ປະຊາຊົນ ບ້ານໂພນຕູມ ເມືອງ ອຸທຸມພອນ ແຂວງສະຫວັນນະເຂດ ສົມທົບທຶນ 217 ລ້ານກ່ວາກີບສ້ອມແປງທາງເຂົ້າບ້ານ


      ການກໍ່ສ້າງສ້ອມແປງ ເສັ້ນທາງເຂົ້າບ້ານໂພນຕູມ ເມືອງອຸທຸມພອນ ແຂວງສະຫວັນນະເຂດ ມາຮອດປັດຈຸບັນສໍາເລັດແລ້ວ 100% ພາຍຫຼັງ ປະຕິບັດມາແຕ່ຕົ້ນເດືອນຕຸຸລາ  ຜ່ານມາ ຕົກເປັນມູນຄ່າ 239 ລ້ານກວ່າກີບ, ໃນນີ້ມີທຶນປະກອບສ່ວນຂອງປະຊາຊົນ ພາຍໃນບ້ານ 217 ກວ່າລ້ານກີບ ແລະ ທຶນສົມທົບຂອງບໍລິສັດຜູ້ຮັບເໝົາ 22 ລ້ານກ່ວາກີບ. ອັນໄດ້ຊ່ວຍໃຫ້ການໄປມາຫາສູ່ ລະຫວ່າງ, ບ້ານຕໍ່ບ້ານ ແລະ ການໄປ-ມາໂຮງຮຽນ ຂອງນ້ອງນັກຮຽນໄດ້ສະດວກສະບາຍ.

      ການກໍ່ສ້າງດັ່ງກ່າວ ມີຄວາມຍາວທັງໝົດ 3.600 ກວ່າແມັດ, ເລີ່ມແຕ່ທາງເລກທີ 10 ເຂົ້າໄປ 2.900 ແມັດ, ກວ້າງ 4 ຫາ 6 ແມັດ.

      ເມື່ອບໍ່ດົນມານີ້, ອຳນາດການປົກຄອງບ້ານໂພຕູມ ໃນນາມເຈົ້າຂອງໂຄງການ ແລະ ບໍລິສັດວິຈິດວົງສາ ກໍ່ສ້າງຂົວ-ທາງ ຜູ້ຮັບເໝົາ ພ້ອມດ້ວຍຄະນະກຳມະການກວດກາຂັ້ນເມືອງ ໄດ້ລົງກວດກາຕົວຈິງ ຜົນສຳເລັດຂອງການກໍ່ສ້າງ ສ້ອມແປງເສັ້ນທາງດັ່ງກ່າວ ພ້ອມທັງເຮັດບົດບັນທຶກ ກວດກາ ແລະ ມອບໃຫ້ອຳນາດການປົກຄອງ ແລະ ປະຊາຊົນ ພາຍໃນບ້ານເປັນຜູ້ປົກປັກຮັກສາ ແລະ ນໍາໃຊ້ຕໍ່ໄປ.


ນາຍບ້ານໂພນຕູມ ໃຫ້ຮູ້ອີກວ່າ: ສຳລັບທຶນຂອງປະຊາຊົນທີ່ໄດ້ມາ ແມ່ນການປຸກລະດົມນຳປະຊາຊົນພາຍໃນບ້ານ ຈຳນວນ 400 ກວ່າຫຼັງຄາເຮືອນ ມາແຕ່ປີ 2017 ເປັນຕົ້ນມາ ໂດຍເລີ່ມຕົ້ນ ເຮືອນລະ 4 ແສນກີບ ແຕ່ຍ້ອນເຫັນໄດ້ຄວາມສຳຄັນ ແລະ ການຕື່ນຕົວຂອງປະຊາຊົນພາຍໃນບ້ານ ຈຶ່ງໄດ້ສືບຕໍ່ລະດົມທຶນນຳ ປະຊາຊົນ ບວກກັບທຶນສົມທົບຂອງບໍລິສັດຜູ້ຮັບເໝົາກໍ່ສ້າງ ເພື່ອສ້ອມແປງທາງພາຍໃນບ້ານຂອງຕົນຍາວ 700 ແມັດສຳເລັດຜົນຢ່າງຈົບງາມ./.

error: Content is protected !!