ພາລະກິດ​ຂອງ​ຄູ​ຕໍ່​ພາລະ​ກຳ​ປະຫວັດສາດ​ຂອງ​ຊາດ

- advert banner 728 90 728x90 - ພາລະກິດ​ຂອງ​ຄູ​ຕໍ່​ພາລະ​ກຳ​ປະຫວັດສາດ​ຂອງ​ຊາດ

​ໂດຍ: ທິດ​ກ່ຳ

- new3 - ພາລະກິດ​ຂອງ​ຄູ​ຕໍ່​ພາລະ​ກຳ​ປະຫວັດສາດ​ຂອງ​ຊາດ

ອີກ​ບໍ່​ດົນ​ວັນ​ທີ 7 ຕຸລາ​ກໍ​ຈະ​ໝູນວຽນ​ມາ​ບັນຈົບ​ຄົບຮອບ​ອີກ​ວາລະ​ໜຶ່ງ. ດັ່ງ​ພວກ​ເຮົາ​ຮູ້ ນຳ​ກັນ​ແລ້ວ​ວ່າ: ວັນ​ທີ 7 ​ຕຸລາ​ເປັນ​ວັນ​ຄູ​ແຫ່ງ​ຊາດ. ​

 ຫລັງ​ຈາກ​ປະ​ເທ​ດຊາດ​ໄດ້​ກ້າວ​ສູ່​ຍຸກ​ໃໝ່​ຄື​ຍຸກ ສາທາລະນະ​ລັດ ປະຊາທິປະ​ໄຕ ປະຊາຊົນ​ລາວ ພັກ ​ແລະ ລັດຖະບານ​ເຮົາ​ຈຶ່ງ​ກຳນົດ​ໃຫ້​ມີ​ວັນ​ຄູ​ໃນ​ຍຸກ​ປະຫວັດສາດ​ຂອງ​ຊາດ​ຢ່າງ ​ເປັນ​ທາງ​ການ​ບົນ​ພື້ນຖານ​ເຫັນ​ໄດ​້ຄວາມ​ໝາຍ, ຄວາມ​ສຳຄັນ​ຕໍ່​ອາຊີບ​ຄູ​ກໍ​ຄື​ພາລະ​ກິດ​ຂອງ​ຄູນັ້ນສຸດ​ທີ່​ໜັກໜ່ວງ ​ແລະ ມີ​ບຸນຄຸນ​ຕໍ່​ປະ​ເທດ​ຊາດ​ບ້ານ​ເມືອງ​ໃນ​ພາລະກິດ​ສ້າງສາ​ພັດທະນາ​ປະ​ເທດ​ຊາດ​ບົດບາດ ​ແລະ ໜ້າ​ທີ່​ຂອງ​ຄູ​ແມ່​ນ​ເປັນ​ຜູ້​ສ້າງ​ຊັບພະຍາກອນ​ມະນຸດ ຫລື ຖ້າ​ຈະ​ຮຽກ​ຕາມ​ຄວາມ​ໝາຍ​ເລິກ​ກໍ​ແມ່ນ​ເປັນ​ວິສະວະກອນ​ແຫ່ງ​ດວງ​ວິນ​ຍານ.

ຖ້າ​ປຽບ​ໃສ່​ບິດາ​ມານ​ດາ​ຜູ້​ເກີດ​ເກົ້າກໍ​ສາມາດ​ເວົ້າ​ໄດ້​ວ່າ​ຄູ​ເປັນ​ພໍ່​ແມ່​ຜູ້​ທີ​ສອງ​ຂອງ​ນັກຮຽນ​ເປັນຕົ້ນຄື​ພໍ່​ແມ່​ຜູ້​ທີ່​ໜຶ່ງ​ເປັນ​ຜູ້​​ໃຫ້ກຳ​ເນີ​ດລ້ຽງ​ເຮົາ​ມາ​ພາ​ເຮົາ​ໃຫຍ່​ໝົດ​ແກງ​ຫລາຍໝໍ້, ໝົດ​ເຂົ້າຫລາຍ​ຕິບ.

ສ່ວນ​ພໍ່​ແມ່​ຜູ້​ທີ​ສອງ​ຄື​ຄູ​ເປັນ​ຜູ້​ສິດສອນ​ໃຫ້​ຄວາມ​ຮູ້, ມີ​ຄວາມ​ສະຫລາດ​ຫລັກ​ແຫລມ​ຮ່ຳຮຽນ​ຂຽນ​ອ່ານ​ນັບ​ແຕ່​ຫ້ອງ​ລ້ຽງ​ເດັກ​ອານຸບານ​ຂຶ້ນ​ໄປ​ຮອດ​ປະຖົມ, ມັດທະຍົມ, ວິທະຍາ​ໄລ, ມະຫາວິທະຍາ​ໄລ​ໄດ້​ຊັ້ນປະລິນຍາ​ໂທ, ປະລິຍາ​ເອກ​ຕາມ​ສາຂາ​ອາຊີບຕ່າງໆ ກໍ​ລ້ວນ​ແລ້ວ​ແຕ່​ແມ່ນ​ຄູ. ອາຈານ​ເປັນ​ຜູ້​ສິດສອນ​ຖ່າຍ​ເທ​ຄວາມ​ຮູ້​ໃຫ້​ດ້ວຍ​ກັນ​ທັງ​ນັ້ນ.

ຍ້ອນ​ເຫັນ​ຄຸນຄ່າ​ຄວາມ​ໝາຍ​ຄວາມ​ສຳຄັນ​ໃນ​ພາລະກິດ​ຂອງ​ຄູ​ທີ່​ມີ​ບຸນຄຸນ​ຕໍ່​ປະ​ເທດ​ຊາດ ບ້ານ​ເມືອງ​ຢ່າງ​ໃຫຍ່​ຫລວງ​ພັກ ​ແລະ ລັດຖະບານ​ເຮົາ​ຈຶ່ງ​ກຳນົດ​ເອົາ​ວັນ​ທີ 7 ​ ​ຕຸລາ ຂອງ​ທຸກໆ ປີ​ເປັນ​ວັນ​ຄູ​ແຫ່ງ​ຊາດ.

​        ເມື່ອ​ຫວນ​ຄືນ​ມາ​ຮອດ​ປີ 2019ນີ້ ວັນ​ຄູ​​ແຫ່ງ​ຊາດ​ກໍ​ມີ​ອາຍຸ​ຄົບຮອບ 24 ປີ​ພໍດີ (7/10/1995-7/10/2019), ​ກ່ຽວກັບ​ປະຫວັດສາດ​ຄວາມ​ເປັນ​ມາ​ຂອງ​ວັນ​ຄູ​ແຫ່ງ​ຊາດ​ທິດ​ກ່ຳ​ຂໍ​ເອົາ​ໄປ​ເລົ່າ​ໃນ​ຄໍ​ລຳມື້ໜ້າ​ເພາະ​ໜ້າ​ເຈ້ຍ​ມື້ນີ້​ມີ​ຈຳກັດ.

- lattana 1 - ພາລະກິດ​ຂອງ​ຄູ​ຕໍ່​ພາລະ​ກຳ​ປະຫວັດສາດ​ຂອງ​ຊາດ

​        ແນວ​ໃດ​ກໍ​ຕາມ, ​ເມື່ອ​ເອີ່ຍ​ເຖິງ​ພາລະກິດ​ຂອງ​ຄູ ​ແລະ ບຸນຄຸນ​ຂອງ​ຄູນັ້ນບໍ່​ມີ​ໃຜ​ປະຕິ​ເສດ​ໄດ້​ວ່າ​ເຮົາ​ເກີດ​ມາຕັ້ງ​ແຕ່​ນ້ອຍ​ເທົ່າ​ໃຫຍ່​ບໍ່​ໄດ້​ຮ່ຳຮຽນ​ວິຊາ​ຄວາມ​ຮູ້​ມາ​ຈາກ​ຄູ, ຜູ້​ທີ່​ເວົ້າ​ໄດ້​ກໍ​ມີ​​ແຕ່​ຄົນ​ປຶກ​ຫຶກ​ໜາ ຫລື ວ່າ​ຄົນ​ກືກ​ທີ່ບໍ່​ໄດ້​ເຂົ້າ​ໂຮງຮຽນ​ນຳ​ເຂົາ​ຍົກ​ຕົວຢ່າງ​ໃນ​ສະ​ໄໝ​ກ່ອນ​ພໍ່​ແມ່​ປູ​ຍ່າ​ຕານາຍ​ເຮົາ​ເຄີຍ​ເວົ້າວ່າ “ກູ​ບໍ່​ໄດ້​ເຂົ້າ​ໂຮງຮຽນ​ຍັງ​ລ້ຽງ​ສູ​ມາ​ພາ​ສູ​ໃຫຍ່” ວ່າ​ຊັ້ນ! ຕົກ​ມາ​ໃນ​ສະ​ໄໝ​ນີ້, ອີງ​ໃສ່​ການ​ປ່ຽນ​ແປງ​ຂອງ​ໂລກ​ນັບ​ມື້ມີ​ການ​ພັດທະນາ​ໄປຢ່າງ​ກ້າວ​ໄກການ​ສຶກສາ​ໄດ້​ມີ​ການ​ຂະຫຍາຍຕົວ​ຢ່າງ​ກວ້າງຂວາງ​ທັງ​ກ້າວໜ້າ​ລ້ຳຍຸກ ​ແລະ ກາຍ​ເປັນ​ພາລະ​ກຳ​ອັນ​ສຳ​ຄັນ​ຂອງ​ຄົນ​ເຮົາ​ທັງ​ເປັນ​ພາກ​ບັງຄັບ​ເພື່ອ​ໃຫ້​ທຸກ​ຄົນ​ໄດ້​ເຂົ້າ ຮຽນ​ຢ່າງ​ທົ່ວ​ເຖິງ.

ຕະຫລອດ​ໄລຍະ 40 ປີກ​ວ່າ​ໂດຍ​ສະ​ເພາະ​ນັບ​ແຕ່​ມີ​ວັນ​ຄູ​ແຫ່ງ​ຊາດ​ມາ​ນີ້, ການ​ສຶກສາ​ໄດ້ ມີ​ການ​ຂະຫຍາຍຕົວ​ຢ່າງ​ໄວວາ​ຈຳນວນ​ໂຮງຮຽນ ​ແລະ ສະ​ຖາ​ບັນ​ການ​ສຶກສາ​ໄດ້​ເພີ່ມ​ຂຶ້ນ, ຈຳນວນ​ນັກຮຽນ​ນັກ​ສຶກສາ​ເພີ່ມ​ຂຶ້ນ ​ແລະ ຈຳນວນ​ຄູ​ກໍ​ເພີ່ມ​ຂຶ້ນ​ໃນ​ແຕ່ລະ​ປີ.

ອີງ​ໃສ່​ຄວາມ​ຮຽກຮ້ອງ​ຕ້ອງການ​ໃນ​ການ​ສ້າງສາ ​ແລະ ພັດທະນາ​ປະ​ເທດ​ຊາດ​ໃຫ້​ກ້າວ​ໄປ​ຢ່າງ​ບໍ່​ຢຸດ​ຢັ້ງສາມາດ​ລົບ​ລ້າງ​ອອກ​ຈາກ​ຄວາມທຸກ​ຍາກ ​ແລະ ດ້ອຍ​ພັດທະນາ​ກ້າວ​ໄປ​ສູ່​ການ​ບຸກທະລຸ​ໃນ​ການ​ສ້າງ​ຊັບພະຍາກອນ​ມະນຸດ​ທີ່​ເຕັມ​ໄປ​ດ້ວຍ​ຄຸນສົມບັດ, ຄວາມ​ຮູ້​ຄວາມ​ສາມາດ​ຕາມ​ແນວທາງ​ນະ​ໂຍບາຍ​ຂອງ​ພັກ ​ແລະ ລັດຖະບານ​ວາງ​ອອກ​ບັນດາ ຄູ-ອາຈານ, ນັບ​ທັງ​ພະນັກງານ​ບໍລິຫານ​ການ​ສຶກສາ​ຕ້ອງ​ໄດ້​ສູ້​ຊົນ​ເພື່ອ​ສຳ​ເລັດ​ໜ້າ​ທີ່​ຂອງ​ຕົນ​ຕໍ່​ພາລະ​ກຳ​ປະຫວັດສາດ​ທີ່​ໄດ້​ມອບ​ໝາຍ​ໃຫ້.

​        ເຖິງ​ຢ່າງ​ໃດ​ກໍ​ດີ, ມາ​ຮອດ​ປັດຈຸບັນ​ນີ້​ບັນຫາ​ການ​ປະຕິບັດ​ໜ້າ​ທີ່​ຂອງ​ຄູ​ກໍ​ຍັງ​ມີ​ຄວາມ​ສະ ດວກ ​ແລະ ຄວາມ​ຫຍຸ້ງຍາກ​ໃນ​ຫລາຍ​ດ້ານ​ເປັນຕົ້ນ: ບັນຫາ​ຄູ​ບໍ່​ມີ​ຄຸນ​ນະພາ​ບ, ຄູ​ເຫລືອ​ບໍ່ພໍ, ຄູ​ອາສາ​ຍັງ​ມີ​ຈຳນວນ​ຫລວງຫລາຍ​ໃນ​ທົ່ວ​ປະ​ເທດ, ຕະຫລອດ​ຊີວິດ​ການ​ເປັນ​ຢູ່​ຂອງ​ຄູ​ໃນ​ຊົນນະບົດ ​ເຊິ່ງພວກ​ເຮົາ​ຈະ​ຕ້ອງ​ເອົາ​ໃຈ​ໃສ່​ແກ້​ໄຂ​ໃຫ້​ສອດຄ່ອງ ​ແລະ ​ເໝາະ​ສົມ./.

- 297 - ພາລະກິດ​ຂອງ​ຄູ​ຕໍ່​ພາລະ​ກຳ​ປະຫວັດສາດ​ຂອງ​ຊາດ
(ພາບປະກອບ)
error: Content is protected !!