ຫລາຍເຂດໃນແຂວງໄຊຍະບູລີ ໄດ້ຮັບຜົນກະທົບຈາກແຜ່ນດິນໄຫວ

ແຫລງຂ່າວທ້ອງຖິ່ນໃຫ້ຮູ້ວ່າ: ພາຍຫລັງໄດ້ເກີດແຜ່ນດິນໄຫວໃນເຊົ້າວັນທີ 21 ພະຈິກນີ້ ມີຄວາມແຮງ 6,4 ຣິກເຕີ, ມີຈຸດໃຈກາງຢູ່ເມືອງຫົງສາ ແຂວງໄຊຍະບູລີ, ສົ່ງຜົນໃຫ້ຫລາຍເຂດໃນແຂວງດັ່ງກ່າວຄື: ເມືອງຫົງສາ ແລະ ເມືອງໄຊສະຖານ ໄດ້ຮັບຜົນກະທົບ, ມີເຮືອນຊານ 89 ຫລັງ, ວັດ 5 ແຫ່ງ ແລະ ໂຮງຮຽນ 3 ຫລັງ, ອາຄານຫ້ອງການ, ຮ້ານຂາຍເຄື່ອງ, ຕະຫລາດ, ໂຮງໝໍ ໄດ້ຮັບຄວາມເສຍຫາຍເລັກໜ່ອຍ. ແຕ່ໂຊກດີບໍ່ມີຜູ້ເສຍຊີວິດ, ມີພຽງ 7 ຄົນໄດ້ຮັບບາດເຈັບ.

ປັດຈຸບັນ, ທາງຄະນະຮັບຜິດຊອບໄພພິບັດແລະ ອຳນາດການປົກຄອງທ້ອງຖິ່ນຂັ້ນພວມເລັ່ງເກັບກຳຂໍ້ມູນຄວາມເສຍຫາຍຈາກເຫດແຜ່ນດິນໄຫວຄັ້ງນີ້ ແລະ ຮຽກຮ້ອງໃຫ້ປະຊາຊົນຈົ່ງມີສະຕິລະວັງຕົວຕໍ່ກັບສະພາບດັ່ງກ່າວ ພ້ອມຕິດຕາມຂໍ້ມູນຂ່າວສານຈາກກົມອຸຕຸນິຍົມ ແລະ ອຸທົກກະສາດ ແຕ່ລະໄລຍະອີກດ້ວຍ ແລະ ໜ້າເປັນຫ່ວງ ເຊິ່ງປັດຈຸບັນຢູ່ປະເທດລາວເຮົາຍັງບໍ່ທັນມີສູນວັດແທກເຫດແຜ່ນດິນໄຫວທີ່ອາດຈະເກີດຂຶ້ນ ເພື່ອສາມາດແຈ້ງເຕືອນໄພໄດ້ກ່ອນ.

error: Alert: Content is protected !!