ປູກໃຫ້ເປັນປ່າປົກປັກຮັກສາໃຫ້ເປັນດົງ

- Untitled design - ປູກໃຫ້ເປັນປ່າປົກປັກຮັກສາໃຫ້ເປັນດົງ

- Untitled 1 2 - ປູກໃຫ້ເປັນປ່າປົກປັກຮັກສາໃຫ້ເປັນດົງ

 

ໂດຍ: ກ້ອງສ່ອງ ອິດສະຫລະ

ວັນ​ທີ 1 ມິຖຸນາ​ທີ່​ຈະ​​ເຖິງ​ນີ້ ​ເປັນ​ວັນ​ເດັກນ້ອຍ​ສາກົນ ​ແລະ ​ທັງ​ເປັນ​ວັນ​ປູ​ກຕົ້ນ​ໄມ້​ແຫ່ງ​ຊາດ. ຕາມ​ປົກກະຕິ​ແລ້ວ, ຊາ​ເຮົ​າ​ເຫັນ​ໃນ​ແຕ່ລະ​ປີ​ຜ່ານ​ມາ ບໍ່​ວ່າ​ຢູ່ຂັ້ນ​ສູນ​ກາງ​ ແລະ ​ທ້ອງ​ຖິ່ນຕ່າງ​ກໍ​ພາກັນ​ແຫ່​ແຫນ​ໄປ​ປູກ​ຕົ້ນ​ໄມ້ຢ່າງ​ເປັນ​ຂະ​ບວນຟົດ​ຟື້ນ,​ ສ່ວນວ່າ​ເມື່ອ​ປູກ​ໄປ​ແລ້ວ​ມາ​ຮອດ​ປັດ​ຈຸ​ບັນ​ຕາຍ​ໄປ​ແລ້ວ​ຈັກ​ຕົ້ນ, ຍັງ​​ຈັກ​ຕົ້ນ,​ ໃຫຍ່​ຂຶ້ນ​ຊໍ່າ​ໃດ​ແລ້ວ ​ແລະ ​ມີ​ຈັກ​ບ່ອນ​ມັນ​ໄດ້ກາຍ​ເປັນ​ປ່າ​ເປັນ​ດົງ​ໃຫ້​ເຮົາ​ເຫັນ​ປະຈັກ​ຕາ​ນັ້ນ, ຜູ້​ຂຽນ​ກໍ​ບໍ່​ທັນ​ມີ​ຂໍ້​ມູນ​ລະອຽດ​ມາ​ເວົ້າສູ່​​ຟັງ. ​ແຕ່​ກໍ​ເຫັນ​ວ່າໃນ​ຕົວຈິງ​ແລ້ວ, ​ຊາ​ເຮົາ​ໄດ້​ຂຶ້ນ​ເໜືອ​ລ່ອງ​ໃຕ້​​​​ໄດ້​ເຫັນຫລາຍ​ໝ້ອງຫລາຍທ້ອງ​ຖິ່ນກໍ​ພໍ​ເຫັນ​ປ່າ​ປູກຫລາຍ​ບ່ອນເຊັ່ນ: ​ເຫັນ​ປ່າ​ໄມ້​ສັກ, ​ສວນຢາງພາລາ​ກວ້າງ​ສຸດ​ສາຍຕາ, ​ເຫັນ​ປ່າ​ໄມ້​ວິກ, ສ່ວນ​ປ່າ​ໄມ້​ແຄນ, ​ໄມ້​ດູ່, ​ຂະຍຸງ, ​​​ແຕ້​ຂ່າ ຫລື ​ໄມ້​ຊະນິດ​ອື່ນໆ​ທີ່​ມີ​ລາຄາ​ແພງ​​ນັ້ນ​ບໍ່​ຄ່ອຍ​ປາກົດ​ເຫັນ, ສ່ວນຫລາຍ​​ແມ່ນ​ເຮົາ​ເຫັນ​ແຕ່​ພາກັນ​ໄປ​ລັກ​ຕັດຫລາຍກວ່າ. ​ຍິ່ງ​ໄປກວ່າ​ນັ້ນ, ເມື່ອ​ຕັດ​ເອົາ​ຕົ້ນ​ມັນໄປ​ແລ້ວ​ຍັງ​ຂຸດ​ກົ່ນ​ເອົາ​ຮາກຂອງ​ມັນ​ໄປ​ຢ່າງ​ບໍ່ໃຫ້​ເຫລືອ. ​ໃນ​ຈໍານວນ​ໄມ້​ດີໆ​ທີ່​ວ່າ​ມາ​ນີ້​ສ່ວນຫລາຍເຮົາມັກ​ເຫັນ​​ແຕ່ຢູ່​ໃນ​ສວນຂອງ​ບຸກຄົນ​, ຂອງໝູ່​ເພື່ອນ​ສະຫາຍ ຫລື ​ສວນເຈົ້າ​ສວນ​ນາຍ​ທີ່​ເພິ່ນ​ປູກ​ເອງ, ບົວລະບັດ​ເອົາ​​ເອງ​ແມ່ນ​ໄດ້​ໝາກ​ໄດ້ຜົນ​ ແລະ ​ງາມຄື​ດັ່ງ​ວ່າ​ອີ່ຫລີ. ສ່ວນວ່າ​ບ່ອນ​ໃດ​ທີ່​ເປັນ​ດິນ​ສາທາລະນະ, ດິນ​ສ່ວນ​ລວມ ຫລື ​ເຂດ​ປ່າ​ສະຫງວນ​ນັ້ນ​ຄື​ວ່າ​ມັນ​ຢ້ຳ​ເທົ້າ ຫລື ​ເບິ່ງ​ຢ່າງ​ໜຶ່ງ​ຄື​ວ່າ​ມັນ​ນັບມື້ກຸດຫ້ຽນ​ໄປ​ຊັກ​ໄຊ້. ​ສະ​ໄໝ​ຊຸມປີ 1986 ​ຜູ້​ຂຽນ​ເຄີຍ​ໄດ້ຮ່ວມ​ກັບຂະ​ບວນການ​ຂອງ​ສູນ​ກາງ​ຊາວ​ໜຸ່ມພາກັນໄປ​ປູກ​ຕົ້ນ​ໄມ້​ຢູ່​ແຖວ​ສະຖານີຫລັກ 48-49 ​ໄປ​ເບິ່ງ​ດຽວ​ນີ້​ເປັນ​ບ້ານ​ປະຊາຊົນເຕັມ​​ໝົດ​ແລ້ວ. ຕົ້ນ​ທີ່​ເຄີຍ​ປູກ​ນັ້ນ​ກໍ​ບໍ່​ເຫັນ​ຈັກຕົ້ນ ​ແລະ ​ຢູ່ບ່ອນ​ອື່ນໆ​ຈໍານວນ​ບໍ່​ໜ້ອຍ​ມັນກໍ​ເປັນ​ລັກສະນະ​ຄ້າຍໆ​ຄື​ກັນ.

 

ຕາມ​ເຮົາ​ຄິດ, ກ່ຽວ​ກັບ​ການ​ປູກ​ຕົ້ນ​ໄມ້​​ໃນ​ແຕ່ລະ​ປີ​ນັ້ນ​, ຖ້າ​ເຮົາ​ບໍ່​ພາກັນ​ບົວລະບັດ​ເບິ່ງ​ແຍງ​ອີ່ຫລີ​ອີ່ຫລໍ​ແມ່ນ​ເປັນ​ໄປ​ໄດ້​ຍາກ​ທີ່​ມັນ​ຈະ​ເຕີບ​ໃຫຍ່ຂຶ້ນ​ດ້ວຍ​ທໍາ​ມະຊາດ​ຂອງ​ມັນ​ເອງ​ແລະ ​ອີກ​ປະການ​ໜຶ່ງ​ຢູ່​ບາງ​ບ່ອນ​ບາງ​ທ້ອງ​ຖິ່ນ​ປູກ​ໄປ​ແລ້ວບໍ່​ມີ​ຮົ້ວ​ອ້ອມ​ງົວ​ຄວາຍພາກັນໄປ​ກິນ​ໃບ ຫລື ​ຮຸກ​ຖູ​ຢຽບ​ຢ້ຳຕາຍ​ກ້ຽງ.

- Wave100S AD to Website 2020 0 - ປູກໃຫ້ເປັນປ່າປົກປັກຮັກສາໃຫ້ເປັນດົງ

 

​ເຖິງ​ຢ່າງ​ໃດ​ກໍ​ດີ, ຕາມ​ເຮົາ​ວ່າ​ພວກ​ເຮົາ​ຈະ​ຢູ່​ໃນ​​ເງື່ອນ​ໄຂ ​​ແລະ ​ສະພາບ​ການ​ອັນໃດ​ກໍຕາມ, ຖື​ວ່າ​ການ​ປູກ​ຕົ້ນ​ໄມ້​ໃຫ້​ກາຍເປັນ​ປ່າ​ໃນ​ອະນາ​ຄົດ​ນັ້ນ​ຍັງ​ແມ່ນ​ພັນທະ​ ແລະ ​ແມ່ນ​ພາລະກິດ​ຂອງ​ພວກ​ເຮົາຕະຫລອດ​ໄປ ດັ່ງ​ມະຕິ 10 ຂອງ​ພັກ​ໄດ້​ເວົ້າ​ວ່າ: ​ນັບແຕ່​ນີ້​​ເປັນ​ຕົ້ນ​ໄປຫາ​ປີ 2020 ​ໃຫ້ເນື້ອ​ທີ່​ປ່າ​ກວມ​ຫລາຍກວ່າ 70% ຂອງ​ເນື້ອ​ທີ່​ໃນ​ທົ່ວ​ປະ​ເທດ. ນີ້​ທັງ​​ແມ່ນເປົ້າ​ໝາຍ​ ແລະ ​ຄາດໝາຍ​ທີ່​ພວກ​ເຮົາ​ຈະ​ຕ້ອງ​ໄດ້​ສູ້​ຊົນ. ການ​ປູກ​ຕົ້ນ​ໄມ້​ໃຫ້​ເປັນ​ປ່າ ​ແລະ ​ມີ​ການ​ປົກ​ປັກ​ຮັກສາ​ໃຫ້​ມັນ​ກາຍ​ເປັນ​ດົງ​ໃນ​ອະນາ​ຄົດ​ຍາວ​ນານ​ນັ້ນ​ ຖື​ວ່າ​​ແມ່ນ​ຄວາມ​ຈໍາ​ເປັນ​ຂອງ​ຄົນ​ທົ່ວ​ທັງ​ຊາດ​ ເພາະ​ທຸກ​ສິ່ງ​ທຸກ​ຢ່າງ​ມັນ​ພົວພັນ​ເຖິງ​ສິ່ງ​ແວດ​ລ້ອມ​ອ້ອມ​ຕົວ​ເຮົາ. ​ໃນ​ການ​ດໍາລົງ​ຄົງ​ຕົວ​ຂອງ​ຄົນ​ເຮົາ​ ຖ້າ​ຫາກ​ຢູ່​ກັບ​ຄວາມ​ສົດ​ໃສ​ຂອງ​ທໍາ​ມະ​ຊາດ ​ແລະ ​ສິ່ງ​ແວດ​ລ້ອມ​ແລ້ວ​ອາຍຸ​ກໍ​ຍືນ​ຍາວ, ຊີວິດ​ກໍ​ຍືນ​ຍົງ.

 

ສະ​ນັ້ນ, ການ​ປູກ​ຕົ້ນ​ໄມ້​ໃນ​ແຕ່ລະ​ປີ​ຈຶ່ງ​ຖື​ເປັນ​ພັນທະ​ຕາມ​ກົດໝາຍ​ທີ່​ທຸກ​ຄົນ​ໃນ​ຊາດ​ຕ້ອງ​ມີ​ສ່ວນຮ່ວມ. ​ແຕ່​ເມື່ອ​ປູກ​ໄປແລ້ວອັນ​ສໍາຄັນກວ່າ​ໝູ່​ແມ່ນ​ການ​ປົກ​ປັກສາ​ນັ້ນ​ເປັນ​ຫລັກ​ມັນ​ຈຶ່ງເຕີບໃຫຍ່ ​ແລະ ​ອາ​ໄສ​ວັນ​ເວລາ​ທີ່​ຍາວ​ນານ​ເປັນ​ສາມ​ສີ່​ສິບ​ປີ​ ຫລື ​ເຖິງ​ຂະໜາດ​ອາຍຸ​ຂອງ​ເຊັ່ນ​ຄົນ​ໜຶ່ງ​ມັນ​ຈຶ່ງ​ກາຍ​ເປັນ​ປ່າ​ໃຫ້​ເຮົາ​ເຫັນ. ຕາມ​ເຮົາຄິດ​ໃນ​ການ​ປູກ​ຕົ້ນ​ໄມ້​ແຕ່ລະ​ປີ​ນັ້ນ​ແມ່ນ​ຢາກ​ມອບ​ໃຫ້​ພວກ​ທີ່​ເຮັດ​ທຸລະ​ກິດ​ໄມ້ ຫລື ​ພວກ​ທີ່​ໄປ​ຕັດ​ນັ້ນ​ພາກັນປູກຫລາຍໆ ຍ້ອນ​ວ່າ​ປ່າດົງ​ດິບ​ມັນ​ຈິບຫາຍ​ວາຍ​ວອດ​ຍ້ອນ​ພວກ​ຕັດ​ໄມ້ ​ແລະ ​ຂາຍ​ໄມ້.

- WhatsApp Image 2020 05 27 at 5 - ປູກໃຫ້ເປັນປ່າປົກປັກຮັກສາໃຫ້ເປັນດົງ
- WhatsApp Image 2020 05 27 at 5 - ປູກໃຫ້ເປັນປ່າປົກປັກຮັກສາໃຫ້ເປັນດົງ
error: Alert: ເນື້ອຫາຂ່າວມີລິຂະສິດ !!