ລັດພວມຄົ້ນຄວ້ານະໂຍບາຍຫລຸດຄ່າໄຟຟ້າ 50% ສຳລັບຜູ້ມີລາຍໄດ້ຕໍ່າ

- advert banner 728 90 728x90 - ລັດພວມຄົ້ນຄວ້ານະໂຍບາຍຫລຸດຄ່າໄຟຟ້າ 50% ສຳລັບຜູ້ມີລາຍໄດ້ຕໍ່າ

ທ່ານ ຄໍາມະນີ ອິນທິລາດລັດຖະມົນຕີກະຊວງພະລັງງານ ແລະ ບໍ່ແຮ່ ໃຫ້ຮູ້ວ່າ: ປັດຈຸບັນ, ລັດຖະບານກໍາລັງພິຈາລະນາຄົ້ນຄວ້າການປັບປຸງລາຄາໄຟຟ້າໃຫ້ມີລາຄາດຽວ,ພ້ອມທັງຄົ້ນຄວ້ານະໂຍບາຍຫລຸດຄ່າກະແສໄຟຟ້າລົງ50% ສໍາລັບຜູ້ມີລາຍຮັບຕໍ່າ.

- lattana 1 - ລັດພວມຄົ້ນຄວ້ານະໂຍບາຍຫລຸດຄ່າໄຟຟ້າ 50% ສຳລັບຜູ້ມີລາຍໄດ້ຕໍ່າ

ທ່ານລັດຖະມົນຕີກະຊວງດັ່ງກ່າວ ໃຫ້ຮູ້ວ່າ: ການປັບປຸງລາຄາໄຟຟ້າໃຫມ່ນີ້ເພື່ອໃຫ້ສອດຄ່ອງກັບສະພາບການພັດທະນາເສດຖະກິດ-ສັງຄົມ ແລະແທດເຫມາະກັບເປົ້າຫມາຍການຊົມໃຊ້ ແລະ ປະເພດຜູ້ຊົມໃຊ້,ທັງຮັບປະກັນໃຫ້ລາຄາໄຟຟ້າມີສະຖຽນລະພາບ ແລະ ບໍ່ມີຜົນກະທົບຕໍ່ການລົງທຶນໃນການພັດທະນາໄຟຟ້າ ແລະ ໃນກອງປະຊຸມບັນດາຜູ້ແທນໄດ້ເຫັນດີໃຫ້ກໍານົດເອົາປະເພດລາຄາດຽວ, ຊຶ່ງໃນຮູບແບບນີ້ແມ່ນມີນະໂຍບາຍພິເສດຕໍ່ຜູ້ທີ່ມີລາຍຮັບຕ່ໍາຄືຈະຫລຸດລາຄາລົງ 50% ສໍາລັບຜູ້ທີ່ຊົມໃຊ້ໄຟຟ້າແຕ່ 0-50 ກິໂລວັດໂມງ(ຕາມການສະເຫນີຂອງກະຊວງພະລັງງານ ແລະ ບໍ່ແຮ່),ໃນນັ້ນບັນດາຜູ້ແທນໄດ້ສະເຫນີໃຫ້ຄະນະລັດຖະບານພິຈາລະນາຄືນ ໂດຍໃຫ້ກໍານົດແຕ່ 0-150 ກິໂລວັດໂມງເປັນລາຄານະໂຍບາຍ.

ການປັບປຸງໃຫມ່ນີ້ ໄດ້ກໍານົດລາຄາໄຟຟ້າສໍາລັບປະເພດທີ່ຢູ່ອາໄສແມ່ນ 700 ກີບຕໍ່ກິໂລວັດໂມງໃນປີ 2019 ແລະຈະເພີ່ມຂຶ້ນປີລະ 1% ໄປຈົນຮອດປີ 2025, ສໍາລັບປະເພດກະສິກໍາ ແລະ ອຸດສາຫະກໍາ(ປູກຝັງ-ລ້ຽງສັດ) ທີ່ນໍາໃຊ້ໄຟຟ້າແຮງດັນ 0,4 ກິໂລໂວນແມ່ນ 526 ກີບຕໍ່ກິໂລວັດໂມງ,ສໍາໂຮງງານອຸດສາຫະກໍາແລະ ໂຮງງານປຸງແຕ່ງກະສິກໍາທີ່ຕິດພັນກັບການຄ້ໍາປະກັນສະບຽງອາຫານແມ່ນ600 ກີບຕໍ່ກິໂລວັດໂມງ.

ໃນຂະນະດຽວກັນ ລາຄາສໍາລັບທຸລະກິດຂະຫນາດກາງ ແລະນ້ອຍ ແມ່ນຫລຸດລົງຈາກ 779 ກີບເຫລືອ 761 ກີບຕໍ່ກິໂລວັດໂມງ.

ສໍາລັບລາຄາໄຟຟ້າແຮງກາງ 22 ກິໂລໂວນແມ່ນຈະຫລຸດລົງ 12-15% ແລະ ລະບົບ 115 ກິໂລໂວນແມ່ນຈະຫລຸດລົງ 7-16% ອີງຕາມປະເພດຂອງການຊົມໃຊ້. ສໍາລັບໄຟຟ້າທີ່ຂາຍໃຫ້ນິຄົມອຸດສາຫະກໍາ, ເມືອງສະມາດຊີຕີ ທີ່ກໍາລັງສ້າງຕັ້ງ, ເສັ້ນທາງລົດໄຟ ຫລືໂຄງການອື່ນໆທີ່ເປັນອັນພິເສດຂອງລັດຖະບານລາຄາແມ່ນ 620 ກີບຕໍ່ກິໂລວັດໂມງ, ຊຶ່ງລາຄາແຕ່ລະປະເພດແມ່ນຈະເພີ່ມຂຶ້ນປີລະ 1% ຈົນຮອດປີ 2025ຈຶ່ງຈະມີການຄົ້ນຄວ້າຕື່ມອີກ.

ທ່ານ ຄໍາມະນີ ອິນທິລາດກ່າວວ່າ: ການປັບປຸງຄາລາໄຟຟ້າໃຫມ່ນີ້ ສ່ວນໃຫຍ່ແມ່ນຫລຸດລົງ, ແຕ່ມີຈໍານວນຫນຶ່ງຍັງຮັກສາໄວ້ຄືເກົ່າ ເນື່ອງຈາກວ່າເປັນການດໍາເນີນທຸລະກິດທີ່ເຫັນວ່າມີປະສິດທິຜົນຢູ່,ໂດຍຈະມີການປະກາດໃຊ້ໃນໄວໆນີ້.

- 1 1 - ລັດພວມຄົ້ນຄວ້ານະໂຍບາຍຫລຸດຄ່າໄຟຟ້າ 50% ສຳລັບຜູ້ມີລາຍໄດ້ຕໍ່າ
- Tiger Head 728x90 - ລັດພວມຄົ້ນຄວ້ານະໂຍບາຍຫລຸດຄ່າໄຟຟ້າ 50% ສຳລັບຜູ້ມີລາຍໄດ້ຕໍ່າ

ປັດຈຸບັນ, ການຊົມໃຊ້ໄຟຟ້າປະເພດທີ່ຢູ່ອາໃສມີ 6 ຂັ້ນ, ຊຶ່ງແຕ່ລະຂັ້ນມີລາຄາທີ່ແຕກຕ່າງກັນຈາກລາຄາຕ່ໍາສຸດ 348 ກີບຕໍ່ກິໂລໂວນຈົນຮອດ 999 ກີບຕໍ່ກິໂລໂວນ ແລະທົ່ວປະເທດມີແຫລ່ງຜະລິດໄຟຟ້າແລ້ວ 63 ແຫ່ງ ລວມມີກໍາລັງຕິດຕັ້ງກໍາລັງການຜະລິດທັງຫມົດ 7.213 ເມກາວັດ, ສາມາດຜະລິດກະແສໄຟຟ້າໄດ້ປະມານ 37.035 ລ້ານກິໂລວັດໂມງ.

ພ້ອມດຽວກັນນີ້,ກໍຍັງມີແຫລ່ງຜະລິດພະລັງງານໄຟຟ້າທີ່ກໍາລັງກໍ່ສ້າງ ແລະ ກໍາລັງຈະລົງມືກໍ່ສ້າງອີກ 37 ແຫ່ງ, ຊຶ່ງຄາດຄະເນວ່າຈະສໍາເລັດທັງຫມົດໃນປີ 2020-2021 ໃນເວລານັ້ນ ປະເທດລາວຈະມີແຫລ່ງຜະລິດພະລັງງານໄຟຟ້າ 100 ແຫ່ງ, ມີກໍາລັງຕິດຕັ້ງປະມານ 13.062ເມກາວັດ, ໃນນີ້ປະມານ 85%ຈະສົ່ງອອກໄປຈໍາຫນ່າຍຢູ່ຕ່າງປະເທດ.

error: Content is protected !!