ການ​ສໍ້​ໂກງ​ຍັງ​ຕິດ​ຊຳ​ເຮື້ອ​ຢຸດຕິ​ໄດ້​ຍາກ

- advert banner 728 90 728x90 - ການ​ສໍ້​ໂກງ​ຍັງ​ຕິດ​ຊຳ​ເຮື້ອ​ຢຸດຕິ​ໄດ້​ຍາກ

​ໂດຍ: ທິດ​ກ່ຳ

- new3 - ການ​ສໍ້​ໂກງ​ຍັງ​ຕິດ​ຊຳ​ເຮື້ອ​ຢຸດຕິ​ໄດ້​ຍາກ

​        ໃນ​ໂອກາດ​ກອງ​ປະຊຸມ​ສະ​ໄໝ​ສາມັນ​ເທື່ອ​ທີ 8 ຂອງ​ສະພາ​ແຫ່ງ​ຊາດ​ຊຸດ​ທີ VIII ທີ່​ພວມມີ​ທີ່​ເດັດ​ເຜັດ​ມັນ ທ່ານ ສອນ​ໄຊ ສີ​ພັນ​ດອນ ຮອງ​ນາຍົກລັດຖະມົນຕີ, ລັດຖະມົນຕີ ກະຊວງ​ແຜນການ ​ແລະ ການ​ລົງທຶນ​ໄດ້​ຊີ້​ແຈງ​ວ່າ​ກວດ​ພົບ 300 ກວ່າ​ໂຄງການ​ທີ່ບໍ່​ຜ່ານ​ການ​ປະມູນ.

        ສ່ວນ​ທ່ານ ນາງ ວຽງ​ທອງ ສີ​ພັນ​ດອນ​ ປະທານ​ກວດ​ສອບ​ແຫ່ງ​ລັດ​ກໍ​ໄດ້​ລາຍ​ ງານ​ຕໍ່​ສະພາ​ວ່າ​ ​ໄດ້​ກວດ​ພົບ​ເຫັນ​ລາຍ​ຮັບ​ບໍ່​ມອບ​ເຂົ້າງົບປະມານ​ສົກ​ປີ 2018 ມີ​ຈຳ ນວນ​ເຖິງ 433 ກວ່າ​ຕື້ກີບ ​ແລະ ຍັງ​ມີ​ການ​ຮົ່ວ​ໂຫລ​ໃນ​ຮູບ​ແບບ​ອື່ນໆ ຢ່າງ​ມະຫາສານ ​ເປັນຕົ້ນ​ເກັບ​ພາສີ​ອາກອນ​ມາ​ໄດ້​ແລ້ວ​ບໍ່​ຖອກ​ເຂົ້າຄັງ​ງົບປະມານ​ຄົບ​ຕາມ​ຈຳນວນ ຫລື  ຖ້າ​ຫາກ​ມອບ​ເຂົ້າຄັງ​ກໍ​ແມ່ນ​ຖອກ​ໜ້ອຍ​ຕົກ​ໄປ​ເຂົ້າ​ຖົງ​ບຸກຄົນ​ຫລາຍ​ເຮ່ຍຮວາຍ​ໄປ​ຕາມ ຂອດ​ລະຫວ່າງ​ກາງ​ຜູ້​ໄດ້​ໜ້ອຍ​ໄດ້​ຫລາຍ​ທັງ​ສວຍ​ໂອກາດ​ເອົາ​ໄປ​ຈ່າຍ​ທາງ​ອື່ນ​ລາມ​ພະ ລາມ​ຈົວ​ອັນ​ເປັນ​ການ​ກະທຳ​ຜິ​ດຕໍ່​ຂໍ້​ກຳນົດ​ກົດ​ລະບຽບ​ໃນ​ການ​ຄຸ້ມ​ຄອງ​ລະບົບ​ການ​ເງິນ ຫລື ກົດໝາຍ​ບ້ານ​ເມືອງ​ວາງ​ອອກ.

        ຕໍ່​ສະພາບ​ດັ່ງກ່າວ​ທ່ານ ບຸນ​ທອງ ຈິດ​ມະນີ ຮອງ​ນາຍົກລັດຖະມົນຕີ ປະທານ​ອົງ ການ​ກວດກາ​ພັກ-ລັດຖະບານ ຍັງ​ໄດ້​ຊີ້​ແຈ້ງວ່າ: ບັນຫາ​ຜູ້​ກະທຳ​ຜິດ​ລະ​ເມີດ​ວິ​ໄນ​ການ​ເງິນ, ສໍ້​ລາດ​ບັງ​ຫລວງ​ແຕ່​ບໍ່​ໄດ້​ຮັບ​ໂທດ​ຕາມ​ຄວາມ​ເໝາະ​ສົມນັ້ນຍັງ​ມີ​ແຜ່​ຫລາຍ​ອັນ​ເນື່ອງ​ມາ​ຈາກ​ຄວາມ​ບໍ່​ເດັດຂາດ​ຕໍ່ໜ້າ​ກົດໝາຍ​ໂດຍ​ສະ​ເພາະ​ແມ່ນ​ຂັ້ນກະຊວງ, ຂັ້ນ​ແຂວງ ​ແລະ ຂັ້ນ​ເມືອງ​ຍັງ​ມີ​ລັກສະນະ​ອະນຸ​ໂລມ​ກັນ, ​ໂອມ​ກິນ​ນຳ​ກັນ​ດ້ວຍ​ວິທີ​ການ, ຮູບ​ການ​ຕ່າງໆ ອັນ​ເປັນ​ການ​ສ້າງ​ຄວາມ​ເສຍ​ຫາຍ​ໃຫ້​ແກ່​ພາກ​ລັດ​ຢ່າງ​ໃຫຍ່​ຫລວງ.

        ​ເມື່ອ​ເປັນ​ຄື​ສະພາບ​ດັ່ງ​ທີ່​ວ່າ​ມາ​ນີ້, ກໍ​ເຫັນ​ວ່າ​ບັນຫາ​ການ​ສໍ້​ລາດ​ບັງ​ຫລວງ​ຢູ່​ບ້ານ ​ເຮົາ​ຍັງ​ບໍ່​ມີ​ທ່າ​ທີ່​ວີ​ແວວ​ຢຸດ​ຕິ​ຫລຸດຜ່ອນ, ຍິ່ງ​ໄປ​ກວ່າ​ນັ້ນຍັງ​ມີ​ປາກົດການ​ຝັງ​ເລິກ​ໄປ​ທຸກ ຂ​ະ​ແໜງ​ການ​ຢ່າງ​ແຜ່​ລາມ. ​ເມື່ອ​ຕັ້ງ​ໂຈດ​ກັນ​ວ່າ​ຕໍ່​ບັນຫາ​ດ່ັງກ່າວ​ເປັນ​ຫຍັງ​ມັນ​ຈຶ່ງ​ເກີດ​ຂຶ້ນ ​ແລະ ​ແມ່ນ​ໃຜ​ເປັນ​ຜູ້ນຳ​ພາ​ເຮັດ​ພາ​ເປັນ? ​ໃນ​ຄຳ​ຕອບ​ມັນ​ກໍ​ອາດ​ເກີດ​ຈາກ​ຫລາຍ ​ເງື່ອນ​ໄຂ ​ແລະ ຫລາຍ​ປັດ​ໄຈ​ແຕ່​ຄຳ​ຕອບ​ທີ່​ຖືກຕ້ອງ​ແມ່ນ​ຢຳ​ທີ່​ສຸດ​ນັ້ນກໍ​ແມ່ນ​ກະ​ໂຕ​ເຈົ້າ ພະນັກງານ​ເອງ​ເປັນ​ຜູ້​ພາ​ເຮັດ​ພາ​ເປັນ.

        ຢູ່​ໃນ​ກະ​ໂຕ​ອົງ​ກອນ ຫລື ກະຊວງ​ໜຶ່ງໆ, ບັນດາ​ຂະ​ແໜງ​ການ​ຕ່າງໆ ຂອງ​ລັດ ຍອມ​ມີ​ອົງການ​ຈັດຕັ້ງຂອງ​ພັກ, ຂອງ​ລັດ​ຢ່າງ​ແໜ້ນໜາ, ມີ​ບັນດາ​ສະຫາຍ​ສະມາຊິກ ພັກ, ມີ​ໜ່ວຍ​ພັກ, ອົງຄະ​ນະ​ພັກ​ເປັນ​ແກນ​ນຳ ​ແລະ ​ເປັນ​ຫົວ​ທອກ​ໃນ​ການ​ບໍລິຫານ ການ​ປົກຄອງ​ຢູ່​ໃນ​ຂະ​ແໜງ​ການ​ຂອງ​ຕົນ​ຢ່າງ​ພຽບພ້ອມ, ກົງກັນຂ້າມ​ຖ້າ​ຫາກ​ບັນດາ​ສະຫາຍ  ສະມາຊິກ​ພັກ, ອົງຄະ​ນະ​ພັກ​ຢູ່​ບ່ອນ​ນັ້ນໆ ບໍ່​ເປັນ​ແບບຢ່າງ​ຊ້ຳບໍ່​ໜຳ​ຍັງ​ນຳພາ​ໝູ່​ເຮັດ​ຢ່າງ ໜ້າ​ຕາ​ເສີຍໆ ​ໂດຍ​ບໍ່​ຄິດ ​ແລະ ຄຳນຶງ​ເຖິງ​ຜົນ​ປະ​ໂຫຍ​ດລວມຂອງ​ພັກ​ຂອງ​ລັດ ​ແລະ ຂອງ​ປະຊາຊົນ​ກໍ​ເປັນ​ອັນວ່າ ຈິບ​ຫາບ​ວາຍ​ວອດ.

- lattana 1 - ການ​ສໍ້​ໂກງ​ຍັງ​ຕິດ​ຊຳ​ເຮື້ອ​ຢຸດຕິ​ໄດ້​ຍາກ

        ຜ່ານ​ການ​ຕິດຕາມ​ບັນຍາກາດ​ຂອງ​ກອງ​ປະຊຸມ​ສະ​ໄໝ​ສາມັນ​ເທື່ອ​ທີ 8 ຂອງ ສະພາ​ແຫ່ງ​ຊາດ​ຊຸດ​ທີ VIII ຄັ້ງນີ້, ​ເຮົາ​ເຫັນ​ວ່າ​ມີ​ຜູ້​ແທນ​ຫລາຍ​ທ່ານ​ຫລາຍ​ສະຫາຍ​ໄດ້  ປະກອບ​ຄຳ​ເຫັນ​ກົງ​ໄປ​ກົງ​ມາ, ຖືກຕ້ອງ​ສອດຄ່ອງ​ກັບ​ສະພາບ​ຄວາມ​ເປັນ​ຈິງ​ທີ່​ສຸດ ​ແລະ  ມີ​ຫລາຍ​ທັດສະນະ​ຕໍ່​ການ​ແກ້​ໄຂ​ບັນຫາ​ເປັນຕົ້ນນອກຈາກ​ແຜນ​ບຸກທະລຸ​ຂອງ​ລັດຖະບານ ທີ່​ມີ​ຢູ່​ແລ້ວ​ໃນ​ການ​ໃຊ້​ມາດ​ຕະການ​ຕາມ​ກົດໝາຍ​ຕໍ່​ຜູ້​ກະທຳ​ຜິດ​ຕ້ອງ​ເດັດຂາດ​ຈິງ​ຈັງ ​ແລະ ​ເຂັ້ມງວດ​ຢ່າ​ປະປ່ອຍ​ໃຫ້​ຄົນ​ບໍ່​ດີ​ສວຍ​ໂອກາດ​ລອຍ​ນວນ​ສໍ້​ໂກງ​ກິນ​ຊັບ​ສິນ​ຂອງ ​ແຜນ​ດິນ​ຢ່າງ​ເດັດຂາດ.

        ​ເຖິງ​ຢ່າງ​ໃດ​ກໍ​ດີ, ພາຍ​ໃຕ້​ການ​ນຳ​ຂອງ​ພັກ ​ແລະ ລັດຖະບານ​ໂດຍ​ສະ​ເພາະ​ລັດ ຖະບານ​ຊຸດ​ປັດຈຸບັນ​ກໍ​ຄື​ຊຸດ​ຕໍ່ໆ ​ໄປ​ຈະ​ສາມາດ​ຜ່ານ​ຜ່າ​ທຸກ​ອຸປະສັກ​ຫຍຸ້ງຍາກ​ນາໆ ປະການ​ໄດ້​ເປັນ​ຢ່າງ​ດີ, ​ໃນ​ຍຸກ​ປະຫວັດສາດ​ຜ່ານ​ມາ​ນັບ​ແຕ່​ພາລະກິດ​ປົດ​ປ່ອຍ ຊາດ​ຈົນ​ມາ​ຮອດ​ຍຸກ​ສ້າງສາ ​ແລະ ພັດທະນາ​ປະ​ເທດ​ຊາດ​ພັກ ​ແລະ ລັດຖະບານ​ເຮົາ​ໄດ້​ອອກ​ແຮງ ຊີ້ນຳ-ນຳພາ​ສ້າງສາ​ບ້ານ​ເມືອງ​ຈົນ​ມາ​ຮອດ​ທຸກ​ວັນ​ນີ້​ປະ​ເທດ​ຊາດ​ຂອງ​ພວກ​ເຮົາ​ພວມ ກ້າວ​ໄປ​ຕາມ​ຍຸກ​ຕາມ​ສະ​ໄໝ, ນັບ​ມື້ມີ​ຄວາມ​ຈະ​ເລີ​ນຮຸ່ງ​ເຮືອງ.

        ຖ້າ​ທຽບ​ໃສ່​ອະດີດຕະການ​ໃນ​ຍຸກ​ການ​ປົກຄອງ​ພາຍ​ໃຕ້​ລະບອບ​ສັກ​ດີ​ນາ ກ່ອນ​ໜ້າ​ນີ້​ຫລາຍ​ຮ້ອຍ​ປີ​ແມ່ນ​ມີ​ຄວາມ​ແຕກ​ໂຕນ​ກັນ​ຫລາຍ​ພັນ​ລີ້; ປັດຈຸບັນ​ກໍ​ຄື​ອະນາຄົດ ຂໍ​ພຽງ​ແຕ່​ວ່າ​ພວກ​ເຮົາ​ພ້ອມ​ກັນ​ຕັດສິນ​ໃຈ​ຢ່າ​ຈິງ​ຈັງ​ຈິງ​ໃຈ​ເວົ້າ​ແລ້ວ​ຕ້ອງ​ເຮັດ​ໃຫ້​ໄດ້​ຢ່າ​ພາກັນ ​ເວົ້າລ້າ​ພາ​ເພ​ເພາະ​ທຸກ​ສິ່ງ​ຢ່າງ​ມັນ​ຂຶ້ນກັບ​ຄົນ​ເປັນ​ຜູ້​ສ້າງ​ປະຫວັດສາດ./.

error: Content is protected !!