ຂີ້​ເຫຍື້ອຫລັງ​ງານ​ບຸນ

ຂີ້​ເຫຍື້ອຫລັງ​ງານ​ບຸນ - advert banner 728 90 728x90 - ຂີ້​ເຫຍື້ອຫລັງ​ງານ​ບຸນ

ໂດຍ: ທິດ​ກ່ຳ

ຂີ້​ເຫຍື້ອຫລັງ​ງານ​ບຸນ - new3 - ຂີ້​ເຫຍື້ອຫລັງ​ງານ​ບຸນ

​    ເວົ້າ​ເລື່ອງ​ການ​ເຮັດບຸນ​ສິນ​ກິນ​ທານ​ຢູ່​ບ້ານ​ເມືອງ​ເຮົາ​ແມ່ນ​ມີ​ທຸກ​ເດືອນ, ຈົນ​ກາຍ​ເປັນຮີດສິບສອງ​ຄອງ​ສິບ​ສີ່, ຮີດ​ຍີ່​ຄອງ​ຈຽງ​ ມາ​ແຕ່​ດຶກ​ດຳ​ບັນ​ສືບ​ຕໍ່​ກັນ​ມາ​ຈົນ​ຜອງ​ເທົ່າ​ທຸກ​ວັນ​ນີ້. ຕົວຢ່າງ​ເດືອນ 11 ​ເພັງ ​ກໍ​ແມ່ນ​ບຸນ​ອອກ​ພັນ​ສາ.

ຕໍ່​ຈາກ​ບຸນ​ອອກ​ພັນ​ສາ​ກໍ​ແມ່ນ​ບຸນ​ກະ​ຖິ່ນ, ຈາກ​ບຸນ​ກະຖິນ​ໄປ​ຮອດ​ເດືອນ 12 ​ເພັງ ກໍ​ແມ່ນບຸນ​ນະມັດສະການ​ພະທາດ​ຫລວງ, ສຳ​ເລັດ​ບຸນທາດຫລວງ​ກໍ​ຍັງ​ມີ​ບຸນ​ຕ່າງໆປະຈຳ​ເດືອນ, ຕາມ​ຮີດຄອງ​ປະ​ເພນີ​ຂອງ​ແຕ່ລະ​ທ້ອງ​ຖິ່ນ, ​ແຕ່​ລະ​ຊົນ​ເຜົ່າ​ຢ່າງ​ເປັນຂະ​ບວນຟົດຟື້ນມ່ວນ​ຊື່ນ​ທີ່​ຫລາກ​ຫລາຍ​ສີສັນ​ຈົນ​ໄປ​ຮອດ​ຕົ້ນລະດູຝົນ​ຍາມ​​ເຂົ້າພັນ​ສາ​ຂອງປີໜ້າ​ຖື​ວ່າ​ມີ​ແຕ່​ບຸນ​ກັບ​ບຸນ​ເກືອບ​ນັບ​ບໍ່​ໄຄ່​ວ.

  ນອກຈາກບຸນ​ຕາມ​ຮີດຄອງ​ປະ​ເພນີ​ແລ້ວ​ ຍັງ​ມີ​ບຸນ​ທາງ​ການ​ຕື່ມ​ອີກ​ເຊັ່ນ: ບຸນວັນຊາດ, ບຸນປີ​ໃໝ່​ສາກົນ ​ແລະ ບຸນ​ອື່ນໆ ທີ່​ໄດ້​ກຳນົດ​ໄວ້​ຢ່າງ​ເປັນທາງ​ການ​ຕາມ​ວາລະ ​ແລະ ຄວາມ​ສຳຄັນ​ຂອງ​ແຕ່​ລະບຸ​ນນັ້ນໆ.

  ສຳລັບ​ຢູ່​ນະຄອນຫລວງ​ວຽງ​ຈັນ​ ເທົ່າ​ທີ່​ເຄີຍ​ເຫັນ​ຜ່ານ​ມາ​ ບຸນ​ທີ່​ມີ​ການ​ຄົບງັນ​ສະເຫລີ​ມສະຫລອງ​ຢ່າງ​ໃຫຍ່​​ໂຕ​ຄຶກຄື້ນ​ເປັນ​ຂະ​ບວນຍິ່ງ​ໃຫຍ່​ແດ່​ ກໍ​ມີ​ແຕ່​ບຸນ​ອອກ​ພັນ​ສາ​ກັບ​ບຸນທາດຫລວງ​ນັ້ນ​ເອງ.

   ອັນ​ສາ​ເຫດ​ກໍ​ຍ້ອນ​ວ່າ​ໃນ​ສອງ​ປາງ​ບຸນ​ນີ້​ມີ​ການ​ຄົບງັນ, ມີ​ກິດຈະກຳ​ທີ່​ຫລາກ​ຫລາຍ, ກາຍ​ເປັນ​ບຸນ​ປາງ​ໃຫຍ່​ສາມາດ​ດຶງ​ດູດ​ແຂກ​ຕ່າງ​ດ້າວ​ທ້າວ​ຕ່າງ​ແດນ​ທັງ​ພາຍ​ໃນ ​ແລະ ຕ່າງປະ​ເທດ​ມາ​ທ່ຽວ​ມາ​ຊົມ​ຢ່າງ​ຫລວງຫລາຍ​ພາຍ​ມາກ.

​   ແນວ​ໃດ​ກໍ​ຕາມ, ສະ​ເພາະ​ໃນ​ຄໍ​ລຳມື້ນີ້​ ທິດ​ກ່ຳ​ຂໍ​ຍົກ​ເອົາ​ສອງ​ປາງ​ບຸນ​ໃຫຍ່​ຄື​ບຸນ​ອອກ​ພັນ​ສາ​ທີ່​ຫາ​ກໍ​ຜ່ານ​ພົ້ນ​ໄປ​ດ້ວຍ​ບັນຍາກາດ​ຍັງ​ສີ​ອຸ່ນໆສົດ​ຮ້ອນໆ ​ແລະ ຂັ້ນຕໍ່​ໄປ​ອີກ​ບໍ່ພໍ​ເທົ່າ​ໃດ​ວັນ​ຄື​ວັນ​ທີ 11 ​​ພະຈິກ 2019 ກົງ​ກັບ 15 ຄ່ຳ​ເດືອນ 12 ​ເພັງ ກໍ​ຈະ​ມີ​ບຸນ​ນະມັດສະການ​ພະທາດ​ຫລວງ​ວຽງ​ຈັນ ​ອັນ​ເປັນ​ສູນ​ເຕົ້າ​ໂຮມຊາວ​ພຸດ ​ກໍ​ຄື​ຊາວ​ລາວ​ທົ່ວ​ທັງ​ປະ​ເທດ ​ແລະ ​ແຂກ​ຕ່າງ​ດ້າວ​ທ້າວ​ຕ່າງ​ແດນ​ມາ​ຮ່ວມ​ສະ​ເຫລີ​ມສະຫລອງ ​ແລະ ສັກກາລະບູຊາ​ຢ່າງ​ຄັບຄາ​ໜາ​ແໜ້ນ.

​   ໂອກາດ​ບຸນພະທາດ​ຫລວງ​ໃນ​ແຕ່ລະ​ປີ​ກໍ​ມີ​ການ​ຄົບງັນ, ສະ​ເຫລີ​ມສະຫລອງ​ຢ່າງ​ໃຫຍ່​ໂຕ​ມະໂຫຖານ, ມີ​ຫລາກ​ຫລາຍ​ສີສັນ, ທັງ​ດີດ​ສີ​ຕີ​​ເປົ່າ​ສະ​ແດງ​ສິລະ​ປະ​ວັນນະຄະດີ, ມີ​ງານ​ຕະຫລາດ​ນັດ​ວາງສະ​ແດງ​ສິນຄ້າ​ບໍລິການ​ຂາຍ​ສິນຄ້າ, ​ເຄື່ອງ​ອຸປະ​ໂພ​ກບໍລິ​ໂພ​ກ​ແຂ່ງຂັນກິລາ​ຢ່າງ​ມ່ວນ​ຊື່ນ.

   ນອກຈາກ​ສິ່ງ​ທີ່​ກ່າວ​ມາ​ນີ້​ແລ້ວ, ຍັງ​ປະກອບ​ໄປ​ດ້ວຍ​ພິທີ​ທາງ​ສາດສະໜາ​ເຊັ່ນ: ​ໄຫວ້​ພະທາດຫລວງ, ພິທີ​ໄຫວ້​ພະ​ຮັບ​ສິນ, ຕັກບາດ​ຢາດ​ນ້ຳຕາມ​ຮີດຄອງ​ປະ​ເພນີ, ນີ້​ຄື​ສີສັນ​ຂອງ​ການ​ເຮັດບຸນ​ປາງ​ໃຫຍ່​​, ໂດຍ​ສະ​ເພາະ​ບຸນ​ອອກ​ພັນ​ສາ​ກັບ​ບຸນ​ນະມັດສະການ​ພະທາດຫລວງ.

ຂີ້​ເຫຍື້ອຫລັງ​ງານ​ບຸນ - lattana 1 - ຂີ້​ເຫຍື້ອຫລັງ​ງານ​ບຸນ

​  ເຖິງ​ຢ່າງ​ໃດ​ກໍ​ດີ, ນອກຈາກ​ສິ່ງ​ທີ່​ດີ​ເລີດ​ປະ​ເສີດ​ສີ​​ໃນ​ການສະ​ເຫລີ​ມສະຫລອງ​ເຮັດບຸນ​ສິນກິນ​ທານ​ສຳ​ເລັດ​ເສັດ​ຊິ້ນ​ໄປ​ແລ້ວ​ ສິ່ງ​ທີ່​ປະ​ໄວ້​ໃຫ້​ເຮົາ​ເຫັນ​ຢ່າງ​ຊະ

ຊາຍ, ບໍ່​ເປັນ​ລະບົບ​ລະບຽບ​ກໍ​ແມ່ນ​ບັນຫາ​ຂີ້​ເຫຍື້ອຈຳນວນ​ຫລວງຫລາຍ​ປະ​ຢັງ​ຢາຍ​ຊະຊາຍ​ໄວ້​ທົ່ວ​ທີບ​ເຕັມບໍລິ​ເວນ​ສະຖານ​ທີ່​ເຮັດບຸນ​ຢ່າງ​ໜາ​ຕາ.

​   ເມື່ອ​ຕັ້ງ​ໂຈດ​ກັນ​ວ່າ​ຕໍ່​ບັນຫາ​ດັ່ງກ່າວ​ມັນ​ເປັນຄວາມ​ຮັບຜິດຊອບ​ຂອງ​ໃຜ, ຖ້າ​ຈະ​ຊອກ​ຫາ​ຄຳ​ຕອບ​ທີ່​ຖືກຕ້ອງ​ນັ້ນຄົງ​ໜີບໍ່​ມົ້ມ​ອົງການ​ພັດທະນາ​ຕົວ​ເມືອງ ​ຫລື​ເຂົາ​ເອີ້ນຢ່າງ​ໜຶ່ງວ່າ​ເທສະບານ​ນັ້ນ​ເອງ.

   ນອກ​ນັ້ນ, ກໍ​ແມ່ນ​ຄວາມ​ຮັບຜິດຊອບ​ຂອງ​ຜູ້​ປະມູນ ​ແລະ ຜູ້​ປະກອບ​ການ​ທັງ​ໝົດ​ ທີ່​ຈະຕ້ອງ​ໄດ້​ພ້ອມ​ກັນ​ເປັນ​ເຈົ້າການ​ຢ່າງ​ຈິ​ງຈັງ, ຖ້າ​ຢາກ​ໄດ້​ຕາມ​ຈຸດປະສົງ​ຄື​ດັ່ງ​ວ່າ​ນີ້, ອົງການ, ຂະ​ແໜງ​ການ ຫລື ພາກສ່ວນ​ທີ່​ຮັບຜິດຊອບ​ໂດຍ​ກົງ​ຕ້ອງ​ມີ​ມາດ​ຕະການ​ອັນເດັດຂາດ​ຕໍ່​ບັນຫາ​ການ​ກຳຈັດ​ຂີ້​ເຫຍື້ອ.

   ສະ​ພາບ​ຜ່ານ​ມາ, ການ​ແກ້​ໄຂ​ບັນຫາ​ຂີ້​ເຫຍື້ອທີ່​ປະຖິ້ມ​ໄວ້​ຫລັງ​ງານ​ບຸນ​ກາຍ​ເປັນສາ​ເຫດໜຶ່ງ​ທີ່​ໄດ້​ສ້າງ​ພາບ​ພົດ​ອັນ​ບໍ່​ຈົບ​​ງາມ​ແກ່​ສັງຄົມ​ຜູ້​ພົບ​ເຫັນ​ທັງ​ເປັນ​ການສະ​ແດງ​ໃຫ້​ເຫັນ​ເຖິງ​ຄວາມ​ຮັບຜິດຊອບ​ທີ່​ປ່ອຍປະ​ລະ​ເລີຍ​ແກ່ຍາວ​ເພື່ອ​ຈະ​ແກ້​ໄຂ​ຕົກ​ກໍ​ເປັນ​ໄປ​ຕາມ​ການ​ເວລາ​ ດັ່ງ​ຕົວຢ່າງ​ບຸນ​ອອກ​ພັນ​ສາ​ທີ່​ຜ່ານ​ມາ​ສົດໆ​ຮ້ອນໆ. ບຸນທາດຫລວງ​ທີ່​ໄກ້​ຈະ​ມາ​ເຖິງ​ນີ້​ ຂໍ​ໃຫ້​ມີ​​ແຜນ​ປາບ​ຂີ້​ເຫຍື້ອຢ່າງ​ຄັກ​ແນ່ຢ່າ​ໃຫ້​ມັນ​ມີ​ລັກສະນະ​ຊຳ​ເຮື້ອ​ເໝືອນ​ດັ່ງ​ບຸນ​ອອກພັນ​ສາ​ກໍ​ແລ້ວ​ກັນ “ຊາ​ເຢີ​”.

ຂີ້​ເຫຍື້ອຫລັງ​ງານ​ບຸນ - 1111 2 - ຂີ້​ເຫຍື້ອຫລັງ​ງານ​ບຸນ
(ພາບປະກອບ)

error: Content is protected !!