ອອກ​ພັນ​ສາ​ບັດ​ເຊີນ​ໄຫລ​ມາ​ງານ​ວິວາ​ຟົດຟື້ນ

ອອກ​ພັນ​ສາ​ບັດ​ເຊີນ​ໄຫລ​ມາ​ງານ​ວິວາ​ຟົດຟື້ນ - advert banner 728 90 728x90 - ອອກ​ພັນ​ສາ​ບັດ​ເຊີນ​ໄຫລ​ມາ​ງານ​ວິວາ​ຟົດຟື້ນ

​ໂດຍ: ທິດ​ກ່ຳ

ອອກ​ພັນ​ສາ​ບັດ​ເຊີນ​ໄຫລ​ມາ​ງານ​ວິວາ​ຟົດຟື້ນ - new3 - ອອກ​ພັນ​ສາ​ບັດ​ເຊີນ​ໄຫລ​ມາ​ງານ​ວິວາ​ຟົດຟື້ນ

ຕາມວິຖີຊີວິດວັດທະນະທຳຂອງຊາວລາວເຮົາບໍ່ວ່າ: ຊົນເຜົ່າໃດເມື່ອເຖິງຍາມ ອອກພັນສາແລ້ວນອກ ຈາກງານບຸນປະເພນີຕ່າງໆຕາມເດືອນຕາມປີຂອງຊົນເຜົ່າຕົນແລ້ວປະເພນີອັນສຳຄັນອີກອັນໜຶ່ງກໍແມ່ນງານ ວິວາມະຫະມຸງຄຸນ ຫລື ງານສ້າງຄອບຄົວໃໝ່ລະຫວ່າງຄູ່ບ່າວສາວທີ່ມັກຮັກກັນມາເປັນເວລາອັນສົນຄວນຈຶ່ງໄດ້ຕົກລົງປົງໃຈກັນສ້າງຄອບຄົວຕາມຮີດຄອງປະເພນີທີ່ດີງາມ.

ເວົ້າເຖິງການແຕ່ງດອງ ໃນຍຸກສະໄໝນີ້, ຕໍ່ຜູ້ມີຖານະ ປານກາງ ແລະ ທຸກຍາກແດ່ ກໍເຮັດໄປຕາມຖານະ ແລະ ເງື່ອນໄຂ, ຕາມໄດ້ຕາມມີຕໍ່ຜູ້ ທີ່ມີຖານະດີແດ່ເພິ່ນກໍຈັດຂຶ້ນຢ່າງໃຫຍ່ໂຕມະໂຫຖານ, ເລື່ອງເງິນຄ່າແກ່ວສິນດອງ ກໍເປັນຮ້ອຍລ້ານພັນລ້ານ, ຍັງບໍເວົ້າເຖິງວັດຖຸສິ່ງຂອງຕ່າງໆ, ການຈັດງານລ້ຽງກໍຢູ່ພັດຕະຄານຫລູຫລາມີມະໂຫລີດົນຕຣີເສບເພື່ອໃຫ້ ສົມກັບຖານະຕຳແໜ່ງຄວາມຮັ່ງຄວາມມີໃນສັງຄົມຍຸກພັດທະນາ.

ເມື່ອຕັ້ງໂຈດກັນວ່າ ເປັນຫຍັງຄົນລາວເຮົາ ຈຶ່ງພາກັນ ມັກຈັດງານດອງນັບແຕ່ຄ່າ ອອກພັນສາເປັນຕົ້ນໄປ? ຄຳ ຕອບກໍເພາະວ່າຍາມນີ້ເປັນຍາມທ້າຍຝົນຕົ້ນໜາວ, ຍາມ ເຂົ້າໃໝ່ປາມັນ, ຜົວເມຍເອົາ ກັນກໍມີຄວາມສຸກ, ມີໂຊກມີ ລາບວ່າຊັ້ນ! ນອກຈາກນັ້ນ, ຍາມນີ້ພັດເປັນຍາມເກັບກູ້ ຜົນຜະລິດ, ອຸດົມສົມບູນໄປ ດ້ວຍເຂົ້າປາອາຫານບໍ່ອຶດບໍ່ ຢາກ, ຕ້ອງການຫຍັງ ກໍຊອກມາໄດ້ເພາະເປັນຍາມແລ້ງ ໂດຍສະເພາະເດືອນສິບເອັດ, ສິບສອງ, ເດືອນຍີ່ເດືອນ ຈຽງເປັນຊ່ວງຍາມໜາວກອດສາວກໍອົບອຸ່ນເສົ່າວ່າ! ສິ່ງທີ່ກ່າວມານີ້ ກາຍເປັນປະເພນີວັດທະນະທຳນອນຢູ່ໃນຮີດສິບສອງຄອງສິບສີ່, ຮີດ ຍີ່ຄອງຈຽງຕາມບູຮານເພິ່ນບັນຍັດໄວ້.

ສະໄໝກ່ອນປະເທດ ຊາດບ້ານເມືອງຂອງພວກ ເຮົາບໍ່ທັນມີຄວາມຈະເລີນຮຸ່ງເຮືອງການແຕ່ງດອງເອົາກັນມີແຕ່ເພິ່ງຕົນເອງກຸ້ມຕົນເອງ ໃນທຸກດ້ານ. ຕົວຢ່າງເຄື່ອງ ບ່ອນ ຢູ່ບ່ອນນອນ, ເສື້ອສາດ ອາດສະນະກໍຕ້ອງໄດ້ຕ່ຳເອົາເອງ, ເຮັດເອົາເອງເພາະບ່ອນ ຊື້ບ່ອນຂາຍມີຈຳກັດທັງຫ່າງໄກສອກຫລີກ.

ອາຫານການກິນລ້ຽງ ແຂກຄົນເປັນໝູເຫັດເປັດໄກ່, ງົວຄວາຍກໍລ້ຽງເອົາໄວ້ ຈົນຮອດມື້ແຕ່ງດອງຈຶ່ງເອົາມາຂ້າຕ້ອນຮັບຂັບສູ່ແຂກຜູ້ມີຫລາຍມີໜ້ອຍ, ເຫລົ້າໄຫ ໄກ່ໂຕ, ເຫລົ້າກ້ອງໄຂ່ໜ່ວຍ, ຜູ້ມີໜ້ອຍກິນໜ້ອຍ, ຜູ້ມີຫລາຍກິນຫລາຍຂ້າງົວ, ຂ້າຄວາຍຕາຍ ເປັນສອງເປັນ ສາມແຂກໄປໄທມາກໍຍົກຍໍ ຍື່ນເປັນພາມາຕ້ອນຮັບຂັບສູ່ໝົດເຫລົ້າຫ້າໄຫ, ໝົດໝູເຫັດ ເປັດໄກ່ເປັນສິບເປັນຊາວ, ງົວ ຄວາຍກໍຂ້າໄປຕິກໆຈົນໝົດ ແຂກຄົນຍາດຕິພີ່ນ້ອງ ຈຶ່ງຖືວ່າບໍລະບວນ. ປະເພນີການ ແຕ່ງດອງແບບນີ້ກາຍເປັນ ມູນເຊື້ອສືບທອດກັນມາ ແລະ ພັດທະນາປ່ຽນແປງໄປຕາມ ສະໄໝຈົນຜອງເທົ່າທຸກວັນນີ້.

ພໍຕົກມາເຖິງສະພາບ ບ້ານເມືອງເຮົາມີຄວາມຈະ ເລີນຮຸ່ງເຮືອງປະເພນີງານ ດອງກໍຍັງເປັນລັກສະນະສືບທອດກັນມາ, ແຕ່ມີຫລາຍ ທ້ອງຖິ່ນກໍເຫັນວ່າມີການ ປ່ຽນແປງ ແລະ ພັດທະນາ ໃຫ້ມີສີສັນ ແລະ ມີຄວາມ ໝາຍຫລາຍຂຶ້ນ.

ປະເພນີການສ້າງຄອບຄົວໃໝ່ສະໄໝນີ້ໄດ້ພັດທະນາຂຶ້ນ ໂດຍສະເພາະມີບັດເຊີນ ເພື່ອນມິດແຂກຄົນທີ່ຢູ່ໄກ້  ແລະ ໄກ, ມີງານລ້ຽງສັງສັນ ຮັບຮອງ, ມີມ່ວນຊື່ນລື້ນເລີງ ຟ້ອນລຳວົງສາມັກຄີສັງສັນ ກັນຕາມອັດທະຍາໄສ.

ອອກ​ພັນ​ສາ​ບັດ​ເຊີນ​ໄຫລ​ມາ​ງານ​ວິວາ​ຟົດຟື້ນ - lattana 1 - ອອກ​ພັນ​ສາ​ບັດ​ເຊີນ​ໄຫລ​ມາ​ງານ​ວິວາ​ຟົດຟື້ນ

ແນວໃດກໍຕາມ, ສຳລັບ ປະເພນີງານດອງສະໄໝນີ້ບໍ່ວ່າ: ຢູ່ທ້ອງຖິ່ນໃດກໍຕາມ ເກືອບທຸກບ່ອນອຳນາດການປົກຄອງການຈັດຕັ້ງເບື້ອງ ພັກລັດມີສ່ວນຮ່ວມຮັບຮູ້ນຳ ຢ່າງເປັນທາງການນັບແຕ່ເຮັດບົດບັນທຶກການສູ້ຂໍ, ການຮັບຮອງດ້ານກົດໝາຍມີການລົງທະບຽນ, ມີໃບອະນຸຍາດແຕ່ງດອງຄັກແນ່ ເຊິ່ງອອກໃຫ້ໂດຍຂະແໜງພາຍໃນຫລືທ່ານເຈົ້າເມືອງທີ່ຕົນຂຶ້ນກັບ.

ຮອດມື້ແຕ່ງແປງມາ ການຈັດຕັ້ງຍັງໄດ້ເຂົ້າຮ່ວມ ຮັບຮູ້ອ່ານໃບອະນຸມັດສ້າງ ຄອບຄົວຢັ້ງຢືນເປັນທາງ ການ. ນີ້ຄືສິ່ງທີ່ດີເລີດປະເສີດ ສີຂອງການສ້າງຄອບຄົວໃໝ່ໃນຍຸກສັງຄົມ ນິຍົມ.

ເຖິງຢ່າງໃດກໍດີ, ອີງຕາມ ແນວທາງນະໂຍບາຍຂອງພັກ ແລະ ລັດຖະບານການສ້າງຄອບຄົວໃໝ່ ຫລື ວ່າ ການແຕ່ງດອງແມ່ນໃຫ້ເຮັດຕາມຮີດຄອງປະເພນີອັນດີງາມຂອງຊາດ. ສົ່ງເສີມຈຸດດີ, ຕີຖອຍຈຸດອ່ອນ, ຖືເປັນຊີວິດວັດທະນະທຳອັນໜຶ່ງ ຂອງຊາດລາວ.

ແຕ່ສິ່ງສຳຄັນແມ່ນຕ້ອງປະຢັດມັດທະຍັດບາງຄົນ ຢາກໄດ້ໜ້າໄດ້ຕາຈັດງານດອງຍິ່ງໃຫຍ່ສຸດທ້າຍມາເປັນໜີ້ໃຊ້ສາມປີບໍ່ຫັນໝົດ, ບາງລາຍສ້າງຄອບຄົວນຳກັນໄປແລ້ວບໍ່ທັນພໍປີພໍເດືອນເກີດ ຜິດຖຽງເບື່ອໜ່າຍຢ່າຮ້າງກັນແບບງ່າຍດາຍຍ້ອນສັງ ຄົມຍຸກນີ້ ມີຫລາຍອັນຫລາຍ ຢ່າງມາກະທົບ.

ສຳລັບໝູ່ເພື່ອນສະຫາຍຫລາຍຄົນກໍອາດເປັນເໝືອນກັນຄືຫລັງຈາກອອກພັນສາ ໄປ ແລ້ວແຕ່ລະອາທິດຊອງບັດເຊີນບຸນແອວໄຫລມາເປັນສີ່ເປັນຫ້າແຕ່ກໍຕ້ອງໄດ້ແບ່ງນ້ຳໃຈເພື່ອຄວາມຮັກຄວາມສາມັກຄີເພື່ອໝູ່ເພື່ອເຮົານັ້ນລະຄືສິ່ງສຸດຍອດແບບຍືນຍົງຄົງກະພັນ./.

ອອກ​ພັນ​ສາ​ບັດ​ເຊີນ​ໄຫລ​ມາ​ງານ​ວິວາ​ຟົດຟື້ນ - 22568 - ອອກ​ພັນ​ສາ​ບັດ​ເຊີນ​ໄຫລ​ມາ​ງານ​ວິວາ​ຟົດຟື້ນ
(ພາບປະກອບ)

error: Content is protected !!