7 ວິທີສ້າງຄວາມສົດໃສໃນມື້ທີ່ນອນໜ້ອຍ

- advert banner 728 90 728x90 - 7 ວິທີສ້າງຄວາມສົດໃສໃນມື້ທີ່ນອນໜ້ອຍ

     – ກາເຟຊ່ວຍໄດ້ : ຄົນທີ່ມັກດື່ມກາເຟຢູ່ແລ້ວຄົງສະບາຍໆ ແຕ່ຖ້າໃຜບໍ່ມັກກາເຟ ແຕ່ຢາກຢູ່ລອດໄປຮອດຕອນແລງໃຫ້ໄດ້  ກໍຕ້ອງອາໄສກາເຟຈັກຈອກ ບໍ່ວ່າຈະດື່ມຢູ່ແລ້ວ ຫລື ຫາກໍເລີ່ມດື່ມ ເຮົາຂໍແນະນຳວ່າ ຄວນດື່ມພຽງ 1 – 2 ຈອກ ໃນຊ່ວງເຊົ້າ ແລະ ກ່ອນເວລາ 14:00 ໂມງ ຈະດີກ່ວາ ຖ້າດື່ມຫລາຍເກີນໄປ ຫລື ດື່ມຊ່ວງເວລາແລງໆ ອາດຈະເຮັດໃຫ້ກາງຄືນນອນບໍ່ຫລັບ ກາຍເປັນວ່າ ຈາກທີ່ອ່ອນເພຍມາຕະຫລອດ ຢາກຈະນອນ ແຕ່ກໍນອນບໍ່ຫລັບ ອາການຮຸນແຮງກ່ວາເກົ່າອີກ.

- new3 - 7 ວິທີສ້າງຄວາມສົດໃສໃນມື້ທີ່ນອນໜ້ອຍ

     – ຫາບ່ອນເຊືອບຫລັບ ປະມານ 15 ນາທີ : ວິທີແກ້ເຫງົານອນທີ່ດີທ່ີສຸດກໍແມ່ນການນອນນັ້ນເອງ, ແຕ່ເຮົາກໍຮູ້ວ່າຖ້ານອນໄດ້ກໍຄົງນອນໄປແລ້ວ ດັ່ງນັ້ນ ຖ້າບໍ່ມີເວລານອນໝົດມື້ ຂໍພຽງແຕ່ 20 ນາທີຊ່ວງເວລາພັກທ່ຽງກໍພໍແລ້ວ ທີ່ຈະເຮັດໃຫ້ເຮົາເອົາໂຕລອດໄປໄດ້ໂດຍໄປຫາບ່ອນເຊືອບຫລັບ. ການນອນເວັນບໍ່ແມ່ນການເສີມສ້າງສະໝອງ, ແຕ່ເປັນການພັກຜ່ອນສະໝອງທີ່ດີທີ່ສຸດ ເອີ້ນໄດ້ວ່າເປັນການສາກແບັດເຕີຣີ ໃຫ້ສະໝອງ ແລະ ຮ່າງກາຍໄດ້ດີກ່ວາການນອນຍາວໆ ໂດຍໃຊ້ເວລາພຽງບໍ່ເກີນ 20 ນາທີໃນຊ່ວງພັກທ່ຽງ ອາດຈະໄປນອນໃນລົດ, ນອນພັກເທິງໂຕະກໍໄດ້ ແລ້ວຕັ້ງໂມງປຸກໄວ້ບໍ່ໃຫ້ເກີນ 20 ນາທີ ຈະໄດ້ບໍ່ເຜີຫລັບຍາວ. ຖ້າໃຜທີ່ຂົ່ມຕາບໍ່ຫລັບ ຍ້ອນສະໝອງຍັງກັງວົນກໍບໍ່ເປັນຫຍັງ ຂໍພຽງແຕ່ນອນຫລັບຕາໄວ້ ແລ້ວຄິດເລື່ອງອື່ນໆທີ່ສະບາຍໃຈ ຫລື ຈະຈິນຕະນາການເຖິງການນອນອາບແດດອຸ່ນໆໃນປ່າສີຂຽວກໍໄດ້ ຈະຊ່ວຍໃຫ້ສະໝອງໄດ້ພັກ ແລ້ວເມື່ອມືນຕາຂຶ້ນມາຈະຮູ້ສຶກ ສົດໃສກ່ວາເກົ່າແນ່ນອນ.

     – ຢູ່ໃນບ່ອນແສງກ້າໆ : ແສງສະຫ່ວາງກ້າໆກະຕຸ້ນສະໝອງໃຫ້ຕື່ນໂຕໄດ້ດີກ່ວາບ່ອນມືດໆ ຍ້ອນເມື່ອຢູ່ໃນບ່ອນມືດ ຮ່າງກາຍເຮົາຈະເກີດຄວາມລຶ້ງເຄີຍວ່າຕ້ອງຫລັບຕານອນ ດັ່ງນັ້ນ ຫາກໃຜທີ່ຕ້ອງເຮັດວຽກໃນບ່ອນມືດໆມົວໆ ອາດເຊືອບຫລັບໄດ້ງ່າຍ ຈຶ່ງຄວນໄປຍ່າງຮັບແສງແດດໃນຊ່ວງເຊົ້າກ່ອນເຮັດວຽກ ເພື່ອໃຫ້ຮ່າງກາຍ ແລະ ສະໝອງໄດ້ຮັບການກະຕຸ້ນ ໂດຍຄວນເປັນແດດທີ່ບໍ່ເກີນ 10 ໂມງເຊົ້າ ເພື່ອບໍ່ໃຫ້ເປັນອັນຕະລາຍຕໍ່ຜິວໜັງ, ແຕ່ຖ້າໃຜຫາແສງແດດຈາກທຳມະຊາດບໍ່ໄດ້ເປີດໄຟໃນ ຫ້ອງໃຫ້ແຈ້ງ ຫລື ຫາໂຄມໄຟຕັ້ງໂຕະມາເປີດຕື່ມກໍຊ່ວຍໄດ້.

– ອອກກຳລັງກາຍ : ຫລາຍຄົນອາດຄິດວ່າການອອກກຳລັງກາຍຈະຍິ່ງເຮັດໃຫ້ຮ່າງກາຍເຮັດວຽກໜັກ ແລ້ວຈະເຫງົານອນຫລາຍຂຶ້ນກ່ວາເກົ່າ, ແຕ່ຄວາມຈິງແລ້ວການອອກກຳລັງກາຍຈະຊ່ວຍຮ່າງກາຍຫລັ່ງໂດພາມີນ ສານເຄມີໃນສະໝອງທີ່ຊ່ວຍກະຕຸ້ນໃຫ້ຮ່າງກາຍມີຄວາມສຸກ ບໍ່ຮູ້ສຶກອ່ອນເພຍ ແລະ ມີເຫື່ອແຮງ ໂດຍຄວນເລືອກອອກກຳລັງກາຍເບົາໆ ປະມານ 20 ນາທີ ເຊັ່ນ : ຍ່າງໄວ, ຈັອກກິ້ງເບົາໆ, ແອໂຣບິກທ່າເບົາໆ ແບບນີ້ຈະຊ່ວຍໃຫ້ຮ່າງກາຍແຈ່ມໃສພ້ອມລຸຍຫລາຍກ່ວາຢາກນອນຕໍ່.

- lattana 1 - 7 ວິທີສ້າງຄວາມສົດໃສໃນມື້ທີ່ນອນໜ້ອຍ

     – ກິນໂປຣຕິນແກ້ເຫງົານອນ : ເຊື່ອບໍ່ວ່າເຖິງຈະເຫງົານອນເທົ່າໃດ ແຕ່ຮ່າງກາຍກໍສັ່ງໃຫ້ເຮົາຫິວໄດ້ຄືເກົ່າ ແລະ ຫລາຍຄົນມັກເລືອກອາຫານກິນງ່າຍໆ ເຊັ່ນ: ເຂົ້າຈີ່, ເຂົ້າໜົມປັງ ມາກິນຮອງທ້ອງ ຍ້ອນຮູ້ສຶກບໍ່ຢາກກິນຫຍັງ ແລະ ຢາກນອນຫລາຍກ່ວາ, ແຕ່ການກິນເຂົ້າຈີ່ຫລື ເຂົ້າໜົມປັງໃນມື້ທີ່ເຫງົານອນ ຈະຍິ່ງເຮັດໃຫ້ຮູ້ສຶກເຫງົານອນ ແລະ ຕາມືນບໍ່ຂຶ້ນຫລາຍກ່ວາເກົ່າ ດັ່ງນັ້ນ ຖ້າບໍ່ຢາກເຫງົານອນຕ້ອງຫລີກເວັ້ນເຂົ້າໜົມຫວານ ຫລື ແປ້ງ ແລ້ວເລືອກກິນຊີ້ນສັດທີ່ມີໂປຣຕິນແທນດີກ່ວາ ຈະຊ່ວຍໃຫ້ຮ່າງກາຍຕື່ນໂຕ ແລະ ສິ່ງສຳຄັນແມ່ນຢ່າກິນຫລາຍເກີນໄປ ເພາະການກິນຫລາຍໆຈະຍິ່ງເຮັດໃຫ້ຮ່າງກາຍໃຫ້ພະລັງງານໃນການຍ່ອຍຫລາຍ.

     – ກິນເຜັດໆສົ້ມໆ : ກິນອາຫານທີ່ມີລົດຊາດເຜັດໆສົ້ມໆ ກິ່ນແຮງໆ ຫລື ໃຫ້ຄວາມຮູ້ສຶກເຢັນ ຈະຊ່ວຍໃຫ້ຮ່າງກາຍຕື່ນໂຕໄດ້ໄລຍະໜຶ່ງ ເຊັ່ນ : ເຂົ້າໜົມອົມສົ້ມໆ, ໝາກຂາມສົ້ມ, ໝາກກ້ຽງ ຫລື ນຳ້ຊາກິ່ນມິ້ນ ຫລື ຈະກິນຕຳໝາກຫຸ່ງ, ຕຳໝີ່ ຮັບຮອງວ່າຕື່ນໄດ້ໝົດມື້.

     – ພະຍາຍາມເຮັດທຸກຢ່າງໃຫ້ເປັນປົກກະຕິ : ເມື່ອເລີກວຽກກັບມາເຮືອນແລ້ວ ຫລາຍຄົນເລືອກທີ່ຈະນອນຢູ່ເທິງຕຽງທັນທີ ແຕ່ການເຮັດແບບນີ້ຈະຍິ່ງບໍ່ເປັນການດີກໍຄື ຢ່າກັບຮອດເຮືອນແລ້ວນອນເລີຍ ຄວນກິນເຂົ້າ ເຮັດທຸກຢ່າງໃຫ້ປົກກະຕິ ເຖິງວ່າຈະຮູ້ສຶກເຫງົານອນຫລາຍກໍຕາມ, ຢ່ານອນທັນທີ, ຢ່ານອນກ່ອນ 20:00 ໂມງ, ແຕ່ໃຫ້ເຂົ້ານອນໃຫ້ໄວຂຶ້ນ ປະມານ 21:00 – 22:00 ໂມງກໍໄດ້ ແລະ ນອນໃຫ້ຄົບ 8 ຊົ່ວໂມງ ຈະຊ່ວຍໃຫ້ຮ່າງກາຍຟື້ນຟູໄດ້ດີກ່ວາ ເມື່ອຕື່ນຂຶ້ນມາມື້ໃໝ່ກໍຈະສົດຊື່ນ ບໍ່ອ່ອນເພຍ ເພາະຖ້າເຮົານອນທັນທີ ເຮົາຈະຕື່ນມາກາງເດິກ ແລ້ວກໍນອນຕໍ່ບໍ່ຫລັບ ສຸດທ້າຍກໍກັບໄປຈຸດເກົ່າ ຄືນອນບໍ່ພໍ, ຕື່ນເຊົ້າມາບໍ່ສົດໃສອີກ.

error: Content is protected !!