ຫຼາຍບ້ານໃນແຂວງພາກກາງແລະພາກໃຕ້ ຮີບຮ້ອນແກ້ໄຂໄພນ້ຳຖ້ວມ

- advert banner 728 90 728x90 - ຫຼາຍບ້ານໃນແຂວງພາກກາງແລະພາກໃຕ້ ຮີບຮ້ອນແກ້ໄຂໄພນ້ຳຖ້ວມ

ແຫຼ່ງຂ່າວທ້ອງຖິ່ນລາຍງານວ່າ: ປັດຈຸບັນ ຫຼາຍໝູ່ບ້ານໃນບັນດາແຂວງພາກກາງ ແລະພາກໃຕ້ຂອງລາວ ພວມສຸມໃສ່ຮັບມືກັບສະພາບນ້ຳຖ້ວມ ພາບຫຼັງໄດ້ຮັບຜົນກະທົບຈາກພາຍຸເຂດຮ້ອນ ໂຟດູ ແລະ ພາຍຸ ດີເປຣຊັນ ພັດຜ່ານເຂົ້າປະເທດເຮົາ ໃນທ້າຍເດືອນ ສິງຫາ – ຕົ້ນເດືອນ ກັນຍາ ນີ້ ເຮັດໃຫ້ເກີດມີຝົນຕົກໜັກ ແລະ ນ້ຳຖ້ວມຢູ່ 6 ແຂວງຄື: ຄຳມ່ວນ, ສະຫວັນນະເຂດ, ສາລະວັນ, ຈໍາປາສັກ, ເຊກອງ ແລະ ອັດຕະປື. ສົ່ງຜົນກະທົບໂດຍກົງຕໍ່ປະຊາຊົນ 37 ເມືອງ, 788ບ້ານ ໃນນັ້ນມີຫຼາຍກວ່າ 54.200 ຄອບຄົວ ໄດ້ຮັບຜົນສະທ້ອນ, ມີຜູ້ເສຍຊີວິດ 5 ຄົນ ຢູ່ແຂວງ ຈໍາປາສັກ ແລະສະຫວັນນະເຂດ ແລະ ອີກ 1 ຄົນສູນຫາຍ ຢູ່ຈຳປາສັກ ມີຫຼາຍບ້ານ, ຫຼາຍຄອບຄົວ ຕ້ອງໄດ້ອົບພະຍົບອອກໄປຢູ່ບ່ອນ ປອດໄພ

- new3 - ຫຼາຍບ້ານໃນແຂວງພາກກາງແລະພາກໃຕ້ ຮີບຮ້ອນແກ້ໄຂໄພນ້ຳຖ້ວມ

   ສະເພາະຢູ່ແຂວງຄຳມ່ວນ ມີເນື້ອທີ່ນາປີຫຼາຍກວ່າ 3.500 ເຮັກຕາ ຈົມຢູ່ໃຕ້ພື້ນນໍ້າ ປະຊາຊົນຫຼາຍກວ່າ 6.000 ຄອບຄົວໃນ 83 ບ້ານໄດ້ຮັບຜົນກະທົບ ໃນນັ້ນຮ້າຍແຮງກວ່າໝູ່ແມ່ນຢູ່ເມືອງໜອງບົກ ມີ 19 ບ້ານ 763 ຄອບຄົວໄດ້ຮັບຜົນກະທົບ, ມີເນື້ອທີ່ນາປີ ຫຼາຍກວ່າ 920 ເຮັກຕາ ຖືກນໍ້າຖ້ວມ ເມືອງຍົມມະລາດ ມີ​ 8 ບ້ານ ແລະ 1.200 ກວ່າຄອບຄົວໄດ້ຮັບຜົນກະທົບ ເນື້ທີ່ປູກເຂົ້ານາປີ 517​ເຮັກຕາ ຖືກນໍ້າຖ້ວມ ເມືອງໄຊບົວທອງ ມີ 13​ ບ້ານ, 322​ ຄອບຄົວ ແລະເນື້ອທີ່ນາ ຫຼາຍກວ່າ 478 ເຮັກຕາຖືກນໍ້າຖ້ວມ, ເມືອງບົວລະພາ ມີ 25 ບ້ານ 2.700​ ກວ່າຄອບຄົວ ແລະ ເນື້ອທີ່ນາປີ 1.100 ກວ່າເຮັກຕາ ຖືກນໍ້າຖ້ວມ ແລະ ເມືອງເຊບັ້ງໄຟ ມີ 18 ບ້ານ, 1,300 ກວ່າ ຄອບຄົວ, ມີເນື້ອທີ່ນາປີ 1.700​ ກວ່າເຮັກຕາ ຈົມຢູ່ໃຕ້ນໍ້າ

   ສ່ວນຢູ່ແຂວງສາລະວັນ ເກີດນໍ້າຖ້ວມຢູ່ 3​ ເມືອງ ນັບແຕ່ ວັນທີ 3​ ກັນຍາ ເປັນຕົ້ນມາຄື: ເມືອງສາລະວັນ, ເມືອງຄົງເຊໂດນ ແລະ ເມືອງວາປິີ, ໂຊກດີໄດ້ມີກຳລັງ ປກສ, ປກຊ ເຂົ້າຊ່ວຍເຫຼືອຍົກຍ້າຍປະຊາຊົນອອກຈາກເຂດນ້ຳຖ້ວມໄດ້ຢ່າງປອດໄພ, ແຕ່ສົ່ງຜົນກະທົບໜັກຕໍ່ພື້ນຖານໂຄງລ່າງ, ເຮືອນຊານບ້ານຊ່ອງ ເນື້ອທີ່ການຜະລິດ ໄຮ່ນາຮົ້ວສວນ ແລະສັດລ້ຽງປະເພດຕ່າງໆ ຊົນລະປະທານໄດ້ຮັບຄວາມເສຍຫາຍຢ່າງຫຼວງຫຼາຍ, ມີຫຼາຍຈຸດນໍ້າໄດ້ຖ້ວມສູງເຖີງ 3 ແມັດ, ເຮັດໃຫ້ການໄປມາຖືກຕັດຂາດຄື: ຢູ່ເມືອງວາປີ ມີ 21 ບ້ານ, ເມືອງສາລະວັນ ມີ 40 ບ້ານ ແລະ ເມືອງຄົງເຊໂດນ ມີ 40 ບ້ານ. ປັດຈຸບັນ ແຂວງສາລະວັນ ຍັງຕ້ອງການຄວາມຊ່ວຍເຫຼືອ ຢ່າງຮີບດ່ວນເຊັ່ນ: ເຮືອ, ນໍ້າດື່ມ, ເຂົ້າສານອາຫານແຫ້ງອື່ນໆ, ເຊິ່ງທ່ານຮອງເຈົ້າແຂວງສາລະວັນ ປະທານຄະນະກຳມະການຄຸ້ມຄອງໄພພິບັດຂັ້ນແຂວງເວົ້າວ່າ: ໄພນ້ຳຖ້ວມຄັ້ງນີ້ ເປັນຄັ້ງທີ່ຮ້າຍແຮງທີ່ສຸດໃນຮອບຫຼາຍປີຜ່ານມາ ເຖິງວ່າຈະບໍ່ມີຜູ້ເສຍຊີວິດ ແຕ່ກໍຈະສົ່ງຜົນກະທົບ ແລະສ້າງຄວາມເດືອດຮ້ອນເສຍຫາຍບໍ່ໜ້ອຍຕໍ່ຊັບສິນ ເຮືອນຊານຂອງປະຊາຊົນ

- lattana 1 - ຫຼາຍບ້ານໃນແຂວງພາກກາງແລະພາກໃຕ້ ຮີບຮ້ອນແກ້ໄຂໄພນ້ຳຖ້ວມ

   ສຳລັບແຂວງສະຫວັນນະເຂດ ກໍປະສົບກັບໄພນ້ຳຖ້ວມຮ້າຍແຮງນີ້, ສະເພາະເມືອງໄຊບູລີ ມີ 26 ບ້ານ ແລະ 2.200 ກວ່າຄອບຄົວໄດ້ຮັບຜົນກະທົບ, ເນື້ອທີ່ນາປີ 3.200​ ກວ່າເຮັກຕາ ຖືກນ້ຳຖ້ວມ, ໃນນັ້ນຕ້ອງໄດ້ຍົກຍ້າຍປະຊາຊົນຫຼາຍກວ່າ 100 ຄົວເຮືອນໄປຢູ່ບ່ອນປອດໄພ, ເສັ້ນທາງຫຼາຍສາຍຖືກຕັດຂາດ, ລົດບໍ່ສາມາດທຽວໄປມາໄດ້ ມີ 8 ບ້ານ, ໂຮງຮຽນ 35 ແຫ່ງບໍ່ສາມາດເປີດຮຽນໄດ້ ໃນນັ້ນມີໂຮງຮຽນອະນຸບານ 13 ແຫ່ງ, ປະຖົມ 21 ​ແຫ່ງ ແລະ ມັດທະຍົມ 1 ແຫ່ງ, ພື້ນຖານໂຄງລ່າງ ເສັ້ນທາງ ແລະ ຂົວເປ່ເພຫຼາຍແຫ່ງ, ລະບົບຕາໜ່າງໄຟຟ້າຂາດ 11 ຊ່ອງ ປັດຈຸບັນສ້ອມເປງສຳເລັດເເລ້ວເປັນການຊົ່ວຄາວ ນີ້ແມ່ນຄຳລາຍງານຂອງທ່ານເຈົ້າເມືອງໃນສອງມື້ທີ່ຜ່ານມານີ້ ສ່ວນຢູ່ເມືອງອາດສະພັງທອງ ກໍມີລາຍງານວ່າ: ມີ 19 ບ້ານໄດ້ຮັບຜົນກະທົບຄື: ບ້ານດົງເຫັນ, ບ້ານດົງກິໂລ, ພັງໂຮ, ສີວິໄລ, ນານ້ຳທ່ຽງ, ດົງກຶມ, ນາໄລໂຄກ, ດົງຂວາງ, ໄລກະທະ, ປົ່ງດົງ, ປົ່ງນາ, ນາແຜກ, ດົງໝາກກໍ, ດົງນາຂາມ, ນາຫຼັກ, ນາຄຳໃຕ້, ຕະບອງເພັດ,  ໜອງປາກຊ່ອງ ແລະ ບ້ານນາສະຫວ່າງ ລວມມີ 1.583 ຄອບຄົວ ແລະ ມີເນື້ອທີ່ 2.337 ເຮັກຕາ ຖືກນ້ຳຖ້ວມ ເຊິ່ງປັດຈຸບັນລະດັບນ້ຳ ເຊຈຳພອນ ໄດ້ຫຼຸດລົງຈາກ 13 ແມັດມາຢູ່ທີ່ 12,30 ແມັດ.

ສ່ວນສະ​ພາບ​ນ້ຳ​ຖ້ວມ​ຢູ່​ແຂວງ​ຈຳ​ປາ​ສັກ ຕາມ​ການ​ລາຍ​ງານ​ຂອງ​ເຈົ້າ​ໜ້າ​ທີ່​ຮັບ​ຜິດ​ຊອບ​ຕ້ານ ແລະ ຄວບ​ຄຸມ​ໄພ​ພິດ​ບັດ​ແຂວງໃຫ້​ຮູ້​ວ່າ: ມາ​ຮອດ​ປັດ​ຈຸ​ບັນ​ລະ​ດັບ​ນ້ຳ​ຂອງ​ ທີ່ນະ​ຄອນ​ປາກ​ເຊເວ​ລາ 13:00 ຂອງວັນທີ 6 ກັນຍານີ້ ​​ແທກ​ໄດ້ 13.57 ແມັດ ເຊິ່ງ​ຫລຸດ​ລົງ​ຈາກ​ຕອນ​ເຊົ້າ 0.3 ຊັງ​ຕີ​ແມັດ. ແລະສາມາດ ​ອົບ​ພະ​ຍົບ​ປະ​ຊາ​ຊົນ​ທີ່​ໄດ້​ຮັບ​ຜົນ​ກະ​ທົບ​ເຊັ່ນ: ບ້ານ​ປາ​ຫລາຍ, ນາ​ແກ, ​ແກ້ງ​ຍາວ,​ ໜອງ​ບົກ​ໃຫຍ່ ​ແລະ ບ້ານ​ປາກ​ຫ້ວຍ​ເດື່ອໄປ​ຢູ່​ທີ່​ປອດ​ໄພ​ແລ້ວ ແລະ​ໄດ້​ໃຫ້​ການ​ຊ່ວຍ​ເຫລືອ​ທາງ​ດ້ານ​ເຄື່ອງ​ນຸ່ງ​ຫົ່ມ ແລະ​ອາ​ຫານ​ຈຳ​ນວນ​ໜຶ່ງ ແຕ່​ຍັງ​ໜ້າ​ເປັນ​ຫ່ວງ​ເລື່ອງ​ຊັບ​ສິນ, ເຮືອນ​ຊ້ານ​ບ້ານ​ຊ່ອງ​ຂອງ​ປະ​ຊາ​ຊົ​ນ​ເຂດ​ເມືອງ​ຊະ​ນະ​ສົມ​ບູນ, ເມືອງ​ບາ​ຈຽງ​ຈະ​ເລີນ​ສຸກ, ເມືອງ​ສຸ​ຂຸມາ, ເມືອງ​ປະ​ທຸມ​ພອນ ແລະ​ບ້ານດອນ​ແດງ ເນື່ອງ​ຈາກວ່າ​ລະ​ດັບ​ນ້ຳ​ເຊ​ໂດນ, ເຊກອງ​ຍັງ​ຢູ່​ໃນ​ລະ​ດັບ​ສູງ ປະຈຸບັນຜູ້ປະສົບໄພດັ່ງກ່າວ ຍັງຕ້ອງການຄວາມຊ່ວຍເຫຼືອຮີບດ່ວນ       ໂດຍສະເພາະ​ອາ​ຫານ​ການ​ກິນ, ນ້ຳ​ດື່ມ ແລະ ຢາ​ປົວ​ພະ​ຍາດ​ຕ່າງໆ ຈຶ່ງ​ຂໍຮຽກ​ຮ້ອງ​ໃຫ້​ຂັ້ນ​ເທິງ ແລະ ສັງຄົມ​ເຂົ້າ​ມາ​ຊ່ວຍ​ເຫຼືອ.

error: Content is protected !!