ຫລາຍ​ໂຮງຮຽນ​​ເປີດ​ສົກຮຽນ​ໃໝ່​ດ້ວຍ​ບັນຍາ​ກາດ​ຄຶກຄື້ນ

- advert banner 728 90 728x90 - ຫລາຍ​ໂຮງຮຽນ​​ເປີດ​ສົກຮຽນ​ໃໝ່​ດ້ວຍ​ບັນຍາ​ກາດ​ຄຶກຄື້ນ

​​ມື້ວານ​ນີ້, ຊຶ່ງ​ກົງ​ກັບ​ວັນ​ຈັນ​ທີ 2 ກັນຍາ ​ເປັນ​ມື້​ໄຂ​ສົກຮຽນ​ໃໝ່​ 2019-2020 ຢ່າງ​ເປັນ​ທາງ​ການ​ຂອງ​​ໂຮງຮຽນ​ແຫ່ງ​ຕ່າງໆ​ໃນ​ທົ່ວ​ປະ​ເທດ​, ​ເພື່ອ​ພ້ອມ​ກັນດໍາ​​ເນີນ​ການ​ຮຽນ-ການສອນດ້ວຍ​ຄວາມ​ຫ້າວ​ຫັນ ​ແລະ ມີ​ຄຸນ​ນະພາ​ບ.

- new3 - ຫລາຍ​ໂຮງຮຽນ​​ເປີດ​ສົກຮຽນ​ໃໝ່​ດ້ວຍ​ບັນຍາ​ກາດ​ຄຶກຄື້ນ
- 69821182 2377609432480699 4155046237977968640 o - ຫລາຍ​ໂຮງຮຽນ​​ເປີດ​ສົກຮຽນ​ໃໝ່​ດ້ວຍ​ບັນຍາ​ກາດ​ຄຶກຄື້ນ

​ໃນ​ຕອນ​ເຊົ້າ​ຂອງ​ມື້​ດັ່ງກ່າວ, ສະ​ເພາະ​ຢູ່​ນະຄອນຫລວງ​ວຽງ​ຈັນ​ເຖິງ​ວ່າ​ສະພາບ​ການ​ສັນຈອນ​ບົນ​ທ້ອງ​ຖະໜົນ​​ຈະ​ມີ​ຄວາມ​ແອ​ອັດ​ສັບສົນ​​​​ໃນຫລາຍ​ຈຸດກໍ​ຕາມ, ແຕ່ຢູ່​ໂຮງຮຽນ​ແຫ່ງຕ່າງໆ​​ທັງ​ພາກ​ລັດ ​ແລະ ​ເອກະ​ຊົນ ກໍ​ເຕັມ​ໄປ​ດ້ວຍຮອຍ​ຍີ້ມ ​ແລະ ບັນຍາກາດອັນປະຕິ​ຊົ​ມ​ຊື່ນ​ຂອງ​ຜູ້​ປົກຄອງ, ນ້ອງ​ນັກຮຽນ-ນັກ​ສຶກສາ ​ແລະ ​ບັນ​ດາ​ຄູ​ອາຈານທີ່​​ໄດ້​ພົບ​ໜ້າ​ພໍ້​ຕາ​ກັນອີກ​​ໃນ​ສົກຮຽນ​ໃໝ່. ​

  ສະ​ເພາະ​ຢູ່​ນະຄອນຫລວງ​ວຽງ​ຈັນ​ ພິທີ​ໄຂສົກ​ຮຽນ​ໃໝ່​ໄດ້​ຈັດ​ຂຶ້ນ​ໃນ​ວັນ​ທີ 30 ສິງຫາ​ຜ່ານ​ມາ ຢູ່​ໂຮງຮຽນ​ມັດທະຍົມ​ສົມບູນ​ນາ​ຊາຍ​ທອງ,​ ໂດຍ​ມີ​ທ່ານ ພຸດ ສິມ​ມາ​ລາ​ວົງ ຮອງ​ລັດ​ຖະ​ມົນ​ຕີ​ກະ​ຊ​ວງ​ສຶກ​ສາ​ທິ​ການ ແລະ ກິ​ລາ, ທ່ານ ສີ​ຫູນ ສິດ​ທິ​ລື​ໄຊ ຮອງ​ເຈົ້າ​ຄອງ​ນະ​ຄອນ​ຫລວງວຽງ​ຈັນ, ພ້ອມ​ດ້ວຍຫົວ​ໜ້າ​ຫ້ອງ​ການ​ສຶກ​ສາ​ທິ​ການ ແລະ ກິ​ລາ 9 ຕົວ​ເມືອງ, ພະ​ນັກ​ງານ​ຄູ-ອາ​ຈານ ແລະ ນັກ​ຮຽນ​ເຂົ້າ​ຮ່ວມ​ເປັນ​ຈໍານວນຫລາຍ.

- 69408426 2377608602480782 467727393142865920 o - ຫລາຍ​ໂຮງຮຽນ​​ເປີດ​ສົກຮຽນ​ໃໝ່​ດ້ວຍ​ບັນຍາ​ກາດ​ຄຶກຄື້ນ

ໃນ​ໂອ​ກາດນີ້, ທ່ານຫົວ​ໜ້າ​ພະ​ແນກ​ສຶກ​ສາ​ທິ​ການ ແລະ ກິ​ລານະ​ຄອນຫລວງວຽງ​ຈັນ ​ໃຫ້​ຮູ້​ວ່າ: ມາ​ຮອດປັດຈຸບັນ, ວຽ​ກ​ງານ​ການ​ສຶກ​ສາໄດ້​ມີ​ການ​ຂະ​ຫຍາຍ​ຕົວນັບ​ທັງ​ດ້ານ​ປະ​ລິ​ມານ ແລະ ຄຸນ​ນະ​ພາບ, ຈຳ​ນວນ​ໂຮງ​ຮຽນ, ຫ້ອງ​ຮຽນ, ຄູ​ສອນ ແລະ ນັກ​ຮຽນ ​ໄດ້​ເພີ່ມ​ຂຶ້ນ, ການ​ສຶກ​ສາໄດ້​ຮັບ​ການ​ພັດ​ທະ​ນາ​ໄປ​ຕາມ 3 ລັກ​ສະ​ນະ ແລະ 5 ຫລັກ​ມູນຂອງ​ການ​ສຶກ​ສາ ​ແລະ ​ໄດ້​ຂະຫຍາຍ​ໄປ​ສູ່​ທ້ອງ​ຖິ່ນ​ຊົນ​ນະ​ບົດ​ຫ່າງ​ໄກຊອກ​ຫລີກ​ໄດ້​ຢ່າງ​ກວ້າງຂວາງ, ອັນເປັນ​ເງື່ອນ​ໄຂ​ໃຫ້​​ເດັກນ້​ອຍລູກ​ຫລານ​ຜູ້​ດ້ວຍ​ໂອ​ກາດ​ໄດ້​ຮັບ​ການ​ສຶກ​ສາ​ຢ່າງ​ທົ່ວ​​ເຖິງ.    

ປັດຈຸບັນຢູ່​ນະ​ຄອນ​ຫລວງວຽງ​ຈັນມີ​ໂຮງ​ຮຽນ​ພາກ​ລັດ ແລະ ເອ​ກະ​ຊົນ ທັງ​ໝົດ 1.099 ແຫ່ງ, ໃນ​ນີ້, ໂຮງ​ຮຽນ​ລ້ຽງ​ເດັກ ແລະ ອາ​ນຸ​ບານມີ 389 ແຫ່ງ, ໂຮງ​ຮຽນ​ປະ​ຖົມມີ 533 ແຫ່ງ ແລະ ໂຮງ​ຮຽນ​ມັດ​ທະ​ຍົມ 177 ແຫ່ງ ​ແລະ ມີ​ນັກ​ຮຽນ​ຊັ້ນ​ຕ່າງໆ 2 ​ແສນ​ກວ່າຄົນ (ຍິງ97.900 ຄົນ).

- lattana 1 - ຫລາຍ​ໂຮງຮຽນ​​ເປີດ​ສົກຮຽນ​ໃໝ່​ດ້ວຍ​ບັນຍາ​ກາດ​ຄຶກຄື້ນ

  ທ່າ​ນອໍ​ານວຍການ​​ໂຮງຮຽນ ມສ ວຽງ​ຈັນ ​ໃຫ້​ຮູ້​ວ່າ: ບັນຍາກາດ​ໃນ​ມື້​ໄຂ​ສົກຮຽນ​ໃໝ່​ຢູ່​ໂຮງຮຽນ​ຂອງ​ຕົນ​ແມ່ນ​ມີ​ຄວາມ​ເປັນ​ລະບຽບ​ຮຽບຮ້ອຍ​ດີ,​ ​ໂດຍ​ສະ​ເພາະ​ແມ່ນ​ນັກຮຽນທຸກ​ຊັ້ນ​ໄດ້​ມາສະ​ເໜີ​ຕົວ​ເຂົ້າ​ຮຽນຄົບ​ຕາມ​ຕົວ​ເລກກໍານົດ​ໄວ້, ພ້ອມ​ທັງ​ມອບ​ໃຫ້​ຄູ​ປະ​ຈໍາ​ແຕ່ລະຫ້ອງຈັດການ​ເລືອກຄະນະ​ຫ້ອງ ແລະ ຫົວໜ້າ​ໜ່ວຍ​​​ຕາມ​ລະບຽບ. ສ່ວນ​ດ້ານຄູ-ອາຈານ, ​ໂຕະ​ຕັ່ງ ແລະ ອຸປະກອນ​ຕ່າງໆ​ເພື່ອ​ຮັບ​ໃຊ້ການ​ຮຽນ​-ການສອນ​ແມ່ນ​ມີ​ຄວາມ​ພ້ອມ 100% ​ແລະ ທາງ​​ໂຮງຮຽນ​ຂອງ​ຕົນ​ຈະ​ສືບຕໍ່​ປະຕິບັດ​ລະບຽບ​ຫ້າມ​ບໍ່​ໃຫ້​ນັກຮຽນ​ໃຊ້​ໂທລະສັບ​ມື​ຖື​ໃນ​ຊົ່ວ​ໂມງ​ຮຽນ, ບໍ່​​ໃຫ້​ກັບ​ເມື່ອ​ກິນ​ເຂົ້າທ່ຽງ​ຢູ່​ເຮືອນ ​ແລະ ນັກຮຽນຜູ້​ທີ່​ຮຽນ​ອ່ອນ​ຕ້ອງ​ໄດ້​ຮຽນ​ເພີ່​ມ​ຕື່ມ​ອີກໃນ​ຕອນ​ແລງ.

ຂະນະ​ດຽວ​ກັນ, ທ່ານ​ອໍານວຍ​ການ​ໂຮງຮຽນ​ ມສ ສີ​ໂຄດ​ຕະບອງ ກໍ​​ໃຫ້​ຮູ້​ວ່າ: ​ມື້​ໄຂ​ສົກຮຽນ​ໃໝ່​ນີ້​ ຢູ່​ໂຮງຮຽນ​ຂອງ​ຕົນ​ກໍ​ມີ​ບັນຍາກາດ​ຄຶກຄື້ນດີ, ​​​ນັກຮຽນ-ນັກ​ສຶກສາ​ ໄດ້ມີ​ຄວາມ​ກະຕືລື​ລົ້ນສູງ​ຕໍ່​ການ​ເຂົ້າ​ມາສຶກສາ​ຮໍ່າຮຽນ ​ແລະ ​ໃນ​ສົກຮຽນ​ນີ້ ຈະ​​ເນັ້ນ​ໃຫ້ຄູ-​ອາຈານ ສືບ​ຕໍ່​ເອົາ​ໃຈ​ໃສ່​ສິດສອນນັກຮຽນຕາມ​ຫລັກສູດ​ທີ່​ກະຊວງ​ສຶກສາ​ທິການ ​ແລະ ກິລາ​ວາງ​ອອກ​ໃຫ້​ມີ​ປະສິດທິ​ຜົນສູງ.

- 70504689 478553669654679 7094851133323083776 n 1024x515 - ຫລາຍ​ໂຮງຮຽນ​​ເປີດ​ສົກຮຽນ​ໃໝ່​ດ້ວຍ​ບັນຍາ​ກາດ​ຄຶກຄື້ນ

​ໃນສານ​ຂອງທ່ານ​ນາຍົກລັດຖະມົນຕີ​​ແຫ່ງ ສປປ ລາວ ເນື່ອງ​ໃນ​ໂອກາດ​ໄຂ​ສົກຮຽນ​ໃໝ່​ນີ້, ​ກໍໄດ້​ຮຽກຮ້ອງ​ໃຫ້ຄູ-ອາຈານ ເພີ່ມທະວີຄວາມຮັບຜິດຊອບຕໍ່ຫນ້າທີ່ວຽກງານຂອງຕົນ ເພື່ອຖ່າຍທອດຄວາມ​ຮູ້ໃຫ້ແກ່ນັກຮຽນ-ນັກສຶກສາມີປະສິດທິພາບສູງຂຶ້ນ, ຂະນະ​ດຽວ​ກັນ ນັກຮຽນ-ນັກສຶກສາ ກໍຕ້ອງຕັ້ງໃຈຄົ້ນຄວ້າຮໍ່າຮຽນ, ມີຄວາມດຸຫມັ່ນຂະຫຍັນພຽນ, ຝຶກຝົນຫໍ່​ຫລອມຕົນ​ເອງໃຫ້ກາຍເປັນນັກຮຽນທີ່ດີ, ນັກຮຽນເກັ່ງຂອງຄູ-ອາຈານ, ເປັນລູກຫລານທີ່ດີຂອງຜູ້ປົກຄອງ, ເປັນພົນລະເມືອງດີຂອງປະເທດຊາດ ແລະ ເປັນຜູ້ທີ່ມີຄວາມຮູ້ຄວາມສາມາດ ເພື່ອສຶບທອດພາລະກິດຂອງຊາດຈະມອບຫມາຍໃຫ້, ພິ​ເສ​ດຮຽກຮ້ອງ​ມາ​ຍັງການຈັດຕັ້ງພັກ-ລັດ, ອົງການຈັດຕັ້ງມະຫາຊົນ, ຜູ້ປົກຄອງ, ຜູ້ປະກອບການ ແລະ ສັງຄົມ ຈົ່ງພ້ອມກັນປະກອບສ່ວນຕາມພາລະບົດບາດຂອງຕົນໃນການສຶກສາອົບຮົມບົ່ມສອນນັກຮຽນ-ນັກສຶກສາ ກໍຄືລູກຫລານຂອງຕົນໃຫ້ເຫັນຄວາມສໍາຄັນຂອງການສຶກສາໃນການສ້າງອະນາຄົດຂອງຕົນເອງ ກໍຄືປະເທດຊາດ ແລະ ໃຫ້ຖືເອົາວຽກງານການສຶກສາເປັນຫນ້າທີ່ ແລະ ຄວາມຮັບຜິດຊອບຂອງຫມົດທຸກຄົນໃນທົ່ວສັງຄົມ.

error: Content is protected !!