ປກສ ກຸ່ມໜອງໜ້ຽວ ສຶກສາ​ອົບຮົມ​ເປົ້າ​ໝາຍມົ້ວ​ສຸມ​ຢາ​ເສບ​ຕິດ

    ​ເມື່ອ​ທ້າຍ​ອາທິດ​ຜ່ານ​ມານີ້, ປກສ ກຸ່ມໜອງໜ້ຽວ ​ເມືອງ ສີ​ໂຄດ​ຕະບອງ ນະຄອນຫລວງ​ວຽງຈັນ ​ໄດ້​ນຳ​ເອົາ​ກຸ່ມ​ມົ້ວ​ສຸມ​ຢາ​ເສບ​ຕິດກວ່າ 10 ຄົນ, ​ມາ​ສຶກສາ​ອົບຮົມ, ​ໂດຍການ​ເຂົ້າ​ຮ່ວມ​ຂອງ​ທ່ານ ພັນ​ຕີ ທອງ​ເວ​ດ ຫອມ​ພວງ​ພັນ ຮອງ​ຫົວໜ້າ ປກສ ກຸ່ມໜອງໜ້ຽວ, ມີ​ທ່ານ ຄຳ​ເຜີຍ ຄົມນາ​ວັນ ຮອງ​ນາຍບ້ານ​ນາ​ເລົ່າ ຜູ້​ຮັບຜິດຊອບ​ວຽກງານ ປກຊ-ປກສ ພ້ອມ​ພາກສ່ວນ​ກ່ຽວຂ້ອງ​ເຂົ້າ​ຮ່ວມ.

     ຮອງ​ຫົວໜ້າ ປກສ ກຸ່ມໜອງໜ້ຽວ ​ໃຫ້​ຮູ້​ວ່າ: ກຸ່ມ​ເປົ້າ​ໝາຍທີ່​ຖືກ​ເຊີນ​ມາ​ສຶກສາ​ອົບຮົມ​​ເທື່ອນີ້ມີ​ທັງໝົດ 15 ຄົນ, ​ເຊິ່ງພວກ​ເຂົາໄດ້​ຮ່ວມ​ກັນ​ມົ້ວ​ສຸມ-​ເສບ​ຢາ​ເສບ​ຕິດ​ປະ​ເພດ​ຢາ​ບ້າ ຢູ່​ຕາມ​ຮ້ານ​ເກ​ມ ຫລື ຮ້ານ ອິນ​ເຕີ​ເນັດ​ຕ່າງໆ​ໃນ​ຕົວ​ເມືອງ, ​ໃນ​ນັ້ນ, ລວມທັງ​ກຸ່ມ​ທີ່​ເຄື່ອນ​ໄຫວ​ພຶດຕິ​ກຳ​ບໍ່ດີສ້າງ​ປະກົດ​ການ​ຫຍໍ້​ທໍ້​ຕ່າງໆ​ໃນສັງຄົມ, ການ​ສຶກສາ​ອົບຮົມ​ນີ້ ເພື່ອ​ ​ໃຫ້​ເຂົາ​ເຈົ້າ​ເຂົ້າ​ໃຈ​ຜົນ​ຮ້າຍ ​ແລະ ຜົນ​ກະທົບ​ຂອງ​ຢາ​ເສບ​ຕິດ, ​ ທີ່ເປັນສານ​ກະ​ຕຸ້ນ​ ລະງັບ​ລະບົບ​ປະສາດ ​ເມື່ອ​ເສບ​ເຂົ້າ​ໄປ​ແລ້ວ​ຈະ​ມີ​ຜົນ​ກະທົບ​ຢ່າງ​ຮຸນ​ແຮງ​ຕໍ່ຮ່າງກາຍ, ຈິດ​ປະສາດ​ ພ້ອມ​ທັງ​ມີ​ຄວາມ​ຕ້ອງການ​ເສບ​ເພີ່ມ​ຂຶ້ນ​ເລື້ອຍໆ.