ປະເທດສະອາດ ຈຶ່ງສາມາດດຶງນັກທ່ອງທ່ຽວ

ປະເທດສະອາດ ຈຶ່ງສາມາດດຶງນັກທ່ອງທ່ຽວ - advert banner 728 90 728x90 - ປະເທດສະອາດ ຈຶ່ງສາມາດດຶງນັກທ່ອງທ່ຽວ

ໂດຍ: ມຶກບໍ່ແຫ້ງ

ປະເທດສະອາດ ຈຶ່ງສາມາດດຶງນັກທ່ອງທ່ຽວ - new3 - ປະເທດສະອາດ ຈຶ່ງສາມາດດຶງນັກທ່ອງທ່ຽວ

ບໍ່ວ່າປະເທດໃດກໍຕາມທີ່ເຮົາໄປທ່ຽວ ກໍຈະນຶກເຖິງຄວາມສະອາດ ເປັນເລື່ອງສຳຄັນ ເຊັ່ນດຽວກັນນັ້ນ, ຖ້າພວກເຮົາ ຢາກດຶງ ນັກທ່ອງທ່ຽວເຂົ້າມາປະເທດ ຈະຄຳນຶງເຖິງຄວາມສະອາດແນວໃດ.

ການທີ່ຈະເຮັດໃຫ້ປະເທດສະອາດງາມຕານັ້ນ ກໍມີຫຼາຍອົງປະກອບ ແຕ່ໃນບົດນີ້ ຜູ້ຂຽນຂໍແລກປ່ຽນ ກ່ຽວກັບ ການກຳຈັດຂີ້ເຫຍື້ອ ໂດຍສະເພາະພວກທີ່ເປັນ ຖົງປລາສຕິກເຊິ່ງອາດບໍ່ເປັນເລື່ອງໃໝ່ພໍເທົ່າໃດແຕ່ຍັງເປັນສິ່ງໜັກໃຈບໍ່ໜ້ອຍ ໂດຍສະເພາະຕິດພັນກັບວຽກງານການທ່ອງທ່ຽວ.

ການນຳໃຊ້ຖົງຢາງປລາສຕິກຍັງແຜ່ຫຼາຍທີ່ສຸດໃນ ສປປລາວ ແຕ່ ການຈັດການກັບຖົງຢາງທີ່ນຳໃຊ້ເຊິ່ງໃຊ້ເວລາເປັນຮ້ອຍໆປີຈຶ່ງຈະຍ່ອຍສະຫຼາຍນັ້ນ ພວກເຮົາຍັງເຮັດບໍ່ໄດ້ດີເທົ່າທີ່ຄວນ, ເປັນເລື່ອງທີ່ຫຼາຍຄົນລຶ້ງແລ້ວແຕ່ບໍ່ປະເອີບໃຈ ທີ່ເຫັນການຖິ້ມຂີ້ເຫຍື້ອຊະຊາຍຕາມແຄມທາງ, ຕາມສາຍນໍ້າ, ຄອງນໍ້າ ຕ່າງໆ ເຊິ່ງ ແຂກຕ່າງດ້າວ ທ້າວຕ່າງແດນ ສາມາດເຫັນໄດ້ງ່າຍໆ.

ເດືອນກ່ອນຜູ້ຂຽນໄດ້ໄປປະຊຸມຢູ່ວັງວຽງ ຂາກັບເຂົ້າມານະຄອນຫຼວງວຽງຈັນ ພໍດີໄດ້ຂີ່ລົດຕູ້ໂດຍສານທີ່ມີນັກທ່ອງທ່ຽວມາແຕ່ເອີຣົບທ່ານໜຶ່ງນັ່ງມານໍາ, ເມື່ອມີໂອກາດ ກໍໄດ້ຖາມເພິ່ນວ່າເປັນແນວໃດມາທ່ຽວລາວກໍມ່ວນຢູ່ບໍ່? ມີຫຍັງປະທັບໃຈ? ຄຳຕອບທີ່ເພິ່ນຍ້ອງຍໍເຮົານັ້ນກໍມີຫຼາຍໂດຍສະເພາະເລື່ອງທິວທັດທຳມະຊາດ, ວັດທະນະທຳ ຕ່າງໆແຕ່ສິ່ງຜູ້ຂຽນສະດຸດໃຈ ແລະຄິດອາຍໃຈບໍ່ແມ່ນໜ້ອຍ ເມື່ອເພິ່ນເວົ້າວ່າ“ເລື່ອງທຳມະຊາດກໍງາມຢູ່ແຕ່ກໍບໍ່ແນ່ໃນອະນາຄົດຖ້າຄົນລາວຍັງຖິ້ມຂີ້ເຫຍື້ອໃສ່ຕາມ ແມ່ນໍ້າຕ່າງໆຢູ່”

ເວົ້າມາຮອດນີ້ ຜູ້ຂຽນກໍປາກບໍ່ອອກ ເພາະໄດ້ຄິດເຫັນພາບ ທີ່ຕອນໄປຍາງເລາະແຄມຂອງໃນເມືອງຫຼວງພະບາງທີ່ແນມລົງໄປຕາມແຄມນໍ້າ ຍັງເຫັນກອງຂີ້ເຫຍື້ອເປັນປະເພດຖົງຢາງ, ກວດປລາສຕິກທີ່ກອງເດຍລະດາດ ກັນ ເຊິ່ງໃກ້ໆນັ້ນກໍມີຮ້ານອາຫານທີ່ກຳລັງເສີບໃຫ້ ນັກທ່ອງທ່ຽວຕ່າງປະເທດ ເກືອບເຕັມຮ້ານ. ສິ່ງດັ່ງກ່າວເຮັດໃຫ້ຜູ້ຂຽນຮູ້ສຶກຜິດຄວາມຄາດຫວັງພໍສົມຄວນ ເພາະບໍ່ນຶກວ່າເມືອງງາມ ແລະມີຊື່ສຽງຂະໜາດນີ້ ຍັງມີ ກອງ ຂີ້ເຫຍື້ອ ທີ່ບໍ່ອາດຄາດສາຍຕາຂອງນັກທ່ອງທ່ຽວແນ່ນອນເພາະສິ່ງສຳຄັນເມື່ອໄປທ່ຽວໃຜກໍບໍ່ຄາດຫວັງຈະເຫັນເລື່ອງເປິະເປື້ອນຄືແນວນັ້ນ.

ປະເທດສະອາດ ຈຶ່ງສາມາດດຶງນັກທ່ອງທ່ຽວ - lattana 1 - ປະເທດສະອາດ ຈຶ່ງສາມາດດຶງນັກທ່ອງທ່ຽວ

ພວກເຮົາຮູ້ດີວ່າການກຳຈັດຂີ້ເຫຍື້ອນັ້ນແມ່ນເປັນເລື່ອງທີ່ເວົ້າກັນມາດົນຈົນຫຼາຍຄົນຮອດບໍ່ຢາກຟັງອີກແລ້ວ. ໃນຄວາມເປັນຈິງພາກສ່ວນກ່ຽວຂ້ອງ ໂດຍສະເພາະ ໜ່ວຍງານບໍລິຫານຕົວເມືອງ ແລະພາກສ່ວນອື່ນໆ ກໍໄດ້ພະຍາຍາມ ໃນການປຸກລະດົມປະຊາຊົນອະນາໄມໂດຍສະເພາະວັນເສົາແດງ ແລະ ຂະບວນການອື່ນໆ ແຕ່ເຖິງປານນັ້ນການຖິ້ມຂີ້ເຫຍື້ອຊະຊາຍກໍຍັງມີໃຫ້ເຫັນ.

ພວກເຮົາລອງຄິດຄືກັນກັບປະເທດ ຣະວັນດາ (Rwanda) ເບິ່ງບໍ? ປະເທດນີ້ ຕັ້ງຢູ່ທາງພາກຕາເວັນອອກ ຂອງ ທະວີບ ອາຟຣິກາ, ເປັນປະເທດ ບໍ່ມີຊາຍແດນຕິດຈອດກັບທະເລ ຄືເຮົາ ແລະ ເຂົາເຈົ້າບໍ່ແມ່ນວ່າຈະຮັ່ງກວ່າເຮົາກະດໍ້ ຖ້າເວົ້າເລື່ອງເສດຖະກິດ ແຕ່ປະເທດນີ້ໄດ້ປະກາດຫ້າມໃຊ້ ປລາສຕິກມາແຕ່ປີ 2008, ມາຮອດດຽວນີ້ປະເທດດັ່ງກ່າວໄດ້ຮັບການຍ້ອງຍໍຈາກສາກົນຢ່າງກວ້າງຂວາງ ແລະ ສິ່ງໜຶ່ງທີ່ອົງການຄຸ້ມຄອງສິ່ງແວດລ້ອມຂອງປະເທດ ຣະວັນດາ ຢືນຢັນກໍຄື ຍ້ອນນະໂຍບາຍການຫ້າມນໍາໃຊ້ປລາສຕິກ, ເຮັດໃຫ້ປະເທດສະອາດຈຶ່ງສາມາດຍາດແຍ່ງຕະຫຼາດທາງດ້ານການທ່ອງທ່ຽວເພີ່ມຂຶ້ນ ແລະ ມີນັກທ່ອງທ່ຽວເຂົ້າ ປະເທດ ນັບມື້ນັບຫຼາຍຂຶ້ນ.

ເພາະສະນັ້ນ, ຖ້າພວກເຮົາ ຍັງດຳລົງຊີວິດທີ່ປາສະຈາກປລາສຕິກບໍ່ໄດ້ ກໍຕ້ອງຮຽນຮູ້ທີ່ຈະຈັດການມັນ ແລະກ້າວໄປສູ່ການຈຳກັດການນຳໃຊ້ໃຫ້ໜ້ອຍລົງ ເພື່ອຮັບປະກັນວ່າບ້ານເມືອງເຮົາສະອາດຂຶ້ນ, ກໍບໍ່ແນ່ ບາງເທື່ອນັກທ່ອງທ່ຽວ ເພີ່ມຂຶ້ນຄືຣະວັນດາກໍເປັນໄດ້.

error: Content is protected !!