ຊາຕາຜູ້ຈັດການທີມແມນຢູຈະຊ້ຳຮອຍ ຫລື ບໍ່ ! ເມື່ອພຣີເມຍລີກເລືອກ ມາຕິນ ແອັດກິນສັນ ຕັດສິນແດງເດືອດວັນອາທິດນີ້
ຝ່າຍຈັດການແຂ່ງຂັນເຕະບານ ພຣີເມຍລີກ ອັງກິດ ເລືອກ ມາຕິນ ແອັດກິນສັນ ຜູ້ຕັດສິນໄວ 48 ປີ ເປັນຜູ້ຕັດສິນນັດແດງເດືອດ ລະຫວ່າງ ແມນເຊັສເຕີ ຢູໄນເຕັດ ຈະເປີດສະໜາມໂອລ ແທຣັບຟອດ ຕ້ອນຮັບ ລິເວີພູລ ໃນວັນທີ 20 ຕຸລານີ້. ເມື່ອເປີດປະຫວັດການຕັດສິນ ແລະ ສະຖິຕິຂອງ ແອັດກິນສັນ ໃນການຕັດສິນຄູ່ນີ້ໜ້າສົນໃຈ ໂດຍສະເພາະນັດຫລ້າສຸດທີ່ຕັດສິນການພົບກັນໃນປີຜ່ານມາ (16 ທັນວາ 2018) ນັດນັ້ນ ລິເວີພູລ ຊະນະ ແມນເຊັສເຕີ ຢູໄນເຕັດ 3-1 ທີ່ແອນຟິວ ໂຈເຊ່ ມູຣິນໂຢ ຜູ້ຈັດການທີມແມນເຊັສເຕີ ຢູໄນເຕັດ ຕອນນັ້ນຖືກປົດຈາກຕຳແໜ່ງທັນທີ.
ລະດູການນີ້ ແອັດກິນສັນ ຕັດສິນທັງໝົດ 8 ນັດ ໃນນີ້ລວມທັງເກມ ຄອມມູນີ້ຕີ້ຊິວ ທີ່ ແມນ ເຊັສເຕີ ຊິຕີ້ ຊະນະຈຸດໂທດ ລິເວີພູລ, ສ່ວນເກມພຣີເມຍລີກ ຕັດສິນມາແລ້ວ 7 ນັດ, ແຈກ 25 ໃບເຫລືອງ, ເຄີຍຕັດສິນເກມ ແມນເຊັສເຕີ ຢູໄນເຕັດ ລົງສະໜາມ 1 ນັດ ທີ່ເປີດບ້ານຊະນະ ເລັສເຕີ ຊິຕີ້ 1-0 ແຕ່ຍັງບໍ່ໄດ້ຕັດສິນ ລິເວີພູລ ລົງສະໜາມໃນເກມລີກລະດູການນີ້.
ສະຖິຕິການຕັດສິນເກມທີ່ ແມນເຊັສເຕີ ຢູໄນເຕັດ ແລະ ລິເວີພູລ ລົງສະໜາມຂອງ ແອັດກິນສັນ ສະເພາະລະດູການຜ່ານມາຕັດສິນ ແມນເຊັສເຕີ ຢູໄນເຕັດ 7 ນັດ ຊະນະ 2 ສະເໝີ 2 ເສຍ 3 ນັດ, ຕັດສິນ ລິເວີພູລ 6 ນັດ ຊະນະ 2 ສະເໝີ 3 ເສຍ 1. ເປັນຜູ້ຕັດສິນທີ່ຖືກເລືອກຕັດສິນເກມໃຫຍ່ຫລາຍນັດ.
ສຳລັບ ມາຕິນ ແອັດກິນສັນ ເກີດທີ່ແບສຟ໊ອດ ປະເທດອັງກິດ ກ້າວສູ່ການເປັນຜູ້ຕັດສິນບານເຕະມາແຕ່ອາຍຸໄດ້ 16 ປີ ແລະ ເລີ່ມຕັດສິນລະດັບລີກໃນອັງກິດໃນປີ 1998 ແລະ ກ້າວສູ່ພຣີເມຍລີກໃນປີ 2000 ເປັນຜູ້ຕັດສິນລະດັບຟີຟາ ປີ 2006 ເຄີຍຕັດສິນຫລາຍນັດທີ່ສຳຄັນ ເປັນຕົ້ນ ລີກຄັບ ແລະ ເອັຟເອຄັບ ຮອບຊີງຊະນະເລີດ ລວມທັງ ຢູໂຣ 2012. �
