ເຮັດ​ປະກັນ​ໄພ​ຕ້ອງ​ເອົາ​ໃຈ​ລູກ​ຄ້າ

- advert banner 728 90 728x90 - ເຮັດ​ປະກັນ​ໄພ​ຕ້ອງ​ເອົາ​ໃຈ​ລູກ​ຄ້າ

​​ໂດຍ: ທິດ​ກ່ຳ

- new3 - ເຮັດ​ປະກັນ​ໄພ​ຕ້ອງ​ເອົາ​ໃຈ​ລູກ​ຄ້າ

ທິດ​ກ່ຳ​ເຄີຍ​ໄດ້​ຍິນ​ສຽງ​ຈົ່ມ​ຂອງ​ສັງຄົມ​ມາ​ຫລາຍ​ລາຍ, ທັງ​ເຄີຍ​ໄດ້​ພົບ​ເຫັນ​ມາ​ຫລາຍ ຄັ້ງ​ເມື່ອ​ເກີດ​ອຸປະຕິ​ເຫດ​ລົດ​ຕຳ​ກັນ​ແລ້ວ ​ໂທ​ຫາ​ປະກັນ​ໄພ​ເປັນ​ສອງ​ສາມ​ຊົ່ວ​ໂມງ​ກໍ​ຍັງ​ບໍ່​ທັນມາ​ຮອດ, ບາງ​ຄົນ​ກໍ​ຈົ່ມ​ວ່າ​ບາດ​ຕອນ​ຢາກ​ໃຫ້​ເຮົາ​ເຂົ້າປະກັນ​ໄພ​ນຳ​ໂທ​ຫາ​ມາ​ໄວ​ປານຈະ​ຫລວດ.

ນອກຈາກ​ນັ້ນ, ​ເມື່ອ​ເກີດ​ອຸປະຕິ​ເຫດ​ແລ້ວ​ກວ່າ​ຈະ​ລົ່ງ​ລອຍກັນ​ໄດ້ວ່າໃຜ​ຜິດ​ໃຜ​ຖືກ​ຫລື​ບາງ​ກໍລະນີ​ທາງ​ປະກັນ​ໄພ​ກໍ​ວ່າ​ມັນ​ບໍ່​ນອນ​ຢູ່​ໃນ​​ເງື່ອນ​ໄຂ​ຮັບຜິດຊອບ, ກວ່າ​ຈະ​ໄກ່​ເກ່ຍກັນ​ໃຫ້​​ເຂົ້າອົກ​ເຂົ້າ​ໃຈ​ກັນໄດ້ກໍ​ຕ້ອງ​ໃຊ້​ເວລາ​ຍາວ​ນານ​ປານ​ຢາງ​ຢືດ. ນີ້​ຄື​ສະພາບຄວາມ​ເປັນ​ຈິງ​, ກໍ​ຄື​ທາງ​ສຽງ​ສັງຄົມ​ຈຳນວນ​ບໍ່​ໜ້ອຍ​ຕໍ່​ຜູ້​ທີ່​​ເຂົ້າປະກັນ​ໄພ​ໃນ​​ລາວ​ທີ່​ພວມ​ມີ​ການ​ພັດທະນາ​ໄປ​ຢ່າງ​ວ່ອງ​ໄວ.

ຄວາມ​ຈິງ​ແລ້ວ, ຢູ່​ປະ​ເທດ​ເຮົາ​ໃນ​ປັດຈຸບັນ​ໄດ້​ເກີດ​ມີ​ຫລາຍ​ບໍລິສັດ​ປະກັນ​ໄພ​ ແຕກ​ໜໍ່​ຈໍ່​ແນວ​ຂຶ້ນປານ​ດອນ​ເຫັດ. ​ເທົ່າ​ທີ່​ທິດ​ກ່ຳ​ຈື່​ໄດ້​ໃນຫລາຍ​ສິບ​ປີ​ກ່ອນໆ ຈຳນວນ​ບໍລິສັດ​ປະກັນມີ​ພຽງ​ສາມ​ສີ່​ບໍລິສັດ​ເປັນຕົ້ນຄື: ບໍລິສັດ​ປະກັນ​ໄພ​ລ້ານ​ຊ້າງ, ອາລີ​ອັນ, ລາວ-ຫວຽດ, ​ໂຕ​ໂກ້, ​ຕໍ່​ມາ​ ຈຶ່ງ​ເປັນ​ສິບ​ເປັນ​ຊາວ​ບໍລິສັດ​ເພີ່ມ​ຂຶ້ນຕິກໆ.

ນອກ​ນັ້ນ, ຍັງ​ມີ​ຕົວ​ແທນ​ຈຳໜ່າຍ​ຢັ່ງ​ຢາຍ​ຢູ່​ແຕ່​ລະ​ບ່ອນ, ​ເຂດ​ແຂວງ​ທ່ອງ​ຖິ່ນ​ຢ່າງ​ຫລວງ ຫລາຍ ​ແລະ  ຢູ່​ໃນ​ກະ​ໂຕ​ບາງ​ທະນາຄານ​ເອງ​ກໍ​ໄດ້​ຈັດຕັ້ງໜ່ວຍ​ງານ​ປະກັນ​​ໄພ​ສະ​ເພາະ​ຂອງ​ຕົນ​ຂຶ້ນ​ເພື່ອ​ອຳນວຍ​ຄວາມ​ສະດວກ​ໃຫ້​ແກ່​ລູກ​ຄ້າ​ເພາະວ່າ​ວຽກ​ງານ​ປະກັນ​ໄພ​ລ້ວນ ​ແລ້ວ​ແຕ່​ນອນ​ຢູ່​ໃນ​ກຸ່ມ​ຂອງ​ການ​ໃຫ້​ສິນ​ເຊື່ອ​ດ້ວຍ​ກັນ​ທັງ​ນັ້ນ.

​        ແນວ​ໃດ​ກໍ​ຕາມ, ນັບ​ແຕ່​ເລີ່​ມມີ​ບໍລິສັດ​ປະກັນ​ໄພ​ເປັນຕົ້ນມາ​ໄດ້​ເປີດ​ກວ້າງ​ໃຫ້​ລູກ​ຄ້າ​ຜູ້​ໃຊ້​ບໍລິການ​ໄດ້​ມີ​ຫລາຍ​ທາງ​ເລືອກ​ທັງ​ອຳນວຍ​ຄວາມ​ສະດວກ​ໄດ້​ຢ່າງ​ວ່ອງ​ໄວ​ທັງ​ສະດວກ​ສະບາຍ​ຫລາຍ​ຂຶ້ນບໍ່​ວ່າ​ໃນ​ດ້ານ​ການ​ປະກັນ​ໄພ​ຊີວິດ, ປະກັນ​ໄພ​ຊັບ​ສິນ, ປະກັນ​ໄພ ອຸປະຕິ​ເຫດ ​ແລະ ປະກັນ​ໄພ​ຕາມ​ຮູບ​ແບບ​ອື່ນໆ ສຸດ​ແລ້ວ​ແຕ່​ເປົ້າໝາຍ ​ແລະ ຄວາມ​ຮຽກຮ້ອງ​ຕ້ອງການ​ຂອງ​ຄົນ​ໃນ​ສັງຄົມ.

- lattana 1 - ເຮັດ​ປະກັນ​ໄພ​ຕ້ອງ​ເອົາ​ໃຈ​ລູກ​ຄ້າ

ຕະຫລອດ​ໄລຍະ​ຫລາຍ​ສິບ​ປີ​ຜ່ານ​ມາ, ບໍລິສັດ​ປະກັນ​ໄພ​ທີ່​ມີ​ຢູ່​ໃນ​ປະ​ເທດ​ລາວ​ສ່ວນ​ໃຫຍ່​ກໍ ​ໄດ້​​ເອົາ​ໃຈ​ໃສ່​ແກ້​ໄຂ​ຊ່ວຍ​ເຫລືອ​ອຳນວຍ​ຄວາມ​ສະດວກ​ແກ່​ລູກ​ຄ້າ​ທີ່​ໄດ້​ນຳ​ໃຊ້​ບໍລິການ​ໄດ້ ​ເປັນ​ຢ່າງ​ດີ, ທັງ​ເປັນ​ການ​ປະກອບສ່ວນ​ຊ່ວຍ​ເຫລືອ​ສັງຄົມ​ກໍ​ຄື​ພາລະກິດ​ການ​ສ້າງສາ​ພັດ ທະ​ນາ​ປະ​ເທດ​ຊາດ​ໄປ​ຄ່ຽງຄູ່​ກັບ​ຂະ​ແໜງ​ການ​ອື່ນໆ ​ໄດ້​ຢ່າງ​ຫລວງຫລາຍ.​ເຖິງ​ຢ່າງ​ໃດ​ກໍ​ດີ, ​ໄປ​ຄຽງ​ຄູ່​ກັບ​ພາລະກິດ​ທີ່​ມີ​ຕໍ່​ຊາດ ​ແລະ ສັງຄົມ​​ໄດ້​ດີ​ແລ້ວ​ຍັງ​ມີ​ບາງ​ບໍລິສັດ​ປະກັນ​ໄພ, ບາງ​ຕົວ​ແທນ​ຈຳໜ່າຍ​ຍັງ​ມີ​ການ​ບໍລິການ​ບໍ່​ຄ່ອຍ​ດີ​ປານ​ໃດ, ຖື​ວ່າ​ຍັງ​ບໍ່ທັນ​ໄດ້​ມາດຕະຖານ​ຕາມ​ຄວາມ​ຮຽກຮ້ອງ​ຕ້ອງການ​ຄື​ດັ່ງ​ຕົວຢ່າງ​ທີ່​ໄດ້​ກ່າວ​ມາ​ຂ້າງ​​ເທິງ.

ນອກ​ນັ້ນ, ການ​ແກ້​ໄຂ​ຄວາມ​ຂັດ​ແຍ່ງ​ລະຫວ່າງຄູ່​ກໍ​ນີຕ່າງໆ ກໍ​ອ່າວ​ຊັກ​ຊ້າ​ແກ່ຍາວ, ຍິ່ງ​​ກວ່າ​ນັ້ນຕົວ​ແທນ​ຈຳໜ່າຍ​ບາງ​ບ່ອນ​ເມື່ອ​ຈ່າຍ​ເງິນ​ປະກັນ​ໄພ​ໄປ​ແລ້ວ​ບໍ່​ຖອກ​ເງິນ​ໃຫ້​ບໍລິສັດ​ແມ່ນ​ສວຍ​ໂອກາດ​ໂອມ​ເອົາ​ໂດຍ​ເຈດ​ຕະນາ​ເມື່ອ​ເກີດ​ເຫດ​ມາ​ພັດຖິ້ມພຸ້ນ, ຖິ້ມພີ້, ຍັງ​ຂໍ​ເວລາ​ຄົ້ນຄວ້າ​ແກ້​ໄຂ, ​ແກ່ຍາວ​ເວລາ, ພະນັກງານ​ປະກັນ​ໄພ​ພາກ​ສະໜາມ​ເວົ້າບໍ່ ຄ່ອຍ​ເຂົ້າຫູ, ບໍ່​ມີ​ຄຸນສົມບັດ​ຕໍ່​ລູກ​ຄ້າ​ໂທລະສັບ​ໄປ​ຫາ​ກໍ​ບໍ່​ຮັບ ​ແລະ ຍັງ​ມີ​ກໍລະນີ​ອື່ນໆ ທີ່ ຍັງ​ບໍ່​ທັນ​ໂປ່​ງ​ໃສ​ໃນ​ຖັນ​ແຖວ​ພະນັກງານ​ຜູ້​ທີ່​ເຮັດ​ປະກັນ​ໄພ​ກັບ​ລູກ​ຄ້າ.

ຕາມ​ເຮົາ​ວ່າການ​ເຮັດ​ທຸລະ​ກິດ​ບໍ່​ວ່າ​ໃນ​ຂະ​ແໜງ​ການ​ໃດ​ກໍ​ຕາມ​ຖ້າ​ບໍ່​ຈິງ​ໃຈ​ກັບ​ລູກ​ຄ້າ ຫລື ການ​ບໍລິການ​ບໍ່​ດີ​ທ່າ​ອ່ຽງຂອງ​ຄວາມ​ຂາດ​ສັດທາ​ຈາກ​ຜູ້​ໃຊ້​ບໍລິການ​ມັນ​ກໍ​ຄ່ອຍ​ມະ​ຫັບ​ມະ ຫາຍ ​ແລະ ສ້ວຍ​ລົງ​ຄື​ຫາງ​ຂີ້​ໂກະ​ຂີ້ກ້ຽມ ວິນາທີ​ສຸດ​ທ້າຍ​ຄຳ​ວ່າ “​ເຈັ້ງ” ມັນ​ກໍ​ມາ​ເຖິງ​ຕົວ​ເຮົາ​ນັ້ນ​ແລ./.

- 1427 - ເຮັດ​ປະກັນ​ໄພ​ຕ້ອງ​ເອົາ​ໃຈ​ລູກ​ຄ້າ
error: Content is protected !!