ນາຍົກລັດຖະມົນຕີລົງຊຸກຍູ້ການພັດທະນາຢູ່ເມືອງວັງວຽງ

- advert banner 728 90 728x90 - ນາຍົກລັດຖະມົນຕີລົງຊຸກຍູ້ການພັດທະນາຢູ່ເມືອງວັງວຽງ

ໃນວັນທີ 8 ສິງຫານີ້, ທ່ານນາຍົກລັດຖະມົນຕີທອງລຸນສີສຸລິດ ໄດ້ໄປຢ້ຽມຢາມ ແລະຊຸກຍູ້ການພັດທະນາເມືອງວັງວຽງແຂວງວຽງຈັນ, ໃນໂອກາດດັ່ງກ່າວ, ທ່ານນາຍົກລັດຖະມົນຕີໄດ້ໄປຢ້ຽມຢາມ ແລະຕິດຕາມເບິ່ງຈຸດກໍ່ສ້າງສະຖານີລົດໄຟວັງວຽງ, ຊຶ່ງເປັນຈຸດຜ່ານຂອງເສັ້ນທາງລົດໄຟດັ່ງກ່າວ, ມີໄລຍະຍາວທັງໝົດ 145 ກິ-ໂລ-ແມັດ, ຜ່ານ 4 ເມືອງ, 60 ບ້ານ, ມີຜູ້ໄດ້ຮັບຜົນກະທົບ 1.589 ຄອບຄົວ, ມາຮອດປັດຈຸບັນ ໄດ້ໄກ່ເກ່ຍທີ່ດິນ ແລະສິ່ງກີດຂວາງການສໍາເລັດແລ້ວ99% ແລະສືບຕໍ່ດຳເນີນການຊົດເຊີຍໃຫ້ແກ່ປະຊາຊົນ ທີ່ໄດ້ຮັບຜົນກະທົບຈາກໂຄງການດັ່ງກ່າວ.ສຳລັບສະຖານີລົດໄຟວັງວຽງ ແມ່ນຕັ້ງຢູ່ບ້ານຫ້ວຍສະເຫງົ້າ-ພູດິນແດງ, ຫ່າງຈາກເທດສະບານເມືອງວັງວຽງປະມານ 2 ກິໂລແມັດ, ຫ່າງຈາກເສັ້ນທາງເລກທີ 13 ເໜືອ 300 ແມັດ, ມີເນື້ອທີ່ທັງໝົດກວ່າ144 ເຮັກຕາ, ສະເພາະເນື້ອທີ່ອາຄານສະຖານີ ມີ 5.000 ຕາແມັດ, ສາມາດຮອງຮັບຜູ້ໂດຍສານໄດ້ 600 ຄົນ. ປັດຈຸບັນໄດ້ສຳເລັດການອອກແບບ, ສຳເລັດການບຸກເບີກພື້ນທີ່ ແລະກະກຽມເພື່ອດຳເນີນການກໍ່ສ້າງ ຊຶ່ງຄາດວ່າຈະສໍາເລັດພາຍໃນປີ 2021ທີ່ຈະມາເຖິງນີ້.

ໃນໂອກາດນີ້, ທ່ານນາຍົກລັດຖະມົນຕີ ໄດ້ຊີ້ນຳໃຫ້ຜູ້ພັດທະນາໂຄງການເອົາໃຈໃສ່ປະຕິບັດວຽກງານສຳເລັດຕາມແຜນການທີ່ວາງໄວ້ ແລະ ໃຫ້ມີຄຸນນະພາບ, ການກໍ່ສ້າງໃຫ້ເປັນໄປຕາມການອອກແບບ ທີ່ໄດ້ຮັບຮອງ, ສິ່ງສຳຄັນ ໂຄງສ້າງຕ່າງໆຕ້ອງໃຫ້ກົມກືນກັບທຳມະຊາດ ກໍຄືແຫຼ່ງທ່ອງທ່ຽວ ຂອງເມືອງວັງວຽງ.

ຫຼັງຈາກນັ້ນ, ທ່ານນາຍົກລັດຖະມົນຕີ ໄດ້ໄປຢ້ຽມຢາມສູນບໍລິການເຕັກນິກກະສິກຳ ແລະໄດ້ຊີ້ນຳໃຫ້ສູນດັ່ງກ່າວ ເອົາໃຈໃສ່ການປູກພຶດປອດສານພິດ, ພືດລົ້ມລຸກໂດຍໃຫ້ຕິດພັນກັບການສົ່ງເສີມການທ່ອງທ່ຽວ. ພ້ອມນີ້, ໄດ້ຢ້ຽມຢາມສະຖານທີ່ທ່ອງທ່ຽວທຳມະຊາດ ຖໍ້ານາງຟ້າ ແລະ ຖໍ້ານອນໂດຍໄດ້ແນະນຳໃຫ້ຜູ້ພັດທະນາ ເອົາໃຈໃສ່ການອະນຸລັກທຳມະຊາດ ແລະຄວາມປອດໄພໃຫ້ແກ່ນັກທ່ອງທ່ຽວ.

- Tiger Head 728x90 - ນາຍົກລັດຖະມົນຕີລົງຊຸກຍູ້ການພັດທະນາຢູ່ເມືອງວັງວຽງ
- 1 1 - ນາຍົກລັດຖະມົນຕີລົງຊຸກຍູ້ການພັດທະນາຢູ່ເມືອງວັງວຽງ

ໃນຕອນບ່າຍຂອງວັນດຽວກັນ, ທ່ານນາຍົກລັດຖະມົນຕີໄດ້ໃຫ້ກຽດໂອ້ລົມຕໍ່ພະ-ນັກງານຫລັກແຫລ່ງ, ພະນັກງານອາວຸໂສບຳນານແລະ ນັກທຸລະກິດຈຳນວນໜຶ່ງໃນເມືອງວັງວຽງ, ໂດຍທ່ານນາຍົກໄດ້ຮັບຟັງການລາຍງານສະພາບການພັດທະນາເສດຖະກິດ-ສັງຄົມຈາກທ່ານເຈົ້າເມືອງວ່າ: ທົ່ວເມືອງຍັງສືບຕໍ່ມີຄວາມສະຫງົບ ແລະ ເປັນລະບຽບຮຽບຮ້ອຍ, ເສດຖະກິດຂະຫຍາຍຕົວຕໍ່ເນື່ອງ, ດ້ານການສຶກສາ ແລະວັດທະນະທຳຕິດພັນກັບການພັດ-ທະນາຊົນນະບົດ ແລະ ລບລ້າງຄວາມທຸກຍາກຂອງປະຊາຊົນກໍນັບມື້ດີຂຶ້ນ. ຫລັງຈາກນັ້ນ, ທ່ານນາຍົກລັດຖະມົນຕີໄດ້ສະເໜີໃຫ້ບັນດາທ່ານລັດຖະມົນຕີກະຊວງກ່ຽວຂ້ອງຊີ້ແຈງຕໍ່ບາງບັນຫາທີ່ທາງເມືອງສະເໜີ ແລະ ບາງບັນຫາພົ້ນເດັ່ນເປັນຕົ້ນ: ການປ້ອງກັນ ແລະ ແກ້ໄຂການລະບາດຂອງພະຍາດໄຂ້ເລືອດອອກ,ການສົ່ງເສີມການຜະລິດກະສິກຳອິນຊີ, ການປູກພືດປອດສານພິດຕິດພັນກັບການຊຸກຍູ້ສົ່ງເສີມການທ່ອງທ່ຽວ, ການຕິດຕາມເຝົ້າລະວັງການລະບາດຂອງພະຍາດອາຫິວາໝູອາຟຣິກາ,ການສ້າງ ແລະປັບປຸງເສັ້ນທາງເຂົ້າແຫລ່ງທ່ອງທ່ຽວ ແລະການຊົດເຊີຍໃຫ້ປະຊາຊົນທີ່ໄດ້ຮັບຜົນກະທົບຈາກທາງລົດໄຟ.ຕໍ່ການພັດທະນາຂອງເມືອງ, ທ່ານນາຍົກລັດຖະມົນຕີໄດ້ມີຄຳເຫັນວ່າ: ເມືອງວັງວຽງໄດ້ຮັບ ການພັດທະນາ ແລະ ມີຫລາຍອັນປ່ຽນແປງໃໝ່, ແຕ່ເຖິງຢ່າງໃດກໍຕາມ, ຍັງມີບາງບັນຫາທີ່ຕ້ອງໄດ້ເອົາໃຈໃສ່ປັບປຸງແກ້ໄຂເປັນຕົ້ນການພັດທະນາຍັງບໍ່ທັນໄປຕາມຜັງເມືອງຢ່າງເຄັ່ງຄັດ, ຂາດການວາງແຜນພັດທະນາການທ່ອງທ່ຽວທີ່ດີ ແລະ ຍືນຍົງ, ບັນຫາລາຄາສິນຄ້າ ແລະຄ່າບໍລິການແພງ, ບັນຫາຄວາມສະອາດ, ຄວາມເປັນລະບຽບຮຽບຮ້ອຍ, ບັນຫາການຄຸ້ມຄອງການປ່ອຍນໍ້າເສຍລົງແມ່ນໍ້າແລະອື່ນໆ.ສະນັ້ນເພື່ອສືບຕໍ່ພັດທະນາເມືອງວັງວຽງໃຫ້ເປັນເມືອງທ່ອງທ່ຽວຢ່າງແທ້ຈິງ, ທ່ານນາຍົກລັດຖະມົນຕີໃຫ້ທິດຊີ້ນຳໃຫ້ເອົາໃຈໃສ່ຕື່ມໃນການຊອກໃຫ້ເຫັນທ່າແຮງແທ້ຈິງຂອງເມືອງວັງວຽງ ແລະ ນຳໃຊ້ທ່າແຮງດັ່ງກ່າວຢ່າງຖືກຕ້ອງ, ຍືນຍົງ ແລະ ມີປະສິດທິຜົນສູງ,ໃຫ້ກະຊວງກ່ຽວຂ້ອງ ສົມທົບກັບແຂວງວຽງຈັນສ້າງແຜນຜັງ ແລະ ຍຸດທະສາດການພັດທະນາເມືອງວັງວຽງເພື່ອເປັນບ່ອນອີງໃນການພັດທະນາ ແລະ ພິຈາລະນາອະນຸມັດໂຄງການ ຫລືທຸລະກິດຕ່າງໆ,ເອົາໃຈໃສ່ຕິດຕາມ, ກວດກາ, ຄຸ້ມຄອງລາຄາສິນຄ້າ, ທີ່ພັກ, ລາຄາອາຫານໃຫ້ຖືກຕ້ອງເໝາະສົມ, ບໍ່ໃຫ້ສູງເກີນຄວາມເປັນຈິງ,ສົ່ງເສີມການຜະລິດກະສິກຳສະອາດ ແລະ ປູກພືດປອດສານພິດ,ຕ້ອງເຂັ້ມງວດຕໍ່ການປົກປັກຮັກສາສິ່ງແວດລ້ອມ, ຫ້າມການປ່ອຍນໍ້າເປື້ອນ, ຫ້າມຖິ້ມຂີ້ເຫຍື້ອຊະຊາຍ, ຕະຫຼອດຮອດການສ້າງຮ້ານບັນເທິງທີ່ບໍ່ຖືກຕ້ອງ, ບໍ່ແທດເໝາະກັບເງື່ອນໄຂຕົວຈິງ ແລະ ເພີ່ມປະສິດທິພາບໃນການຄຸ້ມຄອງເມືອງວັງວຽງໃຫ້ເປັນເມືອງທຳມະຊາດ ແລະ ວັດທະນະທຳຢ່າງແທ້ຈິງ.

error: Content is protected !!