ເຮັດໄດ້ແຕ່ບໍ່ໃຊ້ ຂີ້ໄຮ້ຕະຫລອດໄປ

ເຮັດໄດ້ແຕ່ບໍ່ໃຊ້ ຂີ້ໄຮ້ຕະຫລອດໄປ - advert banner 728 90 728x90 - ເຮັດໄດ້ແຕ່ບໍ່ໃຊ້ ຂີ້ໄຮ້ຕະຫລອດໄປ

​​ໂດຍ: ຈານ​ແຫຍ່.
ບົດ​ນີ້, ຈານ​ແຫຍ່​ຂຽນ​ພາຍຫລັງ​ນັ່ງຟັງ​ທ່ານ​ນາຍົກລັດຖະມົນຕີ ທອງ​ລຸນ​ ສີ​ສຸ​ລິດ ລາຍງານ​ຕໍ່​ກອງ​ປະຊຸມ​ສະພາ​ແຫ່ງ​ຊາດ​ໃນ​ຕອນ​ເຊົ້າວັນ​ທີ 7 ພະຈິກ​ນີ້, ​ເຊິ່ງມີ​ຫລາຍ​ເ​ລື່ອງໜ້າ​ສົນ​ໃຈ​ໃຫ້​ຂໍ້​ຄິດ​ທິດ​ທາງ ​ເພື່ອ​ແກ້​ໄຂ​ບັນຫາ​ເສ​ດຖະກິດ​ຂອງ​ບ້ານ​ເຮົາ ​ທ່າມກາງ​ຄວາມຫຍຸ້ງຍາກ​ທີ່​ເກີດ​ຈາກ​ຫລາຍໆສາ​ເຫດ.
ຈຸດ​ທີ່ຈານ​ແຫຍ່ຢາກ​ຍົກ​ມາ​ສົນທະນາ​ພາ​ທີ​ກັບ​ເພື່ອນ​ຂອງ ຄໍ​ລຳ ກໍ​ຄື​ເລື່ອງ​ການ​ສົ່ງ​ເສີມການ​ຜະລິດ​ຕິດ​ພັນ​ກັບ​ສ້າງຄ່າ​ນິຍົມ​ຊົມ​ໃຊ້​ຜະລິດ​ຕະພັນພາຍ​ໃນ​ແທນ​ການ​ນຳ​ເຂົ້າສິ່ງ​ທີ່​ພວກ​ເຮົາ​ເຮັດ​ເອົາ​ເອງ​ໄດ້.
​ ເວົ້າຮອດ​ຈຸດ​ນີ້, ​ຄິດ​ວ່າຫລາຍ​ທ່ານ​ຄົງ​ຈຳ​ຄຳ​ຂວັນ​ທີ່​ເຄີຍ​ຟັງ ​ແລະ ​ເວົ້າ​ໄດ້​ຕິດ​ປາກ​ວ່າ: “ລາວ​ເຮັດ, ​ລາວ​ໃຊ້, ລາວ​ໄດ້, ​ລາວ​ຈະ​ເລີ​ນ” ຄຳ​ຂວັນ​ນີ້​ບໍ່​ຮູ້​ວ່າ​ຂຽນ​ຂຶ້ນ​ໃນ​ເວລາ​ໃດ​, ແຕ່​ຈານ​ແຫຍ່​ໄດ້​ຍິນ​ມາ​ແຕ່​ຫົວ​ຍັງ​ສ່ຳ​ໝາກກອກ​ພຸ້ນ.
ມັນ​ເປັນຄໍາ​ຂວັນ​ທີ່​ມີ​ເນື້ອ​ໃນ​ດີ​ເດັ່ນ, ​ມີ​ສຽງ​ສຳພັດ​ເກາະ​ກ່າຍ​ໃຫ້​ຈື່​ງ່າຍ ​ແຕ່​ການ​ຫັນ​ຄຳ​ຂວັນ​ນີ້​ໃຫ້​ເປັນຄວາມ​ຈິງ​ນັ້ນ ມັນ​ຍາກ​ປານ​ກື່ງ​ຄົກ​ຂຶ້ນຈອມ​ພູ​ເບ້ຍ​ຍ້ອນ​ວ່າ: ພວກ​ເຮົາ​ບໍ່​ມີ​ມາດຕະການ​ຕົວ​ຈິງທີ່​ເຄັ່ງ​ຄັດ​ຮັດ​ແໜ້ນ​ພວກ​ເຮົາ “​ເຢີ​ກ” ​ເປັນ​ຍາມ​ເວລາ​ມີ​ບັນຫາ​​ເທົ່າ​ນັ້ນ.
ການ​ຜະລິດ​ພາຍ​ໃນ, ​ໂດຍ​ສະ​ເພາະ​ສິນຄ້າ​ເພື່ອ​ຊົມ​ໃຊ້​ເກີດ​ສະພາບ​ສະ​ງັກສະງັນ​ຄື​ຊູ່​ມື້ນີ້ ​ກໍ​ຍ້ອນວ່າ: “ລາວ​ເຮັດ,​​ລາວ​ບໍ່​ໃຊ້,​​ ລາວ​ບໍ່​ໄດ້, ​ລາວ​ທຸກ​ຈົນ” ​ແມ່ນ​ບໍ່​ທ່ານ​ວ່າ? ຫວ່າງ​ບໍ່​ເຫິງ​ມາ​ນີ້​ໄດ້​ອ່ານ​ພົບ​ບົດ​ໃນ​ວຽງ​ຈັນທາມ ທີ່​ຍົກ​ຕົວ
ຢ່າງ​ໃຫ້​ເຫັນ​ວ່າ​ພວກ​ເຮົາ​ຍັງ​ເປັນ​ເມືອງ​ຂຶ້ນຕ່າງປະ​ເທດ​ດ້ານ​ສິນຄ້າ​ໃຊ້​ສອຍ​ປະຈຳ​ວັນ​ຍ້ອນ​ຄ່າ​ນິຍົມ​ຜິດພາດ, ບໍ່​ສົ່ງ​ເສີມ​ການ​ໃຊ້ສິນຄ້າ​ພາຍ​ໃນ.
ບົດ​ຄວາມ​ດັ່ງກ່າວ​ໄດ້​ຍົກ​ຕົວຢ່າງ​ໃຫ້​ເຫັນ​ວ່າ: ​ໃນ​ເຂົ້າຂົ້ວໜຶ່ງ​ຈານ (ພາສາ​ໄທເອີ້ນວ່າເຂົ້າຜັດ) ນັ້ນ ມີ​ສ່ວນ​ປະກອບ​ຢູ່ 15 ຊະນິດ, ສ່ວນ​ທີ່​ເປັນ​ສ່ວນ​ປະ
ກອບ​ຂອງ​ລາວ​ແທ້ ​ກໍມີ​ແຕ່​ເຂົ້າກັບ​ເກືອ​ເທົ່າ​ນັ້ນ. ນອກ​ນັ້ນ​ແມ່ນ​ວັດຖຸ​ນຳ​ເຂົ້າ ຈານ​ແຫຍ່ວ່າ​: ໃນ​ສະພາບ​ຄວາມ​ເປັນ​ຈິ່ງ​ແລ້ວ, ​ແມ່ນ​ແຕ່​ເກືອ ​ແລະ ​ເຂົ້າກໍ​ຍັງ​ອາດ​ເປັນ​ສິ່ງ​ນຳ​ເຂົ້າຊ້ຳອີກ.
ກ່ອນ​ໜ້າ​ນີ້, ກໍ​ມີ​ຂ່າວ​ການ​ຖະ​ແຫ​ລ່ງຂອງ​ຮອງ​ລັດຖະມົນຕີອຸດ​ສາຫະ​ກຳ​​ແລະ ການຄ້າ​ວ່າ: ລັດຖະບານ​ໄດ້​ສ້າງຕັ້ງຄະນະ​ສະ​ເພາະ​ກິດ​ຂຶ້ນ ​ເພື່ອ​ຊຸກຍູ້​ການ​ຜະລິດ ​ແລະ ການ​ຊົມ​ໃຊ້​ຜະລິດຕະພັນ​ພາຍ​ໃນ​ທົດ​ແທນ​ການ​ນຳ​ເຂົ້າສິນຄ້າທີ່​ບ້ານ​ເຮົາ​ເຮັດ​​ເອົາ​ເອງ​ໄດ້. ຈານ​ແຫຍ່​ຍໍມື​ສາທຸ​ນຳ ຂໍ​ໃຫ້​ເປັນ​ຈິງ​ເປັນຈັງ​ແຕ່​ກໍ​​ເຊື່ອວ່າ​ບໍ່​ງ່າຍ​ປານ​ໃດ, ​ເພາະ​ເມື່ອ​​ໃດສິນຄ້າ​ພາຍ​ໃນ​ຫາກ​ຍັງ “ຮູບ​ບໍ່​ຖືກ​ຕາ ລາຄາ​ບໍ່​ຖືກ​ໃຈ ​ແລະ ບໍ່​ໄດ້​ຄຸນ​ນະພາ​ບ” 3 ມາດຕາ​ຖານ​ທີ່​ວ່າມານີ້​ຕ້ອງ​ເອົາ​ໃຈ ​ໃສ່​ເປັນພິ​ເສດ, ​ໄປ​ພ້ອມໆ​ກັບ​ມາດ​ຕະການ​ຄວບ​ຄຸມ​ການ​ນຳ​ເຂົ້າສິນຄ້າ​​ຈາກ​ຕ່າງປະ​ເທດ, ດຽວ​ນີ້​ທາງ​ເລື​ອກສຳລັບ​ຊື້ສິນຄ້າ​ນັ້ນມີ​ຫລາຍ, ສະດວກ​ສະບາຍ​ຈະ​ນຳ​ໃຊ້​ແຕ່​ວິທີ​ປຸກລະດົມ​ແບບ​ເກົ່າໆ​ແມ່ນ​ບໍ່​ໄດ້​ກິນ​ອີກ​ແລ້ວ, ສິນຄ້າ​ຕ້ອງ​ຮູບ​ຖືກ​ຕາລາ​ຄາ​ຕ້ອງ​ຖືກ​ໃຈ ​ແລະ ​ໄດ້​ຄຸນ​ນະພາ​ບ.
ອີກ​ຈຸດ​ໜຶ່ງ​ທີ່​ພວກ​ເຮົາ​ຄວນ​ເອົາ​ໃຈ​ໃສ່​ ກໍ​ຄື​ການ​ໂຄສະນາ, ​ເຊິ່ງຜ່ານ​ມາ​ມັກ​ແຕ່​ຍົກ​ສູງ​ສິນຄ້າ​ຕ່າງປະ​ເທດ​ ລວມທັງ​ວິຊາ​ການ​ຂອງ​ຕ່າງປະ​ເທດ ​ເຊັ່ນ​ບອກ​ວ່າ: “ມີ​ຄຸນ​ນະພາ​ບ ນຳ​ເຂົ້າຈາກ​ຕ່າງປະ​ເທດ” ​ໄດ້​ຖືກ​ຮັບຮອງ​ຈາກ​ຊ່ຽວ​ຊານ​ຕ່າງປະ​ເທດ “ສິດສອນ​ໂດຍ​ອາຈານ​ຕ່າງປະ​ເທດ​ທີ່​ມີ​ຄວາມ​ຊຳນານ ​ແລະ ອື່ນໆ”.
ຕໍ່​ໄປ​ຂໍ​ໃຫ້​ພວກ​ເຮົາ​ໂຄສະນາ​ສິນຄ້າ​ພາຍ​ໃນ​ກັບ​ສິນຄ້າ​ຈາກ​ຕ່າງປະ​ເທດ​ໃຫ້​ສົມ​ດູ​ນກັນ ​ສຳລັບ​ຜະລິດ​ຕະພັນ​ທີ່​ດີ​ຂອງ​ພວກ​ເຮົາ​ເຊັ່ນ​ວ່າ: “ຜະລິດ​ໂດຍ​ຄົນ​ລາວ​ເຮົາ”. “ຜະລິດ​ຈາກ​ພູມ​ປັນຍາ​ຊາວບ້ານ​ທີ່​ມີ​ຕຳນານ​ມາ​ຫລາຍ​ຮ້ອຍ​ປີ” ສິດສອນ ​ແລະ ບັນຊາ​ໂດຍ​ຊ່ຽວຊານ​ສີມື​ຄົນ​ລາວ​ເຮົາ​ເອງ ​ແລະ ອື່ນໆ.
ຕາມ​ເຄີຍ​ໄດ້​ຍິນ​ມາ, ຄຳ​ນິຍົມ​ຊົມ​ຊອບ “ຂອງ​ນອກ” ນີ້​, ມັກ​ຈະ​ເປັນ​ພະ
ຍາດ​ຊຳ​ເຮື້ອຂອງ​ຄົນໃນ​ປະ​ເທດ​ ທີ່​ເຄີຍ​ເປັນ​ຫົວ​ເມືອງ​ຂຶ້ນຂອງ​ຕ່າງປະ​ເທດ​ມາ
ກ່ອນ, ​ແຕ່​ເລື່ອງ​ນີ້​ແກ້​ໄດ້ຖ້າ​ພວກ​ເຮົາ​ຫາກ “​ເຢີ​ກ” ອີ​ຫລີ.

ເຮັດໄດ້ແຕ່ບໍ່ໃຊ້ ຂີ້ໄຮ້ຕະຫລອດໄປ - new3 - ເຮັດໄດ້ແຕ່ບໍ່ໃຊ້ ຂີ້ໄຮ້ຕະຫລອດໄປ
ເຮັດໄດ້ແຕ່ບໍ່ໃຊ້ ຂີ້ໄຮ້ຕະຫລອດໄປ - lattana 1 - ເຮັດໄດ້ແຕ່ບໍ່ໃຊ້ ຂີ້ໄຮ້ຕະຫລອດໄປ
error: Content is protected !!