​ເງິນ​ກີບ​ເຟີ້ຍ້ອນ​ພວກ​ເຮົາ​ເຜີ​ທັງ​ພາກັນ​ເຫີ່

- advert banner 728 90 728x90 - ​ເງິນ​ກີບ​ເຟີ້ຍ້ອນ​ພວກ​ເຮົາ​ເຜີ​ທັງ​ພາກັນ​ເຫີ່

ໂດຍ: ທິດກ່ຳ

- lattana 1 - ​ເງິນ​ກີບ​ເຟີ້ຍ້ອນ​ພວກ​ເຮົາ​ເຜີ​ທັງ​ພາກັນ​ເຫີ່

ມາ​ເຖິງ​ທຸກ​ວັນ​ນີ້ ​ເຮົາ​ເຫັນ​ວ່າ​ເງິນ​ບາດ​ (ສະກຸນເງິນໄທ) ມັນ​ນັບ​ມື້​ແຂງຄ່າ​ຂຶ້ນ​ໄປ​ຕິກໆ, ​ແຕ່​ສະ​ໄໝ​ກ່ອນໆເຖິງ​ວ່າ​ມັນ​ຫລຸດ​ລື່ນ​ກັນ ​ແຕ່​ເມື່ອ​ປຽບທຽບ​ໃສ່​ອັດຕາ​ແລກປ່ຽນ​ເງິນ​ບາດ​ກັບ​ເງິນ​ກີບ ​ມັນ​ກໍ​ບໍ່​ໂຕນ​ກັນ​ຫລາຍ​ພໍ​ເທົ່າ​ໃດ.

​  ໃນ​ຫລາຍ​ທົດ​ສະ​ວັດ​ຜ່ານ​ມາ, ​ເກືອບ​ຮ້ອຍ​​ເປີ​ເຊັນ (100%) ສິນຄ້າ​ປະ​ເພດ​​ອຸປະ​ໂພ​ກ-ບໍລິ​ໂພ​ກທຸກ​ຢ່າງ​ ແມ່ນ​ນຳ​ເຂົ້າຈາກ​ປະເທດໄທ​ອ້ອຍ​ຕ້ອຍ ແຕ່​ກໍ​ເຫັນ​ວ່າ​ຄຸນຄ່າ​ຂອງ​ເງິນ​ກີບ​ກັບ​ເງິນ​ບາດ​ກໍ​ບໍ່​ໄດ້​ຫລຸດລື່ນ​ຜິດ​ດ່ຽງ​ກັນ​ຈົນ​ເກີນ​ໄປ​ ຫລື​ຖ້າ​ຈະ​ປຽບທຽບ​ກໍ​ເໝືອນ​ໄຂ່​ເປັດ​ກັບ​ໄຂ່​​ໄກ່.

  ຕົກ​ມາ​ໃນ​ຍຸກ​ເສດຖະກິດ​ຕະຫລາດ​ຄື​ປັດຈຸບັນ ​ເຮົາ​ເຫັນ​ວ່າ​ເງິນ​ບາດ​ໄດ້​ຕີ​ຖອຍ​ເງິນ​ກີບ​ໄປ​ເລື້ອຍໆ ຍ້ອນ​ວ່າ​ມາ​ຮອດດຽວ​ນີ້ ​ອັດຕາ​ແລກປ່ຽນ​ລະຫວ່າງ​ເງິນ​ກີບ​ກັບ​ເງິນ​ບາດ​ແມ່ນ​ເກືອບ 30.000 ກີບ​ຕໍ່ 100 ບາດ​ໄທ​ແລ້ວ. ​ເມື່ອ​ຕັ້ງ​ໂຈດ​ກັນ​ວ່າເປັນຫຍັງ​ເງິນ​ບາດ​ຈຶ່ງ​ນັບ​ມື້​ແຂງ​ຄ່າຂຶ້ນ? ຄຳ​ຕອບ​ກໍ​ມີ​ຫລາຍ​ປັດ​ໄຈ ​ແລະ ຫລາຍ​ເຫດຜົນ​ເຊັ່ນ: ຖ້າ​ຕອບ​ແບບ​ກວມ​ລວມກໍ​ແມ່ນ​ຍ້ອນ​ເສດຖະກິດ​ໂລກ​ມີ​ການ​ຜັນ​ຜວນ.

   ບັນຫາ​ໃຫຍ່ໆ​ກໍ​ແມ່ນ​ຈີນ​ກັບ​ອາ​ເມ​ລິ​ກາພວມ​ເຮັດ​ເສີກ​ການ​ຄ້າ, ​ໃຜ​ບໍ່​ຍອມ​ໃຜ? ​ໃຜ​ກໍ​ວ່າ​ໃຜ​ເກັ່ງ ​ສຸດ​ທ້າຍ​ມັນ​ກໍ​ສະທ້ອນ​ໄປ​ຮອດ​ກົ້ນຂີ້ມັ່ງ, ມັ່ງ​ບໍ່​ຂີ້ສາມມື້ກະຕ່າຍ​ຕາຍ ນີ້​ລະ​ເຂົາ​ເອີ້ນວ່າ​ມັນ​ເກີດ​ຈາກ​ປັດ​ໄຈ​ພາຍ​ນອກ ​ແລະ ຍັງ​ມີ​ປັດ​ໄຈ​ພາວະ​ວິ​ໄສອື່ນໆ​ມາ​ກະທົບ​ເປັນ​ສາຍ​ໃຍ​ຕ່ອງ​ໂສ້​ເກາະ​ກ່າຍ​ກັນ​ໄປ​ປານ​ເຈັກ​ຂາຍ​ລວດ.

​   ແນວ​ໃດ​ກໍ​ຕາມ, ສຳລັບ​ເຫດຜົນ​ທາງ​ດ້ານ​ອັດຕະວິ​ໄສ ​ເຊິ່ງ​ເຂົາ​ເອີ້ນວ່າ​ປັດ​ໄຈ​ພາຍ​ໃນ​ທີ່​ມາ​ກະທົບ​ນັ້ນກໍ​ມີ​ຫລາຍ​ຢ່າງ​ເໝືອນ​ກັນ​ເຊັ່ນ​ວ່າ: ບັນຫາ​ໃຫຍ່ໆ ​ແມ່ນ​ເສດຖະກິດຂອງ​ລາວ​ເຮົາ​ຍັງ​ບໍ່​ທັນ​ມັ່ງ​ຄັ່ງ​ເຂັ້ມ​ແຂງ, ຂາ​ເຂົ້າຫລາຍ​ກວ່າ​ຂາ​ອອກ, ຕົວ​ເລກ​ການ​ຂາດດູນ​ຍັງ​ມີ​ສູງ, ຍອດ​ຜະລິດ​ຕະພັນ​ຕໍ່​ຫົວ​ຄົນ​ປັດຈຸບັນ​ໄທ​ໄດ້ 20.000 ​ໂດ​ລາ​ສະຫະລັດ​ຕໍ່​ຄົນຕໍ່ປີ, ສ່ວນ​ລາວ​ເຮົາ​ໄດ້​ພຽງ 2.500 ​ໂດ​ລາ​ສະຫະລັດ​ຕໍ່​ຄົນ​ເທົ່າ​ນັ້ນ, ​ເມື່ອ​ປຽບທຽບ​ຕົວ​ເລກ​ນີ້​ເຮົາ​ກໍ​ຮູ້​ເປັນອັນ​ຈະ​ແຈ້ງ​ແລ້ວ.

  ນອກ​ນັ້ນ, ປະ​ເທດ​ເຮົາ​​ຍັງ​ຕົກ​ຢູ່​ໃນ​ຊາຕາກຳ​ເປັນ​ປະ​ເທດ​ທີ່​ທຸກ​ຍາກ ​ແລະ ດ້ອຍ​ພັດທະນາ​ປະ​ເທດ​ໜຶ່ງ​ໃນ​ໂລກ, ຈາກ​ສະພາບ​ເງື່ອນ​ໄຂ​ທີ່​ກ່າວ​ມາ​ນີ້​ແລ້ວ ພວກ​ເຮົາ​ຍັງ​ຂາດ​ປັດ​ໄຈ​ອື່ນໆ​ອີກ​ຫລາຍ​ດ້ານ ​ທີ່​ເຮັດ​ໃຫ້​ຄຸນຄ່າ​ເງິນ​ກີບ​ຕົກ​ຕ່ຳ​ໄປ​ເລື້ອຍໆ.

  ຕາມ​ທິດ​ກ່ຳ​ວ່າບັນດາ​ປັດ​ໄຈທີ່​ວ່າ​ນີ້ ​ກໍ​ແມ່ນ​ເນື່ອງ​ມາ​ຈາກ​ພວກ​ເຮົາ​ເຜີ​ ແລະ ທັງ​ພາກັນ​ເຫີ່​ນຳ​ເງິນ​ບາດ, ​ເງິນ​ໂດ​ລາ ​ຈຶ່ງ​ເຮັດ​ໃຫ້​ເງິນ​ກີບ​ເຟີ້ ​ແລະ ຕົກ​ຕ່ຳ, ສິ່ງ​ທີ່​ໜ້າ​ເປັນ​ຫວ່ງ ​ແລະ ຕົກ​ໃຈນັ້ນ ພວກ​ເຮົາ​ພາກັນຫລຸດ​ຄ່າ​ນິຍົມ​ເງິນ​ກີບ​ໂດຍ​ຫັນ​ໄປ​ໃຊ້​ເງິນ​ບາດ, ​ເງິນ​ໂດ​ລາ ​ໃນ​ການ​ຊື້-ຂາຍ​ດັ່ງ​ທີ່​ເຫັນ​ໃນ​ສະພາບ​ປັດຈຸບັນ.

- 1 1 - ​ເງິນ​ກີບ​ເຟີ້ຍ້ອນ​ພວກ​ເຮົາ​ເຜີ​ທັງ​ພາກັນ​ເຫີ່
- Tiger Head 728x90 - ​ເງິນ​ກີບ​ເຟີ້ຍ້ອນ​ພວກ​ເຮົາ​ເຜີ​ທັງ​ພາກັນ​ເຫີ່

  ​ກ່າວ​ເຖິງ​ຕົວ​ເລກ​ຕົວ​ຜາລາ​ຍ​ໃຫຍ່ໆ, ການ​ຄ້າ​ການ​ຂາຍ​ລາຍ​ໃຫຍ່ໆ​ ກໍ​ພາກັນ​ເວົ້າ​ເປັນ​ເງິນ​ບາດ, ​ເງິນ​ໂດ​ລາ, ຂາຍ​ລົດ, ຂາຍລໍ້, ຂາຍ​ດິນ​ດອນ​ຕອນ​ຫຍ້າ​ກໍ​ວ່າ​ເປັນ​ເງິນ​ບາດ​ເປັນ​ໂດ​ລາ, ຄ່າ​ແກ່ວ​ສິນ​ດອງ​ກໍ​ຄາດກະ​ເປັນ​ບາດ​ເປັນ​​ໂດ​ລາ, ຂາຍ​ງົວ, ຂາຍ​ຄວາຍ, ຕະຫລອດ​ຂາຍ​ເປັດ, ຂາຍ​ໄກ່ ກໍ​ວ່າ​ເທົ່າ​ນັ້ນບາດເທົ່າ​ນີ້​ບາດ​ ເອົາ​ໄປ​​ເອົາ​ມາ​ໃນ​ວົງ​ສັງຄົມ​ລາວ​ທົ່ວ​ປະ​ເທດ​ໂດຍ​ລວມ ກໍ​ພາກັນ​ມັກ​ໃຊ້ ​ແຕ່​ເງິນ​ບາດ ແລະ ເງິນ​ໂດ​ລາ. ພວກ​ເຈົ້າພວກ​ນາຍ​ທັງຫລາຍ​ເວົ້າ​ເຖິງ​ສິນ​ຈ້າງ​ລາງວັນ, ຄ່າ​ລາຍ​ເຊັນ, ​ເງິນ​ກ້ອງ​ໂຕະ ​ເວົ້າ​ເຖິງ​ເງິນ​ກີບ​ເພິ່ນພັດ​ບໍ່​ຫ້າວ, ​ແຕ່​ຖ້າ​ເປັນ​ເງິນ​ບາດ, ​ເງິນ​ໂດ​ລາ ​ເພິ່ນ​ພັດສາວ​ໃສ່​ວັບໆ, ຂະໜາດ​ໝໍພອນ​ ເວລາ​ຈະ​ຜູກ​ແຂນ​ໃຫ້​ຄູ່​ສົມລົດ​ໃໝ່​ເພິ່ນຍັງ​ວ່າ​ຮ້າຍ​ກວາດ​ໜີ, ດີກ​ວາດ​ເຂົ້າ, ​ເງິນ​ບາດ​ໃຫ້​ໄຫລ​ມາ, ​ເງິນ​ໂດ​ລາ​ໄຫລ​ເຂົ້າຂວັນ​ເຈົ້າຈຶ່ງ​ມາ​ໂຮມ ວ່າ​ຊັ້ນ!.

  ອັນ​ໂຕ​ສຳຄັນ​ອີກ​ອັນ​ໜຶ່ງ​ ກໍ​ແມ່ນ​ການ​ຜະລິດ​ສິນຄ້າ​ຂະໜາດ​ນ້ອຍ, ຂະໜາດ​ກາງ ​ຢູ່​ບ້ານ​ເຮົາ​ບໍ່​ທັນ​ເຂັ້ມ​ແຂງ, ລາຍ​ໄດ້​ຂອງ​ປະຊາຊົນ​ບັນດາ​ເຜົ່າ​ຍັງ​ຕ່ຳ, ການ​ຜະລິດ​ສິນຄ້າ​ເພື່ອ​ສົ່ງ​ອອກ​ບໍ່​ທັນ​ຫລາກ​ຫລາຍກວ້າງຂວາງ, ອາ​ໄສ​ການ​ຂາຍ​ຜະລິດ​ຕະພັນ​ດ້ານ​ອຸດ​ສາຫະ​ກຳ​ສ່ວນ​ໃຫຍ່​ຍັງ​ເປັນ​ກຳມະສິດ​ຂອງ​ເອກະ​ຊົນ​ຜູ້​ລົງທຶນ, ການ​ເກັບ​ພາສີ​ອາກອນ​ລາຍ​ໄດ້​ຕ່າງໆ, ນັບ​ທັງ​ພາສີ​ທີ່​ດິນ​ໃນ​ແຕ່ລະ​ປີ​ບໍ່​ໄດ້​ຕາມການ​ຄາດໝາຍ.

  ນອກ​ນັ້ນ, ການ​ຊົມ​ໃຊ້​ສິນຄ້າ​ຂອງ​ຄົນ​ລາວ​ເຮົາ​ຈຳນວນ​ບໍ່​ໜ້ອຍ​​ເຫີ່​ໄປ​ຊື້ຢູ່​ໄທ​ທັງໆທີ່​ສິນຄ້າ​ຫລາຍ​ປະ​ເພດ​ກໍ​ມີ​ຈຳໜ່າຍ​ຢູ່​ລາວ, ​ໃນ​ແຕ່​ລະ​ວັນ​ໂດຍ​ສະ​ເພາະ​ວັນ​ເສົາ-ວັນ​ອາທິດ ຄົນ​ລາວ​ເຮົາ​ເຫີ່​ໄປ​ລົງ​ຕະຫລາດ​ຈັບ​ຈ່າ​ຍຢູ່​ໄທ​ໃນ​ແຕ່ລະ​ແຂວງ​ຊາຍ​ແດນ​ ແຕ່​ເໜືອ​ຈົນ​ສຸດ​ໃຕ້.

   ສະຫລຸບ​ແລ້ວ, ​ເງິນ​ກີບ​ເຟີ້ກໍ​ຍ້ອນ​ພວກ​ເຮົາ​ເຜີ​ທັງ​ພາກັນ​ເຫີ່​ປະ​ເງິນ​ກີບ​ຫັນ​ໄປ​ນິຍົມ​ຊົມ​ໃຊ້​ເງິນ​ບາດ, ​ເງິນ​ໂດ​ລາ​ຂອງ​ປະ​ເທດ​ອື່ນນັ້ນ​ເອງ.

- 527 - ​ເງິນ​ກີບ​ເຟີ້ຍ້ອນ​ພວກ​ເຮົາ​ເຜີ​ທັງ​ພາກັນ​ເຫີ່
(ພາບປະກອບ)
error: Content is protected !!