ບຸນຊ້າງ ໄຊຍະບູລີ ປີນີ້ຈະໃຫ້ຄຶກຄື້ນກວ່າ

- 225 - ບຸນຊ້າງ ໄຊຍະບູລີ ປີນີ້ຈະໃຫ້ຄຶກຄື້ນກວ່າ
- AGL banner - ບຸນຊ້າງ ໄຊຍະບູລີ ປີນີ້ຈະໃຫ້ຄຶກຄື້ນກວ່າ

ທ່ານ ຍັນຍົງ ສີປະເສີດ ຮອງເຈົ້າແຂວງໄຊຍະບູລີທັງເປັນປະທານຈັດງານມະຫະກຳບຸນຊ້າງປີນີ້ໄດ້ແຈ້ງໃຫ້ຮູ້ວ່າ: ງານມະຫະກຳບຸນຊ້າງໄຊຍະບູລີໃນປີນີ້ ຈະຈັດຂຶ້ນໃນວັນທີ 18 ກຸມພາ 2020 ຈະມາເຖິງນີ້, ໃຫ້ມີບັນຍາກາດຄຶກຄື້ນກວ່າ ເຊິ່ງຈິມີກິດຈະກຳຕ່າງໆ ຢ່າງຫລວງຫລາຍເຊັ່ນ: ການວາງສະແດງ ແລະ ຈຳໜ່າຍສິນຄ້າໜຶ່ງເມືອງໜຶ່ງຜະລິດຕະພັນ, ສິນຄ້າກະສິກຳ, ຫັດຖະກຳ, ອຸດສາຫະກຳປຸງແຕ່ງທີ່ເປັນເອກະລັກຂອງທ້ອງຖິ່ນ, ຕ່າງແຂວງ ແລະ ຈາກປະເທດໃກ້ຄຽງເຊິ່ງຈະເລີ່ມເປີດໃຫ້ບໍລິການແຕ່ວັນທີ 18 ກຸມພາ ເປັນຕົ້ນໄປ ແລະ ໃນວັນທີ 21 ກຸມພາ ຈະມີພິທີເຮັດບຸນຕັກບາດອຸທິດກຸສົນໃຫ້ຊ້າງ, ສໍາລັບພິທີເປີດງານເປັນທາງການແມ່ນ ວັນທີ 22 ກຸມພາ ໄປຮອດວັນທີ 28 ກຸມພາ  ໂດຍຈະມີຊ້າງເຂົ້າຮ່ວມທັງໝົດ 71 ໂຕ, ເຊິ່ງມີຄວາມໝາຍ ແລະ ຄວາມຜູກພັນກັບວັນສ້າງຕັ້ງກອງທັບປະຊາຊົນລາວຄົບຮອບ 71 ປີ, ພິເສດປີນີ້ຈະມີຊ້າງເຜືອກເຂົ້າຮ່ວມເຊິ່ງເປັນຊ້າງມິ່ງຂວັນທີ່ຄູ່ບ້ານຄູ່ເມືອງຂອງຊາດລາວເຮົາ, ສ່ວນກິດຈະກຳຫຼັກໃນງານ ແມ່ນຈະເນັ້ນ ກິດຈະກຳທີ່ຕິດພັນກັບຊ້າງ ແລະ ການອະນຸລັກຊ້າງ, ໂດຍສະເພາະແມ່ນການສະແດງຂອງຊ້າງຄຳຮູ້, ພິທີບາສີສູ່ຂວັນຊ້າງ, ການໃຫ້ອາຫານຊ້າງ, ຂີ່ຊ້າງຊົມເມືອງ ແລະ ກິດຈະກຳອື່ນໆອີກຫລາຍຢ່າງທີ່ຕິດພັນກັບການ. ທ່ອງທ່ຽວແຫຼ່ງທໍາມະຊາດທີ່ສວຍງາມ, ວັດທະນະທໍາຂອງປະຊາຊົນ 8 ເຜົ່າທີ່ເປັນເອກະລັກຂອງຊາວແຂວງໄຊຍະບູລີ, ສ່ວນກາງ ຄືນຈະ ມີການຄົບງັນ, ຊົມການສະແດງ ສີລະປະວັນນະຄະດີຂອງພາກສ່ວນຕ່າງໆ.

ແຂວງໄຊຍະບູລີເປັນແຂວງໜຶ່ງຕັ້ງຢູ່ພາກເໜືອຂອງ ສປປ ລາວມີເສັ້ນທາງຄົມມະນາຄົມທີ່ສະດວກໃນການເຊື່ອມຕໍ່ກັບ ແຂວງຕ່າງໆ ແລະ ສາມາດເຊື່ອມຕໍ່ກັບປະເທດໃກ້ຄຽງ ແລະ ອານຸພາກພື້ນທີ່ສໍາຄັນ, ມີປ່າສະຫງວນແຫ່ງຊາດທີ່ອຸດົມສົມບູນໄປດ້ວຍຊີວະນາໆພັນ ແລະ ເປັນແຂວງດຽວທີ່ມີປະຊາກອນຊ້າງຫຼາຍກວ່າໝູ່ ຖ້າທຽບໃສ່ແຂວງອື່ນໆຂອງ ລາວເຮົາ. ດ້ວຍເຫດນີ້ເພື່ອເປັນການອະນຸລັກຮັກສາຊ້າງບໍ່ໃຫ້ສູນພັນ ແລະ ທັງເປັນການສືບຕໍ່ປົກປັກຮັກສາວັດທະນະທໍາຮີດຄອງປະເພນີອັນດີງາມ, ວິຖີການດໍາລົງຊີວິດຂອງປະຊາຊົນລາວບັນດາເຜົ່າ ທີ່ຕິດພັນກັບຊ້າງມາແຕ່ອາດີດຕະການໃຫ້ຍືນຍົງຄົງຕົວ ແລະ ຢູ່ກັບປະຊາຊົນລາວ; ຕະຫລອດໄປດັ່ງນັ້ນຊາວແຂວງໄຊຍະບູລີ ຈຶ່ງໄດ້ພ້ອມພຽງກັນຈັດງານມະຫະກໍາບຸນຊ້າງຂຶ້ນໃນແຕ່ລະປີ, ດັ່ງນັ້ນຂໍເຊີນຊວນບັນດາແຂກ, ນັກທ່ອງທ່ຽວທັງພາຍໃນ ແລະ ຕ່າງປະເທດ ເຂົ້າມາທ່ຽວຊົມງານມະຫະກໍາບຸນຊ້າງຢູ່ແຂວງໄຊຍະບູລີ ເຮົາແລ້ວ ທ່ານຈະບໍ່ຜິດຫວັງ./.

- lattana banner - ບຸນຊ້າງ ໄຊຍະບູລີ ປີນີ້ຈະໃຫ້ຄຶກຄື້ນກວ່າ
- lattana banner 1 - ບຸນຊ້າງ ໄຊຍະບູລີ ປີນີ້ຈະໃຫ້ຄຶກຄື້ນກວ່າ
-    AD conten website - ບຸນຊ້າງ ໄຊຍະບູລີ ປີນີ້ຈະໃຫ້ຄຶກຄື້ນກວ່າ
error: Alert: ເນື້ອຫາຂ່າວມີລິຂະສິດ !!