ນໍ້າຂອງແຫ້ງ ແລ້ງຍາມຝົນ

ນໍ້າຂອງແຫ້ງ ແລ້ງຍາມຝົນ - advert banner 728 90 728x90 - ນໍ້າຂອງແຫ້ງ ແລ້ງຍາມຝົນ

ປົກກະຕິພວກເຮົາຈະເຫັນນໍ້າຂອງແຫ້ງ ໃນຍາມແລ້ງ ແລະບໍ່ເຖິງຂັ້ນວ່າ ເຫັນຫາດຊາຍຈົນຮອດເປີດແປນ ແຕ່ອັນນີ້ ພັດວ່າເກີດຂຶ້ນໃນຍາມຝົນເປັນເລື່ອງໜ້າງຶກງໍ້ຫຼາຍແທ້ໆ.

ນໍ້າຂອງແຫ້ງ ແລ້ງຍາມຝົນ - new3 - ນໍ້າຂອງແຫ້ງ ແລ້ງຍາມຝົນ

ປະກົດການນໍ້າຂອງແຫ້ງຜິດເວລາເຮັດໃຫ້ປະຊາຊົນທີ່ອາໄສຕາມລຳແມ່ນໍ້າຂອງມາໄດ້ຫຼາຍທົດສະວັດຈົນບໍ່ຢາກເຊື່ອສາຍຕາວ່ານີ້ແມ່ນຄວາມຈິງ ເຊິ່ງບໍ່ເຄີຍເກີດມາກ່ອນໃນຍາມນີ້ ເລີຍເຮັດໃຫ້ເປັນຕາໜ້າ ຕົກໃຈບໍ່ແມ່ນໜ້ອຍທີ່ວ່າແມ່ນໍ້າທີ່ກວ້າງໃຫຍ່ໄພສານນີ້ ຈະມາບົກແຫ້ງຢ່າງໜ້າປະຫລາດໃຈ.

ນັບແຕ່ກາງເດືອນ ກໍລະກົດ ແມ່ນໍ້າຂອງໄດ້ບົກແຫ້ງລົງຢ່າງຜິດປົກກະຕິ ເຮັດໃຫ້ ເຫັນຫາດຊາຍຢ່າງເປີດແປນ ເປັນບໍລິເວນກວ້າງ ບາງບ່ອນ ຈົນສາມາດຍ່າງຂ້າມຂອງໄດ້ ຢ່າງສະບາຍ ເຮັດໃຫ້ ປະກົດການນີ້ ກາຍເປັນທີ່ຕົກໃຈ ບ່ອນວ່າ ປູປາ ນານໍ້າ ສັດສາວາສິ່ງ ທີ່ອາໄສ ຢູ່ໃນນໍ້າ ທີ່ປະຊາຊົນ ອາໄສ ເພື່ອການຄອງຊີບມາແຕ່ດຶກດຳບັນນີ້ ຈະເປັນແນວໃດ, ພວກເຮົາເຫັນວ່າ ລະບົບນິເວດ ທີ່ເຄີຍອຸດົມສົມບູນນີ້ ຖືກທຳລາຍຢ່າງຊ້າໆ.

ນອກນັ້ນ ການບົກແຫ້ງຄັ້ງນີ້ຍັງເຮັດໃຫ້ມີຜົນກະທົບຕໍ່ການສະໜອງນໍ້າປະປາ ຕື່ມອີກ, ພາຍຫຼັງ ປະລິມານນໍ້າຂອງ ໄດ້ເລີ່ມບົກແຫ້ງລົງ ລັດວິສາຫະກິດ ນໍ້າປະປາ ນະຄອນຫຼວງ ໄດ້ອອກແຈ້ງການວ່າ ຈະບໍ່ຮັບປະກັນ ການສະໜອງນໍ້າໄດ້ຢ່າງພຽງພໍ ເຊິ່ງສ້າງຄວາມກັງວົນໃຈ ຕໍ່ປະຊາຊົນ ກໍຄືບັນດາໂຮງຈັກໂຮງງານ ທີ່ນໍ້າໃຊ້ນໍ້າປະປາ ເພາະ ເຖິງວ່າ ນໍ້າຂອງບໍ່ແຫ້ງຢູ່ແລ້ວ ບາງຄັ້ງຄາວ ນໍ້າປະປາກໍບໍ່ມາເປັນປົກກະຕິ.

ເມື່ອເປັນເຊັ່ນນັ້ນ ຫຼາຍຄົນຈຶ່ງສົງໄສວ່າ ການບົກແຫ້ງຂອງນໍ້າຂອງຄັ້ງນີ້ ຍ້ອນຫຍັງກັນແທ້? ຕາມການບົດລາຍງານ ວິເຄາະສະຖານນະການ ແລະຢັ້ງຢືນຄວາມເປັນຈິງຂອງປະລິມານນໍ້າແຫ້ງຜິດປົກກະຕິ ແລະຄາດຄະເນປະລິມານນໍ້າຝົນໃນປີນີ້ (2019) ແລະ ຜົນກະທົບສະພາບແຫ້ງແລ້ງ ຂອງກົມອຸຕຸນິຍົມ ແລະອຸທົກກະສາດ ເມື່ອວັນທີເວົ້າວ່າ ຍ້ອນປະກົດການ ການປ່ຽນແປງຂອງດິນຟ້າອາກາດ ແອນນິນໂຍ (El Niño) ເຊິ່ງເຮັດໃຫ້ ມີປະລິມານນໍ້າຝົນຫຼຸດລົງ ສະເລ່ຍ 50% ຖ້າທຽບໃສ່ ໄລຍະດຽວກັນ ຂອງແຕ່ລະປີ.

ນໍ້າຂອງແຫ້ງ ແລ້ງຍາມຝົນ - lattana 1 - ນໍ້າຂອງແຫ້ງ ແລ້ງຍາມຝົນ

ສິ່ງດັ່ງກ່າວ ໄດ້ເປັນສາເຫດໜຶ່ງ ທີ່ເຮັດໃຫ້ລະດັບແມ່ນໍ້າຂອງ ຫຼຸດລົງ 53% ໂດຍສະເລ່ຍ ແຕ່ລະສະຖານີ ວັດແທກນໍ້າຂອງ. ພ້ອມນັ້ນ ອີງຕາມບົດລາຍງານດັ່ງກ່າວ ຍັງສະຫຼຸດວ່າ ການປ່ອຍນໍ້າຫຼຸດລົງຂອງເຂື່ອນໄຟຟ້າ ທາງທິດເໜືອ ໂດຍສະເພາະ ຢູ່ ຊຽງຮຸ່ງ ສປ ຈີນ “ແມ່ນບໍ່ມີຜົນກະທົບໃດໆ ເພາະວ່າ ລະດັບນໍ້າຊ່ວງດັ່ງກ່າວ ເຖິງວ່າຈະຫຼຸດລົງ ແຕ່ຍັງສູງກວ່າ ຖ້າທຽບກັບລະດັບນໍ້າຕໍ່າສຸດຂອງລະດັບນໍ້າໄຫຼຕາມທຳມະຊາດ ກ່ອນການສ້າງເຂື່ອນ”.

ຖ້າການລາຍງານ ແລະການວິເຄາະນີ້ ຖືກຕ້ອງແທ້ ນັ້ນກໍໝາຍຄວາມວ່າ ລະດັບນໍ້າຂອງແມ່ນໍ້າຂອງຫຼຸດລົງ ຜິດທຳມະດານີ້ ແມ່ນເກີດຈາກ ການປ່ຽນແປງດິນຟ້າອາກາດ ໂດຍກົງ ເຊິ່ງຖືວ່າ ເປັນໄພທຳມະຊາດ ທີ່ຮ້າຍແຮງ ຖ້າຍັງສືບຕໍ່ໄປໄລຍະໃດໜຶ່ງ.

ແຕ່ເຖິງຢ່າງໃດກໍຕາມ ຄາດຄະເນວ່າ ປະມິລານນໍ້າຝົນ ອາດເພີ່ມຂຶ້ນ ໃນທ້າຍເດືອນ ກໍລະກົດ ຫາ ເດືອນສິງຫາ ທີ່ອາດເຮັດໃຫ້ລະດັບ ແມ່ນໍ້າ ສາຍຕ່າງໆ ພ້ອມທັງແມ່ນໍ້າຂອງເພີ່ມຂຶ້ນຕາມລຳດັບ.

ປະກົດການຄັ້ງນີ້ ທຳມະຊາດ ໄດ້ເຕືອນພວກເຮົາແລ້ວວ່າ ການປ່ຽນແປງດິນຟ້າອາກາດນັ້ນ ຮ້າຍແຮງ ແລະໄວກວ່າທີ່ເຮົາຄິດໄວ້, ຍິ່ງໃນປັດຈຸບັນ ການພັດທະນາ ເຂື່ອນຕາມລຳແມ່ນໍ້າຕ່າງໆ​ເພື່ອຜະລິດກະແສໄຟຟ້ານັ້ນ ຖ້າບໍ່ມີນໍ້າກໍບໍ່ສາມາດ ຜະລິດໄດ້ຕາມທີ່ຄາດຫວັງ, ພ້ອມນັ້ນ ອາດກ້າວໄປເຖິງ ເລື່ອງ ເຂົ້າຢາກ ໝາກແພງ ເພາະ ຊາວກະສິກອນ ບໍ່ສາມາດ ຜະລິດສະບຽງອາຫານໄດ້ຢ່າງເຕັມສ່ວນ. ສິ່ງດັ່ງກ່າວ ພວກເຮົາຕ້ອງມີຄວາມສະດຸ້ງໄວ ແລະກຽມຮັບມືໄວ້ຢ່າງດີ.

error: Content is protected !!