ທູດຈີນ ມອບເງິນຊ່ວຍເຫລືອຜູ້ປະສົບໄພນ້ຳຖ້ວມຢູ່ລາວ

ໃນວັນທີ 20 ກັນຍາຜ່ານມານີ້ ທ່ານ ຈ່ຽງ ຈ້າຍ ຕົງ ເອກອັກຄະລັດຖະທູດ ສປ ຈີນ ປະຈຳ ສປປ ລາວ ຕາງໜ້າລັດຖະບານ ແຫ່ງ ສປ ຈີນ ໄດ້ນຳເງິນຈຳນວນ 1 ແສນໂດລາສະຫະລັດ ຫລື ປະມານ 800 ລ້ານກວ່າກີບ ມອບໃຫ້ທ່ານ ຄຳແພງ ໄຊສົມແພງ ລັດ ຖະມົນຕີກະຊວງແຮງງານ ແລະ ສະຫວັດດີການສັງຄົມ ເພື່ອນຳໄປຊ່ວຍເຫລືອຜູ້ປະສົບໄພພິບບັດນ້ຳຖ້ວມ ຢູ່ບັນດາແຂວງພາກກາງ ແລະ ພາກໃຕ້ຂອງລາວ ເຊິ່ງເງິນຈຳນວນດັ່ງກ່າວແມ່ນ ໄດ້ລະດົມຈາກບັນດາຫ້າງຮ້ານ, ນັກສຶກສາ ແລະ ນັກທຸລະກິດຈີນ.

ໂອກາດນີ້ ທ່ານ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ໄດ້ສະແດງຄວາມຂອບອົກຂອບໃຈ ຕໍ່ທ່ານ ເອກອັກຄະລັດຖະທູດ ສປ ຈີນ ປະຈຳ ສປປ ລາວ ກໍຄືລັດຖະບານ ແຫ່ງ ສປ ຈີນ, ລວມທັງບັນດາຫ້າງຮ້ານ, ນັກສຶກສາ ແລະ ນັກທຸລະກິດຈີນ ທີ່ຮິບໂຮມນ້ຳໃຈສົ່ງມາຊ່ວຍເຫລືອ ປະຊາຊົນລາວຜູ້ທີ່ໄດ້ຮັບຜົນກະທົບຈາກໄພພິບັດນ້ຳຖ້ວມປີນີ້; ພ້ອມທັງຢືນຢັນ ຈະນຳເງິນຊ່ວຍເຫລືອດັ່ງກ່າວໄປມອບໃຫ້ເຖິງມືປະຊາຊົນ ຢ່າງແນ່ນອນ.

ຂ່າວໃຫ້ຮູ້ຕື່ມວ່າໃນມື້ດຽວກັນ ທ່ານ ເພັດ ພົມພິພັກ ລັດຖະມົນຕີ, ຫົວໜ້າຫ້ອງວ່າ ການສຳນັກງານນາຍົກລັດຖະມົນຕີ ໄດ້ຕາງໜ້າລັດຖະບານລາວ ຮັບເງິນຊ່ວຍເຫລືອຜູ້ປະສົບໄພນໍ້າຖ້ວມ ຈາກທ່ານ ຫລິວ ຫູ້ ຜູ້ຕາງໜ້າກຸ່ມ ບໍລິສັດລົງທຶນ ແລະ ກໍ່ສ້າງ ແຂວງຢູນນານ ຫຸ້ນສ່ວນ ຈຳກັດ ສປ ຈີນ ຈຳນວນ 103.132.000 ລ້ານກີບ ເຊິ່ງເປັນເງິນທີ່ໄດ້ຮັບຈາກການບໍລິຈາກ ຂອງບັນດາບໍລິ ສັດ ແລະ ພະ ນັກງານ ຢູ່ເຂດພັດທະນາກວມລວມ ໄຊເສດຖາ.

ໃນໂອກາດນີ້, ທ່ານ ເພັດ ພົມພິພັກ ໄດ້ກ່າວສະແດງຄວາມຂອບໃຈ ແລະ ຊົມເຊີຍຕໍ່ພາກ ສ່ວນ ກຸ່ມບໍລິສັດດັ່ງກ່າວ ທີ່ໄດ້ປະກອບສ່ວນຊ່ວຍເຫລືອຜູ້ປະສົບໄພນໍ້າຖ້ວມໃນຄັ້ງນີ້ ໂດຍເງິນຊ່ວຍເຫລືອຈຳນວນດັ່ງກ່າວ ແມ່ນຈະໄດ້ນຳໄປມອບໃຫ້ກະຊວງແຮງງານ ແລະ ສະຫວັດດີການສັງຄົມ ເພື່ອນຳໄປຊ່ວຍເຫລືອ ບັນເທົາທຸກແກ່ຜູ້ປະສົບໄພນໍ້າຖ້ວມ. ເພື່ອເປັນກຳລັງໃຈໃຫ້ແກ່ປະຊາຊົນ ແລະ ປະກອບສ່ວນເຮັດໃຫ້ການແກ້ໄຂໄພພິບັດ ກໍຄືຜົນກະທົບຕໍ່ຊີວິດການເປັນຢູ່ຂອງຜູ້ປະສົບໄພນໍ້າຖ້ວມຢູ່ທ້ອງຖິ່ນຕ່າງໆ ສາມາດຜ່ານພົ້ນຄວາມຫຍຸ້ງຍາກ ແລະ ກັບຄືນສູ່ສະພາບປົກກະຕິໂດຍໄວ.

error: Alert: Content is protected !!