ລາວ ຍັງມີໜີ້ຕ້ອງຮັບ ທີ່ບໍ່ທັນໄດ້ຮັບການແກ້ໄຂຂາດຕົວ 1.300 ກວ່າຕື້ກີບ

- advert banner 728 90 728x90 - ລາວ ຍັງມີໜີ້ຕ້ອງຮັບ ທີ່ບໍ່ທັນໄດ້ຮັບການແກ້ໄຂຂາດຕົວ 1.300 ກວ່າຕື້ກີບ

ສປປ ລາວ ຍັງມີໜີ້ຕ້ອງຮັບຂອງຂະແໜງສ່ວຍສາອາກອນ ທີ່ບໍ່ທັນໄດ້ຮັບການແກ້ໄຂຂາດຕົວເຖິງ 1.300 ກວ່າຕື້ກີບ. ໃນນັ້ນ, ຂັ້ນສູນກາງຄຸ້ມຄອງ 623 ກວ່າຕື້ກີບ ແລະ ຂັ້ນທ້ອງຖິ່ນຮັບຜິດຊອບ ຈໍານວນ 680 ກວ່າ ຕື້ກີບ.

- new3 - ລາວ ຍັງມີໜີ້ຕ້ອງຮັບ ທີ່ບໍ່ທັນໄດ້ຮັບການແກ້ໄຂຂາດຕົວ 1.300 ກວ່າຕື້ກີບ

    ທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີ ກະຊວງການເງິນ ຊີ້ແຈງຕໍ່ຄຳຊັກຖາມ ຂອງສະມາຊິກສະພາແຫ່ງຊາດ ໃນວາລະການດໍາເນີນກອງປະຊຸມສະໄໝສາມັນ ເທື່ອທີ 8 ຂອງສະພາແຫ່ງຊາດ ຊຸດທີ VIII ໃນວັນທີ 14 ພະຈິກ 2019 ວ່າ: ຈຳນວນໜີ້ຕ້ອງຮັບ ຂອງຂະແໜງສ່ວຍສາອາກອນທັງໝົດນີ້ ແມ່ນລວມມີຍອດຍົກມາແຕ່ຫລາຍປີກ່ອນ ຈຳນວນ 996,03 ຕື້ກີບ ແລະ ໜີ້ ປີ 2018 ຈຳນວນ 308,78 ຕື້ກີບ.

    ສຳລັບໜີ້ ຂັ້ນສູນກາງຄຸ້ມຄອງ ຈຳນວນ 623,83 ຕື້ກີບນັ້ນ ປະກອບມີ: ໜີ້ຕ້ອງຮັບທີ່ຕິດພັນກັບລາຍຮັບວິຊາການຂອງ 5 ກະຊວງ ຈຳນວນ 361,45 ຕື້ກີບ, ໃນນັ້ນ ມີຍອດຍົກມາ ຈຳນວນ 238,7 ຕື້ກີບ, ເຊິ່ງແມ່ນຍອດເງິນເຫລືອໃນບັນຊີເງິນຝາກ ຂອງຫົວໜ່ວຍງົບປະມານຂັ້ນສູນກາງ ທີ່ເປີດໄວ້ຢູ່ຄັງເງິນແຫ່ງຊາດປີ 2017 ແລະ ຍອດເງິນເຫລືອໃນບັນຊີເງິນຝາກ ປີ 2018 ຈຳນວນ 122,8 ຕື້ກີບທີ່ຍັງບໍ່ທັນໄດ້ມອບເຂົ້າງົບປະມານແຫ່ງລັດ ແລະ ໜີ້ຕ້ອງຮັບທີ່ຕິດພັນກັບຫົວໜ່ວຍທຸລະກິດ ຈໍານວນ 262,34 ຕື້ກີບ, ເຊິ່ງປະກອບດ້ວຍໜີ້ຕ້ອງຮັບ ຈາກຫົວໜ່ວຍທຸລະກິດທີ່ຕິດພັນໂຄງການລົງທຶນຂອງລັດ ແລະ ໜີ້ຕ້ອງຮັບຄ້າງມອບຂອງບັນດາຫົວໜ່ວຍທຸລະກິດ ທີ່ບໍ່ຕິດພັນກັບງົບປະມານ.

ສຳລັບໜີ້ຕ້ອງຮັບທີ່ຂັ້ນທ້ອງຖິ່ນຮັບຜິດຊອບ ຈຳນວນ 680,98 ຕື້ກີບ ໃນ 18 ແຂວງນັ້ນ ແມ່ນໜີ້ຕ້ອງຮັບທີ່ຕິດພັນກັບລາຍຮັບວິຊາການ, ໃນນັ້ນ ໄດ້ຍອດຍົກມາທ້າຍປີ 2017 ຈຳນວນ 583,15 ຕື້ກີບ ແລະ ເກີດຂຶ້ນໃນປີ 2018 ຈຳນວນ 97,83 ຕື້ກີບ.

- lattana 1 - ລາວ ຍັງມີໜີ້ຕ້ອງຮັບ ທີ່ບໍ່ທັນໄດ້ຮັບການແກ້ໄຂຂາດຕົວ 1.300 ກວ່າຕື້ກີບ

ໃນຈຳນວນທັງໝົດ ມີໜີ້ຕ້ອງຮັບຈາກໂຄງການລົງທຶນຂອງລັດ ຈໍານວນ  33,04 ຕື້ກີບ ໂດຍຈຳນວນໜຶ່ງກໍໄດ້ຊຳລະແລ້ວ, ແຕ່ຍັງບໍ່ທັນໄດ້ຖືກປົດອອກຈາກບັນຊີຕິດຕາມໜີ້ຕ້ອງຮັບ ແລະ ໜີ້ຕ້ອງຮັບ ຈາກການກວດກາໄລ່ລຽງຂອງຂະແໜງສ່ວຍສາອາກອນ ຈາກໜ່ວຍງານຕ່າງໆ ຈຳນວນ 647,94 ຕື້ກີບ.

    ສຳລັບການແກ້ໄຂຢູ່ສູນກາງ, ກະຊວງການເງິນ ໄດ້ອອກຄຳແນະນຳກ່ຽວກັບການຄຸ້ມຄອງລາຍຮັບ-ລາຍຈ່າຍຄ່າບໍລິການທາງດ້ານວິຊາການ ແລະ ກອງທຶນຂອງລັດ ແລະ ລົງກວດກາການຈັດເກັບ-ມອບລາຍຮັບວິຊາການ ຂອງບັນດາຫົວໜ່ວຍງົບປະມານດ້ວຍການອະນຸມັດລາຍຈ່າຍເປັນຖ້ຽວ ໂດຍອີງຕາມຈຳນວນລາຍຮັບທີ່ມອບເຂົ້າງົບປະມານ, ອອກໃບເລັ່ງທວງ 3 ຄັ້ງ ແລະ ຖ້າຍັງບໍ່ຊຳລະແມ່ນຈະສະ ເໜີກະຊວງອຸດສະຫະກຳການຄ້າ ເພື່ອແຈ້ງໂຈະການດຳເນີນທຸລະກິດຊົ່ວຄາວ, ໃນຜ່ານມາມີ 1 ບໍລິສັດ ທີ່ໄດ້ແຈ້ງໂຈະຊົ່ວຄາວແລ້ວ ແລະ ຈະໄດ້ສະເໜີດຳເນີນຕາມຂະບວນການຍຸຕິທຳ. ນອກຈາກນັ້ນ, ຈະໄດ້ສືບຕໍ່ປະສານສົມທົບກັບກະຊວງແຜນການ ແລະ ການລົງທຶນ, ກະຊວງໂຍທາທິການ ແລະ ຂົນສົ່ງ ກວດກາຄືນແຜນການລາຍຈ່າຍປະຈຳປີ 2020 ທີ່ຜ່ານການຮັບຮອງຈາກສະພາແຫ່ງຊາດ ຂອງບັນດາຫົວໜ່ວຍທຸລະກິດທີ່ມີໜີ້ຄ້າງມອບໃນຜ່ານມາ.

ໃນການແກ້ໄຂຢູ່ທ້ອງຖິ່ນ, ກະຊວງການເງິນ ກໍໄດ້ອອກແຈ້ງຕົວເລກໜີ້ຄ້າງມອບຕາມຜົນການກວດສອບ ປີ 2018 ໃຫ້ສ່ວຍສາອາກອນປະຈຳແຂວງ, ນະຄອນຫລວງ ແລະ ໃຫ້ສັງລວມລາຍງານຜົນການແກ້ໄຂໃຫ້ກະຊວງເປັນແຕ່ລະເດືອນ.

error: Content is protected !!