ຄວາມອັນຕະລາຍຂອງກອງທັບປວກ

- advert banner 728 90 728x90 - ຄວາມອັນຕະລາຍຂອງກອງທັບປວກ

ໂດຍ: ລູກເມືອງພວນ

- lattana 1 - ຄວາມອັນຕະລາຍຂອງກອງທັບປວກ

ປວກເປັນປະເພດສັດຕົວນ້ອຍໆ ບໍ່ມີກະດູກສັນຫຼັງ, ອາໄສເຮັດຮັງຢູ່ຕາມພື້ນດິນ, ຄູນດິນຂຶ້ນເພື່ອເປັນບ່ອນຢູ່ ອາໄສ.ປວກເຖິງແມ່ນເປັນຕົວນ້ອຍໆແຕ່ມີຄວາມອັນຕະລາຍທີ່ສຸດຕໍ່ເຄື່ອງປູກຂອງຝັງ, ເຮືອນຊານບ້ານຊ່ອງ ແລະ ສິ່ງຂອງຂອງຄົນເຮົາ. ຖ້າກອງທັບປວກເຂົ້າເຖິງບ່ອນໃດ, ບ່ອນນັ້ນຈະຖືກທໍາລາຍຢ່າງຮາບກ້ຽງ.

ປະເທດລາວເປັນປະເທດທີ່ມີພູມສັນຖານພູສູງ ແລະ ພູພຽງກວມ 2/3 ຂອງເນື້ອທີ່ທັງຫມົດ, ອາກາດປະເທດລາວເປັນອາກາດເ ຂດຮ້ອນຊຶ່ງເຫມາະສົມໃຫ້ກອງທັບປວກດໍາລົງຊີວິດ ແລະ ແຜ່ພັນໄດ້ໄວ. ປວກມີແບບແຜນກັດກິນເຮືອນຊານບ້ານຊ່ອງຢ່າງມີແຜນການ ແລະ ເລິກລັບທີ່ສຸດ,ເພາະມັນກັດກິນແຕ່ເບື້ອງໃນຂອງໄມ້ ໂດຍບໍ່ເປີດເຜີຍໂຕອອກເບື້ອງນອກໃຫ້ເຫັນ.

ກອງທັບປວກມັກກັດກິນແຕ່ເຮືອນທີ່ມີໂຄງສ້າງເປັນໄມ້ທຸກຊະນິດ, ຖ້າເຮັດເຮືອນເປັນໂຄງເຫຼັກ ຫຼື ຊີມັງ ມັນກໍຈະກັດກິນທຶນຮອນທີ່ເອົາມາກໍ່ສ້າງຈົນກ້ຽງ, ໃນທີ່ສຸດໂຄງການຕ່າງໆບໍ່ສໍາເລັດ ຫຼື ຖ້າສໍາເລັດກໍພຽງແຕ່ເປັນໂຄງຮ່າງທີ່ອ່ອນແອ, ເມື່ອມີລົມພັດມາກໍຈະລົ້ມລົງທັນທີ, ໂດຍບໍ່ມີໃຜຮູ້ວ່າມັນລົ້ມຍ້ອນປວກກັດກິນທຶນຮອນຫມົດ, ຄົນສ່ວນຫຼາຍຈະ ເຫັນວ່າສາເຫດເຮືອນລົ້ມແມ່ນຍ້ອນລົມພັດ.ອັນນີ້ແມ່ນວິທີການກິນຂອງກອງທັບປວກ.

ກອງທັບປວກດຽວນີ້ບໍ່ໄດ້ເຮັດເຮືອນຮັງຢູ່ຕາມພື້ນດິນອີກ, ຫາກເຮັດເຮືອນຮັງຢູ່ຕາມໂຄງການຕ່າງໆເຊັ່ນ: ໂຄງການກໍ່ສ້າງເສັ້ນທາງ, ໂຄງການເຂື່ອນໄຟຟ້າ, ໂຄງການ ກໍ່ສ້າງອາຄານສະຖານທີ່ໃຫຍ່ໆ, ໂຄງການພັດທະນາໂຄງລ່າງເສດຖະກິດຕ່າງໆ ໃນທົ່ວປະເທດ. ອັນໄດ້ເຮັດໃຫ້ການພັດທະນາບ້ານເມືອງມີຄວາມຫຼ້າຊ້າ ແລະ ຢຸດສະ ຫງັກງັນ, ຫນີ້ສິນຢູ່ຂັ້ນເຕືອນໄພ. ປະເທດລາວຢູ່ຂັ້ນວິກິດການໃນການພັດທະນາ ແລະ ຫນີ້ສິນ. ປັດຈຸບັນກອງທັບປວກປະເທດລາວມັນລີ້ຊ່ອນຢູ່ຕາມສໍານັກງານ, ອົງການຕ່າງໆຂອງພາກລັດຖະບານ ນັບແຕ່ເທິງລົງລຸ່ມ.

ກອງທັບປວກໄດ້ແຜ່ຂະຫຍາຍ ແລະ ແຜ່ພັນມາໄດ້ຫຼາຍສິບປີແລ້ວ, ຈົນລະບາດຫນັກຈຶ່ງຮູ້ເມື່ອວ່າປະເທດຊາດຈະຫຼົ້ມຈົມ, ຈຶ່ງຕື່ນມາສີຕາຕັ້ງໃຈຊິຂ້າປວກ ແຕ່ມັນຫຼ້າສວາຍເກີນໄປແລ້ວ.ການທີ່ຈະປາບກອງທັບປວກເປັນເລື່ອງທີ່ບໍ່ງ່າຍດາຍເພາະຍັງມີແມ່ທັບຂອງມັນທີ່ຍັງບໍ່ທັນຖືກລົງໂທດ ຫຼື ຂ້າຕາຍ, ສ່ວນລູກຂອງພວກມັນກໍພ້ອມກັນມິດງຽບຢູ່, ຊອມຟັງໂອກາດ ຖ້າມີໂອກາດກໍງໍຫົວຂຶ້ນມາກັດກິນພໍມີອັນຮອງທ້ອງ.

- 1 1 - ຄວາມອັນຕະລາຍຂອງກອງທັບປວກ
- Tiger Head 728x90 - ຄວາມອັນຕະລາຍຂອງກອງທັບປວກ

ຄວາມບູຮານລາວເວົ້າວ່າ: ມອດໄຟຕ້ອງມອດຕົ້ນລົມ. ຄວາມຫມາຍນີ້ກໍຄືວ່າ:ຢາກດັບມອດກອງທັບປວກກໍຕ້ອງດັບມອດແມ່ໂປ່ຂອງມັນກ່ອນ ແລ້ວຈຶ່ງຂ້າຝູງລູກ ຂອງມັນ. ໂດຍຖອກນໍ້າມັນລວກແລ້ວຈູດໄຟຂຶ້ນ, ໂດຍໃຊ້ຢາຂ້າປວກຖອກໃສ່ຮັງຂອງມັນໃຫ້ດັບຫມົດທັງຮັງ.ເຖິງເວລາແລ້ວທີ່ພວກເຮົາຈະພ້ອມຈິດພ້ອມໃຈຂ້າກອງທັບປວກໃຫ້ຫມົດໄປຈາກປະເທດລາວ, ເພື່ອໃຫ້ປະເທດລາວງໍຫົວຂຶ້ນໄດ້, ມືນຕາເຫັນໂລກທີ່ກວ້າງໃຫຍ່. ປະຊາຊົນຕາດໍາໆ ມີສິດເສລີພາບ. ປົດປ່ອຍຄໍາວ່າ: ໄຫໃຫຍ່ລົ້ນ,ໄຫນ້ອຍບໍ່ເຕັມ.

————————

error: Content is protected !!