ລັດຖະບານເລັ່ງຊ່ວຍເຫລືອ ປະຊາຊົນ ຜູ້ປະສົບໄພນ້ຳຖ້ວມຢູ່ 6 ແຂວງພາກກາງ ແລະ ພາກໃຕ້ໄດ້ຢ່າງທັນການ.
ພາຍຫລັງໄດ້ເກີດໄພນ້ຳຖ້ວມຮ້າຍແຮງຢູ່ 6 ແຂວງພາກກາງ ແລະ ພາກໃຕ້ເມື່ອທ້າຍເດືອນສິງຫາຜ່ານມານີ້, ຍ້ອນຜົນສະທ້ອນຈາກພາຍຸເຂດຮ້ອນໂພດ ແລະ ດີເປຣຊັນ, ໄດ້ສົ່ງຜົນໃຫ້ 43 ເມືອງ, 1.466 ບ້ານ, ມີ 175.422 ຄອບຄົວ ແລະ ມີພົນລະເມືອງຫລາຍກວ່າ 377.700 ຄົນ ຢູ່ແຂວງຄຳມ່ວນ, ສະຫວັນນະເຂດ, ສາລະວັນ, ຈຳປາສັກ, ເຊກອງ ແລະ ແຂວງອັດຕະປື ໄດ້ຮັບຜົນກະທົບ, ໃນນັ້ນມີ 14 ເສຍຊີວິດ ແລະ ອີກ 1 ຄົນສູນຫາຍ.
ຕໍ່ສະພາບດັ່ງກ່າວມາໃນວັນທີ 5 ກັນຍາຜ່ານມາ, ນາຍົກລັດຖະມົນຕີ ທອງລຸນ ສີສຸລິດ ໄດ້ຈັດກອງປະຊຸມຄະນະລັດຖະບານໂດຍດ່ວນເພື່ອຊີນຳໃຫ້ການຊ່ວຍເຫລືອກອບກູ້ເອົາຜູ້ ປະສົບໄພ ແລະ ຕອບສະໜອງເຄື່ອງອຸປະໂພກ ແລະ ບໍລິໂພກຕ່າງໆ ໃຫ້ພຽງພໍ ແລະ ໜ່ວຍທັນເວລາ, ໂດຍທ່ານນາຍົກລັດຖະມົນຕີ ໄດ້ເນັ້ນໃຫ້ນຳໃຊ້ທຸກພາກສ່ວນນັບທັງກຳລັງ, ທະຫານ, ຕຳຫລວດ, ຊາວໜຸ່ມ ແລະ ມວນຊົນໃນທ້ອງຖິ່ນ, ພ້ອມກະຊວງຕ່າງໆ ລົງຊ່ວຍຜູ້ປະສົບໄພໂດຍໄວ, ໂດຍສະເພາະຄະນະກຳມະການປ້ອງກັນ ແລະ ຄວບຄຸມໄພພິບັດແຫ່ງຊາດ, ກະຊວງແຮງງານ ແລະ ສະຫວັດດີການ-ສັງຄົມ ໄດ້ເປັນເຈົ້າການ ຮີບຮ້ອນປະຕິບັດການຊ່ວຍເຫລືອສຸກເສີນ, ໂດຍໄດ້ສົມທົບກັບກອງທັບນຳໃຊ້ລົດ, ຍົນເພື່ອຈັດສົ່ງພາຫະນະ, ອຸປະກອນ ແລະ ເຄື່ອງຊ່ວຍເຫລືອບັນເທົາທຸກໄປຊ່ວຍ ປະຊາຊົນ ຜູ້ປະສົບໄພດ່ັງກ່າວເປັນຕົ້ນເຮືອກູ້ໄພ, ເຕັ້ນຄອບຄົວ, ນ້ຳດື່ມ, ເຄື່ອງໃຊ້ຄົວເຮືອ, ອາຫານການກິນ, ທິມງານແພດໝໍ, ຢາປົວພະຍາດໄດ້ຢ່າງທັນການ.
ປະຊາຊົນສ່ວນຫລວງຫລາຍໄດ້ຮັບການອົບພະຍົບອອກຈາກເຂດນ້ຳຖ້ວມໄປຢູ່ບ່ອນປອດໄພໄດ້ທັນເວລາ ແລະ ມາໃນວັນທີ 7 ກັນຍາ ທ່ານນາຍົກລັດຖະມົນຕີເອງ, ໄດລົງຢ້ຽມຢາມໃຫ້ກຳລັງໃຈພ້ອມຊ່ວຍຊຸກຍູ້ການແກ້ໄຂໄພພິບັດດັ່ງກ່າວຢູ່ແຂວງສະຫວັນນະ ເຂດ, ສາລະວັນ ແລະ ແຂວງຈຳປາສັກ, ພ້ອມໄດ້ພົບປະໂອ້ລົມຜູ້ປະສົບໄພ, ເພື່ອສະແດງຄວາມເປັນຫວ່ງເປັນໃຍ ແລະ ແນະນຳໃຫ້ເຂົາເຈົ້າເພີ່ມທະວີຄວາມສາມັກຄີຮັກແພງຊ່ວຍເຫລືອ ເຊິ່ງກັນ ແລະ ກັນໃຫ້ຫລາຍຂຶ້ນ, ເພື່ອພ້ອມກັນຜ່ານຜ່າວິກິດການອັນຮ້າຍແຮງນີ້ໄປໂດຍດີ, ພ້ອມເຕືອນໃຫ້ປະຊາຊົນມີສະຕິຕ້ານການໂຄສະນາ ໃສ່ຮ້າຍປ້າຍສີກໍຄືການສ້າງຄວາມປັ່ນປ່ວນຕ່າງໆ ຂອງພວກບໍ່ຫວັງດີເພື່ອຫວັງທຳລາຍຄວາມສະຫງົບສຸກຂອງບ້ານເມືອງເຮົາ, ພ້ອມນັ້ນກໍ່ໃຫ້ເອົາໃຈໃສ່ປຸກລະດົມກຳລັງແຮງພາຍໃນທ້ອງຖິ່ນປະກອບສ່ວນເຂົ້າໃນການຊ່ວຍເຫລືອແກ້ໄຂຜົນກະທົບຈາກໄພທຳມະຊາດຄັ້ງນີ້ໃຫ້ມີປະສິດທິຜົນ, ຮີບຮ້ອນຈັດຫາວັດຖຸສິ່ງຂອງທີ່ຈຳເປັນເພື່ອຕອບສະໜອງຄວາມຕ້ອງການ ອັນຮີບດ່ວນນັ້ນໃຫ້ພຽງພໍ ແລະ ໜ່ວຍທັນເວລາ./.
