ສປປ ລາວ-ອົງການສະຫະປະຊາຊາດເພື່ອການພັດທະນາ ຮັດແໜ້ນການຮ່ວມມື

- advert banner 728 90 728x90 - ສປປ ລາວ-ອົງການສະຫະປະຊາຊາດເພື່ອການພັດທະນາ ຮັດແໜ້ນການຮ່ວມມື

ຂປລ. ໃນວັນທີ 27 ກັນຍາ 2019 ຜ່ານ​ມານີ້, ທີ່ີສໍານັກງານໃຫຍ່ອົງການ UNDP ​ໃນນະຄອນ ນິວຢອກ ສະຫະ​ລັດ​ອາ​ເມ​ລິ​ກາ, ທ່ານ ສະເຫລີມໄຊ ກົມມະສິດ ລັດຖະມົນຕີກະຊວງການຕ່າງປະເທດ ໄດ້ພົບປະກັບ ທ່ານອາຄິມ ສະໄຕເນີ (Achim STEINER), ຜູ້ອຳນວຍການໃຫຍ່ອົງການສະຫະປະຊາຊາດເພື່ອການພັດທະນາ, ທັງເປັນຮອງປະທານກຸ່ມ ເພື່ອພັດທະນາແບບຍືນຍົງຂອງອົງການ ສປຊ (UN Sustainable Development Group). ການພົບປະຄັ້ງນີ້ສອງຝ່າຍໄດ້ຕີລາຄາສູງຕໍ່ການຮ່ວມມືທີ່ດີລະຫວ່າງ ສປປລາວ ແລະ ອົງການ UNDP ຕະຫລອດໃນໄລຍະຜ່ານມາ ແລະ ໄດ້ຢໍ້າຄືນຄວາມຕັດສິນໃຈສູງເພື່ອສືບຕໍ່ຮ່ວມມືກັນໃນຫລາຍໆດ້ານ ເປັນຕົ້ນ ແມ່ນການສະໜັບສະໜູນຄວາມພະຍາ ຍາມຂອງລັດຖະບານລາວ ໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດແຕ່ລະໄລຍະ, ການຈັດຕັ້ງປະຕິບັດເປົ້າໝາຍການພັດທະນາແບບຍືນຍົງ(SDGs), ການປະຕິບັດເປົ້າຫມາຍການພັດທະນາແບບຍືນຍົງແຫ່ງຊາດທີ 18 (ວຽກງານກວດກູ້ລະເບີດທີ່ບໍ່ທັນແຕກ), ການລຶບລ້າງຄວາມທຸກຍາກ, ການປ່ຽນແປງດິນຟ້າອາກາດ ແລະ ການຮັບມືກັບໄພພິບັດທາງທຳມະຊາດ ລວມທັງການຮ່ວມມືໃນຂົງເຂດບຸລິມະສິດອື່ນໆ ເພື່ອສືບຕໍ່ປະກອບສ່ວນເຂົ້າໃນການສ້າງຄວາມເຂັ້ມແຂງໃຫ້ແກ່ ສປປ ລາວ ໃນການກະກຽມຄວາມພ້ອມ ເພື່ອໃຫ້ສາມາດຫລຸດພົ້ນອອກຈາກສະຖານະພາບປະເທດດ້ອຍພັດທະນາ ແລະ ກາຍເປັນປະເທດທີ່ມີລາຍຮັບປານກາງ-ສູງໃນອະນາຄົດ.

- new3 - ສປປ ລາວ-ອົງການສະຫະປະຊາຊາດເພື່ອການພັດທະນາ ຮັດແໜ້ນການຮ່ວມມື

 ທ່ານ ສະເຫລີມໄຊ ກົມມະສິດ ໄດ້ຖືໂອກາດນີ້ເຊື້ອເຊີນ ທ່ານ Achim STEINER ເດີນ ທາງຢ້ຽມຢາມ ສປປ ລາວ ຢ່າງເປັນທາງການ ແລະ ເຂົ້າຮ່ວມກອງປະຊຸມໂຕະມົນລະດັບສູງຄັ້ງທີ 13 ​ທີ່ຈະຈັດຂຶ້ນໃນທ້າຍປີ 2020 ທີ່ ນະຄອນຫລວງວຽງຈັນ ເຊິ່ງຈະເປັນການເສີມຂະຫຍາຍການຮ່ວມມືທີ່ມີມູນເຊື້ອຍາວນານ ລະຫວ່າງ ສອງຝ່າຍ ໃນທ່າມກາງບັນຍາກາດທີ່ ສປປ ລາວ ແລະ ອົງການ ສປຊ ພວມກະກຽມສະເຫລີມສະ ຫລອງວັນສຳຄັນຕ່າງໆ ເປັນຕົ້ນ ການສະເຫລີມສະຫລອງການຮ່ວມມືລະຫວ່າງ ສປປ ລາວ ແລະ ອົງການ ສປຊ ຄົບຮອບ 65 ປີ ແລະ ການສ້າງຕັ້ງອົງການ ສປຊ ຄົບຮອບ 75 ປີ ກໍຄື ເຫດການສໍາຄັນອື່ນໆ.

ທ່ານ Achim STEINER ໄດ້ສະແດງຄວາມຍິນດີຕ້ອນຮັບອັນອົບອຸ່ນ ມາຍັງທ່ານລັດຖະ ມົນຕີ ພ້ອມດ້ວຍຄະນະທີ່ໄດ້ເສຍສະຫລະເວລາມາຢ້ຽມຢາມ ແລະ ພົບປະໃນຄັ້ງນີ້, ພ້ອມທັງໄດ້ຢືນຢັນວ່າ ອົງການ UNDP ຈະສືບຕໍ່ຮ່ວມກັບວົງຄະນະຍາດສາກົນ ສະໜັບສະໜູນ ສປປ ລາວ ໃນການສົ່ງເສີມການພັດທະນາຕາມບຸລິມະສິດຂອງລັດຖະບານ ກໍຄື ແຜນພັດທະນາເສດຖະກິດ-ສັງຄົມແຫ່ງຊາດ ແລະ ແຜນການຮ່ວມມືອື່ນໆໃຫ້ມີປະສິດທິຜົນຍິ່ງຂຶ້ນ ເພື່ອປະກອບສ່ວນໃນການຫລຸດຜ່ອນຄວາມທຸກຍາກ ແລະ ຮັກສາທ່າອ່ຽງການເຕີບໂຕຂອງ ສປປ ລາວ ໃຫ້ສາມາດບັນລຸເງື່ອນໄຂການຫລຸດພົ້ນອອກຈາກສະຖານະພາບດ້ອຍພັດທະນາ ແລະ ການພັດທະນາແບບຍືນຍົງໃນຊຸມປີຕໍ່ໜ້າ.

- lattana 1 - ສປປ ລາວ-ອົງການສະຫະປະຊາຊາດເພື່ອການພັດທະນາ ຮັດແໜ້ນການຮ່ວມມື
error: Content is protected !!