ປູກຈິດສຳນຶກ ໃຫ້ສັງຄົມເຂົ້າໃຈ ຕໍ່ການປ່ຽນແປງດິນຟ້າອາກາດ

- advert banner 728 90 728x90 - ປູກຈິດສຳນຶກ ໃຫ້ສັງຄົມເຂົ້າໃຈ ຕໍ່ການປ່ຽນແປງດິນຟ້າອາກາດ

​ແຫ​ລ່ງຂ່າວ ຂປລ ລາຍ​ງານ​ວ່າ: ການສະເຫລີມສະຫລອງວັນອາຫານໂລກ, ວັນສາກົນ ແລະ ສັບປະດາແຫ່ງຊາດ ເພື່ອລຶບລ້າງຄວາມທຸກຍາກ ໃນບໍ່ດົນມານີ້ ເປົ້າໝາຍສຳຄັນແມ່ນການປູກຈິດສຳນຶກ ແລະ ສ້າງຄວາມຮັບຮູ້ ໃຫ້ປະຊາຊົນ ກໍຄືທົ່ວສັງຄົມລາວ ລວມທັງປະຊາຊາດທົ່ວໂລກ ໄດ້ເຂົ້າໃຈເຖິງບັນຫາສິ່ງທ້າທາຍຕ່າງໆ ຈາກການປ່ຽນແປງດິນຟ້າອາກາດ. ທັງເປັນການແຈ້ງເຕືອນ ແລະ ປຸກລະດົມກຳລັງແຮງ  ເພື່ອເຝົ້າລະວັງ, ປ້ອງກັນຜົນເສຍຫາຍທີ່ອາດເກີດຂຶ້ນ ແລະ ຮ່ວມກັນແກ້ໄຂຜົນຮ້າຍຂອງໄພພິບັດໃຫ້ກັບສູ່ສະພາບປົກກະຕິໂດຍໄວ.

- new3 - ປູກຈິດສຳນຶກ ໃຫ້ສັງຄົມເຂົ້າໃຈ ຕໍ່ການປ່ຽນແປງດິນຟ້າອາກາດ

    ທ່ານ ລຽນ ທິແກ້ວ ລັດຖະມົນຕີກະຊວງກະສິກຳ ແລະ ປ່າໄມ້ ກ່າວວ່າ: ລັດຖະບານລາວ ໄດ້ໃຫ້ຄວາມສຳຄັນ ໃນການສະເຫລີມສະຫລອງ 3 ວັນດັ່ງກ່າວ ເຊັ່ນ: ວັນອາຫານໂລກ 2019 ເຊິ່ງຄົບຮອບ 39 ປີ ເຊິ່ງໄດ້ເນັ້ນຄຳຂວັນ “ການກະທຳຂອງພວກເຮົາ ຄືອະນາຄົດຂອງພວກເຮົາ, ສົ່ງ ເສີມການກິນອາຫານທີ່ດີ ມີຄຸນຄ່າຕໍ່ສຸຂະພາບ ເພື່ອການລຶບລ້າງຄວາມອຶດຫິວໃນໂລກ”. ສ່ວນການລະນຶກວັນສາກົນລຶບລ້າງຄວາມທຸກຍາກ ແມ່ນຄົບຮອບ 27 ປີ ພາຍໃຕ້ຄຳຂວັນ “ຮ່ວມກັນສ້າງຄວາມເຂັ້ມແຂງໃຫ້ກັບເດັກນ້ອຍ, ຄອບຄົວ ແລະ ຊຸມຊົນ ເພື່ອລຶບລ້າງຄວາມທຸກຍາກ”; ໃນຂະນະທີ່ ສັບ ປະດາແຫ່ງຊາດເພື່ອລຶບລ້າງຄວາມທຸກຍາກ ແມ່ນຄົບຮອບ 16 ປີ ກໍໄດ້ເນັ້ນຄຳຂວັນ “ແຂ່ງຂັນຮັກຊາດ ແລະ ພັດ ທະນາຊົນນະບົດ ເພື່ອແກ້ໄຂຄວາມທຸກຍາກຂອງປະຊາຊົນ”. ສະຫລຸບແລ້ວ ແມ່ນການປູກຈິດສຳນຶກ ໃຫ້ປະຊາຊົນລາວ ແລະ ປະຊາຊາດໂລກ ຕ້ອງເພີ່ມທະວີການຮ່ວມມື ເພື່ອໄຂບັນຫາຄວາມທຸກຍາກ ແລະ ໄພອຶດຫິວ ນັບທັງປ້ອງກັນໄພພິບັດທີ່ອາດເກີດຂຶ້ນໃຫ້ທັນການ.

    ການສະເຫລີມສະຫລອງ 3 ວັນດັ່ງກ່າວໃນປີນີ້ ແມ່ນດຳເນີນໄປຢູ່ໃນເງື່ອນໄຂທີ່ບັນດາປະ ເທດຕ່າງໆ ນັບທັງປະເທດລາວ ໄດ້ມີຜົນສຳເລັດເບື້ອງຕົ້ນ ໃນການຈັດຕັ້ງປະຕິບັດເປົ້າໝາຍການພັດທະນາແບບຍືນຍົງ. ຄຽງຄູ່ກັນນັ້ນ ຫລາຍປະເທດ ກໍຖືກຜົນກະທົບຂອງໄພພິບັດຕ່າງໆຢ່າງໜັກໜ່ວງ ເຊິ່ງໄດ້ກາຍເປັນອຸປະສັກຕໍ່ການສູ້ຊົນບັນລຸຄາດໝາຍ ໃນການລຶບລ້າງຄວາມທຸກຍາກ ແລະ ໄພອຶດຫິວຂອງໂລກທີ່ວາງໄວ້ ໃຫ້ສຳເລັດໂດຍພື້ນຖານໃນປີ 2030. ສະເພາະປະເທດລາວ ກໍໄດ້ຮັບຜົນກະທົບຈາກໄພທຳມະຊາດຢ່າງໜັກໜ່ວງ ເປັນຕົ້ນແມ່ນ ໄພນ້ຳຖ້ວມຢູ່ບັນດາແຂວງພາກກາງ ແລະ ພາກໃຕ້, ການລະບາດຂອງບົ້ງຝູງ ແລະ ໄພແຫ້ງແລ້ງຢູ່ພາກເໜືອ, ລວມທັງການລະບາດຂອງພະຍາດອະຫິວາໝູອາຟຣິກກາ ຢູ່ຫລາຍແຂວງໃນຂອບເຂດທົ່ວປະເທດ. ສິ່ງເຫລົ່ານີ້ ເປັນສັນ ຍານເຕືອນພວກເຮົາຈະມີຄວາມຫຍຸ້ງຍາກໃນໄລຍະສັ້ນ ກໍຄືທ້າຍລະດູຝົນປີນີ້ ເຊິ່ງການສະໜອງສະ ບຽງອາຫານຈະບໍ່ສາມາດປະຕິບັດໄດ້ຢ່າງເປັນປົກກະຕິຄືປີຜ່ານມາ, ປະຊາຊົນຢູ່ຫລາຍບ່ອນຢືນຢູ່ຕໍ່ໜ້າຄວາມສ່ຽງທີ່ຈະທຸກຍາກຂຶ້ນຕື່ມ; ບັນດາຄອບຄົວ ແລະ ບ້ານພົ້ນທຸກ ຢູ່ໃນເຂດທີ່ໄດ້ຮັບຜົນກະທົບ ຈະມາທຸກຍາກຄືນຕື່ມ ອັນເນື່ອງມາຈາກການປ່ຽນແປງຂອງດິນຟ້າອາກາດ.

- lattana 1 - ປູກຈິດສຳນຶກ ໃຫ້ສັງຄົມເຂົ້າໃຈ ຕໍ່ການປ່ຽນແປງດິນຟ້າອາກາດ

    ໂອກາດນີ້, ທ່ານ ລຽນ ທິແກ້ວ ໄດ້ຮຽກຮ້ອງໃຫ້ອົງການຈັດຕັ້ງສາກົນ ແລະ ຄູ່ຮ່ວມພັດທະ ນາ ຈົ່ງສືບຕໍ່ຮ່ວມກັບບັນດາປະຊາຊາດໃນໂລກ ພ້ອມກັນສົ່ງແຮງໃຈ ແລະ ສະໜັບສະໜູນ ໄປເຖິງຜູ້ທຸກຍາກ ແລະ ອຶດຫິວ, ພ້ອມທັງຄົ້ນຄວ້າຊອກຫາວິທີການ ແລະ ມາດຕະການ ເພື່ອສູ້ຊົນຈັດຕັ້ງຜັນຂະຫຍາຍເນື້ອໃນຄຳຂວັນຂອງ 3 ວັນດັ່ງກ່າວໃຫ້ປະກົດຜົນເປັນຈິງ.

error: Content is protected !!