ບານເຕະລາວຕ້ອງມີສັກສີ

ບານເຕະລາວຕ້ອງມີສັກສີ - advert banner 728 90 728x90 - ບານເຕະລາວຕ້ອງມີສັກສີ

​ໂດຍ: ມຶກບໍ່​ແຫ້ງ

ບານເຕະລາວຕ້ອງມີສັກສີ - new3 - ບານເຕະລາວຕ້ອງມີສັກສີ

ກິລາບານເຕະເປັນໜຶ່ງໃນຍອດນິຍົມຂອງຄົນລາວແຕ່ ຫຼາຍປີມາແລ້ວທີ່ກິລາບານເຕະຂອງລາວບໍ່ໄດ້ມີຜົນງານອັນພົ້ນເດັ່ນໂດຍສະເພາະບານເຕະຊາຍທີ່ຫຼິ້ນແບບໄຮ້ຄວາມຕື່ນເຕັ້ນແລະຂາດ ຄວາມກະຕືລືລົ້ນ.

ຜູ້ຂຽນກໍເປັນຜູ້ໜຶ່ງທີ່ຊື່ນຊອບກິລາບານເຕະເປັນຊີວິດຈິດໃຈຕິດຕາມເກືອບວ່າທຸກລາຍການການແຂ່ງຂັນທີ່ທິມຊາດລາວແຕ່ລະຮຸ່ນ ເຂົ້າຮ່ວມໂດຍສະເພາະໃນກຸ່ມບັນດາປະເທດອາຊີຕາເວັນອອກສຽງ ໃຕ້, ສະນັ້ນຈຶ່ງສາມາດບອກໄດ້ວ່າຄຸນນະພາບຂອງບານເຕະ ລາວນັ້ນມີທ່າອ່ຽງແນວໃດ.

ມື້ວານນີ້ຜູ້ຂຽນໄດ້ຊົມການແຂ່ງຂັນບານເຕະຊີງແຊ້ມອາຊຽນ ຮຸ່ນບໍ່ເກີນອາຍຸ 18 ປີເຊິ່ງທິມຊາດລາວພົບກັບອິນໂດເນເຊຍ ເຊິ່ງ ເປັນທິມໜຶ່ງທີ່ແຂ່ງແກ່ນຂອງພາກພື້ນແຕ່ທິມຊາດລາວເຮົາກໍຫຼິ້ນໄດ້ບໍ່ໜ້ອຍໜ້າເລີຍໂດຍຍິງປະຕູຂຶ້ນນຳໄປກ່ອນແລະມີຈັງວະເຂົ້າຍິງປະຕູຄູ່ແຂ່ງໄດ້ຫຼາຍຈັງຫວະ, ພ້ອມນັ້ນຜູ້ຫຼິ້ນແຕ່ລະຄົນກໍຊ່ວຍກັນ ໄຫຼ່ຍາດບານຢ່າງບໍ່ລົດລະ.

ແຕ່ສິ່ງໜຶ່ງທີ່ເຮັດໃຫ້ການຫຼິ້ນບານຂອງພວກເຮົາທຳລາຍຄວາມສວຍງາມຂອງກິລາບານເຕະນັ້ນແມ່ນການຖ່ວງເວລາທີ່ບໍ່ຈຳເປັນ ເຮັດໃຫ້ຜູ້ຊົມຮູ້ສຶກລຳຄານ, ເບິ່ງແລ້ວບໍ່ມີຄວາມມ່ວນຊື່ນຕື່ນເຕັ້ນ ຫຍັງເລີຍແຖມຍັງບົ່ງບອກໃຫ້ຮູ້ວ່າພວກເຮົາບໍ່ແມ່ນນັກສູ້ ບໍ່ແມ່ນ ນັກກິລາທີ່ໜ້າຊື່ນຊົມແຕ່ປະການໃດ.

ແນ່ນອນໃນເກມລະດັບນີ້ ນັກກິລາແລະທິມງານຄູຝຶກໃຜກໍຫວັງ ເລື່ອງຄະແນນ, ບໍ່ວ່າຈະເປັນໜຶ່ງຫຼືສາມຄະແນນກໍແມ່ນມີຄຸນຄ່າ ຕໍ່ການເຂົ້າຮອບຕໍ່ໄປແຕ່ການຂາດຄວາມເປັນກິລາຄືບໍ່ຫຼິ້ນເຕັມທີ່ນັ້ນເຮັດໃຫ້ຄວາມສວຍງາມແລະຄວາມ່ວນຊື່ນຂອງກິລາ ຫົດຫາຍ ໄປ, ພ້ອມຍັງເຮັດໃຫ້ສ້າງຄວາມຊິນເຄີຍຕໍ່ນັກກິລາພາຍໃນປະເທດ ສ້າງພາບເກີນຈິງເທິງສະໜາມເຊິ່ງບາດເຮົາເສຍແລ້ວທັງຖືກເຂົາ ຢຽບຫຍາມ ແລະ ເຮົາກໍບໍ່ມີຄວາມກ້າວໜ້າຫຍັງເລີຍ.

ຕົວຢ່າງພາບຂອງນັກຮັບລາວທີ່ພະຍາຍາມຖ່ວງເວລາໃນເກມທີ່ພົບກັບອິນໂດເນເຊຍພາຍຫຼັງທີ່ທິມຊາດລາວຂຶ້ນນຳນັ້ນເອີ້ນໄດ້ວ່າ ມັນເປັນສິ່ງເບິ່ງແລ້ວພວກເຮົາບໍ່ມີສັກສີພໍເທົ່າໃດ.

ບານເຕະລາວຕ້ອງມີສັກສີ - lattana 1 - ບານເຕະລາວຕ້ອງມີສັກສີ

ເມື່ອເບິ່ງອາດີດຜ່ານມາບານເຕະລາວບໍ່ໜ້ອຍໜ້າຊາດໃດ​ໃນພາກພື້ນໂດຍສະເພາະໄວໜຸ່ມທີ່ມີອາຍຸຕໍ່າກວ່າ 20 ປີລົງມາຕົວຢ່າງຮຸ່ນ ຕໍ່າກວ່າ 15ປີພວກເຮົາເຄີຍເປັນຮອງແຊ້ມມາເຖິງສາມສະໄໝ (2002, 2007 ແລະ 2011), ຮຸ່ນຕໍ່າກວ່າ 16 ປີເຄີຍເປັນຮອງ ແຊ້ມ 3 ສະໄໝ, ທີ 3 ແລະທີ 4 ສອງສະໄໝ, ແລະຮຸ່ນຕໍ່າກວ່າ 18 ປີລາວເຄີຍເປັນລຳດັບທີ 3 ມາແລ້ວ 3​ ສະໄໝ (2002, 2005 ແລະ 2015).

ເບິ່ງລວມແລ້ວຕັ້ງແຕ່ 2015 ຄືນຫຼັງບານເຕະລາວຮຸ່ນໜຸ່ມນີ້ ເບິ່ງຄືວ່າໂດດເດັ່ນແລະຕື່ນເຕັ້ນເຊິ່ງເກືອບທັງໝົດນັ້ນແມ່ນນຳພາໂດຍຄູຝຶກຄົນລາວນັ້ນເອງ, ແຕ່ໃນປັດຈຸບັນເຫັນວ່າກິບານເຕະເຮົາຮຸ່ນນີ້ ສູ້ກັບບັນດາປະເທດໃນພາກພື້ນໄດ້ຍາກແລ້ວ, ຫຼາຍຄົນກໍຈົ່ມວ່າເປັນ ຫຍັງພວກເຮົາຈຶ່ງຈຳເປັນຈ້າງຄົນຕ່າງປະເທດເພາະຄູຝຶກລາວຫຼາຍຄົນກໍມີຄວາມສາມາດແລະຜົນງານທີ່ໂດດເດັ່ນມາແລ້ວ.

ພ້ອມນັ້ນບາງຜ່ອງກໍຈົ່ມວ່າຄູ່ຝຶກທີ່ຈ້າງມານັ້ນສໍ່າກັບວ່າມາຂ້າພອນສະຫວັນຂອງເຍົາວະຊົນເຮົາຢູ່ບ່ອນວ່າເກມບໍ່ມີສີສັນ, ບໍ່ມີຊີວິດ ຊີວາເພາະເນັ້ນເກມຮັບ, ການໂຍນບານເປັນສ່ວນໃຫຍ່ ເຊິ່ງເບິ່ງ ແລ້ວເປັນທີ່ໜ້າຫົດຫູ່ໃຈໃນຄວາມຖອຍຫຼັງນີ້.

ຫຼາຍຄົນເຊື່ອວ່າເຍົາວະຊົນຄົນໜຸ່ມລາວມີພອນສະຫວັນທີ່ດີ (ແລະກໍພິສູດມາຫຼາຍຄັ້ງແລ້ວ) ແຕ່ເປັນຫຍັງພວກເຮົາຈຶ່ງ ຖົດຖອຍລົງຄືທຸກມື້ນີ້, ຈະເຮັດແນວໃດໃຫ້ພວກເຮົາກອບກູ້ເອົາ ກຽດສັກສີຂອງບານເຕະລາວຄືນມາ, ພວກເຮົາບໍ່ອາດຢາກ ເຫັນບານເຕະລາວທີ່ເອົາແຕ່ຕ້ານ, ຖ່ວງເວລາແລະໂຍນບານໄປມາ ໂດຍຂາດການຕໍ່ບານທີ່ເປັນສິລະປະຂອງກິລາ ເຊິ່ງ ບານເຕະລາວ ຕ້ອງມີສັກສີ ແລະ ດີກວ່ານີ້.

error: Content is protected !!