ເອົາທີ່ດິນ ພວກເຮົາຄືນມາ

ເອົາທີ່ດິນ ພວກເຮົາຄືນມາ - advert banner 728 90 728x90 - ເອົາທີ່ດິນ ພວກເຮົາຄືນມາ

ໂດຍ: ມຶກບໍ່ແຫ້ງ

ເອົາທີ່ດິນ ພວກເຮົາຄືນມາ - new3 - ເອົາທີ່ດິນ ພວກເຮົາຄືນມາ

ທີ່ດິນແມ່ນຊັບສິນຂອງວົງຄະນາຍາດແຫ່ງຊາດ, ການນຳໃຊ້ທີ່ດິນເພື່ອ ຄອງຊີບຂອງປະຊາຊົນ ແລະຜົນປະໂຫຍດ ລວມຂອງຊາດນັ້ນຖືເປັນເປົ້າໝາຍທີ່ພວກເຮົາຕ້ອງການໄປເຖິງ ແຕ່ໃນລະຫວ່າງທາງນັ້ນ ທີ່ດິນຈຳນວນ ຫຼວງຫຼາຍຕົກໃນກຳມືຂອງກຸ່ມຄົນຈຳນວນໜຶ່ງທີ່ ພວກເຮົາກຳລັງຄິດຫງໍາວ່າ ຈະເອົາຄືນມາ ໄດ້ຈັ່ງໃດ?

ການຮັບຮອງເອົາກົດໝາຍວ່າດ້ວຍທີ່ດິນ (ສະບັບປັບປຸງ) ໃນວາລະການດຳເນີນກອງປະຊຸມສະໄໝສາມັນເທື່ອທີ 7 ຂອງສະມາຊິກ ສະພາຊຸດທີ່ VIII ນັ້ນເປັນບາດກ້າວໃໝ່ ທີ່ຈະເຮັດໃຫ້ບັນດາ ບັນຫາທີ່ດິນຄຸມເຄືອມາຫຼາຍປີ ໄດ້ຮັບແກ້ໄຂ, ເຖິງວ່າ ຍັງມີຫຼາຍຈຸດ ທີ່ພວກເຮົາຈະຕ້ອງສືບຕໍ່ຄຳນຶງຄືນ.

“ປະຊາຊົນ ນັກທຸລະກິດ ຈັບຈອງ ມັ່ນງ່າຍທີ່ຈະເອົາທີ່ດິນຄືນມາ ແຕ່ ອຳນາດຈັບຈອງ ແມ່ນຍາກທີ່ຈະເອົາຄືນ… ແລະໃນກົດໝາຍສະບັບນີ້ ຍັງບໍ່ໄດ້ເວົ້າແຈ້ງ ມາດຕະການ ຕໍ່ຜູ້ລະເມີດ ຜູ້ຈັບຈອງ ຈະເອົາດິນຄືນມາແນວໃດ ໂດຍສະເພາະຜູ້ມີອຳນາດ” ທ່ານ ວິໄລສຸກ ພິມມະສອນ ສະມາຊິກສະພາເຂດ 9​ ແຂວງຊຽງຂວາງ ກ່າວປະກອບຄຳເຫັນ ຕໍ່ຮ່າງກົດໝາຍ ວ່າດ້ວຍທີ່ດິນ ສະບັບປັບປຸງ ໃນວັນທີ 21​ມິຖຸນາ 2019.

ທ່ານ ຍັງກ່າວຕື່ມວ່າ “ອີກອັນໜຶ່ງ ລັດຖະບານວ່າມີຄວາມຈຳເປັນຢາກໄດ້ເງິນມາພັດທະນາປະເທດຊາດ.. ເຫັນດີ ແຕ່ໃນມູມມອງສ່ວນຕົວຂອງຂ້າພະເຈົ້າວ່າ ເອົາໂຕນີ້ມາຮ້ອງຂໍ ບໍ່ຢາກແທດເໝາະ… ຂາຍດິນໃຫ້ຕ່າງປະເທດ”  

ພ້ອມນັ້ນ, ທ່ານ ບົວຄຳ ທິບພະວົງ ສະມາຊິກສະພາແຫ່ງຊາດ ເຂດເລືອກຕັ້ງທີ 1 ນະຄອນຫຼວງວຽງຈັນ ກໍຍັງ ກ່າວຕື່ມວ່າ “ຖ້າຜູ້ໃດຫາກຄອບຄອງໃນຈຳນວນທີ່ເກີນ ກໍ່ແມ່ນຕ້ອງໃຫ້ສົ່ງລັດຖະບານຄືນ, ໂດຍສະເພະ ໃນກໍລະນີທີ່ກ່ຽວພັນກັບຜູ້ທີ່ມີອໍານາດຕ່າງໆ ຖ້າບໍ່ປະຕິບັດໃຫ້ເປັນແບບຢ່າງ ປະຊາຊົນຈະບໍ່ເຮັດນໍາ, ບໍ່ເຊື່ອຖື ແລະ ເສຍຄວາມສັດທາຕໍ່ລະບອບໃໝ່ຂອງພວກເຮົາ”

ທ່ານ ຍັງກ່າວຕື່ມວ່າ “ເພາະໃນໄລຍະຜ່ານມາ ກໍ່ມີຫລາຍຄົນທີ່ໄປຈັບຈອງ ດິນໄວ້ຫລາຍຮ້ອຍເຮັກຕາ ແຕ່ບໍ່ເຮັດຫຍັງເລີຍ. ດັ່ງນັ້ນ ຜູ້ທີ່ມີອໍານາດ ແລະ ຜູ້ທີ່ມີຖານະທາງການເງິນ ຊຶ່ງເຄີຍສ້າງພາບພົດໄວ້ບໍ່ດີ ແລະ ເຮັດໃຫ້ປະຊາຊົນຜູ້ທຸກຍາກຕ້ອງອັບປະໂຫຍດ” (ຄັດຈາກ ວິທະຍຸກະຈາຍສຽງແຫ່ງຊາດ).

ເອົາທີ່ດິນ ພວກເຮົາຄືນມາ - lattana 1 - ເອົາທີ່ດິນ ພວກເຮົາຄືນມາ

ບັນດາ ບັນຫາ ທີ່ສະມາຊິກສະພາ ທີ່ໄດ້ເຈາະຈິ້ມ ແລະປະກອບຄຳເຫັນ ຢ່າງກົງໄປກົງມານັ້ນ ໄດ້ສ່ອງແສງເຖິງ ສະພາບຄວາມຈິງທີ່ເກີດຂຶ້ນ ຢູ່ປະເທດເຮົາ ໂດຍສະເພາະຕໍ່ກັບເລື່ອງທີ່ດິນ, ນອກຈາກ ບັນດາບັນຫາ ທີ່ສະມາຊິກສະພາ ສອງທ່ານ ແລະ ທ່ານອື່ນໆ ທີ່ໄດ້ປະກອບຄຳເຫັນມານັ້ນ ຍັງມີບັນຫາອື່ນໆ ທີ່ກ່ຽວພັນກັບທີ່ດິນ ທີ່ລັດຖະບານເຮົາ ຮັບຮູ້ ແລະ ພະຍາຍາມໃນການແກ້ໄຂເລື້ອຍມາ.

ເນື່ອງຈາກການພັດທະນາແຕ່ລະໄລຍະແມ່ນມີຄວາມແຕກຕ່າງກັນພໍສົມຄວນ, ເຊິ່ງນະໂຍບາຍທີ່ພວກເຮົາ ເຄີຍຈັດຕັ້ງປະຕິບັດມາໃນເມື່ອກ່ອນ ອາດມີອັນທີ່ເໝາະສົມ ແລະບໍ່ເໝາະສົມແດ່, ແລະບາງອັນ ມັນກໍເປັນສາເຫດ ເຮັດໃຫ້ບັນຫາທີ່ດິນຄຸມເຄືອມາຮອດປັດຈຸບັນ ແລະອະນາຄົດ.

ແຕ່ທັງໝົດນັ້ນ ແທນທີ່ພວກເຮົາຈະພະຍາຍາມຖິ້ມໂທດໃສ່ແຕ່ອາດີດ ຈົ່ງຮີບມາເຕົ້າໂຮມກັນ, ເອົາຄວາມຈິງໃຈໃສ່ກັນ ໂດຍຖືເອົາ ກົດໝາຍທີ່ດິນສະບັບປັບປຸງໃໝ່ພວກເຮົານີ້ລະ ມາເປັນບ່ອນອີງໃນການ ແກ້ໄຂບັນຫາທີ່ດິນ ໃຫ້ລຸລ່ວງໄປໄດ້ດ້ວຍດີ.

ພວກເຮົາຕ້ອງກ້າຫານທີ່ຈະເຮັດໃຫ້ ໝົດທຸກຄົນໃນຊາດ ມີຄວາມເທົ່າທຽມກັນ ຕໍ່ໜ້າກົດໝາຍ ຈຶ່ງຈະເຮັດໃຫ້ ທີ່ດິນ ທີ່ສູນເສຍ ຫຼື ຕົກໃນກຳມືຂອງໃຜຜູ້ໜຶ່ງ ຫຼື ຫຼາຍຄົນນັ້ນ ກັບມາເປັນປະໂຫຍດຕໍ່ສ່ວນລວມ, ຕໍ່ປະເທດຊາດ ຈຶ່ງຈະເໝາະສົມກັບຄຳວ່າ ທີ່ດິນ ແມ່ນເປັນຊັບສົມບັດ ຂອງວົງຄະນະຍາຍາດແຫ່ງຊາດ.

error: Content is protected !!