ຊາວພຸດທົ່ວປະເທດໃສ່ບາດໃນມື້ອອກພັນສາ ພສ. 2562 ຢ່າງຄຶກຄື້ນ

- advert banner 728 90 728x90 - ຊາວພຸດທົ່ວປະເທດໃສ່ບາດໃນມື້ອອກພັນສາ ພສ. 2562 ຢ່າງຄຶກຄື້ນ

ເຊົ້າວັນທີ 13 ຕຸລານີ້,ຊຶ່ງກົງກັບມື້ຂຶ້ນ 15 ຄໍ່າເດືອນ 11 ພສ 2562 ເປັນວັນບຸນອອກພັນສາ ປະວໍລະນາ, ໂດຍຊາວພຸດທະສາສະນິກະຊົນລາວໃນທົ່ວປະເທດຕ່າງກໍໄດ້ພ້ອມພາກັນໄປທໍາບຸນໃສ່ບາດຖວາຍສັງຄະທານແດ່ ພະສົງສໍາມະເນນຢູ່ຕາມວັດວາອາຮາມຕ່າງໆດ້ວຍບັນຍາກາດຄຶກຄື້ນ ແລະ ຮັບຟັງທໍາມະເທສະຫນາເພື່ອຍຶດຖືເປັນຫລັກທໍາພື້ນຖານໃນການດໍາລົງຊີວິດທີ່ຖືກຕ້ອງ ແລະ ປົກປັກຮັກສາຮີດຄອງປະເພນີອັນດີງາມດັ່ງກ່າວ ໃຫ້ຄົງຢູ່ຄູ່ຊາດລາວຕະຫລອດໄປ ແລະ ໃນຕອນບ່າຍມື້ ດຽວກັນກໍໄດ້ມີການແຂ່ງຂັນຊ່ວງເຮືອເພດຍິງ ແລະ ຕອນຄໍ່າກໍມີການວຽນທຽນຕາມວັດວາອາຮາມຕ່າງໆ, ພ້ອມດ້ວຍປະເພນີລອຍກະໂທງຢູ່ຕາມສາຍນໍ້າຕ່າງໆຕາມຮີດຄອງປະເພນີ.

- new3 - ຊາວພຸດທົ່ວປະເທດໃສ່ບາດໃນມື້ອອກພັນສາ ພສ. 2562 ຢ່າງຄຶກຄື້ນ

ຄໍາວ່າ ອອກພັນສາ ນັ້ນໄດ້ແກ່ ການອະນຸຍາດໃຫ້ພະພິກຂຸສົງອອກຈາກເຂດຈໍາກັດຫລັງຈາກການເຂົ້າຈໍາພັນສາຄົບ 3 ເດືອນ ເພື່ອອອກໄປປະຕິບັດຫນ້າທີ່ຢູ່ບ່ອນອ່ືນໄດ້ເອີ້ນອີກຢ່າງຫນຶ່ງວ່າການອອກຈາກລະດູຝົນ.

- 3190b568 fa43 4e4b b195 2aac0249ccff - ຊາວພຸດທົ່ວປະເທດໃສ່ບາດໃນມື້ອອກພັນສາ ພສ. 2562 ຢ່າງຄຶກຄື້ນ

ເມ່ືອເຖິງມື້ຂຶ້ນ 14 ຄ່ໍາ ຂອງເດືອນ 11 ຊາວພຸດທັງຫລາຍພາກັນຈັດຫາວັດຖຸທານຕ່າງໆ ມາໄວ້ຖວາຍທານຕາມກໍາລັງສັດທາຂອງຕົນ. ເມ່ືອເຖິງມື້ເພັງ 15 ຄ່ໍາເດືອນ 11 ຕອນເຊົ້່າມວນຊົນຊາວພຸດກໍມາ ເຕົ້າໂຮມກັນຖວາຍຂອງທານທີ່ໄດ້ກະກຽມໄວ້ດ້ວຍການຕັກບາດຢູ່ ໃນວັດພ້ອມທັງຖວາຍຜ້າຈີວອນ ຫລືຜ້າຈໍານໍາພັນສາໃຫ້ແກ່ພະພິກຂຸສົງ.

- IMG 8750 - ຊາວພຸດທົ່ວປະເທດໃສ່ບາດໃນມື້ອອກພັນສາ ພສ. 2562 ຢ່າງຄຶກຄື້ນ

ຕາມປະເພນີລາວແຕ່ເກ່ົາແລ້ວ ເວລາໃກ້ຈະຮອດວັນບຸນອອກພັນສາ ຊາວບ້ານໄດ້ກະກຽມ ເຮັດຫມາກກະໂພກ ແລະບັ້ງໄຟດອກ ໂດຍນໍາໃຊ້ຂີ້ຫມື້,ຂີ້ເຈຍມາຕໍາປະສົມກັນໃຫ້ເປັນເຊື້ອເພີງ ແລະ ນໍາມາຫໍ່ດ້ວຍໃບລານແຫ້ງ, ພໍຕົກຄ່ໍາມາຂອງມື້ເພັງຊາວບ້ານກໍພາກັນມາເຕົ້າໂຮມກັນຢູ່ວັດເພ່ືອພ້ອມກັນສ້າງເຮືອໄຟໂຄກ, ວຽນທຽນ,ຈູດຫມາກກະໂພກ, ຈູດບັ້ງໄຟດອກ ແລະ ໄຕ້ໄຟບູຊາຄຸນ ພະພຸດ, ພະທໍາ ແລະ ພະສົງ.

- lattana 1 - ຊາວພຸດທົ່ວປະເທດໃສ່ບາດໃນມື້ອອກພັນສາ ພສ. 2562 ຢ່າງຄຶກຄື້ນ

ນອກຈາກນັ້ນແຕ່ລະຄອບຄົວຍັງໄດ້ສ້າງເຮືອໄຟໂຄກຢູ່ທີ່ເຮືອນຂອງໃຜລາວນໍາອີກ.ອີກຢ່າງຫນຶ່ງທີ່ຊາວບ້ານໄດ້ກະກຽມແມ່ນເຮືອໄຟນ້ໍາເຊິ່ງປົກກະຕິແມ່ນສ້າງຂຶ້ນໃນຕອນບ່າຍຂອງມື້ເພັງເອງ.ບາງບ້ານກໍເຮັດແບບງ່າຍດາຍຈາກທ່ອນກ້ວຍເປັນຕົ້ນຕໍເສີມດ້ວຍແຜ່ນໄມ້ນ້ອຍໆເປັນຮູບຍາວຄ້າຍຮູບເຮືອເຊິ່ງເພິ່ນເອົາມັດຢອງໃສ່ແພທ່ອນກ້ວຍ.

ຈາກນັ້ນເພິ່ນເອົາຕົ້ນກາລະພຶກຕັ້ງໄວ້ຢູ່ເທິງກາງຂອງແຜ່ນໄມ້ແລ້ວຈຶ່ງໄຕ້ກະບອງລຽນໃສ່ເຮືອໄຟເພ່ືອໃຫ້ແນມເຫັນແສງໄຟໃນຄືນວັນເພັງ ແລະ ແລ້ວຊາວບ້ານກໍພ້ອມກັນອະທິຖານຕ່າງໆນາໆເຊ່ັນວ່າ: ຂໍໃຫ້ຊີວິດມີຄວາມສຸກ, ປາສະຈາກໂລກໄພໄຂ້ເຈັບ, ປະສົບຜົນສໍາເລັດໃນຫນ້າທີ່ການງານ ແລະ ອື່ນໆແລ້ວກໍປ່ອຍເຮືອໄຟ ອອກສູ່ແລວນ້ໍາ, ເພິ່ນເອີ້ນຂະບວນການນີ້ວ່າ “ການໄຫລເຮືອໄຟ”. ອີກບາງບ້ານກໍເຮັດດ້ວຍໄມ້ໃຜ່ມັດເຂົ້າກັນເປັນ ຮູບຊົງເຮືອໃຫຍ່ມີການກະກຽມຫລາຍວັນ. ຢູ່ຕາມລໍານ້ໍາຖ້າວ່າຜູ້ໃດຫາກລັດເອົາເຮືອໄຟດັ່ງກ່າວໄດ້ຕົ້ນກາລະພຶກກໍຈະເປັນຂອງຜູ້ນັ້ນເຊິ່ງເປັນຜູ້ມີໂຊກໄຊເຫລືອຫລາຍ, ມີຄວາມເຊື່ອວ່າຄອບຄົວຂອງຜູ້ນັ້ນຈະມີຊີວິດທີ່ປາສະຈາກໂລກໄພໄຂ້ເຈັບທັງຫລາຍທັງປວງໃນປີນັ້ນ.ແຕ່ໃນປັດຈຸບັນຢູ່ຕາມຕົວເມືອງໂດຍສະເພາະຊາວຫນຸ່ມໄດ້ນໍາເຮືອໄຟນ້ອຍທີ່ເຮັດດ້ວຍທ່ອນກ້ວຍປະດັບປະດາດ້ວຍທູບທຽນ ແລະ ດອກໄມ້ເຊິ່ງແມ່ນຮູບແບບ ປະຍຸກໃຫມ່ໄປລອຍນ້ໍາຫລັງຈາກທີ່ໃຫ້ພະສູດ ແລະວຽນທຽນ ຢູ່ໃນວັດແລ້ວພ້ອມທັງອະທິຖານຕ່າງໆນານາ.

ພໍຮອດມື້ຕໍ່ມາ ຄືມື້ແຮມ 1ຄ່ໍາ ກໍມີການຈັດຊ່ວງເຮືອລະຫວ່າງຊຸມຊົນຕ່າງໆ ແລະ ຄົບງັນກັນຕາມປະເພນີຕະຫລອດທັງຄືນ. ຈຸດປະສົງຂອງການຊ່ວງເຮືອ ແລະ ການໄຫລເຮືອໄຟ ແມ່ນເພື່ອສົມມາຄາລະວະພ້ອມທັງບວງສວງຂໍໂຊກຈາກພະຍານາກ ແລະ ເທວະດາອົງທີ່ໄດ້ປົກປັກຮັກສາແມ່ນ້ໍາລໍາເຊຕະຫລອດຮອດຫ້ວຍຮ່ອງຄອງບຶງບ່ອນທີ່ຊາວພຸດທັງຫລາຍໄດ້ທໍາມາຫາກິນຢ່າງສະຫງົບສຸກ.

error: Content is protected !!