ສ້າງຊາຍແດນລາວ-ກຳປູເຈຍ ເປັນຊາຍແດນມິດຕະພາບ

ສ້າງຊາຍແດນລາວ-ກຳປູເຈຍ ເປັນຊາຍແດນມິດຕະພາບ - advert banner 728 90 728x90 - ສ້າງຊາຍແດນລາວ-ກຳປູເຈຍ ເປັນຊາຍແດນມິດຕະພາບ

ໂດຍ: ທິດ​ກ່ຳ

ສ້າງຊາຍແດນລາວ-ກຳປູເຈຍ ເປັນຊາຍແດນມິດຕະພາບ - new3 - ສ້າງຊາຍແດນລາວ-ກຳປູເຈຍ ເປັນຊາຍແດນມິດຕະພາບ

ກ່າວ​ເຖິງ​ຊາຍ​ແດນ ລາວ-ກຳປູ​ເຈຍ ຍັງ​ມີ​ບາງ​ຈຸດ, ບາງ​ບ່ອນ​ບໍ່​ທັນ​ໄດ້​ປັກ​ຫລັກ​ໝາຍ​ເພາະ​ຍັງ​ມີ​ອັນ​ຄົງ​ຄ້າງ, ຂ້ອງໆ​ຄາໆ​ມາ​ຢ່າ​ງຍາວ​ນານ​ຜ່ານ​ຫລາຍ​ເຊັ່ນ​ຄົນ​ແລ້ວຈົນມາ​ຮອດ​ທຸກ​ວັນ​ນີ້, ບັນຫາ​ຊາຍ​ແດນ​ກໍ​ຍັງ​ແກ່ຍາວ, ບໍ່​ທັນ​ລົງ​ລອຍ​ກັນ​ກ່ຽວ​ກັບ​ການ​ປັກຫລັກ​ໝາຍ.

​        ເມື່ອ​ຕັ້ງ​ໂຈດ​ກັນ​ວ່າ​ເປັນ​ຫຍັງ ຈຶ່ງ​ແກ່ຍາວ​ມາ​ເຖິງ​ທຸກ​ວັນ​ນີ້? ຕາມ​ເຮົາ​ວ່າ​ມັນ​ກໍ​ມີ​ສາ​ເຫດ​ຕັ້ງ​ແຕ່​ສະ​ໄໝ​ອາ​ດິດຍ້ອນ​ສອງ​ປະ​ເທດ​ໄດ້​ຕົກ​ຢູ່​ໃນ​ຊາຕາກຳ​ອັນ​ດຽວ​ກັນ, ຖືກ​ຝຣັ່ງ​​ເຂົ້າມາ​ບຸກລຸກ​ຮຸກ​ຮານ​ຍຶດ​ເອົາ​ລາວ ​ແລະ ກຳປູ​ເຈຍ​ເປັນ​ຫົວ​ເມືອງ​ຂຶ້ນ​ແລ້ວ​ກໍ​ຖື​ເອົາ​ສາມ​ປະ​ເທດ​ລາວ, ຫວຽດນາມ ​ແລະ ກຳປູ​ເຈຍ ​ໃຫ້​ເປັນ​ປະ​ເທດ​ດຽວ​ເອີ້ນວ່າ ອິນ​ດູ​ຈີນ​ຝຣັ່ງ.

ຍັງ​ບໍ່​ແລ້ວ​ແຕ່​ເທົ່າ​ນັ້ນ, ​ຝຣັ່ງ​ຍັງ​ໄດ້​ແບ່ງ​ດິນ​ແດນ​ປະ​ເທດ​ລາວ​ລ້ານ​ຊ້າງ​ກັບ​ສະຫຍາມ​ໂດຍ​ຖື​ເອົາ​ແມ່ນ້ຳຂອງ​ເປັນ​ເຂດ​ແດນ ​ຈົນ​ມາ​ເຖິງ​ທຸກ​ວັນ​ນີ້​ລາວ​ຝັ່ງ​ຂວາ​ຄື​ພາກ​ອີສານ​ກໍ​ໄດ້​ຕົກ​ເປັນ​ຂອງ​ສະຫຍາມ​ປົກຄອງ​ກັນ​ມາ​.

​ເວົ້າ​ເຖິງ​ຄວາມ​ສຳພັນ​ສາມັກຄີ​ຮັກ​ແພງ​ກັນ​ລະຫວ່າງ​ປະຊາຊົນ​ລາວ​ກັບ​ປະຊາຊົນ​ກຳປູ​ເຈຍ​ເຄີຍ​ມີ​ມູນ​ເຊື້ອມາ​ແຕ່​ປາງ​ປະຖົມ​ບູຮານ, ​ເປັນ​ເມືອງ​ໄພ້, ​ເມືອງ​ເຂີຍ​ໃນ​ຍຸກ​ເຈົ້າຟ້າ​ງຸ່ມ​ມະຫາລາດ. ​ໃນ​ສະ​ໄໝ​ນັ້ນ​ໄດ້​ມີ​ຕຳນານ​ກ່າວ​ໄວ້​ວ່າ: ຕອນ​ເຈົ້າຟ້າ​ງຸ່ມ​ຍັງ​ນ້ອຍ​ໄດ້​ລ່ອງ​ແພ​ໄປ​ຮຽນ​ວິຊາ​ອາຄົມ​ສາດຕະສິນ​ຢູ່​ປະ​ເທດ​ຂະ​​ເໝນ.

​        ເມື່ອ​ຮຽນ​ຈົບ​ແລ້ວ​ພະ​ເຈົ້າວໍຣະມັນ​ທີ່​ເປັນ​ເຈົ້າ​ແຜ່ນດິນ​ຂະ​​ເໝນ​ໃນ​ສະ​ໄໝ​ນັ້ນ, ​ເຫັນ​ວ່າ​ເຈົ້າຟ້າ​ງຸ່ມ​ເປັນ​ຄົນ​ສະຫລາດ, ຮຽນ​ກໍ​ເກັ່ງ​ເລີຍ​ຮັບ​ເອົາ​ເປັນ​ລູກ​ເຂີຍ​ໂດຍ​ມອບ​ຍານາງ ​ແກ້ວ​ເກັງຍາ ຫລື ຊື່​ໜຶ່ງ​ວ່າ​ນາງ ​ແກ້ວ​ຍອດ​ຟ້າ ​ໃຫ້​ເປັນ​ເອກະ​ອັກຄະມະ​ເຫ​ສີ.

ຫລັງ​ຈາກ​ນັ້ນຕໍ່​ມາ​ເຈົ້າຟ້າ​ງຸ່ມ​ຈຶ່ງ​ໄດ້​ຂຶ້ນມາ​ຍັງ​ປະ​ເທດ​ລ້ານ​ຊ້າງ​ເພື່ອ​ຕີ​ເອົາ​ບັນດາ​ຫົວ​ເມືອງ​ທີ່​ເປັນ​ລັດ​ລາວ ​ເອກະລາດ​ມາ​ເຕົ້າ​ໂຮມ​ເຂົ້າກັນ​ເປັນອັນ​ໜຶ່ງ​ອັນ​ດຽວ​ແລ້ວ​ປະກາດ​ເປັນ​ປະ​ເທດ​ລ້ານ​ຊ້າງ​ທີ່​ມີ​ພື້ນທີ່​ອັນ​ກວ້າງ​ໃຫຍ່​ໄພສານ.

ຕະຫລອດ​ຮອດ​ສາດສະໜາ​ພຸດ​ທີ່​ພວກ​ເຮົາ​ພາກັນ​ນັບຖື​ມາ​ທຸກ​ວັນ​ນີ້​ກໍ​ແມ່ນ​ເຈົ້າຟ້າ​ງຸ່ມ​ລວມທັງ​ນັກປາດ​ອາຈານ​ຄົນ​ຂະ​ເໝນ​ເປັນ​ຜູ້ນຳ​ເອົາ​ມາ​ໃນ​ສະ​ໄໝ​ນັ້ນ, ນີ້​ຄື​ຫລັກ​ຖານ​ຕຳນານ​ແຫ່ງ​ຄວາມ​ສຳຄັນ​ໃນ​ຍຸກ​ປະຫວັດສາດ.

ສ້າງຊາຍແດນລາວ-ກຳປູເຈຍ ເປັນຊາຍແດນມິດຕະພາບ - lattana 1 - ສ້າງຊາຍແດນລາວ-ກຳປູເຈຍ ເປັນຊາຍແດນມິດຕະພາບ

ພໍ​ຕົກ​ມາ​ໃນ​ສະ​ໄໝ​ການ​ຕໍ່ສູ້​ກູ້​ຊາດ, ລາວ ​ແລະ  ກຳປູ​ເຈຍ ກໍ​ຍັງ​ໄດ້​ຮ່ວມ​ຢູ່​ໃນ​ຊາຕາກຳ ອັນ​ດຽວ​ກັນ​ໃນ​ພາລະກິດ​ຕໍ່ສູ້​ປົດ​ປ່ອຍ​ຊາດ​ໂດຍ​ມີ​ພັກ​ຄອມ​ມູນິດ​ອິນດູຈີນ​ເປັນ​ຜູ້ນຳ​ພາ​ການ​ປະຕິວັດ​ຂອງ​ສາມ​ຊາດ​ອິນດູຈີນ​ຈົນ​ມາ​ຮອດ​ຊຸມ​ປີ 50 ພັກ​ກອມ​ມູນິດ​ອິນດູຈີນ ຈຶ່ງ​ໄດ້​ແຍກ​ຕົວ​ອອກ​ເປັນ​ພັກ​ໃຜ​ພັກ​ມັນ​ຄື: ພັກ​ປະຊາຊົນ​ປະຕິວັດ​ລາວ, ພັກ​ກອມ​ມູນິດ ຫວຽດນາມ ​ແລະ ພັກ​ປະຊາຊົນ​ກຳປູ​ເຈຍ ​ໃນ​ປັດຈຸບັນ.

ດ້ວຍ​ມູນ​ເຊື້ອ ​ແລະ ​ເຫດການ​ທາງ​ປະຫວັດສາດ​ຂອງ​ສອງ​ປະ​ເທດ​ໃນ​ການ​ປົກ​ປັກ​ຮັກສາ ​ແລະ ສ້າງສາ​ພັດທະນາ​ປະ​ເທດ​ຊາດ ປະຊາຊົນ​ທັງ​ສອງ​ປະ​ເທດ​ທີ່​ມີ​ຮີດຄອງ​ປະ​ເພນີ​ວັດທະນະທຳ ທີ່​ຄ້າຍຄື​ກັນ​ປະຊາຊົນ​ດຳລົງ​ຊີວິດຢູ່​ຕາມ​ຊາຍ​ແດນ​ກໍ​ໄດ້​​ໄປມາຫາສູ່​ກັນ​ຮັກ​ແພງ​ກັນ​ຈົນ​ມາ​ເຖິງ​ທຸກ​ວັນ​ນີ້.

ກ່ຽວ​ກັບ​ບັນຫາ​ຊາຍ​ແດນ​ທີ່​ໄດ້​ແກ່ຍາວ​ມາ​ແຕ່​ສະ​ໄໝ​ປະຫວັດສາດ​ອັນ​ເປັນ​ບັນຫາ​ຄົງ​ຄ້າງ​ແກ່ຍາວ​ມາ​ໃຫ້​ຄົນ​ຮຸ້ນ​ນີ້​ກໍ​ຕ້ອງ​ໄດ້​ພາກັນ​ແກ້ຢ່າງ​ຍຸດຕິ​ທຳ. ຄົນ​ເຊື້ອຊາດ​ລາວ, ​ເວົ້າພາສາ​ລາວ, ​ເປັນ​ຊົນ​ເຜົ່າ​ລາວ​ທີ່​ກາຍ​ເປັນ​ຄົນ​ກຳປູ​ເຈຍ ຍັງ​ມີ​ຫລາຍ​ພັນ​ຫລາຍ​ໝື່ນ.

​ເທົ່າ​ທີ່​ຜ່ານ​ມາ, ທິດ​ກ່ຳ​ໄດ້​ສຳ​ພັດ​ກັບ​ຄົນ​ກຳປູ​ເຈຍ​ຫລາຍ​ສະຫາຍ​ລ້ວນ​ເປັນ​ຄົນ​ອັດທະຍາ​ໄສ​ດີ, ​ເວລາ​ກິນ​ຢູ່​ຮ່ວມ​ກັນ​ເຂົາ​ບໍ່​ໄດ້​ດູ​ຖູ​ກຄົນ​ລາວ. ປີຜ່ານມາ​ນີ້, ຊ່ວງ​ບຸນປີ​ໃໝ່​ຂອງ​ລາວ ​ແລະ ກຳປູ​ເຈຍ​ທະຫານ​ສອງ​ປະ​ເທດ​ໄດ້​ຈັດ​ພາ​ເຂົ້າສາມັກຄີ​ຟ້ອນ​ລຳວົງ​ຮ່ວມ​ກັນ, ມີ​ມະ​ໂຫລີ​ດົນຕີ​ເສບ, ຕົກ​ມາ​ປີ​ນີ້, ກຳລັງ​ທະຫານ​ສອງ​ປະ​ເທດ​ກໍ​ຍັງ​ຄົງ​ພົວພັນ​ກັນ​ດີ, ມີ​ອັນ​ໃດ​ກໍ​ເວົ້າວ່າ​ເຈຍລະຈາ​ກັນ​ບົນ​ພື້ນຖານ​ຄວາມ​ສາມັກຄີ​ຮັກ​ແພງ, ຍັງ​ບໍ່​ເປັນ​ໄປ​ຕາມ​ຂ່າວ​ຄາວ​ທີ່​ຊ່າ​ລື​ກັນ​ໃນ​ສື່​ອອນ​ລາຍ​ຕ່າງໆ​ນາໆ ຂໍ​ໃຫ້​ຊາຍ​ແດນ​ລາວ-ກຳປູ​ເຈຍ ຈົ່ງ​ເປັນ​ຊາຍ​ແດນ​ແຫ່ງ​ມິດຕະພາບ​ໃນ​ຍຸກ​ນີ້ ​ແລະ ຍຸກ​ຕໍ່​ໆ​ໄປ./.

ສ້າງຊາຍແດນລາວ-ກຳປູເຈຍ ເປັນຊາຍແດນມິດຕະພາບ - 12348 - ສ້າງຊາຍແດນລາວ-ກຳປູເຈຍ ເປັນຊາຍແດນມິດຕະພາບ

error: Content is protected !!