ລົດພາທ່ຽວ ໃຫ້ຫຼຸດຄວາມສ່ຽງ

- advert banner 728 90 728x90 - ລົດພາທ່ຽວ ໃຫ້ຫຼຸດຄວາມສ່ຽງ

ໂດຍ: ມຶກບໍ່​ແຫ້ງ

- new3 - ລົດພາທ່ຽວ ໃຫ້ຫຼຸດຄວາມສ່ຽງ

ການທີ່ພວກເຮົາ ຈະດຶງດູດນັກທ່ອງທ່ຽວເຂົ້າມາປະເທດໄດ້ນັ້ນ ບໍ່ສະເພາະ ແຕ່ ຄວາມສົນໃຈທາງດ້ານ ວັດທະນະທຳ ​ແລະ ທຳມະຊາດ​ເທົ່າ​ນັ້ນ ແຕ່ເຂົາເຈົ້າ ຍັງຄຳນຶງເຖິງຄວາມປອດໄພນຳອີກ.

ເຫດການສະເທືອນຂວັນ ລົດເມ ທີ່ບັນທຸກນັກທ່ອງທ່ຽວຕົກເຫວຢູ່ເຂດ ບ້ານນາເມືອງ, ເມືອງນານ, ແຂວງຫຼວງພະບາງໃນເວລາປະມານ 4 ໂມງແລງຂອງ ວັນທີ 19/08/2019 ນັ້ນໄດ້ສະທ້ອນ ອີກເທື່ອໜຶ່ງວ່າ ຄວາມ ປອດໄພ ຂອງນັກທ່ອງທ່ຽວ ທີ່ເຂົ້າມາປະເທດເຮົານັ້ນ ຍັງຕ້ອງໄດ້ຮັບ ການກວດກາຢ່າງເຄັ່ງຄັດຕຶ່ມອີກ.

ເຫດການຄັ້ງນີ້ ຖືວ່າຮ້າຍແຮງສົມຄວນ ໂດຍເຮັດໃຫ້ມີຜູ້ເສຍຊີວິດທັງ ໝົດ 13 ຄົນເປັນນັກທ່ອງທ່ຽວຈີນ ໃນ​ນັ້ນ​ມີຍິງ 8 ຄົນ, ບາດເຈັບ ອີກ 33 ຄົນ ແລະ 2 ຄົນເປັນຄົນລາວຄື: ຄົນຂັບລົດ ແລະ ພະນັກງານນຳທ່ຽວ.

ຕາມການສັນນິຖານຂອງເຈົ້າໜ້າທີ່ໃນເບື້ອງຕົ້ນ: ອຸປະຕິເຫດໃນຄັ້ງນີ້ ອາດເກີດມາຈາກສະພາບເຕັກນິກຂອງລົດ, ພູມສັນຖານຂອງບ່ອນເກີດ ອຸປະຕິເຫດ ແລະ ສະພາບດິນຟ້າອາກາດພ້ອມທັງຄວາມຊຳນິຊໍານານ ຂອງຜູ້ຂັບລົດ. ແຕ່ເຖິງຢ່າງໃດກໍ່ຕາມທາງເຈົ້າໜ້າທີ່ຈະມີການສືບສວນ-ສອບສວນຫາສາຍເຫດຕື່ມອີກ.

- lattana 1 - ລົດພາທ່ຽວ ໃຫ້ຫຼຸດຄວາມສ່ຽງ

ສິ່ງດັ່ງກ່າວ ສະທ້ອນໃຫ້ພວກເຮົາເຫັນວ່າ ຄວາມເອົາໃຈໃສ່ ເລື່ອງ ຄວາມປອດໄພຂອງນັກທ່ອງທ່ຽວ ຍັງໜ້າເປັນຫ່ວງ ບວກກັບ ສະພາບເສັ້ນ ທາງ ແລະ ພູມສັນຖານ ເຊິ່ງ ໄລຍະນີ້ ກໍເປັນຍາມຝົນ ທີ່ມີຄວາມ ສ່ຽງ ສູງ ໃນການເກີດອຸບັດເຫດ ເພາະສະນັ້ນ ການເພີ່ມຄວາມລະມັດ ລະວັງ ແລະ ປ້ອງກັນ ລ່ວງໜ້ານັ້ນ ຈຶ່ງເປັນສິ່ງຈຳເປັນ.

ແນ່ນອນ ບໍ່ວ່າສາເຫດໃດກໍຕາມ ອຸບັດຕິເຫດ ຄັ້ງນີ້ ອາດສ້າງພາບພົບ ທີ່ບໍ່ຄ່ອຍດີ ຕໍ່ວຽກງານທ່ອງທ່ຽວຂອງ ພວກເຮົາພໍເທົ່າໃດ ເນື່ອງວ່າ ຜູ້ທີ່ ເປັນພີ່ນ້ອງ, ຄົນຮູ້ຈັກ ແລະນັກທ່ອງທ່ຽວ ທົ່ວໄປ ອາດຖືວ່າ ມາດຖານການ ບໍລິການ ທາງດ້ານໂດຍສານລາວນັ້ນ ຍັງຕໍ່າ, ມີຄວາມສ່ຽງ ໃນການ ເກີດອຸປະ​ຕິເຫດ ເພາະສະນັ້ນ ເຂົາເຈົ້າອາດຫຼີກລ່ຽງ ການນຳໃຊ້ບໍລິການ ໃນອະນາຄົດ ກໍເປັນໄດ້.

ເຖິງວ່າ ອຸບັດຕິເຫດ ແມ່ນສິ່ງບໍ່ປາຖະໜາ ແລະ ບາງຄັ້ງກໍເກີດຈາກ ສະພາບການ ທີ່ບໍ່ສາມາດຄວບຄຸມໄດ້ ແຕ່ການປ້ອງກັນ ແລະ ເອົາໃຈໃສ່ ອາດຫຼຸດຜ່ອນຄວາມສ່ຽງໄດ້ ເຊັ່ນ ກວດກາ ເຕັກນິກ ລົດ, ຮັບປະກັນ ຄວາມຊຳນານງານ​ຄົນ​ຂັບ, ຊອກຫາຂໍ້ມູນ ສະພາບເສັ້ນ ທາງ ຕະຫຼອດຮອດພູມສັນຖານ ຫຼື ສະພາບອາກາດ.

ໃນທ່າມກາງ ທີ່ລັດຖະບານເຮົາກຳລັງ ເລັ່ງໃສ່ວຽກງານ ທ່ອງທ່ຽວ ເປັນຂະແໜງການທີ່ສຳຄັນຕໍ່ການພັດທະນາ ເສດຖະກິດຂອງປະເທດ ແຕ່ພ້ອມດຽວກັນນັ້ນ ພວກເຮົາ ກໍປະສົບພົບພໍ້ ກັບ ສິ່ງທ້າທາຍຫຼາຍປະການ ທີ່ເຮັດໃຫ້ນັກທ່ອງທ່ຽວ ເຂົ້າມາປະເທດເຮົາ ຕໍ່າກວ່າ ທີ່ຄາດຫວັງໄວ້. ເມື່ອເປັນເຊັ່ນນັ້ນ ພວກເຮົາ ໄດ້ແນເປົ້າ ໃສ່ນັກ ທ່ອງທ່ຽວຈີນ ເປັນຕະຫຼາດສຳຄັນ ຂອງວຽກງານທ່ອງທ່ຽວລາວ ໂດຍຖື ເອົາ 2019 ເປັນປີທ່ອງທ່ຽວ ລາວ-ຈີນ. ແຕ່ເຫດການດັ່ງກ່າວ ເຮັດໃຫ້ ນັກທ່ອງທ່ຽວຈີນ ຕ້ອງຫວັ່ນພະຫວາ. ເພາະສະນັ້ນ,  ຕ້ອງໄດ້ເບິ່ງຄືນເລື່ອງຄວາມປອດໄພຂອງນັກທ່ອງທ່ຽວ ຕຶ່ມອີກ ໂດຍສະເພາະ ການໂດຍສານ ທີ່ໄຮ້ມາດຖານ ເພື່ອແນໃສ່ ໃນການສ້າງຄວາມໝັ້ນໃຈ ຕໍ່ແຂກຄົນທີ່ ຈະເຂົ້າມາ ທ່ຽວຊົມບ້ານເຮົາ ໃນອະນາຄົດ.

error: Content is protected !!