ໄລຍະ​ທ້າຍ​ເດືອນ​ນີ້ອາກາດ​​ສືບ​ຕໍ່​ເຢັນ​ລົງ 1-2 ອົງສາ

ກົມ​ອຸຕຸນິຍົມ ​ແລະ ອຸ​ທົກ​ກະສາ​ດ ​ໃຫ້​ຮູ້​ວ່າ: ໃນໄລຍະທ້າຍ​ເດືອ​ນຕຸລານີ້, ສະພາບອາກາດ​ໃນ​ທົ່ວ​ທຸກ​ພາກ​ຂອງ​ປະ​ເທດ​ເຮົາ​ຈະເຢັນລົງ 1-2 ອົງສາ, ​ເຮັດ​ໃຫ້​ອາກາດ​ເຢັນ​ໃນຕອນກາງຄືນຫາຕອນເຊົ້າ, ພ້ອມມີໝອກປົກຫຸ້ມຢູ່ທົ່ວໄປ,  ຢູ່ແຂວງພາກເໜືອລົງຫາພາກກາງດ້ານຕາເວັນອອກ ຈະມີລົມພັດແຮງເປັນບາງໂອກາດ ແລະ ຝົນຕົກຢູ່ບາງທ້ອງຖິ່ນ.

ໄລຍະ​ທ້າຍ​ເດືອນ​ນີ້ອາກາດ​​ສືບ​ຕໍ່​ເຢັນ​ລົງ 1-2 ອົງສາ - new3 - ໄລຍະ​ທ້າຍ​ເດືອນ​ນີ້ອາກາດ​​ສືບ​ຕໍ່​ເຢັນ​ລົງ 1-2 ອົງສາ

ຫລັງ​ຈາກຄວາມກົດດັນສູງຂອງອາກາດເຢັນທີ່ປະເທດຈີນ ຈະເພີ່ມກໍາລັງແຮງຂຶ້ນແຜ່ລົງມາປົກຄຸມຢູ່ທຸກພາກຂອງປະເທດ​ເຮົາ ສົມທົບກັບລົມຕາເວັນອອກ-ຕາເວັນອອກສ່ຽງເໜືອພັດປົກຄຸມເປັນສ່ວນໃຫຍ່.

  ສໍາລັບ​ສະພາບອາກາດໃນແຕ່ລະພາກ ດັ່ງນີ້: ພາກເໜືອດ້ານຕາເວັນອອກ: ແຂວງ ຜົ້ງສາລີ, ຫົວພັນ ແລະ ຊຽງຂວາງ ອາກາດຍັງຈະສືບຕໍ່ເຢັນຫາໜາວເຢັນຢູ່ຕື່ມອີກອຸນຫະພູມ​ແຕ່ 14-28 ອົງສາ. ພາກເໜືອດ້ານຕາເວັນຕົກ: ແຂວງຫລວງນໍ້າທາ, ຫລວງພະບາງ ແລະ ໄຊຍະບູລີ ອາກາດຈະເຢັນລົງ 1-2 ອົງສາໃນຕອນກາງຄືນຫາຕອນ​ເຊົ້າ, ພ້ອມມີໝອກປົກຫຸ້ມຢູ່ທົ່ວໄປ ແລະ ຈະມີຝົນຕົກກະຈາຍຢູ່ບາງທ້ອງຖິ່ນ ອຸນຫະພູມ​ແຕ່ 16-31 ອົງສາ.

ພາກກາງ: ມີເຝື້ອປົກຄຸມເປັນບາງສ່ວນ, ອາກາດເຢັນ ພ້ອມມີໝອກບາງປົກຫຸ້ມໃນຕອນເຊົ້າຢູ່ບາງທ້ອງຖິ່ນແຂວງ ວຽງຈັນ ແລະ ບໍລິຄຳໄຊ, ສະເພາະຢູ່ທາງດ້ານຕາເວັນອອກຂອງພາກຈະມີລົມພັດແຮງເປັນບາງໂອກາດ. ອຸນຫະພູມ​ແຕ່ 20-32 ອົງສາ. ສະເພາະແຂວງໄຊສົມບູນ, ເຂດຫລັກ 20, ເມືອງວຽງທອງ ແລະ ເມືອງນາກາຍ, ອາກາດຈະເຢັນຫາໜາວເຢັນ ແລະ ມີໝອກປົກຫຸ້ມໃນຕອນກາງຄືນຫາຕອນເຊົ້າ, ພ້ອມມີລົມພັດແຮງຢູ່ບາງບໍລິເວນ ອຸນຫະພູມ​ແຕ່12-27 ອົງສາ.

ພາກໃຕ້: ມີເຝື້ອປົກຄຸມເປັນບາງສ່ວນ, ອາກາດອ່າວເຢັນຢູ່ທົ່ວໄປ, ພ້ອມມີໝອກປົກຫຸ້ມໃນຕອນກາງຄືນຫາຕອນເຊົ້າ ອຸນຫະພູມ​ແຕ່ 22-34 ອົງສາ. ສະເພາະເຂດພູພຽງບໍລະເວນ: ອາກາດຈະເຢັນຫາໜາວເຢັນລົງຕື່ມ ພ້ອມມີໝອກບາງປົກຫຸ້ມໃນຕອນກາງຄືນຫາຕອນເຊົ້າ ແລະ ມີລົມພັດແຮງເປັນບາງໂອກາດຢູ່ບາງບໍລິເວນ ອຸນຫະພູມ​ແຕ່ 11-25 ອົງສາ.

ນະຄອນຫລວງວຽງຈັນ: ຈະມີເຝື້ອປົກຄຸມເປັນບາງສ່ວນ, ອາກາດອ່າວເຢັນໃນຕອນກາງຄືນ ຫາຕອນເຊົ້າ ແລະ ຈະມີຝົນຕົກຄ່ອຍພ້ອມຈະມີລົມພັດແຮງເປັນບາງໂອກາດຢູ່ບາງບໍລິເວນ ອຸນຫະພູມ​ແຕ່ 24-33 ອົງສາ.

error: Content is protected !!