ຢາສູບຂ້າຊີວິດປີລະກວ່າ 7 ລ້ານຄົນ

- advert banner 728 90 728x90 - ຢາສູບຂ້າຊີວິດປີລະກວ່າ 7 ລ້ານຄົນ

- 1496138026691 960x0 - ຢາສູບຂ້າຊີວິດປີລະກວ່າ 7 ລ້ານຄົນ

 

​ເຈ​ນີວາ 30 ພຶດສະພາ: ອົງການ​ອະນາ​ໄມ​ໂລກ​ລະບຸ​ວ່າ: ຢາສູບ ​ແລະ ຜະລິດ​ຕະພັນ​ຢາ​ສູບ​ອື່ນໆ ຂ້າ​ຊີວິດ​ຄົນທົ່ວ​ໂລກ​ປີ​ລະ​ກວ່າ 7 ລ້ານ​ຄົນ. ນອກຈາກ​ນີ້ ຍັງ​ສົ່ງ​ຜົນ​ກະທົບ​ຕໍ່​ສິ່ງ​ແວດ​ລ້ອມ ນັບ​ແຕ່​ການ​ຜະລິດ, ການ​ຂົນ​ສົ່ງ ຈົນ​ຮອດ​ຂີ້​ເຫຍື້ອທີ່​ເກີດຂຶ້ນ. ບັນດາ​ປະ​ເທດ​ຈຶ່ງ​ຕ້ອງ​ເພີ່ມ​ມາດ​ຕະການ​ໃຫ້​ເຂັ້ມງວດ​ຂຶ້ນ.

 

- 1 1 - ຢາສູບຂ້າຊີວິດປີລະກວ່າ 7 ລ້ານຄົນ
- Tiger Head 728x90 - ຢາສູບຂ້າຊີວິດປີລະກວ່າ 7 ລ້ານຄົນ

ທ່ານ​ນາງ ມາ​ກາ​ເຣັດ ຊານ ຜູ້ອຳນວຍການ​ອົງການ​ອະນາ​ໄມ​ໂລກ ກ່າວ​ວ່າ: ຢາສູບ​ເປັນ​ໄພ​ຄຸກ​ຄາມ​ຕໍ່​ທຸກ​ຄົນ ​ເຮັດ​ໃຫ້​ຄົນ​ທຸກ​ຍິ່ງ​ທຸກ​ລົງ, ຫລຸດ​ປະສິດທິພາບ​ໃນ​ການ​ຜະລິດ ​ແລະ ​ເຮັດ​ໃຫ້​ອາກາດ​ເປັນ​ພິດ. ອົງການ​ອະນາ​ໄມ​ໂລກ​ອອກ​ລາຍ​ງານ​ໃນ​ວັນ​ທີ 30 ພຶດສະພາ ກ່ອນ​ວັນ​ງົດ​ສູບຢາ​ໂລກ 31 ພຶດສະພາ​ວ່າ: ຕົວ​ເລກ​ຜູ້​ເສຍ​ຊີວິດ​ຈາກ​ຢາສູບ​ເພີ່ມ​ຂຶ້ນຈາກ​ປີ​ລະ 4 ລ້ານ​ຄົນ​ໃນ​ໄລຍະ​ປ່ຽນ​ຄຣິສສະຕະວັດ​ເປັນ​ປີ​ລະ 7 ລ້ານ​ຄົນ​ໃນ​ປັດຈຸບັນ​ນີ້ ​ເປັນສາ​ເຫດການ​ເສຍ​ຊີວິດ​ທີ່​ປ້ອງ​ກັນ​ໄດ້​ເປັນອັນ​ດັບ​ໜຶ່ງ​ຂອງ​ໂລກ ​ແລະ ຄາດ​ວ່າ​ຈະ​ເພີ່ມ​ຂຶ້ນ, ສ່ວນ​ຫລາຍ​ຈະ​ເກີດ​ຂຶ້ນ​ໃນ​ປະ​ເທດ​ກຳລັງ​ພັດທະນາ ​ເນື່ອງ​ຈາກ​ບໍລິສັດ​ຢາສູບ​ຖືກ​ບີບ​ຈາກ​ລະບຽບ​ເຂັ້ມງວດ​ໃນ​ປະ​ເທດ​ພັດທະນາ​ແລ້ວ. ນອກຈາກ​ນີ້ ຢາສູບ​ຍັງ​ເຮັດ​ໃຫ້​ຄອບຄົວ ​ແລະ ລັດຖະບານ​ຕ້ອງ​ເສຍ​ເງິນ​ໄປ​ກັບ​ຄ່າ​ປິ່ນປົວ​ສຸຂະພາບ ​ແລະ ການ​ເສຍ​ປະສິດທິພາບ​ໃນ​ການ​ຜະລິດ​ບໍ່​ໜ້ອຍ​ກວ່າ 1,4 ຕື້​ໂດ​ລາ​ສະຫະລັດ ຫລື ​ເກືອບ 2% ຂອງ​ GDP ​ທົ່ວ​ໂລກ.

 

ລາຍ​ງານ​ຂອງ​ອົງການ​ອະນາ​ໄມ​ໂລກ​ໄດ້​ລະບຸ​ເຖິງ​ພິດ​ໄພ​ຂອງ​ຢາສູບ​ທີ່​ມີ​ຕໍ່​ສິ່ງ​ແວດ​ລ້ອມ​ເປັນ​ເທື່ອ​ທຳ​ອິດ​ວ່າ: ຂະ​ບວນການ​ຜະລິດ​ນັບ​ແຕ່​ຕົ້ນ​ໄປ​ຈົນ​ຮອດ​ການ​ສູບ​ລ້ວນ​ເຕັມ​ແຕ່​ມົນ​ລະ​ພິດ ​ແລະ ການ​ທຳລາຍ. ການ​ປູກ​ຢາ​ສູບ​ຕ້ອງ​ໃຊ້​ປຸ໋ຍ ​ແລະ ຢາຂ້າ​ແມງ​ໄມ້​ຈຳນວນ​ຫລາຍ ອີກ​ທັງ​ຍັງ​ເປັນສາ​ເຫດ​ໃຫ້​ເກີດ​ການ​ຖາງ​ປ່າ​ເພື່ອ​ເອົາ​ຟືນ​ໄປ​ບົ່ມ​ໃບ​ຢາສູບ, ຕົ້ນ​ໄມ້ 1 ຕົ້ນຕ້ອງ​ກາຍ​ເປັນ​ຟືນ​ໄປ​ບົ່ມ​ຢາສູບ 300 ກອກ. ອຸດສາຫະກຳ​ການ​ຜະລິດ​ຢາສູບ​ປ່ອຍ​ແກັສ​ກາກບອນ​ປີ​ລະ​ເກືອບ 4 ລ້ານ​ໂຕນ​ຈາກ​ການ​ຜະລິດ, ຂົນ​ສົ່ງ ​ແລະ ຈຳໜ່າຍ ທຽບ​ໃສ່​ກາກ​ບອນ​ທີ່​ເກີດ​ຈາກ​ເຮືອບິນ​ຂ້າມ​ມະຫາ​ສະໝຸດ​ອັດ​ລັງ​ຕິກ 3 ລ້ານ​ຖ້ຽວ. ນອກຈາກ​ນີ້ ຂີ້​ເຫຍື້ອຈາກ​ຂະ​ບວນການ​ຜະລິດ​ຍັງ​ມີ​ສານ​ເຄມີ​ກວ່າ 7.000 ຊະນິດ ​ເປັນ​ໄພ​ຕໍ່​ສຸຂະພາບ ​ແລະ ສິ່ງ​​ແວດ​ລ້ອມ ຍັງ​ບໍ່​ລວມສານພິດ​ຈາກ​ຄວັນ​ຢາສູບ ​ແລະ ຂີ້​ເຫຍື້ອຈາກ​ກົ້ນຢາສູບ​ຄິດ​ເປ​ັນ 40% ຂອງ​ຂີ້​ເຫຍື້ອ​ໃນ​ເມືອງ ​ແລະ ຫາດ​ຊາຍ ​ເພາະ​ສອງ​ໃນ​ສາມ​ຂອງ​ຢາສູບ​ທີ່​ຈຳໜ່າຍ​ທົ່ວ​ໂລກ​ວັນ​ລະ 15.000 ລ້ານ​ກອກ​ຖືກ​ຖິ້ມ​ບໍ່​ເປັນ​ລະບຽບ.

error: Content is protected !!