ຊູ​ແອັດ ກັບສັນຍາຈະບໍ່ໃຊ້ນໍ້າມັນ!

ຊູ​ແອັດ ກັບສັນຍາຈະບໍ່ໃຊ້ນໍ້າມັນ! - advert banner 728 90 728x90 - ຊູ​ແອັດ ກັບສັນຍາຈະບໍ່ໃຊ້ນໍ້າມັນ!

ໂດຍ: ມຶກບໍ່ແຫ້ງ

ຊູ​ແອັດ ກັບສັນຍາຈະບໍ່ໃຊ້ນໍ້າມັນ! - new3 - ຊູ​ແອັດ ກັບສັນຍາຈະບໍ່ໃຊ້ນໍ້າມັນ!

ປະ​ເທດ​ຊູ​ແອັດ (Sweden) ​ຕັ້ງ​ຢູ່​ທາງ​ທິດ​ໜືອ​ຂອງ​ທະ​ວີບເອີ​ຣົບ, ມີ​ປະ​ຊາ​ກອນ 9,6 ລ້ານຄົນ ດ້ວຍ​ລາຍ​ຮັບ​ສະ​ເລ່ຍ​ຕໍ່​ຫົວ​ຄົນເກືອບ 60 ພັນ​ໂດ​ລາສະຫະລັດ ກຳ​ລັງ​ຈະ​ກາຍ​ເປັນ​ປະ​ເທດ​ທີ່​ຈະ​ບໍ່ນຳ​ໃຊ້​ນໍ້າ​ມັນ​ເຊື້ອ​ໄຟເປັນ​ປະ​ເທດ​ທຳ​ອິດ​ໃນ​ໂລກ.

​ໃນ​ຄວາມ​ເປັນ​ຈິງ​ແລ້ວຊູ​ແອັດ​ກໍ​ເປັນ​ປະ​ເທດ​ນຳ​ໜ້າ​ທາງ​ດ້ານ​ພະ​ລັງ​ງານ​ທີ່​ທົດ​ແທນ​ໄດ້ ປະ​ເທດ​ໜຶ່ງໃນ​ໂລກ​ຢູ່​ແລ້ວ ໂດຍ​​ການ​ຜະ​ລິດ​ກະ​ແສ​ໄຟ​ຟ້າ 2/3 ພາຍ​ໃນ​ປະ​ເທດ​​ໄດ້ຈາກກັງ​ຫັນ​ລົມ ແລະ​ແສງ​ແດດ ເຊິ່ງຄ້າຍ​ກັນ​ກັບ​ປະ​ເທດ​ດານ​ມາກທີ່​ສາ​ມາດ​ຜະ​ລິດ​ກະ​ແສ​ໄຟ​ຟ້າໄດ້ເກີນຄວາມ​ຕ້ອງ​ການຈາກ​ການ​ກັງ​ຫັນ​ລົມ​ພຽງ​ຢ່າງ​ດຽວ, ສ່ວນ​ທີ່​ເຫລືອ​ຈາກ​ການ​ຊົ​ມ​ໃຊ້​ພາຍ​ໃນກໍ​ຍັງ​ໄດ້​ສົ່ງ​ອອກ​ປະ​ເທດ​ໃກ້​ຄຽງ​ເຊັ່ນ ເຢຍ​ລະ​ມັນ, ຊູ​ແອັດ ແລະ​ນອກ​ແວ (ເປັນ​ໜຶ່ງ​ໃນ​ປະ​ເທດ​ທີ່​ຜະ​ລິດ​ນຳ​ມັນ​ເຊື້ອ​ໄຟ​ລາຍ​ໃຫຍ່​ຂອງ​ໂລກ).

​ໃນ​ການ​ລຶບ​ລ້າງ​ການ​ຊົມ​ໃຊ້ ນ້ຳ​ມັນ​ເຊື້ອ​ໄຟ​ໃນ​ຂອບ​ເຂດ​ປະ​ເທດ​ຂອງ​ຊູ​ແອັດ​ມັນ​ກໍ​ອາດບໍ່​ແມ່ນ​ເລື່ອງ​ງ່າຍ, ເຊິ່ງ​ຫລາຍ​ທ່ານ​ອາດ​ມີ​ຄຳ​ຖາມ​ວ່າ ປະ​ເທດ​ອຸດ​ສາ​ຫະ​ກຳທີ່​ພັດ​ທະ​ນາ​ແລ້ວ ແລະ​ມີ​ປະ​ຊາ​ກອນເກືອບສິບ​ລ້ານ​ຄົນຄື​ຊູ​ແອັດນັ້ນຈະ​ສາ​ມາດ​ຢຸດ​ນຳ​ໃຊ້​ນໍ້າ​ມັນ​ເຊື້ອ​ໄຟ​ໄດ້​ແນວ​ໃດໃນ​ບໍ່​ພໍ​ເທົ່າ​ໃດ​ທົດ​ສະ​ຫວັດ​ຂ້າງ​ໜ້ານີ້?

ເມື່ອ​ແລ​ເບິ່ງ​ນະ​ໂຍ​ບາຍ​ທາງ​ດ້ານ​ງົບ​ປະ​ມານ​ຂອງ​ຊູ​ແອັດ​ຫວ່າງບໍ່​ດົນ​ມານີ້ ກໍ​ສາ​ມາດ​ສັງ​ເກດ​ເຫັນ​ວ່າ ບັນ​ດາ​ພັກ​ການ​ເມືອງ​ພາຍ​ໃນ​ປະ​ເທດ ຕ່າງ​ກໍ​ໃຫ້​ການ​ສະ​ໜັບ​ສະ​ໜູນ​ຕໍ່​ກັບ​ພະ​ລັງ​ງານ ສີ​ຂຽວ. ພ້ອມນັ້ນ ທ່ານ ສະ​ເຕ​ຟານ ໂລບ​ເວັນ (Stefan Löfven) ນາ​ຍົກ​ລັດ​ຖະ​ມົນ​ຕີຂອງ​ຊູ​ແອັດ​ກໍ​ຍັງ​ໄດ້​ປະ​ກາດ ຢ່າງ​ອາດ​ຫານຕໍ່​ໜ້າ​ຜູ້ນຳ​ຂອງ​ບັນ​ດາ​ປະ​ເທດ​ສະ​ມາ​ຊິກ​ຂອງ​ອົງ​ການ ສ​ປ​ຊ ໃນ​ກອງ​ປະ​ຊຸມສະ​ມັດ​ຊາ​ໃຫຍ່ໃນ​ເດືອນກັນ​ຍາ 2015 ທີ່​ຜ່ານ​ມາວ່າ “ຊູ​ແອັດ ຈະ​ເຮັດ​ໃຫ້​ຄວາມ​ຝັນ​ອັນ​ເໜືອ​ເມກທີ່​​ປະ​ເທດ​ອື່ນໆ​ໃນ​ໂລກບໍ່​ອາດເອື້ອມ​ຫານີ້​ເປັນ​ຈິງ​ໃຫ້​ໄດ້ອີກສອງຫາສາມທົດ​ສະ​ຫວັດ​ຂ້າງ​ໜ້ານີ້ໂດຍລິ​ເລິ່ມແຕ່​ສົກ​ປີ​ 2016 ລັດ​ຖະ​ບານຊູ​ແອັດ​ຈະ​ສະໜອງ​ເງິນຢ່າງ​ໜ້ອຍ 356 ລ້ານ​ເອີ​ໂຣເພື່ອ​ການ​ກໍ​ສ້າງພື້ນ​ຖານ​ໂຄງ​ລ່າງ​ໃນ​ການຜະ​ລິດ​ພະ​ລັງ​ງານ​ທີ່​ສະ​ອາດເປັນ​ຕົ້ນພະ​ລັງ​ງານແສງ​ຕາ​ເວັນ, ພະ​ລັງ​ງານ​​ລົມ ແລະ​ ການ​ຄົມ​ມະ​ນາ​ຄົມສາ​ທາ​ລະ​ນະ​ທີ່​ສະ​ອາດ​ຕື່ມ​ອີກ.

ຊູ​ແອັດ ກັບສັນຍາຈະບໍ່ໃຊ້ນໍ້າມັນ! - lattana 1 - ຊູ​ແອັດ ກັບສັນຍາຈະບໍ່ໃຊ້ນໍ້າມັນ!

ຈາກ​ນະ​ໂຍ​ບາຍ​ດັ່ງ​ກ່າວ ມັນ​ເປັນ​ສັນ​ຍານ​ທີ່​ສັ່ນ​ສະ​ເທືອນຄວາມ​ໜ້າ​ດ້ານ​ຂອງ​ບັນ​ດາ​ປະ​ເທດ​ມະ​ຫາ​ອຳ​ນາດທາງ​ດ້ານ​ອຸດ​ສາ​ຫະ​ກຳອື່ນໆ ທີ່​ຊ່ວງ​ເສັງ​ກັນ​ຍາດ​ແຍ່ງ​ແຫລ່ງ​ນ້ຳ​ມັນຢ່າງ​ຫົວ​ເດັດ​ຕີນ​ຂາດຈົນ​ເກີດ​ສົງ​ຄາມຢູ່​ບັນ​ດາ​ປະ​ເທດ​ທີ່​ເປັນ​ເຈົ້າ​ຂອງ​ນ້ຳ​ມັນ​ນັ້ນ​ບໍ່​ເລີກ​ລາ​ຈັກ​ເທື່ອ, ນອກນັ້ນ ກໍ​ຍ້ອນ​ບັນ​ດາ​ຫົວ​ໂປ່​ໃຫຍ່ທາງດ້ານອຸດສາຫະກຳທີ່​ເປັນ​ກ້າງ​ຂວາງ​ຄໍໃນ​ການ​ເຈ​ລະ​ຈາເພື່ອ​ການ​ຫລຸດ​ຜ່ອນ​ການ​ປ່ອຍອາຍ​ກາກ​ໂບ​ນິກຂອງ​ໂລກທີ່​ເຮັດ​ໃຫ້​ດິນ​ຟ້າ​ອາ​ກາດ ມີ​ການ​ປ່ຽນ​ແປງ​ຄື​ທຸກມື້ນີ້ ໂດຍ​ການຫລຸດ​ຜ່ອນ​ການ​ບໍ​ລິ​ໂພກ​ນ້ຳ​ມັນ​ເຊື້ອ​ໄຟ​ລົງ ​ແຕ່​ຊູ​ແອັດ​ໄດ້​ສະ​ແດງ​ໃຫ້​ເຫັນບາດ​ກ້າວ​ອັນ​ສຳ​ຄັນທີ່​ອາດ​ເປັນ​ແວ່ນ​ແຍງແກ່​ບັນ​ດາ​ປະ​ເທດ​ອຸດ​ສາ​ຫະ​ກຳ​ອື່ນໆ​ໄດ້ ເພື່ອ​ການ​ສ້າງ​ພະ​ລັງ​ງານ​ທີ່​ຍືນ​ຍົງ​​

ບໍ່​ພຽງ​ແຕ່ ບັນ​ດາ​ປະ​ເທດ​ອຸດ​ສາ​ຫະ​ກຳ​ທີ່​ຄວນ​ຫັນ​ເອົາ ຊູ​ແອັດ​ເປັນ​ແບບ​ຢ່າງ ແຕ່​ກະ​ໂຕ ບັນ​ດາ​ປະ​ເທດ​ກຳ​ລັງ​ພັດ​ທະ​ນາ ທີ່​​ໃຊ້ຈຳ​ນວນ​ເງິນ​ອັນ​ມະ​ຫາ​ສານ​ຂອງ​ຕົນ​ທີ່​ໄດ້​ຈາກ​ການ​ຂາຍ​ຊັບ​ພະ​ຍາ​ກອນ​ທຳ​ມະ​ຊາດ​ແຕ່​ລະ​ປີ​ ເພື່ອ​ນຳ​ເຂົ້າ​ນຳ​ມັນ​ເຊື້ອ​ໄຟ​ນັ້ນ ຄວນຫັນ​ມາ​ລົງ​ທຶນ​ໃສ່​ພະ​ລັງ​ງານ​ສະ​ອາດ​ໃຫ້​ຫລາຍ​ຂຶ້ນ. ໃນ​ບັນ​ດາ​ປະ​ເທດ​ກຳ​ລັງ​ພັດ​ທະ​ນານັ້ນ ສ​ປ ຈີນ ຖື​ວ່າ​​ກຳ​ລັງເອົາ​ການ​ເອົາ​ງານ​ກັບ​ການ​ລົງ​ທຶນ​ໃສ່​ພະ​ລັງ​ງານ​ທີ່​ສະ​ອາດນີ້ ຢ່າງ​ເຂັ້ມ​ແຂງ, ພ້ອມນັ້ນ ມັນ​ກໍ​ເປັນ​ບາດ​ກ້າວ​ສຳ​ຄັນ ທີ່ລັດ​ຖະ​ບານ ສ​ປ​ປ​ລາວ ເຮົາ​ໄດ້​ອະ​ນຸ​ມັດ​ໃຫ້ ນັກ​ລົງ​ທຶນ​ຈາກ​ຕ່າງປະເທດ ເພື່ອ​ເຂົ້າ​ມາ​ພັດ​ທະ​ນາ ການ​ລົ​ງ​ທຶນ​ດ້ານ​ພະ​ລັງ​ງານ​ຈາກ​ລົມຢູ່​ພາກ​ໃຕ້​ຂອງ​ລາວ. ແນ່ນອນ​ທີ່​ສຸດ ການ​ລົງ​ທຶນ​ໃສ່​ພະ​ລັງ​ງານ​ທົດ​ແທນ ຫລື ພະ​ລັງ​ງານ​ສະ​ອາດນີ້ມັນ​ຈະ​ກາຍ​ເປັນ​ແກ່ນ​ສານອັນ​ສຳ​ຄັນ ເພື່ອ​ການ​ພັດ​ທະ​ນາ​ທີ່​ຍືນ​ຍົງ ແລະ​ຄວາມ​ຮັ່ງ​ມີ​ເຂັ້ມ​ແຂງ​ຂອງ​ຊາດໃນອະນາຄົດ​ໄດ້.

error: Content is protected !!