ລັດຖະມົນຕີຕ່າງປະເທດແຫ່ງ ສປປ ລາວ ສຳເລັດການຢ້ຽມຢາມ ສ.ກູບາ

- advert banner 728 90 728x90 - ລັດຖະມົນຕີຕ່າງປະເທດແຫ່ງ ສປປ ລາວ ສຳເລັດການຢ້ຽມຢາມ ສ.ກູບາ

   ໂດຍຕອບສະໜອງຕາມຄໍາເຊີນຂອງສະຫາຍ ບຣູໂນ ໂຣດຣີເກັສ ປາຣີຍາ ກໍາມະການກົມການ​ເມືອງສູນ​ກາງ​ພັກ​ຄອມ​ມູນິດກູບາ, ລັດຖະມົນຕີກະຊວງການຕ່າງປະເທດແຫ່ງສາທາລະນະລັດ ກູບາ, ສະ​ຫາຍ ສະ​ເຫຼີມ​ໄຊ ກົມ​ມະ​ສິດ ກໍາ​ມະ​ການສູນກາງພັກ, ລັດ​ຖະມົນ​ຕີ​ກະຊ​ວງ​ການ​ຕ່າງ​ປະ​ເທດແຫ່ງ ສປປ ລາວ ພ້ອມຄະນະ ໄດ້ໄປຢ້ຽມຢາມສາທາລະນະລັດ ກູບາ ຢ່າງເປັນທາງ​ການ ​ໃນລະຫວ່າງວັນທີ 11-12 ພະ​ຈິກນີ້ ເພື່ອ​ຮັດແໜ້ນ ແລະ ເສີມ​ຂະ​ຫຍາຍສາຍພົວພັນມິດ​ຕະ​ພາບ ແລະ ການຮ່ວມ​ມືສອງຝ່າຍຖານ​ອ້າຍ​ນ້ອງ​ທີ່​ເປັນມູນເຊື້ອອັນ​ດີ​ງາມ​ມາ​ແຕ່ດົນນານລະຫວ່າງສອງພັກ, ສອງລັດ ແລະ ປະຊາຊົນສອງຊາດລາວ-ກູບາ.

- new3 - ລັດຖະມົນຕີຕ່າງປະເທດແຫ່ງ ສປປ ລາວ ສຳເລັດການຢ້ຽມຢາມ ສ.ກູບາ

   ການພົບປະຄັ້ງນີ້, ທັງສອງຝ່າຍໄດ້ຜັດປ່ຽນກັນແຈ້ງສະພາບການກ່ຽວກັບການພັດທະນາເສດ​ຖະກິດ-ສັງຄົມຂອງ​ແຕ່ລະປະ​ເທດໃຫ້ກັນຊາບ, ປຶກສາຫາລື ແລະ ແລກປ່ຽນຄວາມຄິດເຫັນນໍາກັນ ໃນການສືບຕໍ່ເສີມຂະຫຍາຍການພົວພັນການຮ່ວມມືຖານອ້າຍ​ນ້ອງ, ຄວາມສາມັກຄີອັນແໜ້ນແຟ້ນ ແລະ ການຮ່ວມມືສອງຝ່າຍລະຫວ່າງສອງປະເທດ, ໂດຍສະເພາະການຮ່ວມມືລະຫວ່າງສອງກະຊວງການຕ່າງປະເທດລາວ-ກູບາ ໃຫ້ນັບມື້ຂະຫຍາຍຕົວຍິ່ງໆຂຶ້ນ.  ນອກນັ້ນ, ສອງຝ່າຍໄດ້​​ແລກປ່ຽນຄວາມຄິດເຫັນກ່ຽວກັບບັນຫາພາກພື້ນ ແລະ ສາກົນ ທີ່ມີຄວາມສົນໃຈນໍາກັນ.

   ໃນການພົບປະ, ສະຫາຍ ສະ​ເຫຼີມ​ໄຊ ກົມ​ມະ​ສິດ ໄດ້ຢືນຢັນຄືນເຖິງນະໂຍບາຍອັນສະເໝີຕົ້ນສະເໝີປາຍຂອງພັກ ແລະ ລັດຖະບານລາວ ທີ່ມີຕໍ່ພັກ ແລະ ລັດຖະບານ ສ.ກູບາ ໃນການເຄື່ອນໄຫວໃນເວທີພາກພື້ນ ແລະ ສາກົນ. ຄຽງ​ຄູ່​ກັນ​ນັ້ນ ກໍໄດ້ສະແດງຄວາມຊົມເຊີຍຕໍ່ໄຊຊະນະໃນການ​ຜ່ານມະຕິ​ຂອງ​ສະ​ມັດ​ຊາ​ໃຫຍ່​ສະ​ຫະ​ປະ​ຊາ​ຊາດ ຕ້ານການປິດລ້ອມທາງດ້ານເສດຖະກິດ, ການຄ້າ ແລະ ການເງິນ ຂອງສະຫະລັດອາເມລິກາ ທີ່ມີຕໍ່ ສ.ກູບາ ດ້ວຍ 187 ສຽງເຫັນດີ, ຕ້ານ 3 ສຽງ ແລະ 2 ປະເທດບໍ່ອອກສຽງ ໃນອາທິດທີ່ຜ່ານມາ ກໍ​ຄືຜົນ​ສໍາເລັດທີ່ພັກ, ລັດຖະບານ ແລະ ປະຊາຊົນ​ ສ.ກູບາ ຍາດ​ມາໄດ້​ໃນການປົກປັກຮັກສາໝາກຜົນຂອງການ​ປະຕິວັດ ແລະ ການສ້າງສາພັດທະນາປະເທດ ໃນປັດຈຸບັນ.

        ສະຫາຍ ບຣູໂນ ໂຣດຣີເກັສ ໄດ້ຢືນຢັນຄືນເຖິງການສືບຕໍ່ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມື ລະຫວ່າງສອງປະເທດລາວ-ກູບາ, ເວົ້າສະເພາະລະຫວ່າງ ສອງກະຊວງການຕ່າງປະເທດ ທີ່ເປັນມູນເຊື້ອອັນດີງາມມາ​ແຕ່ດົນນານແລ້ວນັ້ນ ໃຫ້ເພີ່ມຂຶ້ນຢ່າງຍໍ່ຢຸດຢັ້ງ, ພ້ອມ​ນັ້ນ ກໍໄດ້ແຈ້ງໃຫ້ຊາບເຖິງຜົນສໍາເລັດໃນການສ້າງສາພັດ​ທະນາ​ປະ​ເທດ ແລະ ການ​ປັບປຸງຊີວິດການເປັນຢູ່ຂອງປະຊາຊົນ ກູບາ ໃຫ້​ດີ​ຂຶ້ນ​ຢ່າງບໍ່​ຢຸດຢັ້ງ.

        ທັງສອງປະເທດ ລາວ ແລະ ສ.ກູບາ ເວລາໃດ ກໍຢຶດໝັ້ນຢ່າງໜັກແໜ້ນທີ່​ຈະ​ສືບ​ຕໍ່​ໃຫ້​ການສະໜັບສະໜູນ ແລະ ຊ່ວຍ​ເຫຼືອ​ເຊິ່ງກັນ ແລະ ກັນໃນເວທີພາກພື້ນ ແລະ ສາກົນ​. ໄປຄ່ຽງຄູ່ກັບການພົວພັນອັນດີງາມທາງດ້ານການເມືອງ, ທັງສອງຝ່າຍ ກໍໄດ້ມີການຮ່ວມມືທາງດ້ານສາທາລະນະສຸກ, ການສຶກສາ ແລະ ກິລາ. ຝ່າຍລາວສະ​ແດງ​ຄວາມ​ຍິນ​ດີ​ທີ່ຈະ​ສືບ​ຕໍ່ຮັບເອົາແພດໝໍຂອງ ກູບາ ມາຮັບໃຊ້​ການປິ່ນປົວໃຫ້ແກ່ປະຊາຊົນຢູ່ທ້ອງຖິ່ນ ແລະ ອາຈານສອນພາສາ ແອັສປາໂຍນ ມາປະຈໍາຢູ່ມະຫາວິທະຍາໄລແຫ່ງຊາດ, ອັນ​ເປັນ​ການປະກອບສ່ວນເຂົ້າໃນພະລະກິດສ້າງສາພັດທະນາປະເທດຊາດ.  ນອກນັ້ນ, ລັດຖະບານ ກູບາ ກໍຍັງໄດ້ໃຫ້ທຶນການສຶກສາລາວຈໍານວນໜຶ່ງໄປຮຽນຢູ່ ສ.ກູບາ. ປີ 2019 ນີ້ ກໍເປັນປີທີ່ມີຄວາມໝາຍສຳຄັນແຫ່ງການພົວພັນການທູດລະຫວ່າງສອງປະເທດ ຄົບ​ຮອບ 45 ປີ ແລະ ໃນໂອກາດຢ້ຽມຢາມ ສ.ກູບາ ນີ້, ສອງປະເທດ ກໍໄດ້ຮ່ວມກັນຈັດພິທີສະເຫຼີມສະຫຼອງວັນທີ່​ມີ​ຄວາມ​ໝາຍ​ຄວາມ​ສຳ​ຄັນ​ດັ່ງ​ກ່າວນີ້ຂື້ນ ທີ່ກະຊວງການຕ່າງປະເທດ ກູບາ.

- lattana 1 - ລັດຖະມົນຕີຕ່າງປະເທດແຫ່ງ ສປປ ລາວ ສຳເລັດການຢ້ຽມຢາມ ສ.ກູບາ

        ໃນໄລຍະຢ້ຽມຢາມ ສາທາລະນະລັດ ກູບາ ຄັ້ງນີ້, ນອກຈາກໄດ້ດໍາເນີນການພົບປະສອງຝ່າຍກັບຄູ່ຮ່ວມຕໍາແໜ່ງຂອງຝ່າຍ ກູບາ ແລະ ເຂົ້າຮ່ວມພິທີຕ້ອນຮັບຈາກບັນດາທຸຕານຸທູດ ແລະ ອົງການຈັດຕັ້ງສາກົນທີ່ມີສຳນັກງານຕັ້ງຢູ່ນະຄອນຫຼວງລາຮາວານ ແລ້ວ, ຄະນະຜູ້ແທນກະຊວງການຕ່າງປະເທດລາວ ຍັງໄດ້ເຂົ້າຢ້ຽມຂໍ່ານັບສະຫາຍ ມີ​ເກັນ ດີ​ເອັດ​ສ-ກາ​ແນນ ແບ​ຣ​ມູ​ເດັດ​ສ, ປະ​ທານ​ປະ​ເທດແຫ່ງ ສາ​ທາ​ລະ​ນະ​ລັດ ກູ​ບາ, ສະຫາຍ ຮວງ ເອັດສເຕບານ ລາໂຊ ເອຮນານເດັດສ, ປະທານສະພາແຫ່ງຊາດ​ອຳ​ນາດ​ປະ​ຊາ​ຊົນແຫ່ງສາ​ທາ​ລະ​ນະ​ລັດ ກູ​ບາ, ພົບ​ປະ​ກັບສະຫາຍ ອັນໂຕນີໂອ ຫຼຸຍສ ກາຣີກາຣເຕ ໂກໂຣນາ ຮັກ​ສາ​ການ​ລັດ​ຖະ​ມົນ​ຕີ​ກະ​ຊວງ​ການ​ຄ້າ​ຕ່າງ​ປະ​ເທດ ແລະ ການ​ລົງ​ທຶນ​ຕ່າງ​ປະ​ເທດແຫ່ງສາ​ທາ​ລະ​ນະ​ລັດ​ກູ​ບາ ແລະ ພົບປະ​ກັບສະ​ຫາຍ ອານເຮນ ອຼາຊູເອກາ ຮອງ​ຫົວ​ໜ້າ​ຄະ​ນະ​ພົວ​ພັນ​ການ​ຕ່າງ​ປະ​ເທດ​ສູນ​ກາງ​ພັກ​ຄອມ​ມູ​ນິດກູ​ບາ​. ໃນ​ໂອ​ກາດ​ນີ້ ສອງປະເທດໄດ້​ລົງ​ນາມ​ສັນ​ຍາ​ຮ່ວມ​ມື​ສອງ​ສະ​ບັບຄື: ສັນ​ຍາ​ການ​ຮ່ວມ​ມືລະ​ຫວ່າງລັດ​ຖະ​ບານ​ແຫ່ງສາລະ​ນະ​ລັດ ປະ​ຊາ​ທິ​ປະ​ໄຕ ປະ​ຊາ​ຊົນ​ລາວ ແລະ ລັດ​ຖະ​ບານແຫ່ງ ສາ​ທາ​ລະ​ນະ​ລັດ ​ກູ​ບາ ແລະ ບົດບັນທຶນຄວາມເຂົ້າໃຈວ່າດ້ວຍການຮ່ວມມືໃນຂົງເຂດວຽກງານສາທາລະນະສຸກ ແລະ ວິຊາການແພດ ລະຫວ່າງກະຊວງສາທາລະນະສຸກແຫ່ງ ສປປ ລາວ ແລະ ກະຊວງສາທາລະນະສຸກ ແຫ່ງ ສ.ກູບາ.​

        ​ນອກ​ນັ້ນ, ຄະນະ​ຜູ້​ແທນລາວ ຍັງ​ໄດ້ໄປຢ້ຽມ​ຊົມສະຖານ​ທີ່ປະຫວັດສາດ ແລະ ວັດທະນະ​ທຳ​​ຈຳນວນ​ໜຶ່ງ ຂອງນະຄອນ​ຫຼວງ​ລາ​ຮາ​ວານ.

error: Content is protected !!