ລັດຈະສືບຕໍ່ແກ້ໄຂຜົນຂອງການກວດສອບ-ກວດກາ ໂຄງການນອກແຜນ

- advert banner 728 90 728x90 - ລັດຈະສືບຕໍ່ແກ້ໄຂຜົນຂອງການກວດສອບ-ກວດກາ ໂຄງການນອກແຜນ

    ທ່ານ ຮອງນາຍົກລັດຖະມົນຕີ ສອນໄຊ ສີພັນດອນ ໄດ້ຊີ້ແຈງຕໍ່ຄໍາຊັກຖາມຂອງ ສສຊ ໃນວາລາດໍາເນີນກອງປະຊຸມສະໄໝສາມັນ ເທື່ອທີ 8 ຂອງສະພາແຫ່ງຊາດ ຊຸດທີ VIII, ໃນວັນທີ 15 ພະຈິກນີ້, ໂດຍການເປັນປະທານຂອງທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດ, ໂດຍໄດ້ເນັ້ນກ່ຽວກັບຜົນຂອງການກວດສອບ-ກວດກາ ໂຄງການລົງທຶນຂອງລັດ ຍັງມີຫຼາຍບັນຫາທີ່ຍັງບໍ່ທັນໄດ້ແກ້ໄຂ ເປັນຕົ້ນແມ່ນ ການຈັດຕັ້ງແຜນພັດທະນາເສດຖະກິດ-ສັງຄົມ ປີ 2019 ຊຶ່ງໄດ້ປະເຊີນກັບຫຼາຍສິງທ້າທາຍ ເປັນຕົ້ນ ສະພາບສາກົນມີຄວາມເຄັ່ງຕຶງ, ເສດຖະກິດຂອງໂລກມີພາວະຖົດຖອຍ ແລະ ສະພາບພາຍໃນມີຄວາມຫຍຸ້ງຍາກທາງດ້ານເສດຖະກິດມະຫາພາກ ແລະ ໄພພິບັດທໍາມະຊາດຈຶ່ງມີຫຼາຍໂຄງການບໍ່ໄດ້ປະເມີນ ແລະ ປະມູນຕາມຂັ້ນຕອນ, ການດັດແກ້ມູນຄ່າໂຄງການລົງທຶນຂອງລັດຈໍານວນໜຶ່ງບໍ່ເໝາະສົມ ແລະ ບໍ່ໄປຕາມຂັ້ນຕອນຄື:

- new3 - ລັດຈະສືບຕໍ່ແກ້ໄຂຜົນຂອງການກວດສອບ-ກວດກາ ໂຄງການນອກແຜນ

ໂຄງການກໍ່ສ້າງສ້ອມແປງ ເດີ່ນດອກປີກໄກ່ໃນຮົ່ມ ຢູ່ແຂວງຜົ້ງສາລີ ມູນຄ່າສັນຍາ 1.760 ລ້ານກີບ ຊໍາລະຜ່ານມາ 1.600 ລ້ານກີບ, ໂຄງການຍົກລະດັບທາງປູຢາງ 2 ຊັ້ນ ເລກທີ 2571 ແຕ່ສະໜາມບິນ-ທາງເວັ້ນຕົວເມືອງຫຼວງພະບາງ ມູນຄ່າສັນຍາ 1800 ລ້ານກີບ ຊໍາລະຜ່ານມາ 1​.000 ລ້ານກີບ, ໂຄງການກໍ່ສ້າງທາງຢາງເທສະບານນະຄອນຫຼວງພະບາງ 4 ແຍກຕະຫຼາດດາລາໄປຕາມເສັ້ນທາງໂຮງຮຽນປະຖົມສີຖານ  ມູນຄ່າສັນຍາ 4.700 ລ້ານກີບ, ຊໍາລະຜ່ານມາ 1.000 ລ້ານກີບ (ແຂວງຫຼວງພະບາງ). ໂຄງການຕິດຕັ້ງໄຟເຍືອງທາງພະລັງງານແສງຕາເວັນຕາມຈຸດຕ່າງໆໃນນະຄອນຫຼວງວຽງຈັນ ມູນຄ່າສັນຍາ 3.700 ລ້ານກີບ, ໂຄງການກໍ່ສ້າງຫ້ອງການບໍ່ແຮ່ ເມືອງສັງທອງ ມູນຄ່າສັນຍາ 1.240 ລ້ານກີບ ແລະ ໂຄງການຂັ້ນຫ້ອງບັນດາຂະແໜງການພາຍໃນ ພະແນກພະລັງງານ ແລະບໍ່ແຮ່ນະຄອນຫຼວງວຽງຈັນ ມູນຄ່າສັນຍາ 100 ລ້ານກີບຊຶ່ງທັງ 3 ໂຄງການນີ້ມາຮອດປັດຈຸບັນຍັງບໍ່ທັນໄດ້ຊໍາລະ.

6 ໂຄງການດັ່ງກ່າວ, ແມ່ນນໍາໃຊ້ແຫຼ່ງທຶນລະດົມຈາກສັງຄົມ ແລະ ເງິນເກີນແຜນ, ສໍາຫຼັບເງິນລະດົມຈາກສັງຄົມ ຕາມມາດຕາ 2 ຂອງກົດໝາຍ ວ່າດ້ວຍການລົງທຶນຂອງລັດ ໄດ້ກໍານົດວ່າ: ຕ້ອງແມ່ນທຶນທີ່ຕ້ອງຜ່ານລະບົບງົບປະມານເທົ່ານັ້ນ, ສໍາຫຼັບການນໍາໃຊ້ເງິນເກີນແຜນ ແມ່ນຢູ່ໃນຄວາມຮັບຜິດຊອບຂອງກະຊວງການເງິນ ເຊິ່ງພາກສ່ວນກ່ຽວຂ້ອງຕ້ອງໄດ້ຂໍອະນຸມັດຈາກກະຊວງດັ່ງກ່າວເສຍກ່ອນຈຶ່ງສມາດນໍາໃຊ້ໄດ້ ແລະ ຖ້າຈະໃຊເຂົ້າໃນໂຄງການລົງທຶນຂອງລັດ ຈະຕ້ອງໄດ້ປະກອບເອກະສານ ແລະ ດໍາເນີນຂັ້ນຕອນຂອງກົດໝາຍການລົງທຶນຂອງລັດ ເປັນຕົ້ນແມ່ນຕ້ອງໄດ້ຜ່ານຂະບວນການປະເມີນເສຍກ່ອນ, ສະນັ້ນ ເຫັນວ່າໂຄງການດັ່ງກ່າວ ແມ່ນບໍ່ໄດ້ນໍາສະເໜີຜ່ານຂະແໜງການ ແລະ ການລົງທຶນຕາມກົດໝາຍຂອງການລົງທຶນຂອງລັດ ແລະ ກະຊວງແຜນການ ແລະ ການລົງທຶນ. ແຕ່ເຖິງຢ່າງໃດກໍຕາມ ກະຊວງແຜນການ ແລະ ການລົງທຶນ ຈະສືບຕໍ່ຊຸກຍູ້ໃຫ້ບັນດາຂະແໜງການ ແລະ ທ້ອງຖິ່ນທີ່ເປັນເຈົ້າຂອງໂຄງການ ມີຄວາມເຂັ້ມງວດໃນການປະຕິບັດກົດໝາຍການລົງທຶນຂອງລັດ ແລະ ບັນດານິຕິກໍາກ່ຽວຂ້ອງຢ່າງຮັດກຸມ, ຕິດຕາມກວດກາບັນດາໂຄງການຮ່ວມກັບສະພາທ້ອງຖິ່ນ ແລະ ອົງການກວດກາ ກ້າວໄປເຖິງການປະຕິບັດວິໄນຕໍ່ຜູ້ທີ່ຍັງລະເມີດ. ຕໍ່ກັບໂຄງການທີ່ບໍ່ໄດ້ປະເມີນຜົນ, ດັດແກ້ມູນຄ່າໂຄງການບໍ່ໄປຕາມຂັ້ນຕອນທີ່ກໍານົດໄວ້ໃນກົດໝາຍກໍໝາຍວ່າເຈົ້າຂອງໂຄງການຍັງບໍ່ປະຕິບັດຕາມບົດແນະນໍາກ່ຽວກັບການສ້າງ ແລະ ຄຸ້ມຄອງໂຄງການລົງທຶນຂອງລັດ ທີ່ກະຊວງແຜນການ ແລະ ການລົງທຶນແຈ້ງອອກແຕ່ລະປີ.

- lattana 1 - ລັດຈະສືບຕໍ່ແກ້ໄຂຜົນຂອງການກວດສອບ-ກວດກາ ໂຄງການນອກແຜນ

ສະນັ້ນ ຕໍ່ບັນຫາດັ່ງກ່າວ ກະຊວງແຜນການ ແລະ ການລົງທຶນ ຈະສືບຕໍ່ປະສານສົມທົບກັບພາກສ່ວນກ່ຽວຂ້ອງ ເພື່ອແກ້ໄຂບັນຫາດັ່ງກ່າວຮ່ວມກັບເຈົ້າຂອງໂຄງການແລ້ວໃຫ້ປະກອບເອກະສານກ່ຽວຂ້ອງໄປຕາມລະບຽບກົດໝາຍກໍານົດ ແລ້ວຈຶ່ງສະເໜີຄືນ ໃໝ່ຈົນກວ່າບັນຫາທີ່ຕິດພັນກັບໂຄງການນັ້ນໄດ້ຮັບການແກ້ໄຂ.

error: Content is protected !!