ຜູ້ສຳປະທານຢືນຢັນບໍ່ຂຶ້ນຄ່າເຊົ່າຫ້ອງບູດຕ່າງໆໃນງານບຸນຊ່ວງເຮືອປີນີ້
ຍັງອີກບໍ່ດົນງານບຸນອອກພັນສາ ແລະ ຊ່ວງເຮືອປະຈຳປີ 2019 ຢູ່ ທ່າວັດຈັນ ນະຄອນຫລວງວຽງຈັນເຮົາ, ກໍຈະເລີ່ມຂຶ້ນຄາດວ່າ: ຈະມີການຄົບງັນນັບແຕ່ວັນທີ 10 ຫາ 14 ຕຸລານີ້, ຊຶ່ງປັດຈຸບັນກໍເຫັນວ່າມີບັນຍາກາດຄືກຄື້ນ ໃນການກະກຽມໃຫ້ແກ່ງານບຸນປະເພນີດັ່ງກ່າວ, ໂດຍສະເພາຊາວຄ້າຂາຍໄດ້ຖະຍອຍກັນມາຈັບຈອງພຶ້ນທີ່ວາງສະແດງສິນຄ້າ ແລະ ຂາຍເຄື່ອງປະເພດຕ່າງໆ, ຂະນະດຽວກັນຜູ້ສຳປະທານກໍຢືນຢັນວ່າ: ຈະບໍ່ຂຶ້ນລາຄາຄ່າເຊົ່າ’້ອງຂາຍ ແລະ ສະຖານທີ່ດັ່ງກ່າວແຕ່ປະການໃດ.
ດັ່ງທ່ານຄຳເສັງ ສູນດາລາ ຜູ້ອຳນວຍການ ບໍລິສັດ ຄຳເສັງ ຈຳກັດ ໃຫ້ຮູ້ວ່າ: ງານບຸນອອກພັນສາ ແລະ ຊ່ວງເຮືອປີນີ້ ແມ່ນຈະບໍ່ມີການປັບຂຶ້ນລາຄາຄ່າເຊົ່າຫ້ອງຂາຍເຄື່ອງ ແລະ ສະຖານທີ່ຕ່າງໆແຕ່ປະການໃດໂດຍຈະຮັກສາໃນລາຄາເກົ່າຂອງປີກາຍຄື: ເລີ່ມແຕ່ 1,5 ລ້ານຕໍ່ລ້ອກ, ຊຶ່ງປັດຈຸບັນມີຜູ້ມາຈັບຈອງແລ້ວກ່ວາ 30%, ໂດຍທາງບໍລິສັດຮັບສຳປະທານພຶ້ນທີ່ໃນເຂດໂຮງໝໍມະໂຫສົດ, ໄປຫາວັດຊຽງຍືນ ແລະ ເຂດສາມແຍກປາກປາສັກ ໄປຫາ ໂຮງຮຽນມັດທະຍົມສົມບູນວຽງຈັນ-ຮ່າໂນ້ຍ, ແລະ ພວກເຮົາໄດ້ຈັດສັນເພື່ອໃຫ້ຊາວຄ້າຂາຍໄດ້ເຂົ້າມາຈັບຈອງອອກເປັນ 2 ປະເພດຄື: ລັອກສຳລັບຂາຍສິນຄ້າຫັດຖະກຳ, ອຸດສາຫະກຳ ຈາກບໍລິສັດຕ່າງໆ ແລະ ລັອກສຳລັບຂາຍສິນຄ້າປະເພນີເປັນຕົ້ນແມ່ນຂາຍເຂົ້າຫລາມ, ປີ້ງໄກ່, ການບໍລິການອາຫານ ແລະ ອື່ນໆ.
ຜູ້ອຳນວຍການ ບໍລິສັດ ຄຳເສັງ ຈຳກັດ ໃຫ້ຮູ້ວ່າ: ສຳລັບການເກັບຄ່າບໍລິການຝາກລົດໃນປີນີ້ ແມ່ນໄດ້ກຳນົດ: ລົດຈັກ ຄັນລະ 5000 ກີບ, ລົດໃຫຍ່ 15.000 ກີບ, ແຕ່ແນວໃດກໍຈະມີການຫາລືລາຍລະອຽດກັບພາກສ່ວນກ່ຽວຂ້ອງຕື່ມກ່ຽວກັບຄ່າຝາກລົດ, ເພື່ອບໍ່ໃຫ້ມີການສວຍໂອກາດຂື້ນລາຄາ ໂດຍລຳພັງ
ຄະນະກຳມະການຈັດງານບຸນດັ່ງກ່າວໃຫ້ຮູ້ວ່າ: ງານບຸນອອກພັນສາ ແລະ ບຸນຊ່ວງເຮືອປະເພນີປີນີ້ ຢູ່ ທ່າວັດຈັນ, ຊຶ່ງຈັດຂຶ້ນໃຫ້ຟົດຟຶ້ນກ່ວາປີຜ່ານມາເພາະເປັນປີທີ່ທ່ອງທ່ຽວລາວ-ຈີນ. ດັ່ງນັ້ນ, ເພື່ອຮັກສາຄວາມເປັນລະບຽບຮຽບຮ້ອຍດັ່ງກ່າວ ທາງຄະນະກໍາມະການຈັດງານ ຈຶ່ງໄດ້ອອກຂໍ້ຫ້າມຕ່າງໆໄວ້ຄື: ຫ້າມບໍ່ໃຫ້ມີການໂຄສະນາທຸກຮູບແບບທີ່ຜິດຕໍ່ກົດໝາຍຂອງ ສປປ ລາວ, ຫ້າມຂາຍ ຫຼືນໍາເອົາອາວຸດ ທຸກປະເພດລວມທັງພ້າ, ມີດ, ງ້າວ, ໜ້າເກັກ, ກະຖຸນ, ສະໜັບມື, ໂຄມໄຟລອຍຕ່າງໆ ເຂົ້າໄປໃນງານຢ່າງເດັດຂາດ, ນອກຈາກຈະໄດ້ຮັບອະນຸຍາດຈາກເຈົ້າໜ້າທີ່. ຫ້າມນໍາເອົາຢາເສບຕິດ, ທາດເບື່ອ, ສານເຄມີທີ່ອອກລິດທາງປະສາດທຸກຊະນິດ, ສິ່ງທີ່ເຮັດໃຫ້ເກີດສຽງດັງເກີນຂອບເຂດ ໂດຍສະເພາະແມ່ນ ກະໂພກ, ບັ້ງໄຟເຂົ້າມາຈູດ ແລະວາງຂາຍພາຍໃນງານຢ່າງເດັດຂາດ. ຫ້າມນໍາເອົາຜະລິດຕະພັນລອກຮຽນແບບສິ້ນລາວ (Copy) ຫຼືເຄື່ອງນຸ່ງລາວນໍາເອົາມາຈໍາໜ່າຍພາຍໃນງານຢ່າງເດັດຂາດ. ຫ້າມວາງ, ຂາຍເຄື່ອງ ແລະນໍາເຄື່ອງສຽງອອກມາໂຄສະນາສິນຄ້າຢູ່ນອກບໍລິເວນຮ້ານ ເກີນຂອບເຂດທີ່ຄະນະກໍາມະການຈັດງານໄດ້ກໍານົດໃຫ້. ຫ້າມຂາຍ ແລະ ນໍາເອົາຜະລິດຕະພັນວັດທະນະທໍາລາມົກ ເຊັ່ນ: ກະແຊັດ, ແຜ່ນຊີດີລາມົກ ແລະ ຮູບພາບລາມົກອະນາຈານເຂົ້າມາວາງຂາຍຢູ່ໃນງານຢ່າງເດັດຂາດ. ຫ້າມຫຼິ້ນການພະນັນທຸກປະເພດ ແລະອາລະວາດຕີກັນ. ຫ້າມຂາຍເຄື່ອງຊະຊາຍ ໂດຍທີ່ບໍ່ໄດ້ຮັບອະນຸຍາດຈາກຄະນະກໍາມະການຈັດງານ ຢູ່ຕະຫຼາດນັດ ງານບຸນອອກພັນສາປະວໍລະນາ ແລະຊ່ວງເຮືອປະເພນີປີນີ້, ຫ້າມດື່ມສິ່ງມຶນເມົາເກີນຂອບເຂດ, ຖ້າຜູ້ໃດລະເມີດຈະຖືກເຈົ້າໜ້າທີ່ກ່າວເຕືອນ ຫຼືນໍາຕົນໄປພັກຜ່ອນໄວ້ກ່ອນ. ຫ້າມບຸກຄົນ, ນິຕິບຸກຄົນ, ສໍານັກງານ, ອົງການປົກຄອງບ້ານທີ່ກີດຂວາງ ການຈັດສັນສະຖານທີ່ວາງສະແດງຂາຍສິນຄ້າຂອງຄະນະກໍາມະການຈັດງານຕະຫຼາດນັດ. ຫ້າມຕອກເຫຼັກ ຫຼືສິ່ງຂອງຕ່າງໆໃສ່ພື້ນທີ່ຢ່າງເດັດຂາດ. ຫ້າມແຈກຢາຍແຜ່ນພັບ ຫຼືແຜ່ນເຈ້ຍໂຄສະນາສິນຄ້າຕ່າງໆພາຍໃນງານ. ຫ້າມຜູ້ສໍາປະທານສະຖານທີ່ງານບຸນ ມອບສະຖານທີ່ໃຫ້ຜູ້ສໍາປະທານອື່ນຈັບຈອງຕໍ່ເດັດຂາດ. ຫ້າມມີການໂຄສະນາສິນຄ້າ ໂດຍການໃຊ້ນາງສາວອອກມາເຕັ້ນໂຊ ແລະ ບໍ່ໃຫ້ມີການຈັດຄອນເສີດ ໂດຍລຳພັງ.
