ອອກພັນສາລາພະເຈົ້າຫັນຫ້າວສູ່ງານ

ອອກພັນສາລາພະເຈົ້າຫັນຫ້າວສູ່ງານ - advert banner 728 90 728x90 - ອອກພັນສາລາພະເຈົ້າຫັນຫ້າວສູ່ງານ

ໂດຍ: ທິດກ່ຳ

ອອກພັນສາລາພະເຈົ້າຫັນຫ້າວສູ່ງານ - new3 - ອອກພັນສາລາພະເຈົ້າຫັນຫ້າວສູ່ງານ

ບຸນອອກພັນສາປີນີ້, ພໍດີ ຕົງເປະກັບວັນອາທິດ ວັນທີ 13 ຕຸລາ 2019 ເດືອນລາວ ແມ່ນມື້ຂຶ້ນ 15 ຄ່ຳເດືອນ 11 ເພັງ ພສ 2562 ໂດຍປົກກະ ຕິແລ້ວ, ຕາມປະເພນີ ຮີດຄອງ ຂອງລາວເຮົາທີ່ສືບທອດກັນມາແຕ່ບູຮານນະການນັ້ນ, ເມື່ອຮອດຍາມບຸນອອກພັນ ສາໄດ້ມີກິດຈະກຳຕ່າງໆນັບທັງພິທີທາງສາດສະໜາ ແລະ ປະເພນີວັດທະນະທຳ ເປັນຕົ້ນຄືເຮັດບຸນສິນກິນ ທານຕາມວັດວາອາຮາມ, ຊາວພຸດເຮົາຜູ້ມີສັດທາອັນ ແຮງກ້າກໍເຂົ້າວັດຟັງທຳ, ຕັກບາດຢາດນ້ຳ, ຕັ້ງໝັ້ນສ້າງຄວາມດີ, ອຸທິດສ່ວນບຸນກຸສົນໄປຍັງຜູ້ດັບຫາຍຕາຍ ຈາກຕາມຄວາມເຊື້ອທີ່ເຄີຍ ມີມາແຕ່ດຶກດຳບັນ.

ຕາມກົດຂອງສົງນັ້ນ, ເມື່ອອອກພັນສາໄປແລ້ວກໍມີ ໂອກາດໄປທຳບຸນຫລືໄປທຳສາສະນະກິດຕາມຈຸດປະສົງແຮມມື້ແຮມຄືນໄດ້ເອີ້ນຢ່າງໜຶ່ງວ່າຫັນລົງຮາກຖານເພື່ອນຳພາ ຊາວພຸດໃນແຕ່ລະທ້ອງຖິ່ນເຮັດບຸນສິນກິນທານ, ຂຸດນ້ຳບໍ່ກໍສາລາ,  ສ້າງສາວັດວາອາຮາມໃຫ້ຮຸ່ງເຮືອງເຫລືອງເຫລື້ອມ.

ການນຳພາເຮັດບຸນສິນກິນທານຫລັງຈາກອອກພັນ ສາໄປແລ້ວ, ກໍເລີ່ມມີບຸນ ຕ່າງໆເຊັ່ນ: ມີບຸນກະຖິນຕໍ່ໃສ່ບຸນຜ້າປ່າ ແລະ ບຸນປະເພນີ ອື່ນໆ ຕາມຮີດ 12 ຄອງ 14, ສ່ວນກິດຈະກຳທາງປະເພນີວັດທະນະທຳທີ່ຂາດບໍ່ໄດ້ອີກອັນໜຶ່ງກໍແມ່ນການໄຫລ ເຮືອໄຟໃນຄືນມື້ເພງ 15 ຄ່ຳ. ກາງເວັນມາກໍມີການແຂ່ງ ຂັນຊ່ວງເຮືອຢ່າງເບີກບານ ມ່ວນຊື່ນຂອງປະຊາຊົນບັນດາເຜົ່າໃນແຕ່ລະທ້ອງຖິ່ນ ເຂດແຂວງ.

ສະເພາະຢູ່ນະຄອນ ຫລວງວຽງຈັນປີນີ້ງານຊ່ວງເຮືອແມ່ນຖືກວັນຈັນວັນທີ 14 ຕຸລາ, ສ່ວນການຄົບງັນຕ່າງໆ ເຊັ່ນ: ງານຕະຫລາດນັດ, ການ ບໍລິການຂາຍສິນຄ້າ, ຂາຍ ເຂົ້າຫລາມປິ້ງໄກ່ແມ່ນຈະເລີ່ມ ຕົ້ນແຕ່ວັນທີ 9 ເປັນຕົ້ນໄປ.

ກ່າວເຖິງງານສະເຫລີມສະຫລອງບຸນອອກພັນສາໃນຍຸກສະໄໝນີ້, ບ້ານເມືອງເຮົາ ມີຄວາມຈະເລີນຮຸ່ງເຮືອງກໍ ຍິ່ງມີສີສັນຂຶ້ນຫລາຍຢ່າງຖື ເປັນວາລະການທ່ອງທ່ຽວ ທາງດ້ານວັດທະນະທຳອີກ ແບບໜຶ່ງເປັນຕົ້ນຜູ້ຄົນທັງ ຫລາຍທ່ຽວຊົມການແຂ່ງເຮືອຊ່ວງ, ທ່ຽວງານຕະຫລາດນັດຈັບຈ່າຍຊື້ເຄື່ອງ ຂອງຕ່າງໆສຸດແລ້ວແຕ່ ເງື່ອນ ໄຂຂອງທ້ອງຖິ່ນໃຜມັນ.

ສິ່ງທີ່ບໍ່ຄວນລືມອີກປະການໜຶ່ງທີ່ຊາວນະຄອນ ຫລວງພາກັນຈົດຈໍ່ຄອຍຊົມ ກໍແມ່ນປາກົດການທາງທຳ ມະຊາດຄື: ບັງໄຟພະຍານາກ ທີ່ພຸດຂຶ້ນຈາກພື້ນນ້ຳຂອງ, ນ້ຳງື່ມແຖວບ້ານໂນນຊາຍ, ບ້ານໂດນ, ໜອງຂຽວບ້ານໄຮ່ ປາກນ້ຳງື່ມເມືອງປາກງື່ມນະ ຄອນຫລວງວຽງຈັນໃນມື້ ເພັງ 15 ຄ່ຳໃນຕອນຊ່ວງ 18 ໂມງຫາ 19 ນັ້ນເອງ.

ແນວໃດກໍຕາມ, ໂດຍປົກ ກະຕິແລ້ວຕາມສະພາບຄວາມເປັນຈິງໃນການດຳລົງຊີວິດ ຂອງປະຊາຊົນລາວບັນດາເຜົ່າເຮົາໂດຍສະເພາະແມ່ນ ຊາວພຸດ ເມື່ອອອກພັນສາໄປແລ້ວກໍພາກັນຕັ້ງໜ້າຫັນ ຫ້າວໃສ່ໜ້າວຽກ, ໜ້າງານ ຫລືກິດຈະກຳການພັດທະ ນາຫາລ້ຽງຊິບຕາມວິຖິຊີວິດ ແລະ ຕາມຄວາມເຊື່ອເຊັ່ນ: ເກັບກູ້ຜົນຜະລິດຈາກການປູກຝັງ, ການທຳມາຄ້າຂາຍ, ຕະຫລອດການຊອກຢູ່ຫາ ກິນດ້ານອື່ນໆ ຖືວ່າຍາມນີ້ ກ້າວເຂົ້າສູ່ຍາມແລ້ງສະດວກສະບາຍໃນການໄປມາຫາ ເງິນຫາຄຳຫາວຽກຫາງານອັນໃດກໍງ່າຍເງິນກໍໄຫລນອງ, ທອງກໍໄຫລມາໄຄ່ຄວ້າຊອກອັນໃດຄືວ່າດີກວ່າ ຍາມຝົນ ແລະ ຍາມເຂົ້າພັນ ສາວ່າຊັ້ນ.

ສຳລັບພວກມັກກ໊ອກທັງຫລາຍທີ່ອົດຫລິ້ນ, ອົດກິນ, ອົດທ່ຽວມາໃນໄລຍະສາມເດືອນເພິ່ນກໍຍິ່ງດີໃຈວ່າ ໄດ້ພົ້ນທຸກ, ພົ້ນກຳໄປແລ້ວຄວາມ ອົດຄວາມທົນທີ່ໄດ້ປະຕິບັດ ມາສາມເດືອນນັ້ນຖືວ່າສຸດຍອດ ແລະ ຜ່ານພົ້ນໄປດ້ວຍ ຄວາມອີ່ລາກອີເລືອ.

ບາງຄົນກໍເກືອບໄປບໍ່ມົ້ມກົ້ມບໍ່ຫວິດເຫັນໝູ່ເຫັນຄູ່ພາ ກັນສັງສັນກໍໄດ້ແຕ່ນັ່ງອົດນັ່ງທົນອ້າປາກຕາກແຂ້ວຈົນນ້ຳລາຍເຫີອຍ. ທິດກ່ຳຂໍຊົມເຊີຍ ຕໍ່ຜູ້ທີ່ເຮັດໄດ້ຈົນສຳເລັດເປັນ ຢ່າງດີແຕ່ວ່າບາດເວລາວິດ ອອກພັນສາໄປແລ້ວເບິ່ງ ເພິ່ນກ໊ອກຄືນພັດຍິ່ງເອົາໜັກກວ່າເກົ່າຍ້ອນ ວ່າເພິ່ນໄລ່ຄືນໃສ່ຕອນເຂົ້າພັນສາມາເປັນ ຕົວວັດ.

ເຖິງຢ່າງໃດກໍດີ, ຕາມທິດກ່ຳວ່າບຸນອອກພັນສາປີນີ້ ປະຊາຊົນລາວບັນດາເຜົ່າຫລາຍບ້ານຫລາຍເມືອງ ແລະ ຫລາຍແຂວງໄດ້ພ້ອມກັນຈັດກິດຈະກຳຢ່າງຍິ່ງ ໃຫຍ່ມ່ວນຊື່ນ ແລະ ສຸກສັນ ຫັນສາໃນໂອກາດທີ່ປະເທດຊາດບ້ານເມືອງຂອງພວກ ເຮົາພວມມີການສ້າງສາພັດ ທະນາດ້ວຍຄວາມມຸ້ງຫວັງຕັ້ງໃຈພາຍໄຕ້ການນຳພາຂອງພັກ ແລະ ລັດຖະບານພວມກ້າວໄປສູ່ຍຸກໃໝ່  ແລະ ປີນີ້ກໍເປັນປີທ່ອງທ່ຽວ ລາວ-ຈີນ ຍິ່ງເບີກບານມ່ວນ ຊື່ນຕ້ອນຮັບຜົນງານໃຫ້ ວັນຊາດທີ 2 ທັນວາທີ່ຈະມາເຖິງ./.

ອອກພັນສາລາພະເຈົ້າຫັນຫ້າວສູ່ງານ - 222254 - ອອກພັນສາລາພະເຈົ້າຫັນຫ້າວສູ່ງານ
error: Content is protected !!