ສະຫລຸບອຸປະຕິເຫດໃນເທສະການອອກພັນສາ ແລະ ບຸນຊ່ວງເຮືອ

ເຈົ້າໜ້າທີ່​ຈະລາຈອນ ນະຄອນຫລວງ​ວຽງຈັນ ​ໃຫ້​ຮູ້​ວ່າ: ພຽງ​ໄລຍະ 3 ວັນ ຂອງ​ການຈັດ​ງານ​ບຸນ​ອອກ​ພັນ​ສາ ​ແລະ ບຸນຊ່ວງ​ເຮືອ​ຄື: ນັບ​ແຕ່​ວັນ​ທີ 12 ຫາ 14 ຕຸລາ ນີ້, ຢູ່ ນະຄອນຫລວງ​ວຽງຈັນ ມີ​ອຸປະຕິ​ເຫດ​ເກີດ​ຂຶ້ນທັງໝົດ 12 ກໍລະນີ, ສົ່ງ​ຜົນ​ເຮັດ​ໃຫ້​ມີ​ຜູ້​ເສຍ​ຊີວິດ 2 ຄົນ​ຄື: ​ໃນ​ວັນ​ທີ 12 ຕຸລາ ​ໄດ້​ເກີດ​ອຸປະຕິ​ເຫດ ລົດຈັກ ຕຳ​ລົດຍົນ ຢູ່​ເສັ້ນທາງ​ເຂດ​ບ້ານ ນາ​ແຮ່ ​ເມືອງ ສີ​ໂຄດ​ຕະບອງ ​ເຮັດ​ໃຫ້​ຜູ້​ຂັບ​ຂີ່​ລົດຈັກ​ເສຍ​ຊີວິດ​ຄາ​ທີ່ ​ແລະ ​ໃນ​ວັນ​ດຽວກັນ ກໍ​ໄດ້​ເກີດ​ອຸປະຕິ​ເຫດລົດຈັກ​ລົ້ມ​ເອງ ຢູ່ ​ເຂດ​ບ້ານ ໜອງ​ແຕ່​ເຫນືອ ​ເມືອງ​ ສີ​ໂຄດ​ຕະບອງ ​ເຮັດ​ໃຫ້​ຜູ້​ຂັບ​ຂີ່​ເສຍ​ຊີວິດ​ຄາ​ທີ່.

    ​ເຈົ້າໜ໊າທີ່ ຈະລາຈອນ ນະຄອນຫລວງ​ວຽງຈັນ ​ໃຫ້​ຮູ້​ວ່າ: ງານ​ບຸນ​ອອກ​ພັນ​ສາ ​ແລະ ບຸນຊ່ວງ​ເຮືອ​ປີນີ້ ​ເຈົ້າໜ້າທີ່​ໄດ້​ເອົາ​ໃຈ​ໃສ່​ເປັນ​ພິ​ເສດ ​ໃນ​ການ​ສະກັດ​ກັ້ນ ອຸປະຕິ​ເຫດ​ຕາມ​ທ້ອງ​ຖະໜົນ, ​ໂດຍ​ໄດ້​ວາງ​ກຳລັງ​ປ້ອງ​ກັນ​ຫລາຍ​ກ່ວາ 70 ຈຸດ ຕາມ​ເສັ້ນທາງ​ຕ່າງໆ, ທັງ​ການ​ກວດກາ​ທາດ​ມືນ​ເມົາ ​ແລະ ການ​ລົງ​ໂຄສະນາ​ເຜີຍ​ແຜ່​ກົດ​ລະບຽບ ​ແລະ ການ​ປ້ອງ​ກັນ​ອຸປະຕິ​ເຫດ​ໃຫ້​ຜູ້​ມາ​ທ່ຽວບຸນ ມີ​ສະຕິ​ໃນ​ການ​ຂັບ​ຂີ່, ນຳ​ໃຊ້​ລົດ​ໃຊ້​ຖະໜົນ ຈຶ່ງ​ເຮັດ​ໃຫ້​ສະພາບ​ອຸປະຕິ​ເຫດ​ໃນ​ປີນີ້ຫລຸດ​ລົງ​ຢ່າງ​ເພິ່ງ​ພໍ​ໃຈ.