ກະຊວງແຮງງານເລັ່ງຈັດສັນເຄື່ອງຊ່ວຍເຫລືອສຸກເສີນໃຫ້ຜູ້ປະສົບໄພນໍ້າຖ້ວມ

- advert banner 728 90 728x90 - ກະຊວງແຮງງານເລັ່ງຈັດສັນເຄື່ອງຊ່ວຍເຫລືອສຸກເສີນໃຫ້ຜູ້ປະສົບໄພນໍ້າຖ້ວມ

ໃນວັນທີ 8 ກັນຍານີ້, ທ່ານ ວິໄລພົງ ສີສົມຫວັງ ຫົວໜ້າກົມສັງຄົມ ສົງເຄາະ, ທັງເປັນຫົວໜ້າກອງເລຂະຄະນະຄຸ້ມຄອງໄພພິບັດແຫ່ງຊາດໄດ້ ຖະແຫລງຕໍ່ສື່ມວນຊົນວ່າ: ຕໍ່ກັບຜົນກະທົບຈາກອິດທິພົນຂອງລົມພະຍຸໜຸນເຂດຮ້ອນໂພດູ ແລະ ລົມພະຍຸດີເປຣຊັນ ທີ່ພັດຜ່ານເຂົ້າມາ ສປປ ລາວ ໃນຊ່ວງທ້າຍເດືອນສິງຫາ ຫາ ຕົ້ນເດືອນ ກັນຍາ 2019 ເຮັດໃຫ້ມີຝົນຕົກໜັກ ແລະ ເກີດນໍ້າຖ້ວມ ຢູ່ 6 ແຂວງຄື: ຄຳມ່ວນ, ສະຫວັນນະເຂດ, ສາລະວັນ, ຈຳປາສັກ, ເຊກອງ ແລະ ແຂວງອັດຕະປື, ສົ່ງຜົນກະທົບໂດຍກົງຕໍ່ປະຊາຊົນ ໃນ 37 ເມືອງ, 1.187 ບ້ານ, ມີປະຊາຊົນໄດ້ຮັບຜົນກະທົບ 122.892 ຄອບຄົວ, 224.604 ຄົນ ຖືກກະທົບ ໃນນີ້ ມີຜູ້ເສຍຊີວິດ 10 ຄົນ (ແຂວງສະຫວັນນະເຂດ 3 ຄົນ, ສາລະວັນ 2 ຄົນ ແລະ ຈໍາປາສັກ 5 ຄົນ), ຍົກຍ້າຍ 7.559 ກວ່າຄອບຄົວ (64.022 ກວ່າຄົນ), ບ້ານເຮືອນຂອງປະຊາຊົນຈໍານວນຫຼາຍຖືກນໍ້າຖ້ວມ, ພື້ນທີ່ການຜະລິດກະສິກໍາ ເຊັ່ນ: ເນື້ອທີ່ນາ 139.829 ກວ່າ ເຮັກຕາ, ສວນ 251 ເຮັກຕາ, ໜອງປາ 1.922 ໜອງ, ສັດລ້ຽງຫຼາຍກວ່າ 300 ໂຕຖືກຍ້າຍໄປຢູ່ບ່ອນທີ່ປອດໄພ, ຊົນລະ ປະທານ 33 ແຫ່ງ, ອ່າງເກັບນໍ້າ 43 ແຫ່ງ, ຄອງເໝືອງ 64.025 ແມັດ, ເສັ້ນທາງຄົມມະນາຄົມຖືກຕັດຂາດ ຍ້ອນນໍ້າຖ້ວມ ໃນນີ້ ມີຫຼາຍກວ່າ 252 ກິໂລແມັດ, ຂົວ 12 ແຫ່ງ ຖືກນໍ້າຖ້ວມ, ໂຮງຮຽນ 215 ແຫ່ງ, ໂຮງໝໍ ແລະ ສຸກສາລາ 10 ແຫ່ງ.  ຄວາມຕ້ອງການຮີບດ່ວນ ລວມມີເຄື່ອງອຸປະໂພກ-ບໍລິໂພກ ເປັນຕົ້ນອາຫານ, ນໍ້າດື່ມ, ເຄື່ອງໃຊ້ຄົວເຮືອນ, ເຄື່ອງນອນ, ເຮືອ ແລະ ງົບປະມານຮັບໃຊ້ອື່ນໆ. ມາຮອດປັດຈຸບັນອໍານາດການປົກຄອງ ແລະ ຄະນະກໍາມະການປ້ອງກັນ ແລະ ຄວບຄຸມໄພພິບັດຂັ້ນທ້ອງຖິ່ນ ໄດ້ຮີບຮ້ອນໃຫ້ການຊ່ວຍເຫຼືອສຸກເສີນທັນທີ ໂດຍໄດ້ນໍາໃຊ້ກໍາລັງແຮງຂອງພະນັກງານ, ທະຫານ, ຕໍາຫຼວດ, ແລະ ປະຊາຊົນພາຍໃນບ້ານ ປະຕິີບັດການຍົກຍ້າຍ ທັງຄົນ ແລະ ຊັບສິນ ໄປບ່ອນທີ່ປອດໄພ, ຈັດສັນສະຖານທີ່ພັກເຊົາຊົ່ວຄາວ ແລະ ສະໜອງບັນເທົາທຸກສຸກເສີນຂັ້ນພື້ນຖານ ດ້ານເຄື່ອງອຸປະ ໂພກ-ບໍລິໂພກ ເປັນຕົ້ນ – ອາຫານ, ນໍ້າດື່ມ, ເຄື່ອງໃຊ້ຄົວເຮືອນ, ຢາປົວພະຍາດ ແລະ ອື່ນໆ.

- new3 - ກະຊວງແຮງງານເລັ່ງຈັດສັນເຄື່ອງຊ່ວຍເຫລືອສຸກເສີນໃຫ້ຜູ້ປະສົບໄພນໍ້າຖ້ວມ
- 70581099 1109831529220626 4338837457760944128 o - ກະຊວງແຮງງານເລັ່ງຈັດສັນເຄື່ອງຊ່ວຍເຫລືອສຸກເສີນໃຫ້ຜູ້ປະສົບໄພນໍ້າຖ້ວມ
- 69729547 1106036326261984 4351998904003198976 n 1 - ກະຊວງແຮງງານເລັ່ງຈັດສັນເຄື່ອງຊ່ວຍເຫລືອສຸກເສີນໃຫ້ຜູ້ປະສົບໄພນໍ້າຖ້ວມ
- 69620320 1109845522552560 5971006170763100160 n - ກະຊວງແຮງງານເລັ່ງຈັດສັນເຄື່ອງຊ່ວຍເຫລືອສຸກເສີນໃຫ້ຜູ້ປະສົບໄພນໍ້າຖ້ວມ

ເພື່ອຮັບປະກັນໃຫ້ແກ່ການປະຕິບັດຊ່ວຍເຫຼືອແກ້ໄຂສຸກເສີນ ໃຫ້ທັນການ ແລະ ມີປະສິດທິຜົນ, ນອກນີ້, ລັດຖະບານໄດ້ຈັດກອງປະຊຸມສຸກເສີນຂື້ນ ໂດຍການເປັນປະທານ ຂອງ ທ່ານ ນາຍົກລັດຖະມົນຕີ ແລະ ມີບັນດາຄະນະນໍາຈາກບັນດາກະຊວງໃນຄະນະກໍາມະການປ້ອງກັນ ແລະ ຄວບຄຸມໄພພິບັດແຫ່ງຊາດເຂົ້າຮ່ວມ, ຊຶ່ງໄດ້ຊີ້ນໍາໃຫ້ບັນດາຂະແໜງການກ່ຽວຂ້ອງ ຮີບຮ້ອນລົງໄປຊ່ວຍເຫຼືອຕາມພາລະບົດບາດໜ້າທີ່ຂອງຕົນ. ພ້ອມກັນນີ້ ຄະນະພັກ ຄະນະນໍາ ຂັ້ນສູນກາງ ນໍາໂດຍ ທ່ານ ນາຍົກ, ຮອງນາຍົກລັດຖະມົນຕີ ພ້ອມດ້ວຍຄະນະ ກໍໄດ້ລົງໄປພື້ນທີ່ພາກສະໜາມຢູ່ບັນດາແຂວງທີ່ຖືກກະທົບເພື່ອຕິດຕາມ, ຊຸກຍູ້ການແກ້ໄຂສຸກເສີນແລະໃຫ້ກໍາລັງໃຈ, ຄວາມອົບອຸນແກ່ປະຊາຊົນຜູ້ທີ່ໄດ້ຮັບຜົນກະທົບແລະພະນັກງານ, ນາຍແລະພົນທະຫານ, ຕໍາຫຼວດແລະພາກສ່ວນຕ່າງໆທີ່ປະຕິບັດໜ້າທີ່ກູ້ໄພແລະແກ້ໄຂສຸກເສີນ.

ສະເພາະ ການປະຕິບັດໃຫ້ການຊ່ວຍເຫຼືອສຸກເສີນ ຂອງ ກະຊວງແຮງງານ ແລະ ສະຫວັດດີການສັງຄົມ ໃນນາມ ຄະນະກໍາມະການປ້ອງກັນ ແລະ ຄວບຄຸມໄພພິບັດແຫ່ງຊາດ ໂດຍໄດ້ຮັບການມອບໝາຍຂອງຂັ້ນເທິງ ກໍ່ໄດ້ປະສານງານຢ່າງໃກ້ສິດກັບບັນດາແຂວງທີ່ຖືກກະທົບຈາກໄພພິບັດ ພ້ອມທັງໄດ້ປະຕິບັດໃຫ້ການຊ່ວຍເຫຼືອສຸກເສີນ ເປັນຕົ້ນ – ໄດ້ສົມທົບກັບກອງທັບ ນໍາໃຊ້ລົດ ແລະ ຍົນ ເພື່ອຈັດສົ່ງພາຫະນະ, ອຸປະກອນ ແລະ ເຄື່ອງຊ່ວຍເຫຼືອບັນເທົາທຸກສຸກເສີນ ໄປຊ່ວຍເຫຼືອປະຊາຊົນທີ່ຖືກກະທົບຢູ່ບັນດາແຂວງ ເປັນຕົ້ນ – ເຮືອກູ້ໄພ, ເຕັ້ນຄອບຄົວ, ນໍ້າດື່ມ, ເຄື່ອງໃຊ້ຄົວເຮືອນ, ອື່ນໆ ໄປໃຫ້ແຂວງ ຄໍາມ່ວນ, ສະຫວັນນະເຂດ, ສາລະວັນ, ຈໍາປາສັກ ແລະ ແຂວງ ເຊກອງ.

ພ້ອມກັນນີ້, ເພື່ອຮັບປະກັນໃນການປະສານງານໃຫ້ການຊ່ວຍເຫຼືອສຸກເສີນ, ກະຊວງ ຮສສ ໃນນາມ ປະທານ ຄະນະກໍາມະການປ້ອງກັນ ແລະ ຄວບຄຸມໄພພິບັດແຫ່ງຊາດ ກໍໄດ້ ຈັດຕັ້ງສູນປະສານງານສຸກເສີນຂື້ນ ຢູ່ ກົມສັງຄົມສົງເຄາະ ກະຊວງ ຮສສ ພ້ອມທັງໄດ້ອອກແຈ້ງການເຖິງບັນດາແຂວງ ເພື່ອຈັດຕັ້ງສູນປະສານງານຊ່ວຍເຫຼືອສຸກເສີນຢູ່ຂັ້ນແຂວງ ແລະ ເມືອງ ເພື່ອປະຕິບັດໃຫ້ການຊ່ວຍເຫຼືອສຸກເສີນ.

ພ້ອມນີ້, ໂດຍໄດ້ມອບໝາຍຈາກລັດຖະບານ, ກະຊວງ ຮສສ ໄດ້ອອກແຈ້ງການລະດົມບໍລິຈາກນໍາສັງຄົມຜ່ານສື່ມວນຊົນ ຊຶ່ງຈະເລີ່ມປະຕິບັດແຕ່ວັນທີ 7 ກັນຍາ 2019 ເປັນຕົ້ນໄປ.

- lattana 1 - ກະຊວງແຮງງານເລັ່ງຈັດສັນເຄື່ອງຊ່ວຍເຫລືອສຸກເສີນໃຫ້ຜູ້ປະສົບໄພນໍ້າຖ້ວມ
- 69670962 1110018685868577 4335634653403676672 n - ກະຊວງແຮງງານເລັ່ງຈັດສັນເຄື່ອງຊ່ວຍເຫລືອສຸກເສີນໃຫ້ຜູ້ປະສົບໄພນໍ້າຖ້ວມ

ສ່ວນບັນດາຂະແໜງການອື່ນໆ ໃນຄະນະກໍາມະການປ້ອງກັນ ແລະ ຄວບຄຸມໄພພິບັດແຫ່ງຊາດ ກໍໄດ້ມີແຜນ ແລະ ດໍາເນີນໃຫ້ການຊ່ວຍເຫຼືອຢູ່ບັນດາແຂວງທີ່ຖືກກະທົບຈາກໄພພິບັດນໍ້າຖ້ວມ ເປັນຕົ້ນ – ກະຊວງປ້ອງກັນປະເທດ ໄດ້ນໍາໃຊ້ກໍາລັງ ຫຼວງ ແລະ ກໍາລັງທ້ອງຖິີ່ນ ພ້ອມທັງ ພາຫະນະຂົນສົ່ງ, ເຮືອກູ້ໄພ, ຍົນ ເຂົ້າຊ່ວຍເຫຼືອ; ກະຊວງປ້ອງກັນຄວາມສະຫງົບ ກໍໄດ້ນໍາໃຊ້ທັງກໍາລັງ ແລະ ພາຫະນະ ຢູ່ ສູນກາງ ແລະ ແຂວງ ເຂົ້າໄປຊ່ວຍເຫຼືອປ້ອງກັນເວນຍາມ, ການຮັກສາຄວາມສະຫງົບ ແລະ ຄວາມປອດໄພ ສິ່ງຂອງປະຊາຊົນ ລວມທັງ ການຊ່ວຍນໍາໃຊ້ລົດດັບເພີງເຂົ້າໄປລໍາລຽງນໍ້າໃຊ້ໃຫ້ປະຊາຊົນ ແລະ ຊ່ວຍອານາໄມ, ອື່ນໆ. ຈາກສະພາບໄພພິບັດນໍ້າຖ້ວມປີ 2019 ນີ້ ໄດ້ເກີດຂື້ນ ແລະ ສົ່ງຜົນກະທົບຢູ່ຫຼາຍແຂວງ ທາງພາກກາງ ແລະ ໃຕ້, ດ້ານຜົນກະທົບຄວາມເສຍຫາຍ ຖ້າທຽບໃສ່ເຫດການປີ 2018 ເຫັນວ່າ ຍັງມີໜ້ອຍກວ່າ ໂດຍສະເພາະ ດ້ານຜົນກະທົບຕໍ່ຊີວິດ ແລະ ສັບສິນຂອງປະຊາຊົນ.

ສະນັ້ນ, ການຊ່ວຍເຫຼືອຂອງພາກສັງຄົມ ຕໍ່ກັບເຫດການປີ 2019 ນີ້ ຖ້າທຽບໃສ່ ການປະກອບສ່ວນຊ່ວຍເຫຼືອໃນປີ 2018 ທີ່ຜ່ານມາ ກໍຍັງບໍ່ທັນຫຼາຍ ແລະ ໃນຕໍ່ໜ້ານີ້ຈະສືບຕໍ່ຕິດຕາມສະພາບຜົນກະທົບ ແລະ ເຮັດການປະເມີນຄວາມເສຍຫາຍ ແລະ ຄວາມຕ້ອງການເພື່ອວາງແຜນຟື້ນຟູຫຼັງໄພພິບັດ ທັງໄລຍະສັ້ນ, ກາງ ແລະ ຍາວ, ສືບຕໍ່ລະດົມບໍລິຈາກສັງຄົມ ເພື່ອໃຫ້ການຊ່ວຍເຫຼືອສຸກເສີນ ຕໍ່ຜູ້ປະສົບໄພພິບັດ ຢູ່ ບັນດາແຂວງທາງພາກກາງ ແລະ ໃຕ້ ເພື່ອຟື້ນຟູຊິວິດການເປັນຢູ່ຂອງເຂົາເຈົ້າກັບຄືນສູ່ສະພາບປົກກະຕິໂດຍໄວ.

error: Content is protected !!