ໄຂ້ຍຸງລາຍຍັງສືບຕໍ່ລະບາດຢູ່ປະເທດເຮົາ

ໄຂ້ຍຸງລາຍຍັງສືບຕໍ່ລະບາດຢູ່ປະເທດເຮົາ - advert banner 728 90 728x90 - ໄຂ້ຍຸງລາຍຍັງສືບຕໍ່ລະບາດຢູ່ປະເທດເຮົາ

ສະພາບການລະບາດຂອງພະຍາດໄຂ້ຍຸງລາຍຢູ່ປະເທດເຮົາຍັງສືບຕໍ່ເພີ່ມຂຶ້ນ, ເຊິ່ງນັບແຕ່ເດືອນມັງກອນ ມາຮອດທ້າຍເດືອນກໍລະກົດນີ້, ທົ່ວປະເທດມີຜູ້ຕິດເຊື້ອພະຍາດໄຂ້ຍຸງລາຍແລ້ວ 20.000 ກວ່າກໍລະນີ, ໂດຍມີຜູ້ເສຍຊີວິດ 40 ກ່ວາຄົນ, ໃນນັ້ນ ແຂວງທີ່ມີຜູ້ຕິດເຊື້ອຫລາຍກວ່າໝູ່ແມ່ນນະຄອນຫລວງວຽງຈັນ ມີ 4.315 ຄົນ ເສຍຊີວິດແລ້ວ 11 ຄົນ , ສະຫວັນນະເຂດ 3.300 ກ່ວາຄົນ, ເສຍຊີວິດ 14 ຄົນ, ຈໍາປາສັກ 2.879 ຄົນ, ເສຍຊີວິດ 5 ຄົນ ແລະ ແຂວງອື່ນໆອີກ, ມີພຽງແຕ່ແຂວງຫົວພັນເທົ່ານັ້ນທີ່ຍັງບໍ່ທັນມີລາຍງານຜູ້ຕິດເຊື້ອໄຂ້ຍຸງ. ທ່ານ ຄໍາເປ ພົງສະຫວັດ, ປະທານສະມາຄົມແພດເດັກ ທິມງານປິ່ນປົວພະຍາດໄຂ້ຍຸງລາຍ, ກະຊວງສາທາລະນະສຸກໃຫ້ສໍາພາດຕໍ່ສື່ມວນຊົນ ໃນວັນທີ 3 ສິງຫານີ້ວ່າ : ຈາກປະສົບການແລະ ບົດຮຽນໃນການຮັກສາຄົນເຈັບທີ່ເປັນພະຍາດໄຂ້ຍຸງລາຍ ເຊິ່ງສ່ວນຫລາຍແມ່ນເຂດຊຸມຊົນ, ໂຮງໝໍນ້ອຍ, ສຸກສາລາ, ແລະ ໂຮງໝໍເອກະຊົນນັ້ນ ຈະມີຄົນເຈັບເຂົ້າໄປກວດພະຍາດຫລາຍ, ໂດຍທໍາອິດແມ່ນຕ້ອງກວດເຊັກສຸຂະພາບ ແລະ ຊັກຖາມປະຫວັດໃຫ້ລະອຽດ ເພາະໃນບາງກໍລະນີ, ພະຍາດນີ້ອາດຈະມີສັນຍານເຕືອນ ຫລືບໍ່ມີສັນຍານເຕືອນ ມີອາການໄຂ້ແຮງ ກິນຢາກໍບໍ່ລົງ. ຈາກນັ້ນ, ແພດກໍ່ຈະແນະນໍາໃຫ້ການປິ່ນປົວ ແລະ ຕິດຕາມຢູ່ເຮືອນກ່ອນຈັກ 2-3 ມື້ ເຊິ່ງຄົນເຈັບຈະມີອາການເຈັບຫົວ, ປວດກະບົງຕາ, ປວດຕົນໂຕ, ກິນເຂົ້າບໍ່ແຊບ, ເບື່ອອາຫານ, ມີຜື່ນຕາມຕົນໂຕ, ກວດເລືອດເມັດເລືອດຂາວຕໍ່າ, ຕ້ອງແນະນໍາໃຫ້ຄົນເຈັບພັກຜ່ອນ, ດື່ມນໍ້າຫລາຍໆ, ຜູ້ໃຫ່ຍດື່ມມື້ລະ 6-8 ຈອກ, ຜູ້ນ້ອຍອາຍຸຕໍ່າກວ່າ 5 ປີ ແມ່ນໃຫ້ດື່ມປະມານ 4 ຈອກຕໍ່ມື້, ປະເພດນໍ້າແມ່ນນໍ້າໝາກພ້າວ, ນໍ້າເຂົ້າ, ນໍ້າແກງ, ນໍ້າແຮ່ທາດ ແລະນໍ້າ ນົມ, ແຕ່ຄວນຫລີກເວັ້ນນໍ້າດື່ມທີ່ມີສີ, ໂດຍສະເພາະແມ່ນສີແດງ. ທ່ານ ຄໍາເປ ພົງສະຫວັດ ໃຫ້ຄໍາແນະນໍາໃນການຮັກສາຜູ້ເປັນພະຍາດໄຂ້ເລືອດອອກຕື່ມອີກວ່າ: ການໃຫ້ຢາລົດໄຂ້ ເຊັ່ນ: ປາຣາເຊຕາໂມນ ແມ່ນຕ້ອງໃຫ້ດ້ວຍຄວາມລະມັດລະວັງ; ຜູ້ໃຫ່ຍບໍ່ໃຫ້ກິນເກີນ 3 ເມັດຕໍ່ມື້ ຫລື 1,5g ຕໍ່ມື້ (ເມັດ 500mg), ແບ່ງກິນ 3 ເວລາ, ສະເພາະໄຂ້ຂຶ້ນສູງເຖິງ 39 ອົງສາ, ແຕ່ຖ້າບໍ່ຈໍາເປັນ ແມ່ນບໍ່ໃຫ້ໃຊ້ຊະນິດສັກ ເພາະຈະເຮັດໃຫ້ຊຶມເບື່ອຕັບ, ແລະ ເປັນສາເຫດຫລັກເຮັດໃຫ້ເລືອດອອກ, ໂດຍສະເພາະເລືອດທີ່ອອກກະເພາະລໍາໄສ້; ຈຸດສໍາຄັນແມ່ນມັນຈະເຮັດໃຫ້ໜ້າທີ່ການຂອງຕັບຊຸດໂຊມ, ແກ້ໄດ້ຍາກ ແລະ ເປັນສາເຫດຕົ້ນຕໍ ເຮັດໃຫ້ຄົນເຈັບເສຍຊີວິດໃນໄລຍະຜ່ານມາ. ອາການທີ່ຄວນໄປພົບແພດດ່ວນ ມີຄື: ຄົນເຈັບມີອາການຮາກຫລາຍ, ກິນຫຍັງລົງໄປກໍ່ຮາກອອກໝົດ, ເຈັບທ້ອງແຮງ, ມີເລືອດອອກຕາມເຍື່ອເມືອກ (ຕາມເຟັນແຂ້ວ, ເລືອດດັງ ແມ່ຍິງປະຈໍາເດືອນແກ່ຍາວຜິດປົກກະຕິ,ຍ່ຽວເປັນເລືອດ) ມີອາການງ້ວງຊຶມ, ມີແຕ່ຢາກນອນ, ເດັກບໍ່ຫລິ້ນອິດເມື່ອຍຫລາຍ, ຫລື ມີອາການກະວົນກະວາຍ, ຫາຍໃຈຫອບເໝື່ອຍ, ຕົນໂຕເຢັນຜິດປົກກະຕິຫລັງໄຂ້ຫລຸດລົງ, ສິ່ງສຳຄັນເດັກບໍ່ຍ່ຽວຫລາຍຊົ່ວໂມງ ຍ້ອນເລືອດຕໍ່າ ໃນໄລຍະນີ້ຖືວ່າແມ່ນຂັ້ນວິກິດ. ຂໍ້ແນະນໍາເວລາເອົາຄົນເຈັບເຂົ້ານອນຕິດຕາມ: ຍ້ອນຄົນເຈັບອິດເໝື່ອຍ ກິນດື່ມບໍ່ໄດ້ ແຕ່ກໍ່ຕ້ອງໃຫ້ດື່ມເທື່ອລະນ້ອຍ, ຕິດຕາມການດື່ມນໍ້າ, ການຍ່ຽວ, ຕິດຕາມຜົນກວດວິເຄາະໃຫ້ທັນການ, ໂດຍສະເພາະໃນກຸ່ມສ່ຽງ ເປັນຕົ້ນ: ແມ່ມານ, ຜູ້ທີ່ເປັນພະຍາດເບົາຫວານ, ຄວາມດັນ, ພະຍາດຫົວໃຈ, ເດັກນ້ອຍ ແລະ ຜູ້ສູງອາຍຸ. ໃນສະພາບທີ່ຮ້າຍແຮງນີ້, ກະຊວງສາທາລະນະສຸກຈຶ່ງຂໍຮຽກຮ້ອງໃຫ້ທຸກພາກສ່ວນເປັນເຈົາການຊ່ວຍກັນ ກໍາຈັດ ແລະທໍາລາຍແຫ່ລງເພາະພັນຍຸງລາຍ ທີ່ເປັນພາຫະນໍາເຊື້ອເຮັດໃຫ້ເກີດພະຍາດໄຂ້ເລືອດອອກ, ໂດຍໃຫ້ເອົາໃຈໃສ່ປະຕິບັດຫລັກການ 5ປ ຄື : 1/. ປິດຝາພາຊະນະເກັບນໍ້າໃຫ້ດີ ເພື່ອບໍ່ໃຫ້ຍຸງລາຍໄປໄຂ່ໃສ່, 2/. ປ່ຽນນໍ້າ ແລະ ຜັດຖູພາຊະນະ ເຊັ່ນ ເຕົ້າດອກໄມ້, ນໍ້າຮອງຕີນຕູ້, ຖານຮອງຈອກນໍ້າແລະ ອື່ນໆ, 3/. ປ່ອຍປາຫາງນົກຍຸງເພື່ອກິນໜອນນໍ້າ, 4/. ປັບປຸງບໍ່ໃຫ້ມີນໍ້າຄ້າງຂັງກະໂປະ, ກະປອງ, ຮາງລິນ, ຢາງຕີນລົດເກົ່າ ແລະ ອື່ນໆ, ແລະ 5/. ປະຕິບັດເປັນປະຈໍາທຸກໆອາທິດ ແນ່ໃສ່ເຮັດໃຫ້ການລະບາດຂອງພະຍາດໄຂ້ຍຸງລາຍຫລຸດຜ່ອນລົງ.

ໄຂ້ຍຸງລາຍຍັງສືບຕໍ່ລະບາດຢູ່ປະເທດເຮົາ - new3 - ໄຂ້ຍຸງລາຍຍັງສືບຕໍ່ລະບາດຢູ່ປະເທດເຮົາ
ໄຂ້ຍຸງລາຍຍັງສືບຕໍ່ລະບາດຢູ່ປະເທດເຮົາ - lattana 1 - ໄຂ້ຍຸງລາຍຍັງສືບຕໍ່ລະບາດຢູ່ປະເທດເຮົາ
error: Content is protected !!