ສຸຂະພາບ​ລົດ ສຸຂະພາບ​ຄົນ

ສຸຂະພາບ​ລົດ ສຸຂະພາບ​ຄົນ - advert banner 728 90 728x90 - ສຸຂະພາບ​ລົດ ສຸຂະພາບ​ຄົນ

​ໂດຍ: ບັນຫາ​ຈານ​ແຫຍ່

ສຸຂະພາບ​ລົດ ສຸຂະພາບ​ຄົນ - new3 - ສຸຂະພາບ​ລົດ ສຸຂະພາບ​ຄົນ

ບັນຫາ​ທີ່​ຂໍ​ເວົ້າກັບ​ບັນດາ​ຊູ້​ຂອງ​ຄໍ​ລຳ ບັນຫາຈານແຫຍ່​” ​ໃນ​ມື້ນີ້ ​ເປັນ​ເລື່ອງ​ສ່ວນຕົວ   ​ແຕ່​ກໍ​ເຊື່ຶອວ່າ​ຄົນ​ທົ່ວ​ໄປ​ຄົງ​ມີ​ຄວາມ​ສົ​ນ​ໃຈ​ ເພາະ​ມັນ​ກ່ຽວ​ກັບ​ສຸຂະພາບ ​ແລະ ຊີວິດ ​ທີ່​ບໍ່​ມີ​ບ່ອນ​ຂາຍ ​ບ່ອນ​ຊື້ ຄື​ສິນຄ້າ​ທົ່ວໆ​ໄປ​ໃນ​ຕະຫລາດ.

ຈຳ​​ໄດ້​ວ່າ​ເມື່ອ​ອາຍຸຍ່າງ​ເຂົ້າຫລັກ 5, ຈານ​ແຫຍ່​ໄດ້​ຕັ້ງສັດຈະ​ວ່າ​ຈາ​ໄວ້​ກັບ​ຕົນ​ເອງ​ວ່າ: ຈະ​ກວດ​ສຸຂະພາບ​ປະຈຳ​ປີ​ບໍ່​ໃຫ້​ຂາດ ​ແລະ ຈະ​ຄ່ອຍກ້າວຈາກ​ກວດ​ປະຈຳ​ປີ​ເປັນ​ກວດ​ປະຈຳ​ 6 ​ເດືອນ. ​ແຕ່​ແລ້ວ​ອອກປາກ​ສັນຍານ້ຳລາຍ​ບໍ່​ທັນ​ແຫ້ງ ​ກໍ​ມີ​ການ​ລະ​​ເມີດ​ແລ້ວ. ມາ​ຮອດ​ປັດຈຸບັນ​ ຈານ​ແຫຍ່​ລອງ​ນັບ​ຂໍ້ມື​ເບິ່ງ​ກໍ​ພົບ​ວ່າ​ໄດ້​ກວດ​ພະຍາດ​ມາ​ທັງ​ໝົດ​ບໍ່​ເກີນ 5 ຄັ້ງ ທັງໆທີ່​ອາຍຸ​ຫຍັບ​ໃກ້​ຫລັກ 7 ພໍ​ແຮງ​ແລ້ວ.

​        ເຫດ​ໃດ​ຈິ່ງ​ປະຕິບັດ​ບໍ່ໄດ້? ນີ້​ຄື​ຄຳ​ຖາມ​ທີ່​ຈານ​ແຫຍ່​ຖາມ​ຕົນ​ເອງ ​ແລະ ຂໍ​ຖາມ​ເພື່ອນ​ຜູ້​ອ່ານ ​ເພາະ​ຢາກ​ຮູ້​ວ່າ: ຄົນ​ອື່ນ​ເປັນ​ຄື​ຈານ​ແຫຍ່ ຫລື ບໍ່?. ​ໃນ​ໄລຍະ​ຜ່ານ​ມາ, ຈານ​ແຫຍ່​ເຄີຍ​ຖາມ​ຫລາຍໆຄົນ​ກ່ຽວ​ກັບ​ການ​ກວດ​ສຸຂະພາບ​ປະຈຳ​ປີ.

ຄຳ​ຕອບ​ທີ່​ໄດ້​ຮັບ​ນັ້ນປະມານ 70% ບອກ​ວ່າ: “​ເຮັດ​ບໍ່​ເປັນ​ປົກກະຕິ” ​ແລະ ມີ​ຈຳນວນ​ບໍ່​ໜ້ອຍ​ຕອບ​ວ່າ ບໍ່​ເຄີຍ​ກວດ​ເພາະ​ບໍ່​ເຫັນ​ມີ​ຄວາມ​ຈຳ​ເປັນ, ບໍ່​ເຈັບ​ບໍ່​ເປັນ​ເຫດ​ໃດ​ຈະ​ຕ້ອງ​ໄປກວດ?. ມີ​ບາງ​ຄົນ​ຕອບ​ວ່າ​ບໍ່​ກ້າ​ໄປ​ກວດ​ຍ້ອນ “ຢ້ານ​ເຫັນ….!”  ​ແລ້ວ​ຈະ​ເຮັດ​ໃຫ້​ທຸກ​ໃຈ, ພາ​ໃຫ້​ເກີດ​ພະຍາດ​ຊ້ຳ. ມີ​ບາງ​ຄົນ​ບອກ​ວ່າການ​ໄປ​ກວດ​ສຸຂະພາບ​ປະຈຳ​ປີນັ້ນບໍ່​ຕ່າງ​ຫຍັງ​ກັບ “​ແກ່ວ​ງຕີນ​ຫາ​ສ້ຽນ” ຊອກ​ຫາ​ແນວ​ຮ້າຍ​ໃສ່​ຕົນ​ເອງ.

​        ເມື່ອ​ໄດ້​ຢືນ​ຄຳ​ຕອບ​ແບບ​ນີ້, ຈານແຫຍ່ ​ເອງ​ກໍ​ອຸ່ນ​ໃຈ (​ເພາະ​ບໍ່​ຍາກ​ໄປ​ກວດ!). ຈານ​ແຫຍ່​ຈຳ​​ໄດ້​ວ່າ ​ເຄີຍ​ໄດ້​ກວດ​ເລືອດ​​ເພື່ອ​ເບິ່ງ​ທາດ​ນ້ຳຕານ ​ແລະ ​ໄຂມັນ​ຄັ້ງຫລ້າ​ສຸດ ​ເມື່ອເກືອບ 3 ປີຜ່ານ​ມາ, ​ເຊິ່ງຜົນ​ອອກ​ມານັ້ນຟັງ​ບໍ່​ມ່ວນ​ຫູ​ປານ​ໃດຄື​ ໄຂມັນ​ຂຶ້ນສູງ, ຕັບ​ເລີ່​ ອ່ອນ​ແອ, ໝາກ​ໄຂ່ຫລັງ​ມີ​ສັນຍານ​ບໍ່​ດີ.

    ຜົນ​ການ​ກວດຄັ້ງນັ້ນ​, ເຮັດ​ໃຫ້​ຈານ​ແຫຍ່​ເຫງົາ​ເປັນ​ເວລາ​ຫລາຍ​ເດືອນ​ ແລ້ວຈຶ່ງ​ຕັດສິນ​ໃຈ​ວ່າ: ຈະ​ບໍ່“​ແກ່ວ​ງຕີນ​ຫາ​ສ້ຽນ” ອີກ.

   ນີ້​ລະ​ທີ່​ເປັນສາ​ເຫດ​ໃຫ້​ຈານ​ແຫຍ່​ງົດ​ການກວດ​ສຸຂະພາບ​ປະຈຳ​ປີ​ມາ​ເປັນ​ເວລາ​ດົນ ທີ່​ເອີ້ນວ່າ: ກວດ​ສຸຂະພາບ​ປະຈຳ​ປີນັ້ນ ຈານ​ແຫຍ່ ໝາຍ​ເຖິງ​ການກວດ​ເລືອດ​ເທົ່າ​ນັ້ນ ບໍ່​ໄດ້​ກວດ​ຄົບ​ຊຸດ​ຄື​ຫລາຍ​ຄົນ​ເຮັດ.

ສຸຂະພາບ​ລົດ ສຸຂະພາບ​ຄົນ - lattana 1 - ສຸຂະພາບ​ລົດ ສຸຂະພາບ​ຄົນ

   ບ​າດ​ແລ້ວ​ໃນຕົ້ນ​ເດືອນ​ຕຸລາ​ປີ​ນີ້ ບໍ່​ຮູ້​ວ່າ​ເປັນ​ຫຍັງ​ຈິ່ງ​ປວດ​ຢາກ​ກວດ​ສຸຂະພາບ​ປະຈຳ​ປີ​ຂຶ້ນມາ, ກໍ​ເລີຍ​ເຂົ້າ​ໄປ​ຄລິ​ນິກ​ແຫ່ງ​ໜຶ່ງ ​ແລະ ນັດ​ກວດ​ເລືອດ​ກັບທ່ານໝໍ ​ແຕ່​​ເນັ້ນ​ແລ້ວ​ເນັ້ນອີກ​ວ່າ: ຢາກ​ຮູ້​ເລື່ອງ​ທາດ​ນ້ຳຕານ ​ແລະ ​ໄຂມັນ​ເທົ່າ​ນັ້ນ ​ເລື່ອງ​ອື່ນ​ບໍ່​ກ່ຽວ!.

    ທ່ານໝໍ ຍິ້ມ​ແບບ​ຮູ້​ໃຈ​ແຕ່​ກໍ​ບອກ​ວ່າ “ອາຍຸ​ສ່ຳ​ລຸງ​ຄວນ​ເບິ່ງ​ທຸກ​ຢ່າງ​ທີ່​ເລືອດ​ສາມາດ​ບົ່ງ​ບອກ​ໄດ້” ຈານ​ແຫຍ່​ແກວ່ງຫົວ​ປະຕິ​ເສດ (ຍ້ອນ​ຢ້ານ​ເຫັນ…!) ສຸດ​ທ້າຍ​ກໍ​ຮອດ​ເວລານັດ​ເອົາ​ຜົນກວດ ​ແລະ ຮູ້​ວ່າທ່ານໝໍ​ຄົນ​ນີ້​ດື້​ເຮັດ​ແບບ​ຫົວລ້ານ​ລື່ນ​ຄູ ຄືກ​ວດ​ຮອດ 16 ພະຍາດ.

   ຈານ​ແຫຍ່ ຫລັບຕາ​ຟັງທ່ານໝໍ​ອະທິ​ບາຍ​ກ່ຽວ​ກັບ​ແຕ່​ຜົນ​ກວດ​ຈົນ​ສຸດ (ຊາ​ໃຈ​ຢາກ ອັດ​ຮອດ​ຫູ​ພຸ້ນ​ລະ).

   ທ່ານໝໍ ​ເວົ້າປິດ​ທ້າຍ​ວ່າ: “​ຄົນ​ເຮົາ​ບໍ່​ຮູ້​ວ່າ​ເປັນ​ຫຍັງ ​ສົນ​ໃຈສຸຂະພາບ​ລົດ​ຫລາຍ​ກວ່າ​ສຸຂະພາບ​ຕົນ​ເອງ, ພໍ​ລົດ​ເກີດ​ຕິດ​ຂັດ ຫລື ມີ​ສຽງ​ດັງ​ຄ໋ອກ​ແຄ໋ກ ຜິດ​ປົກກະຕິ ​ກໍ​ຮີບ​ເອົາ​​ເຂົ້າອູ່​ສ້ອມ​ແປງ, ​ແຕ່​ສຸຂະພາບ​ຕົນ​ເອງ​ພັດ​ແນມ​ກາຍ​ ລໍຖ້າ​ເຈັບໜັກໆຈຶ່ງ​ເຂົ້າອູ່ (​ໂຮງໝໍ) ຂໍ​ໃຫ້​ຈຳ​ໄວ້​ວ່າ: ລົດ​ຕາຍ​ແປງ​ໃຫ້​ດີ​ໄດ້ ຄົນ​ນັ້ນຖ້າ​ຕາຍ​ແລ້ວ​ຕາຍ​ເລີຍ​ເນີ​ລຸງ​ເອີຍ”.

   ຈານ​​ແຫຍ່ ຍ່າງ​ອອກ​ຈາກ​ຄ​ລິ​ນິກ ດ້ວຍ​ຮອຍ​ຍິ້ມບາງໆ​ແຕ່​ໜັກ​ແໜ້ນ ​ແລະ ​ໄດ້​ສັນຍາ​ກັບ​ຕົນ​ເອງ​ວ່າ: ​ແຕ່​ນີ້​ເມື່ອ​ໜ້າ​ສຸຂະພາບ​ຂອງ​ຕົນ​ເອງ​ຈະ​ມາ​ກ່ອນ​ສຸຂະພາບ​ຂອງ​ລົດ!.

ສຸຂະພາບ​ລົດ ສຸຂະພາບ​ຄົນ - 1147 - ສຸຂະພາບ​ລົດ ສຸຂະພາບ​ຄົນ
(ພາບປະກອບ)

error: Content is protected !!