- advert banner 728 90 728x90 -

ນາຍົກລັດຖະມົນຕີ ທອງລຸນ ສີສຸລິດ ສໍາເລັດການເຂົ້າຮ່ວມກອງປະຊຸມສຸດຍອດອາຊຽນຄັ້ງທີ 34 ທີ່ບາງກອກ

- new3 -

  ທ່ານ ທອງລຸນ ສີສຸລິດ ນາຍົກລັດຖະມົນຕີແຫ່ງ ສປປ ລາວ ພ້ອມດ້ວຍຄະນະ ໄດ້ເຂົ້າຮ່ວມກອງປະຊຸມສຸດຍອດອາຊຽນຄັ້ງທີ 34 ທີ່ບາງກອກ ປະເທດໄທ ໃນລະຫວ່າງວັນທີ 22-23 ມິຖຸນານີ້.

  ກອງປະຊຸມສຸດຍອດອາຊຽນນີ້, ບັນດາຜູ້ນຳອາຊຽນໄດ້ພ້ອມກັນປຶກສາຫາລື ແລະ ແລກປ່ຽນຄຳຄິດຄຳເຫັນ ເພື່ອສືບຕໍ່ສ້າງປະຊາຄົມອາຊຽນໃຫ້ເຂັ້ມແຂງ, ເສດຖະກິດຂະຫຍາຍຕົວໄປຄຽງຄູ່ກັບການພັດທະນາແບບຍືນຍົງ ແລະ ບໍ່ປະປ່ອຍຜູ້ໃດໄວ້ທາງຫລັງ ພາຍໃຕ້ຄຳຂວັນ: “ຮ່ວມແຮງຮ່ວມໃຈ ກ້າວໄກຍືນຍົງ”. ໃນນີ້, ຜູ້ນຳອາຊຽນໄດ້ຕີລາຄາສູງຕໍ່ຄວາມຄືບໜ້າໃນການຈັດຕັ້ງປະຕິບັດວິໄສທັດອາຊຽນຮອດປີ 2025, ຊຶ່ງກວມເອົາ 3 ເສົາຄ້ຳຄື: ການເມືອງ-ຄວາມໝັ້ນຄົງ, ເສດຖະກິດ ແລະ ສັງຄົມ-ວັດທະນະທຳ, ພ້ອມທັງປຶກສາຫາລືກ່ຽວກັບທິດທາງໃນຕໍ່ໜ້າຂອງອາຊຽນ.

  ໃນໂອກາດນີ້, ທ່ານ ທອງລຸນ ສີສຸລິດ ໄດ້ຕີລາຄາສູງກ່ຽວກັບຜົນສຳເລັດຂອງອາຊຽນໃນປີຜ່ານມາ ແລະ ສະເໜີໃຫ້ສືບຕໍ່ຜັນຂະຫຍາຍບັນດາບຸລິມະສິດໃນການສ້າງປະຊາຄົມອາຊຽນເຊັ່ນ: ການຮັດແຄບຄວາມແຕກໂຕນດ້ານການພັດທະນາ, ການເຊື່ອມຈອດອາຊຽນ, ການກະກຽມຄວາມພ້ອມຮອບດ້ານເພື່ອຮອງຮັບຍຸກເສດຖະກິດດີຈີຕອນ, ການປະຕິວັດອຸດສາຫະກຳ 4.0 ແລະ ການພັດທະນາເຄືອຂ່າຍຕົວເມືອງອັດສະລິຍະອາຊຽນ.

   ກອງປະຊຸມໄດ້ຮັບຮອງເອົາ 4 ເອກະສານສຳຄັນຄື: (1) ຖະແຫລງການວິໄສທັດຂອງຜູ້ນຳອາຊຽນວ່າດ້ວຍການເປັນຄູ່ຮ່ວມເພື່ອຄວາມຍືນຍົງ. (2) ຖະແຫລງການບາງກອກວ່າດ້ວຍການສະກັດກັ້ນຂີ້ເຫຍື້ອທະເລໃນພາກພື້ນອາຊຽນ. (3) ຖະແຫລງການຂອງຜູ້ນໍາອາຊຽນວ່າດ້ວຍປີແຫ່ງວັດທະນະທໍາອາຊຽນປີ 2019 ແລະ (4) ແນວຄວາມຄິດອິນໂດ-ປາຊີຟິກຂອງອາຊຽນ, ຊຶ່ງທັງ 4 ເອກະສານນີ້ ຈະເປັນພື້ນຖານໃນການສືບຕໍ່ຮ່ວມມືກັນພາຍໃນອາຊຽນ ແລະ ລະຫວ່າງອາຊຽນກັບຄູ່ເຈລະຈາ ແລະ ຮ່ວມມືພາຍນອກ ເພື່ອເຮັດແນວໃດເຮັດໃຫ້ພາກພື້ນອາຊຽນກາຍເປັນພາກພື້ນແຫ່ງສັນຕິພາບ, ຄວາມໝັ້ນຄົງ ແລະ ວັດທະນາຖາວອນ ແລະ ຮັບຊາບເອກະສານຕ່າງໆອີກ 13 ສະບັບ.

  ໃນວັນທີ 23 ມິຖຸນານີ້, ທ່ານ ທອງລຸນ ສີສຸລິດ ແລະ ຄະນະ ໄດ້ສືບຕໍ່ເຂົ້າຮ່ວມພິທີເປີດກອງປະຊຸມສຸດຍອດອາຊຽນຄັ້ງທີ 34 ຢ່າງເປັນທາງການ ແລະ ເຂົ້າຮ່ວມກອງປະຊຸມສຸດຍອດອາຊຽນຄັ້ງທີ 34 ແບບວົງແຄບ, ໂດຍບັນດາຜູ້ນໍາອາຊຽນໄດ້ປຶກສາຫາລືແລກປ່ຽນທັດສະນະກ່ຽວກັບການພົວພັນຮ່ວມມືອາຊຽນກັບພາຍນອກ, ບັນຫາພົ້ນເດັ່ນຢູ່ພາກພື້ນ ແລະ ສາກົນ. ໃນນີ້, ບັນດາຜູ້ນຳອາຊຽນໄດ້ຕີລາຄາສູງຕໍ່ຜົນສຳເລັດໃນການພົວພັນຮ່ວມມືກັບພາຍນອກໃນໄລຍະຜ່ານມາ ບົນພື້ນຖານຍົກສູງບົດບາດນຳພາ ແລະ ຄວາມເປັນແກນກາງຂອງອາຊຽນ, ໂດຍຜ່ານບັນດາກົນໄກທີ່ອາຊຽນເປັນຜູ້ລິເລີ່ມ. ຕໍ່ບັນຫາພົ້ນເດັ່ນຢູ່ພາກພື້ນ ແລະ ສາກົນ ບັນດາຜູ້ນຳອາຊຽນໄດ້ແລກປ່ຽນຄວາມຄິດເຫັນນຳກັນ ໂດຍສະເພາະສິ່ງທ້າທາຍຮູບແບບໃໝ່ຂ້າມຊາຍແດນເຊັ່ນ: ຄວາມໝັ້ນຄົງທາງໄຊເບີ, ຂ່າວທີ່ບໍ່ມີມູນຄວາມຈິງ, ການກໍ່ການຮ້າຍ ແລະ ອາຊະຍາກຳຂ້າມຊາດ, ໄພພິບັດທຳມະຊາດ, ພະຍາດລະບາດ, ມົນລະພິດສິ່ງແວດລ້ອມ ແລະ ບັນຫາອຶ່ນໆ.

- lattana 1 -

  ໃນຕອນຄໍ່າຂອງວັນດຽວກັນ, ທ່ານ ທອງລຸນ ສີສຸລິດ ໄດ້ເຂົ້າຮ່ວມງານລ້ຽງຈັດໂດຍລັດຖະບານໄທ, ສະຖາບັນຍຸດທະສາດຄິງສະລີຂອງມາເລເຊຍ ແລະ ຫ້ອງການເສດຖະກິດ-ການຄ້າຮົງກົງ ແລະ ຂຶ້ນຮັບລາງວັນກຽດຕິຄຸນ, ຊຶ່ງເປັນລາງວັນສູງສົ່ງໜຶ່ງຂອງອາຊຽນ, ໂດຍຍ້ອງຍໍສະເພາະລະດັບຜູ້ນຳອາຊຽນທີ່ມີຜົນງານດີເດັ່ນໃນການຊີ້ນຳ-ນຳພາການພັດທະນາເສດຖະກິດ-ສັງຄົມຂອງປະເທດຕົນ ແລະ ປະກອບສ່ວນອັນສຳຄັນເຂົ້າໃນການສ້າງປະຊາຄົມອາຊຽນ.    

  ຜ່ານມາ, ບັນດາຜູ້ນຳອາຊຽນທີ່ໄດ້ຮັບລາງວັນກຽດຕິຄຸນນີ້ມີທ່ານ ລີ ກວນ ຢູ (ສິງກະໂປ), ທ່ານ ມາຫາເທຍ ບິນໂມຮາແມັດ (ມາເລເຊຍ), ທ່ານ ຊູຊິໂລ ບຳບັງ (ອິນໂດເນເຊຍ), ທ່ານນາງ ອອງຊານຊູຈີ (ມຽນມາ), ທ່ານ ສົມເດັດ ເຕໂຊ ຮຸນແຊນ (ກຳປູເຈຍ) ແລະ ທ່ານ ໂກຈົກຕົງ (ສິງກະໂປ). ສໍາລັບໃນປີນີ້, ທ່ານ ທອງລຸນ ສີສຸລິດ ນາຍົກລັດຖະມົນຕີແຫ່ງ ສປປ ລາວ ແລະ ທ່ານ ອານັນ ປັນຍາຣະຊຸນ (ອະດີດນາຍົກ ລັດຖະມົນຕີໄທ) ໄດ້ເປັນກຽດຮັບລາງວັນກຽດຕິຄຸນດັ່ງກ່າວ.

   ໃນໄລຍະກອງປະຊຸມສຸດຍອດຄັ້ງນີ້, ບັນດາຜູ້ນຳອາຊຽນຍັງໄດ້ພົບປະກັບສະມັດຊາລັດຖະສະພາອາຊຽນ (AIPA), ສະພາທີ່ປຶກສາທຸລະກິດອາຊຽນ (ASEAN BAC) ແລະ ຊາວໜຸ່ມອາຊຽນ. ບັນດາຜູ້ນຳອາຊຽນ ໄດ້ຕີລາຄາສູງຕໍ່ການປະກອບສ່ວນອັນສຳຄັນເຂົ້າໃນການສ້າງປະຊາຄົມອາຊຽນຂອງ 3 ອົງການຈັດຕັ້ງດັ່ງກ່າວ ແລະ ໄດ້ສະເໜີໃຫ້ສືບຕໍ່.

   ກອງປະຊຸມສຸດຍອດອາຊຽນຄັ້ງທີຕໍ່ໄປຈະຈັດຂຶ້ນໃນລະຫວ່າງວັນທີ 31 ຕຸລາເຖິງ 4 ພະຈິກ 2019

error: Content is protected !!