ຊ່ວຍກັນຢຽວຢາຜູ້ໄດ້ຮັບຜົນກະທົບຈາກໄພພິບັດນ້ຳຖ້ວມ

- advert banner 728 90 728x90 - ຊ່ວຍກັນຢຽວຢາຜູ້ໄດ້ຮັບຜົນກະທົບຈາກໄພພິບັດນ້ຳຖ້ວມ

- new3 - ຊ່ວຍກັນຢຽວຢາຜູ້ໄດ້ຮັບຜົນກະທົບຈາກໄພພິບັດນ້ຳຖ້ວມ

ໂດຍ: ທິດກ່ຳ

    ຖືໄດ້ວ່າປີ 2019 ເປັນ ປີໜຶ່ງທີ່ປະເທດເຮົາໄດ້ປະສົບບັນຫາໄພພິບັດນ້ຳຖ້ວມ ຢ່າງໜັກໜ່ວງ. ພໍແຕ່ກ້າວ ສູ່ລະດູຝົນນັບແຕ່ເດືອນ ມິຖຸນາ ຕໍ່ໃສ່ກໍລະກົດແມ່ນເກີດຢູ່ 3 ແຂວງພາກເໜືອຄື:  ຫລວງພະບາງ, ໄຊຍະບູລີ ແລະ ຫລວງນ້ຳທາ; ແຕ່ກໍເຫັນວ່າ ບໍ່ໜັກໜ່ວງປານພາກກາງ ແລະ ພາກໃຕ້ນັບແຕ່ ແຂວງຄຳມ່ວນ, ສະຫວັນນະເຂດ, ສາລະວັນ, ເຊກອງ, ອັດຕະປື ແລະ ຈຳປາສັກ.

ໄພພິບັດຄັ້ງນີ້, ໄດ້ສ້າງຄວາມເສຍຫາຍໃຫ້ແກ່ຊີວິດ ແລະ ຊັບສິນຂອງປະຊາຊົນລາວ ທີ່ຢູ່ພາກກາງ ແລະ ພາກໃຕ້ຢ່າງຫລວງຫລາຍພາຍມາກຄືມີຄົນຕາຍເຖິງ 14  ຄົນ, 122.892 ຄອບ ຄົວຖືກຜົນກະທົບ, ມີພົນລະເມືອງ ທັງໝົດ 224.600 ຄົນ, ເນື້ອ ທີ່ນາ 139.800 ເຮັກຕາ, ເນື້ອທີ່ສວນ 251 ເຮັກຕາ, ໜອງປາ 1.922 ໜອງ, ສັດລ້ຽງປະເພດງົວຄວາຍ ຫລາຍກວ່າ 300 ໂຕ, ຊົນລະປະທານ 33 ແຫ່ງ, ຄອງ ເໝືອງ 64.000 ກວ່າແມັດ, ເສັ້ນທາງຄົມມະນາຄົມຖືກເປ້ເພຖືກຕັດຂາດ 250 ກວ່າ ກິ ໂລແມັດ, ໂຮງຮຽນຖືກນ້ຳ ຖ້ວມ 215 ແຫ່ງ, ສຸກສາລາຫລາຍກວ່າ 10 ແຫ່ງ, ນີ້ເປັນ ພຽງຕົວເລກສະຫລຸບເບື້ອງ ຕົ້ນແຕ່ຖ້າຈະໄລ່ກີໆກີໆ ແມ່ນມີມະຫາສານສົມຄວນ.

ນອກຈາກນີ້, ກໍຍັງມີຊັບສິນອື່ນໆ ເປັນຕົ້ນເຄື່ອງເຮືອນ, ຂອງຊານ, ປະເພດ ເຄື່ອງໃຊ້ ໃນເຮືອນໂທລະທັດຕູ້ເຢັນ, ລົດລາງພາຫະນະ ອີກຫລາຍຢ່າງຫລາຍແນວ ເກືອບນັບບໍ່ຖ້ວນ.

  ໄພພິບັດນ້ຳຖ້ວມຄັ້ງນີ້  ຍັງພໍໄຄແດ່ແຕ່ວ່າບໍ່ເຖິງຂັ້ນຍ້າຍບ້ານຍ້າຍເຮືອນໄປຢູ່ທີ່ອື່ນ;   ແຕ່ກໍຍັງມີເຮືອນຊານ ຫລາຍຫລັງຖືກນ້ຳຊຸທັ່ງເປ່ເພເສຍຫາຍ. ນີ້ລະຄືຄວາມຫາຍຍານະອັນຕະລາຍຮ້າຍກາດຈາກໄພທຳມະຊາດ, ດັ່ງສຸພາສິດບູຮານໄດ້ເວົ້າວ່າ “ດັບນ້ຳດັບໄຟ” ແມ່ນບໍ່ມີອັນໃດຫລົງເຫລືອຈົນຈິບຫາຍວາຍວອດ.

ແນວໃດກໍດີ, ຕາມເຮົາຄິດບັນຫາໄພພິບັດນັ້ນມັນບໍ່ອາດເກີດຂຶ້ນທຸກປີ ແລະ ບໍ່ມີ ສະເພາະແຕ່ບ້ານເຮົາເມືອງເຮົາ. ຢູ່ປະເທດອື່ນບາງປີເຂົາມີຮອດແຜ່ນດິນໄຫວ, ຄື້ນສຶນາມິປະຫັດປະຫານຊີວິດຄົນ ເປັນພັນເປັນໝື່ນ, ນອກນັ້ນ, ກໍມີພາຍຸທັງລົມທັງຝົນທຳລາຍຊີວິດຄົນ ແລະ ຊັບສິນ ຈົນນັບບໍ່ຖ້ວນດັ່ງພວກເຮົາ ເຄີຍເຫັນໃນແຫລ່ງຂ່າວຄາວແຕ່ລະປີເຊັ່ນ: ຢູ່ຈີນ, ຍີ່ປຸ່ນ, ສະຫະລັດອາເມລິກາ ແລະ ບາງປະເທດອື່ນໆ ໃນໂລກ ຕ້ອງໄດ້ປະເຊີນກັບໄພທຳມະຊາດມາແລ້ວຢ່າງໜັກໜ່ວງ ກວ່າເຮົາ.

- lattana 1 - ຊ່ວຍກັນຢຽວຢາຜູ້ໄດ້ຮັບຜົນກະທົບຈາກໄພພິບັດນ້ຳຖ້ວມ

ເຖິງຢ່າງໃດກໍດີ, ທຸກສິ່ງ ຢ່າງໄພພິບັດມັນກໍເກີດຂຶ້ນ ແລ້ວ ມີແຕ່ວ່າໃນຂັ້ນຕໍ່ໄປ ຕ້ອງພ້ອມກັນສຸມໃສ່ການ ປັບປຸງ ແລະ ກໍ່ສ້າງຊີວິດການ ເປັນຢູ່ໃຫ້ເຂົ້າສະພາບປົກກະ ຕິ, ສ້າງສິ່ງໃໝ່ມາທົດແທນ ອັນເກົ່າທີ່ເສຍໄປໃຫ້ກັບຄືນມາຫາເຮົາໂດຍໄວ ແລະ ອົບອຸ່ນ.

ຖືວ່ານັບແຕ່ມື້ເລີ່ມຕົ້ນ ເກີດໄພພິບັດຈົນຮອດມື້ນ້ຳ ບົກແຫ້ງລົງການນຳພັກ-ລັດທຸກຂັ້ນເພິ່ນກໍບໍ່ໄດ້ປ່ອຍປະລະໄລ, ຕະຫລອດການຈັດ  ຕັ້ງທຸກພາກສ່ວນ, ບໍລິສັດ, ຫ້າງຮ້ານ, ການຈັດຕັ້ງສັງຄົມ, ທຸກຄົນກໍພ້ອມກັນສຸມ ກຳລັງໃຫ້ການຊ່ວຍເຫລືອເປັນເງິນ, ວັດຖຸສິ່ງຂອງ, ເຂົ້າສານອາຫານແຫ້ງເພື່ອຊ່ວຍເຫລືອຜູ້ປະສົບໄພຢູ່ທຸກບ້ານທຸກເມືອງ ແລະ ທຸກ ແຂວງທີ່ມີຜົນກະທົບ.

ຄົນລາວພວກເຮົາເຄີຍມີມູນເຊື້ອຮັກແພງຕຸ້ມຫໍ່ກັນ, ບໍ່ປະບໍ່ຖິ້ມກັນໃນເວລາອັດຕະຄັດຂັດ ສົນເປັນມູນເຊື້ອທີ່ປູຍ່າຕານາຍເຮົາໄດ້ສັ່ງສອນ ແລະ ສ້າງໄວ້ທັງພາເຮັດພາໄປມາແຕ່ບູຮານນະການ./.

- 447 1 - ຊ່ວຍກັນຢຽວຢາຜູ້ໄດ້ຮັບຜົນກະທົບຈາກໄພພິບັດນ້ຳຖ້ວມ

error: Content is protected !!