ຄະນະຜູ້ແທນລາວ ສຳເລັດການເຂົ້າຣ່ວມກອງປະຊຸມລັດຖະມົນຕີອາຊຽນກ່ຽວກັບໄພພິບັດ

- advert banner 728 90 728x90 - ຄະນະຜູ້ແທນລາວ ສຳເລັດການເຂົ້າຣ່ວມກອງປະຊຸມລັດຖະມົນຕີອາຊຽນກ່ຽວກັບໄພພິບັດ

ໃນໄລຍະວັນທີ 1-4 ຕຸລານີ້ ທ່ານ ຄຳແພງ ໄຊສົມແພງ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ພ້ອມດ້ວຍຄະນະ ໄດ້ເຂົ້າຮ່ວມກອງປະຊຸມລັດຖະມົນຕີອາຊຽນ ກ່ຽວກັບການຄຸ້ມຄອງໄພພິບັດ ຄັ້ງທີ 7, ກອງປະຊຸມຄະນະກຳມະການຄຸ້ມຄອງໄພພິບັດອາຊຽນ ຄັ້ງທີ 35 ແລະ ກອງປະຊຸມອື່ນໆ ທີ່ກ່ຽວຂ້ອງ ຢູ່ນະຄອນຫລວງເນປີດໍ, ປະເທດມຽນມາ ພາຍໃຕ້ຫົວຂໍ້:“ການຂ້າມຜ່ານການຟື້ນຟູຫລັງໄພພິບັດສູ່ຄວາມເຂັ້ມແຂງ”ຊຶ່ງເປັນຫົວຂໍ້ທີ່ມີຄວາມໝາຍ ແລະ ແທດເໝາະກັບສະພາບການ ທີ່ບັນດາປະເທດສະມາຊິກອາຊຽນກຳລັງປະເສີນຢູ່ ໂດຍສະເພາະ ອຸທົກກະໄພ ທີ່ເກີດຂຶ້ນໃນ ສປປ ລາວ, ກຳປູເຈຍ ແລະ ມຽນມາ ບັນດາລັດຖະມົນຕີ ໄດ້ຊຸກຍູ້ໃຫ້ມີກົນໄກ ແລະ ແຜນງານຍຸດທະສາດ ໃນການລະດົມທຶນ ເພື່ອສະໜັບສະໜູນ ການຟື້ນຟູຫລັງໄພພິບັດ ໃນບັນດາປະເທດສະມາຊິກ ທີ່ມີຜົນກະທົບ ເພື່ອສ້າງໃຫ້ພາກພື້ນ ມີຄວາມເຂັ້ມແຂງ ແລະ ໄດ້ຮັບການປົກປ້ອງໝາກຜົນຂອງການພັດທະນາເສດຖະກິດ-ສັງຄົມ.

- new3 - ຄະນະຜູ້ແທນລາວ ສຳເລັດການເຂົ້າຣ່ວມກອງປະຊຸມລັດຖະມົນຕີອາຊຽນກ່ຽວກັບໄພພິບັດ

ກອງປະຊຸມຄັ້ງນີ້ໄດ້ປຶກສາຫາລື ແລະ ມີຄຳເຫັນໃສ່ເອກະສານທີ່ສຳຄັນ ຄື:​(1) ແຜນປະຕິບັດງານ AADMER 2016-2020 ກ່ຽວກັບການຄຸ້ມຄອງໄພພິບັດ ແລະ ຕອບໂຕ້ສຸກເສີນ; (2) ການຮັບຮອງແຜນການເຄື່ອນໄຫວຂອງ ສູນປະສານງານຊ່ວຍເຫລືອດ້ານມະນຸດສະທຳອາຊຽນ (AHA center); (3) ຜົນສໍາເລັດດ້ານນະໂຍບາຍ ແລະ ບັນດາກິດຈະກຳພາກສະໜາມ ໃນການຜັນຂະຫຍາຍ ຖະແຫຼງການອາຊຽນ ກ່ຽວກັບ ໜຶ່ງອາຊຽນ ໜຶ່ງການຕອບໂຕ້, ວິໃສທັດອາຊຽນ 2025 ກ່ຽວກັບໄພພິບັດ ແລະ ແຜນຍຸດທະສາດວັດທະນາທຳ-ສັງຄົມອາຊຽນ 2025 (ASCC Blueprint). ບັນຫາພົ້ນເດັ່ນໃນການຜັນຂະຫຍາຍແຜນປະຕິບັດງານ AADMER2016-2020ແມ່ນກອງປະຊຸມ ໄດ້ຊົມເຊີຍຜົນສໍາເລັດໃນການສ້າງສາງເກັບເຄື່ອງຊ່ວຍເຫລືອສຸກເສີນອາຊຽນ ເພີ່ມສອງແຫ່ງ ຢູ່ປະເທດໄທ ແລະ ຟິລິບປີນ (DELSA); ໄດ້ຮັບຮອງເອົາບົດແນະນໍາການນໍາໃຊ້ເຄື່ອງໝາຍອາຊຽນ ກ່ຽວກັບການຊ່ວຍເຫລືອມະນຸດສະທຳ ແລະ ການບັນເທົາທຸກ; ຮັບຮອງເອົາບົດຄົ້ນຄ້ວາຮ່ວມລະຫວ່າງ ອາຊຽນ ແລະ ESCAP ກ່ຽວກັບບັນຫາໄພແຫ້ງແລ້ງ; ນອກຈາກນີ້, ຍັງໄດ້ດໍາເນີນການທົດລອງຫລັກສູດຝຶກອົບຮົມ ຂັ້ນສູງ ໃຫ້ທີມງານການປະເມີນ ແລະ ຕອບໂຕສຸກເສີນອາຊຽນ (AEAN ERAT). ນອກຈາກນີ້, ກອງປະຊຸມລັດຖະມົນຕີອາຊຽນຄັ້ງນີ້ ໄດ້ຮັບຊາບແຜນການສ້າງ ແຜນປະຕິບັດງານ AADMER 2021-2025 ແລະ ແຕ່ງຕັ້ງ ໜ່ວຍງານຄົ້ນຄວ້າຂຽນແຜນດັ່ງກ່າວ.

ກອງປະຊຸມ ໄດ້ຮັບຮູ້ບົດບາດຄວາມສຳຄັນຂອງ ສູນປະສານງານຊ່ວຍເຫລືອມະນຸດສະທຳອາຊຽນ ຫລື ສູນອາຮາ ໃນການຈັດຕັ້ງຜັນຂະຫຍາຍ ຖະແຫລງການອາຊຽນ ກ່ຽວກັບ ໜຶ່ງອາຊຽນ ໜຶ່ງການຕອບໂຕ້ ໂດຍສະເພາະ ການເຄື່ອນໄຫວຊ່ວຍເຫລືອ ສປປ ລາວ ທີ່ປະສົບກັບອຸທົກກະໄພ ໃນບັນດາແຂວງພາກໃຕ້ ເນື່ອງຈາກອິດທິພົນຂອງພະຍຸລະດູຮ້ອນ ໂພດູ ແລະ ກາຈິກິ ແລະ ເປັນໃຈກາງປະສານງານກັບບັນດາປະເທດສະມາຊິກອາຊຽນ ລະດົມປະຖົມປັດໃຈ ສ້າງ ບ້ານເຂັ້ມແຂງອາຊຽນ ໃນເຂດທີ່ໄດ້ຮັບຜົນກະທົບ ໃນເມືອງ ສຸລາວະສີ, ປະເທດອິນໂດເນເຊຍ. ຕໍ່ກັບບັນຫາດັ່ງກ່າວນີ້, ທ່ານ ຄຳແພງ ໄຊສົມແພງ ລັດຖະມົນຕີກະຊວງແຮງງານ ແລະ ສະຫວັດດີການ ແຫ່າງ ສປປ ລາວ ກໍໄດ້ກ່າວສະແດງຍ້ອງຍໍຊົມເຊີຍ ແລະ ຂອບໃຈ ມາຍັງບັນດາປະເທດສະມາຊິກອາຊຽນ ໂດຍສະເພາະ ສູນອາຮາ ແລະ ພິເສດ ປະທດມາເລເຊຍ ໃນການປະກອບສ່ວນຍົນທະຫານ ຂົນເຄື່ອງຊ່ວຍເຫລືອບັນເທົາທຸກ ຈາກປະເທດມາເລເຊຍ ມາສົ່ງ ສປປ ລາວ ໃນປີ 2019.​ ນອກຈາກນີ້, ສປປ ລາວ ໄດ້ມີແຈ້ງການໃຫ້ກອງປະຊຸມຮັບຊາບ ກ່ຽວກັບການປ້ອງກັນ ແລະ ຫລຸດຜ່ອນຜົນກະທົບຈາກໄພພິບັດ ເປັນຕົ້ນ ດ້ານນິຕິກຳ ສປປ ລາວ ໄດ້ຜ່ານກົດໝາຍວ່າດ້ວຍການຄຸ້ມຄອງໄພພິບັດ ແລະ ຮອງຮັບເອົາຍຸດທະສາດແຫ່ງຊາດ ວ່າດ້ວຍການຫລຸດຜ່ອນຄວາມສ່ຽງໄພພິບັດ 2021-2025; ໄດ້ສົ່ງເສີມການຮ່ວມມືກັບຄູ່ຮ່ວມງານອາຊຽນ ແລະ ສາກົນ,​ ພາກເອກະຊົນ ພາຍໃນ ແລະ ຕ່າງປະເທດ ເພື່ອຈັດຕັ້ງຜັນຂະຫຍາຍສັນ ຍາອາຊຽນວ່າດ້ວຍ ການຄຸ້ມຄອງໄພພິບັດ ແລະ ການຕອບໂຕ້ສຸກເສີນ ແລະ ເພີ່ມທະວີການຮ່ວມມືທີ່ດີ ກັບສູນປະສານງານຊ່ວຍເຫລືອມະນຸດສະທຳອາຊຽນ ໃນການປະຕິບັດຊ່ວຍເຫລືອສຸກເສີນ ຟີື້ນຟູ ໃຫ້ມີປະສິດທິຜົນ ແລະ ປະສິດທິພາບ ໃນລະດັບສູງ.

- d8b9acb8705f - ຄະນະຜູ້ແທນລາວ ສຳເລັດການເຂົ້າຣ່ວມກອງປະຊຸມລັດຖະມົນຕີອາຊຽນກ່ຽວກັບໄພພິບັດ
- c2d6f2c8 04b8 4aa7 8fff 76ad7ade2968 1024x473 - ຄະນະຜູ້ແທນລາວ ສຳເລັດການເຂົ້າຣ່ວມກອງປະຊຸມລັດຖະມົນຕີອາຊຽນກ່ຽວກັບໄພພິບັດ

ນອນຈາກການເຂົ້າຮ່ວມປະຊຸມແລ້ວ, ທ່ານ ຄຳແພງ ໄຊສົມແພງ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ແຫ່ງ ສປປ ລາວ ໄດ້ພົບປະບໍ່ເປັນທາງການ ກັບທ່ານ ລີມ ຈົກ ຮອຍ ເລຂາທິການໃຫ່ຍອາຊຽນ ຊຶ່ງ ທ່ານ ເລຂາທິການໃຫ່ຍອາຊຽນ ໄດ້ສະແດງຄວາມເປັນຫ່ວງຕໍ່ອຸທົກກະໄພ ທີ່ເກີດຂຶ້ນຢູ່ບັນດາແຂວງພາກໃຕ້ ສປປ ລາວ ໃນປີນີ້ ແລະ ທ່ານ ຢືນຢັນ ເຖິງເຈດນຳນົງອາຊຽນໃນການຊ່ວຍຫລືອຊຶ່ງກັນແລະກັນ ຕາມຄຳຂວັນອາຊຽນ ໜຶ່ງອາຊຽນ ໜຶ່ງການຕອບໂຕ້.​ ໃນໂອກາດນີ້, ທ່ານ ລັດຖະມົນຕີ ໄດ້ສະແດງຄວາມຂອບໃຈ ມາຍັງ ທ່ານ ເລຂາທິການໃຫ່ຍອາຊຽນ ແລະ ບັນດາປະເທດສະມາຊິກອາຊຽນ ທີ່ໃຫ້ການຊ່ວຍເຫລືອບັນເທົາທຸກ ຢ່າງທັນການ ເຮັດໃຫ້ ສປປ ລາວ ສາມາດເຄື່ອນໄຫວການຊ່ວຍເຫລືອປະຊາຊົນບັນດາເຜົ່າ ທີ່ໄດ້ຮັບຜົນກະທົບ ຢ່າງທົ່ວເຖິງ.

- lattana 1 - ຄະນະຜູ້ແທນລາວ ສຳເລັດການເຂົ້າຣ່ວມກອງປະຊຸມລັດຖະມົນຕີອາຊຽນກ່ຽວກັບໄພພິບັດ

ກອງປະຊຸມລັດຖະມົນຕີອາຊຽນ ກ່ຽວກັບການຄຸ້ມຄອງໄພພິບັດໄດ້ປິດລົງດ້ວຍຜົນສຳເລັດດີ ແລະ ປະເທດມ້ຽນມ້າ ໄດ້ມອບໜ້າທີ່ປະທານກອງປະຊຸມລັດຖະມົນຕີ ຄັ້ງຕໍ່ໄປ ໃຫ້ແກ່ ປະເທດຟິລິບປິນ ໃນປີ 2020. ນອກນີ້, ການຝືກຊ້ອມຈຳລອງສະຖານນະການການຄຸ້ມຄອງໄພພິບັດ ແລະ ການຕອບໂຕ້ສຸກເສີນ ຈະໄດ້ຈັດຂຶ້່ນໃນປະເທດຟິລິບປິນ ໃນປີ 2020.

error: Content is protected !!