ໂຮງໝໍມິດຕະພາບ 150 ຕຽງ ເປັນເຈົ້າການປິ່ນປົວຜູ້ເປັນໄຂ້ຍຸງລາຍ
ໃນວັນທີ 11 ກໍລະກົດນີ້, ທ່ານ ນາງ ມະນີຈັນ ທອງຊະນະ ຫົວໜ້າພະແນກຊຶມເຊື້ອ ໂຮງໝໍມິດຕະພາບ 150 ຕຽງ ໄດ້ໃຫ້ສໍາພາດຕໍ່ນັກຂ່າວ ລາວພັດທະນາ ວ່າ: ນັບແຕ່ຕົ້ນປີມານີ້ຜູ້ຕິດເຊື້ອພະຍາດໄຂ້ຍຸງລາຍເຂົ້າມາປິ່ນປົວຢູ່ໂຮງໝໍແຫ່ງນີ້ຫລາຍກວ່າ 2.500 ກໍລະນີ ແລະ ເຫັນວ່າມີທ່າອ່ຽງເພີ່ມຂຶ້ນຫລາຍ. ແຕ່ທາງໂຮງໝໍກໍໄດ້ກຽມພ້ອມຮັບມືກັບສະພາບດັ່ງກ່າວນັບແຕ່ດ້ານສະຖານທີ່, ບຸກຄະລາກອນ, ອຸປະກອນການແພດ, ຢາປິ່ນປົວພະຍາດ ແລະ ອື່ນໆ ເພື່ອເຮັດແນວໃດໃຫ້ຜູ້ຕິດເຊື້ອພະຍາດດັ່ງກ່າວໄດ້ຮັບການຢ່າງມີປະສິດທິ ພາບ ແລະ ປອດໄພ. ເຖິງວ່າທາງໂຮງໝໍຍັງມີຂໍ້ຫຍຸງຍາກຫລາຍຢ່າງ ໂດຍສະເພາະແມ່ນສະຖານທີ່ຂອງພະແນກຊຶມເຊື້ອ ຄັບແຄບມີຕຽງນອນພຽງແຕ່ 15 ຕຽງ, ເຊິ່ງວ່າແຕ່ຈໍານວນຄົນເຈັບເພີ່ມຂຶ້ນຫລາຍ, ດັ່ງນັ້ນທາງໂຮງໝໍໄດ້ແບ່ງ ຫ້ອງປະຊຸມ ເພື່ອເພີ່ມຕຽງໄມ້ເສີມຕື່ມອີກຈໍານວນ 28 ຕຽງ ໃຫ້ສາມາດ ຮັບຮອງຄົນເຈັບໄດ້ຫລາຍຂຶ້ນ.
ທ່ານຫົວໜ້າພະແນກຊຶມເຊື້ອໃຫ້ຮູ້ຕື່ມວ່າ: ພາຍຫລັງເກີດການລະບາດ
ພະຍາດດັ່ງກ່າວ, ທາງແພດໝໍກໍໄດ້ເພີ່ມທະວີຄວາມເອົາໃຈໃສ່ປະຕິບັດໜ້າທີ່ຂອງຕົນຢ່າງບໍ່ຮູ້ອິດຮູ້ເມື່ອຍ
ແລະ ເຝົ້າລະວັງຕິດຕາມອາການຄົນເຈັບຕະຫລອດ 24 ຊົ່ວໂມງ ແລະ
ທັງຮຽກຮ້ອງໃຫ້ພ້ອມກັນເອົາໃຈໃສ່ປະຕິບັດ
ຫລັກການ 5 ປ ຢ່າງເຂັ້ມງວດຄື: 1). ປິດຝາພາຊະນະເກັບນໍ້າໃຫ້ດີ ເພື່ອບໍ່ໃຫ້ຍຸງລາຍມາ ໄຂ່ໃສ່; 2). ປ່ຽນນໍ້າ ແລະ ຜັດຖູພະຊະນະເຊັ່ນ: ເຕົ້າດອກໄມ້,
ນໍ້າຮອງຕີນຕູ້, ຖານຮອງຈອກນໍ້າ ແລະ ອື່ນໆ;
3). ປ່ອຍປາຫາງນົກຍຸງ ເພື່ອກິນໜອນນໍ້າ; 4). ປັບປຸງບໍ່ໃຫ້ມີນໍ້າຄ້າງຂັງກະໂປະ,
ກະປ່ອງ, ຮາງລິນ, ຢາງຕີນລົດເກົ່າ
ແລະ ອື່ນໆ; 5). ປະຕິບັດເປັນປະຈໍາທຸກໆອາທິດ ແລະ ຖ້າເປັນໄຂ້ໃຫ້ໄປປິ່ນປົວຢູ່ໂຮງໝໍຫລືສຸກສາລາຕ່າງໆ.
