ຮອງ​ນາຍົກ ​ເນັ້ນ​ຂະ​ແຫນງ​ວິທະຍາສາດ ​​ເປັນ​ເຈົ້າການ​ພັດທະນາ ​ເຕັກ​ໂນ​ໂລ​ຊີ​ໃຫ້​ທັນ​ສະ​ໄໝ

ໃນ​ໂອກາດ​ການ​ເຂົ້າ​ຮ່ວມ​ກອງ​ປະຊຸມ​ວຽກງານ ວິທະຍາສາດ ​ແລະ ​ເຕັກ​ໂນ​ໂລ​ຊີ ທົ່ວ​ປະ​ເທດ ຄັ້ງ​ທີ III ຂຶ້ນ ​ຢູ່ ນະຄອນຫລວງ​ວຽງຈັນ, ​​ເມື່ອ​ທ້າຍ​ອາທິດ​ຜ່ນ​ມາ ນີ້, ຂອງ ທ່ານ ສອນ​ໄຊ ສີ​ພັນ​ດອນ ຮອງ ນາຍົກລັດຖະມົນຕີ ໄດ້​ໃຫ້ກຽດ​ໂອ້​ລົມ​ຕໍ່ກອງ​ປະຊຸມ ​ແລະ ​ໄດ້​ເນັ້ນ​​ໃຫ້​ຂະ​​ແຫນງ​ກ່ຽວຂ້ອງ​ສືບຕໍ່ພັດທະນາ​ວຽກງານ ວິທະຍາສາດ ​ແລະ ​ເຕັກ​ໂນ​ໂລ​ຊີ​ໃຫ້​ທັນ​ສະ​ໄໝຂຶ້ນ​ເປັນ​ຕົ້ນ​ແມ່ນ: ສຶບຕໍ່ສ້າງຄວາມຮັບຮູ້ ແລະ ຄວາມເຂົ້າໃຈ ຂອງສັງຄົມທາງດ້ານ​ວິທະຍາ​ສາດ​ ແລະ ເຕັກ​ໂນ​ໂລ​ຊີ ໃຫ້ກວ້າງຂວາງ ແລະ ເລິກເຊິ່ງ ຕໍ່ກັບ​ພາລະບົດບາດ ແລະ ຄວາມສຳຄັນ ຂອງວິທະທະຍາສາດ ແລະ ເຕັກໂນໂລຊີ ດ້ວຍຫລາຍຮູບການ ເພື່ອສ້າງວັດທະນະທຳດ້ານວຽກງານທາງດ້ານວິທະຍາສາດ, ຊຸກຍູ້ສົ່ງເສີມການເຄື່ອນໄຫວຂອງສັງຄົມບົນພື້ນຖານຄວາມຮູ້, ວິທະຍາການທີ່ກ້າວໜ້າ ແລະ ສ້າງພື້ນຖານໃຫ້ແກ່ການສ້າງສັງຄົມພູມປັນຍາ ເທື່ອລະກ້າວ; ປັບປຸງກົງຈັກການຈັດຕັ້ງ, ກົນໄກການຄຸ້ມຄອງ ວຽກງານວິທະຍາສາດ ແລະເຕັກໂນໂລຊີ, ສ້າງນະໂຍບາຍ-ນິຕິກຳ ໃຫ້ເປັນລະບົບ ແລະ ສາມາດຊຸກຍູ້ສົ່ງເສີມ ການເຄື່ອນໄຫວວຽກງານວິທະຍາສາດ ແລະ ເຕັກໂນໂລຊີ ໃຫ້ມີປະສິດທິພາບສູງຂຶ້ນ; ພັດທະນາຊັບພະຍາກອນມະນຸດ ທາງດ້ານວິທະຍາສາດ ແລະ ເຕັກໂນໂລຊີ ​ໃຫ້​ເປັນ​ກຳລັງ​ແຮງ​ທີ່​ໜັກ     ​ແໜ້ນ ​ແລະ ເຂັ້ມ​ແຂງໃຫ້ການ​ພັດທະນາ; ຄົ້ນຄວ້າ ແລະ ນໍາໃຊ້ວິທະຍາສາດ ແລະ ເຕັກໂນໂລຊີ ເພື່ອຊຸກຍູ້ການພັດທະນາເສດຖະກິດ-ສັງຄົມ ​ທັງເປັນ​ເງືອນໄຂເຄື່ອງມື​ໃນ​ການປົກປັກຮັກສາ ​ແລະ ຟື້ນ​ຟູສິ່ງແວດລ້ອມ ຕາມທິດພັດທະນາສີຂຽວ ແລະ ຍືນຍົງ; ຄຸ້ມຄອງ ແລະ ພັດທະນາການບໍລິການ ດ້ານວິທະຍາສາດ ແລະ ເຕັກໂນໂລຊີ ເພື່ອຮັບໃຊ້ສັງຄົມຢ່າງມີປະສິດທິພາບ ແລະມີ​ຄຸນ​ນະພາ​ບ

ພ້ອມກັນນັ້ນການຄົ້ນຄວ້າ-ພັດທະນາ ວຽກງານວິທະຍາສາດ ແລະ ເຕັກໂນໂລຊີ ຈະຕ້ອງ​ຕອບສະໜອງການພັດທະນາເສດຖະກິດ-ສັງຄົມຂອງປະເທດເຮົາຢ່າງແທ້ຈິງເພື່ອໃຫ້ທົ່ວສັງຄົມມີຄວາມເຂົ້າໃຈເຖິງບົດບາດຄວາມສໍາຄັນຂອງວຽກງານວິທະຍາສາດ ແລະ ເຕັກໂນໂລຊີ, ກະຕຸ້ນໃຫ້ນັກຄົ້ນຄວ້າວິທະຍາສາດໜຸ່ມ, ຜູ້ມັກການຄົ້ນຄວ້າ ແລະ ມີການລະດົມທຶນຂອງທົ່ວສັງຄົມ; ມີການພົວພັນຮ່ວມມືລະຫວ່າງການຄຸ້ມຄອງລັດ, ທຸລະກິດເອກະຊົນ ແລະ ການພັດທະນາຮ່ວມມືໂດຍການລົງທຶນໃສ່ການຄົ້ນຄວ້າ ແລະ ພັດທະນາໃຫ້ເພີ່ມຂຶ້ນ. ນໍາໃຊ້ຜົນສໍາເລັດຂອງການຄົ້ນຄວ້າ ພັດທະນາວິທະຍາສາດ ແລະ ເຕັກໂນໂລຊີ ເຂົ້າໃນບັນດາໂຄງການລົງທຶນທີ່ເປັນຍຸດທະສາດລະດັບຊາດ ໂດຍມີການສົມທົບການນໍາໃຊ້, ຍົກລະດັບວິທະຍາສາດເຕັກໂນໂລຊີ ແລະ ນະວັດຕະກໍາ, ສຸມໃສ່ພັດທະນາພື້ນຖານໂຄງລ່າງ ແລະ ການບໍລິການວິທະຍາສາດ ແລະ ເຕັກໂນໂລຊີ ໃນຂົງເຂດກະສິກໍາ, ອຸດສະຫະກໍາ ແລະ ການບໍລິການ, ສົ່ງເສີມວິສະຫະກິດຂະໜາດນ້ອຍ/ຂະໜາດກາງ ທີ່ຕິດພັນກັບຂະແໜງການ ທີ່ມີທ່າແຮງ ຕາມທິດພັດທະນາແບບຍືນຍົງ ແລະ ສີຂຽວ, ພ້ອມກັນນັ້ນກໍ່ເອົາໃຈໃສ່ນໍາໃຊ້ເຕັກໂນໂລຊີທັນສະໄໝ ເຂົ້າໃນບັນດາຂະແໜງການຕ່າງໆ ເຊັ່ນ: ຂະແໜງການເງິນ, ທະນາຄານ, ການສຶກສາ ແລະ ສາທາລະນະສຸກ ເພື່ອຫັນເປັນທັນສະໄໝໃຫ້ທັນກັບການພັດທະນາຂອງຍຸກສະໄໝໃໝ່. ພ້ອມກັນນັ້ນຂະແໜງການວິທະຍາສາດ ແລະ ເຕັກໂນໂລຊີ ຈະຕ້ອງປັບປຸງໃຫ້ເຂັ້ມແຂງຕາມແຜນຍຸດທະສາດ ການພັດທະນາວິທະຍາສາດ ແລະ ເຕັກໂນໂລຊີ ທີ່ໄດ້ສະເໜີຜ່ານລັດຖະບານ ແລະ ກົມການເມືອງສູນກາງພັກແລ້ວນັ້ນ ໃຫ້ປະກົດຜົນເປັນຈິງ.