ການກໍ່ສ້າງໄປໜ້າ ຄ່າຊົດຊົດເຊີຍຍັງນຳຫຼັງ

- 11 9 - ການກໍ່ສ້າງໄປໜ້າ ຄ່າຊົດຊົດເຊີຍຍັງນຳຫຼັງ
- AGL banner - ການກໍ່ສ້າງໄປໜ້າ ຄ່າຊົດຊົດເຊີຍຍັງນຳຫຼັງ

ການກໍ່ສ້າງເສັ້ນທາງລົດໄຟລາວ-ຈີນໄດ້ມີຄວາມຄືບໜ້າຢ່າງວ່ອງໄວແຕ່ສິ່ງໜຶ່ງທີ່ປະຊາຊົນເປັນຫ່ວງກໍຄືການຊົດເຊີຍທີ່ຍັງຊັກຊ້າກວ່າການສ້າງທາງລົດໄຟດັ່ງກ່າວ.

ການຈ່າຍຄ່າຊົດທີ່ເໝາະສົມ, ການຈ່າຍຄ່າຊົດເຊີຍທີ່ໄດ້ຕາມກຳນົດເວລາມັກຈະເປັນບັນຫາໜຶ່ງຂອງບັນດາໂຄງການພັດທະນາທັງຫຼາຍບໍ່ວ່າຈະເປັນການໂຄງການພັດທະນາເຂື່ອນໄຟຟ້ານໍ້າຕົກ, ການສຳປະທານທີ່ດິນແລະອື່ນໆ ທີ່ການຊົດເຊີຍຈະເປັນກິດຈະກຳທີ່ຕິດພັນກັບໂຄງການເຊິ່ງໄດ້ຮັບການແກ້ໄຂຫຼືຈັດຕັ້ງປະຕິບັດລ່າຊ້າກວ່າກິດຈະກຳອື່ນ.

ເຊັ່ນດຽວກັນນັ້ນໂຄງການສ້າງທາງລົດໄຟລາວ-ຈີນທີ່ທາງການເພິ່ນຫາກໍລາຍງານເມື່ອບໍ່ດົນມານີ້ວ່າມາຮອດທ້າຍເດືອນສິງຫາຜ່ານມານີ້ ໂຄງການກໍ່ສ້າງທາງລົດໄຟລາວ-ຈີນສຳເລັດແລ້ວ 76,2% ໃນນີ້ ຍັງບໍ່ລວມວຽກລະບົບລາງ, ລະບົບໄຟຟ້າແລະລະບົບຄວບຄຸມຕ່າງໆ ແຕ່ຖ້າທຽບໃສ່ແຜນການແລ້ວຖືວ່າປະຕິບັດໄດ້ລື່ນແຜນການ.

ຄຽງຄູ່ກັບການກໍ່ສ້າງນັ້ນການມອບພື້ນທີ່ ໃຫ້ໂຄງການກໍມີຄວາມໜ້າດີເຊັ່ນກັນ, ມາຮອດປັດຈຸບັນໄດ້ມອບແລ້ວ 98,2% ຈາກພື້ນທີ່ທັງໝົດຂອງແລວລົດໄຟແລະພື້ນທີ່ສະຖານີ 3.000 ເຮັກຕາແລະໃນຈຳນວນ 10​ ສະຖານີລົດໄຟແມ່ນກວມເອົາເນື້ອທີຮອດ 812,7 ເຮັກຕາ.

ແຕ່ແນວໃດກໍຕາມເມື່ອມາເບິ່ງດ້ານການຈ່າຍຄ່າຊົດເຊີຍແລ້ວແມ່ນສາມາດບັນລຸໄດ້ພຽງແຕ່ 20,4% ຕົກເປັນເງິນ 369 ຕື້ກີບ. ໃນປີ 2019 ຈຳນວນເງິນທີ່ຈະຕ້ອງຈ່າຍຄ່າຊົດເຊີຍທັງໝົດແມ່ນ 450​ ຕື້ກີບແຕ່ມາຮອດປັດຈຸບັນສາມາດຈ່າຍໄປຮອດບັນດາເຂດແຂວງທີ່ນອນໃນໂຄງການໄດ້ພຽງແຕ່ 134 ຕື້ກີບ, ນັ້ນກໍສະແດງວ່າຍັງເຫຼືອ 316 ຕື້ກີບທີ່ຈະຕ້ອງຈ່າຍພາຍໃນເດືອນເຄິ່ງກ່ອນຈະໝົດປີ 2019.

ເຊິ່ງເປັນສິ່ງທ້າທາຍຫຼາຍທີ່ຈະສາມາດບັນລຸເປົ້າໝາຍຕັ້ງໄວ້ ບວກໃສ່ກັບວ່າໃນຫ່ວງ 450 ນັ້ນເປັນງົບປະມານຂອງລັດຖະບານຈຳນວນ 250​ ຕື້ ໃນສົກປີ 2019 ເຊິ່ງອາດຫຍຸ້ງຍາກຢູ່ບ່ອນວ່າງົບປະມານຈຳນວນຫຼາຍຂອງລັດຖະບານໄດ້ບິແບ່ງເພື່ອຟື້ນຟູຊ່ວຍເຫຼືອຜູ້ໄດ້ຮັບຜົນກະທົບຈາກໄພພິບັດທາງທຳມະຊາດໃນປີນີ້ ໂດຍສະເພາະນໍ້າຖ້ວມນັ້ນອາດເຮັດໃຫ້ ການຈ່າຍຄ່າຊົດເຊີຍດັ່ງກ່າວລ່າຊ້າຂຶ້ນໄປຕື່ມ.

ມາຮອດປັດຈຸບັນລັດຖະບານຕ້ອງການງົບປະມານຈຳນວນ 1.356 ຕື້ກີບເພື່ອນຳໃຊ້ເຂົ້າໃນການຊົດເຊີຍໂດຍທີ່ລັດຖະບານໄດ້ຂຶ້ນງົບປະມານໃນປີ 2020 ຈຳນວນ 400 ຕື້ກີບ.

ແນ່ນອນລັດຖະບານເຮົາໄດ້ໃຫ້ຄວາມສຳຄັນຕໍ່ການຊົດເຊີຍຂອງໂຄງການນີ້, ນອກເໜືອຈາກງົບປະມານຂອງລັດຖະບານແລ້ວຍັງມີການຊ່ວຍເຫຼືອລ້າຈາກລັດຖະບານຈີນຕື່ມອີກເພື່ອຮັບປະກັນວ່າປະຊາຊົນ ກະທົບໄດ້ຮັບການຊົດເຊີຍທີ່ເໝາະສົມແລະທັນກັບຄວາມຕ້ອງການ.

ແຕ່ເຖິງຢ່າງໃດກໍຕາມການຊົດເຊີຍໃຫ້ປະຊາຊົນຜູ້ໄດ້ຮັບຜົນກະທົບກໍມີຄວາມສຳຄັນເທົ່າທຽມກັບການບຸກບືນໃຫ້ການກໍ່ສ້າງສຳເລັດຕາມແຜນ, ເພາະສະນັ້ນຄຽງຄູ່ກັບການກໍ່ສ້າງທີ່ຄືບໜ້າຢ່າງວ່ອງໄວກໍບໍ່ຄວນປ່ອຍປະການຊົດເຊີຍໄວ້ຂ້າງຫຼັງ.

-    AD conten website - ການກໍ່ສ້າງໄປໜ້າ ຄ່າຊົດຊົດເຊີຍຍັງນຳຫຼັງ
- lattana banner 1 - ການກໍ່ສ້າງໄປໜ້າ ຄ່າຊົດຊົດເຊີຍຍັງນຳຫຼັງ
- lattana banner - ການກໍ່ສ້າງໄປໜ້າ ຄ່າຊົດຊົດເຊີຍຍັງນຳຫຼັງ
error: Alert: ເນື້ອຫາຂ່າວມີລິຂະສິດ !!