​ເປັນ​ຫຍັງ? ຟີ​ລິບ​ປິນ ຈຶ່ງ​ລາກທ້າຍ​ໝູ່​ໃນ​ອາ​ຊຽນ

- 587 1 - ​ເປັນ​ຫຍັງ? ຟີ​ລິບ​ປິນ ຈຶ່ງ​ລາກທ້າຍ​ໝູ່​ໃນ​ອາ​ຊຽນ
- Untitled design - ​ເປັນ​ຫຍັງ? ຟີ​ລິບ​ປິນ ຈຶ່ງ​ລາກທ້າຍ​ໝູ່​ໃນ​ອາ​ຊຽນ

​ໂດຍ: ວິ​ເສດ ສະ​ແຫວ​ງສຶກສາ

ຂໍບອກແຕ່ແຖວທຳອິດໂລດວ່າບົດນີ້ຜູ້ຂຽນແປມາ ຈາກໜັງສືພິມ ຟີລິບປິນ ເດລີ ອິນໄຄວເຣີ (Philippine Daily Inquirer) ເຊິ່ງໜັງ ສືພິມວຽງຈັນທາມ ຂອງພວກເຮົາເອົາ ມາເຜີຍແຜ່ຕໍ່ (ສະບັບ ວັນທີ 18/8/2018). ບໍ່ຊັ້ນ ຈະຫາວ່າຜູ້ຂຽນ “ກິນເຂົ້າໂຕ ໂສຄວາມເພິ່ນ”.

ບົດທີ່ວ່ານີ້ ຜູ້ຂຽນອ່ານຫລາຍຫລົບຫລາຍຕ່າວຕາມຄວາມສາມາດດ້ານພາສາອັງກິດຕົນເອງ ແລະ ເຫັນວ່າເປັນບົດທີ່ປາກກ້າວ່າແຂງສາມາດແທງຈຸດສົນໃຈໃນບັນຫາທີ່ວ່າ ເປັນຫຍັງ ຟີລິບປິນ ຈຶ່ງລ້າຫລັງ ຫລື ລາກທ້າຍປະເທດອື່ນໆໃນອາຊຽນ? ກ່ອນອື່ນຂໍໃຫ້ເຂົ້າ ໃຈນຳກັນວ່າຢູ່ຄອບຄົວໃຫຍ່ອາຊຽນຂອງພວກເຮົາທີ່ ສ້າງຕັ້ງຂຶ້ນໃນປີ 1976 ນັ້ນມີຢູ່ 10 ປະເທດດ້ວຍກັນໃນນັ້ນປະເທດສະມາຊິກເກົ່າ 6 ປະເທດຄື ບຼູໄນ, ອິນໂດ ເນເຊຍ, ມາເລເຊຍ, ຟີລິບປິນ, ສິງກະໂປ ແລະ ໄທສ່ວນປະ ເທດສະມາຊິກໃໝ່ນັ້ນມີກຳ ປູເຈຍ, ລາວ, ມຽນມາ ແລະ ຫວຽດນາມ ຂຽນຫຍໍ້ ເປັນຕົວອັກສອນພາສາອັງກິດວ່າ CLMV.

ຖ້າແຍກລະອຽດໄປຕື່ມກໍມີປະເທດກໍ່ຕັ້ງ 5 ປະເທດ ທີ່ຮ່ວມກັນເລີ່ມສ້າງອາຊຽນ ເຊິ່ງໄດ້ແກ່ ອິນໂດເນເຊຍ, ມາເລເຊຍ, ຟີລິບປິນ, ສິງກະ ໂປ ແລະ ໄທ. ບົດຄວາມທີ່ແປມານີ້ເນັ້ນຄວາມລ້າຫລັງຂອງຟີລິບປິນເມື່ອທຽບກັບ 5 ປະເທດກໍ່ຕັ້ງຂອງອາຊຽນ.

ຜູ້ຂຽນບົດນີ້ບອກວ່າ ປັດໄຈທີ່ເຮັດໃຫ້ ຟີລິບປີນ ລ້າ ຫລັງໝູ່ນັ້ນມີຢູ່ 3 ພະຍາດ ຄື: “ສໍ້ລາດບັງຫລວງ ສໍ້ລາດບັງຫລວງ ສໍ້ລາດບັງ ຫລວງ!” ແລະ ສາເຫດ    ຂອງ ພະຍາດຊຳເຮື້ອນີ້ກໍຄື: “ຂາດການປົກຄອງທີ່ດີ” ນັ້ນເອງ.

ສະພາບລ້າຫລັງທີ່ວ່າມານັ້ນໄດ້ສົ່ງຜົນກະທົບຢ່າງຮ້າຍແຮງຕໍ່ເສດຖະກິດ ແລະ ຄວາມ ຢູ່ດີກິນດີໂດຍລວມຂອງປະຊາຊົນຟີລິບປິນ. ບົດຄວາມເນັ້ນວ່າຖ້າລັດຖະບານຟີລິບປີນຫາກເອົາຈິງເອົາຈັງກັບການປາບປາມພະຍາດສໍ້ລາດບັງຫລວງຄືກັບໃນບັ້ນຮົບຕ້ານຢາເສບຕິດແລ້ວແນ່ນອນຊາວຟີລິບປິນ ກໍຈະເຫັນປະຈັກຕາການປ່ຽນແປງທີ່ດີຂຶ້ນ.

ເຫດຜົນທີ່ກ້າຈັດການສໍ້ລາດບັງຫລວງບໍ່ໄດ້ນັ້ນເປັນຍ້ອນວ່າລັດຖະບານກຳນົດໜ້າທີ່ບຸລິມະສິດພິດພາດ  ຫລື ຍ້ອນບໍ່ເອົາຈິງເອົາຈັງກັບການຕ້ານການສໍ້ລາດບັງຫລວງ.

ທີ່ບໍ່ເອົາຈິງເອົາຈັງກໍ ຍ້ອນວ່າພະນັກງານຂອງລັດຍັງໄດ້ຮັບຜົນປະໂຫຍດຈາກພະຍາດຮ້າຍດັ່ງກ່າວ.

- Wave100S AD to Website 2020 0 - ​ເປັນ​ຫຍັງ? ຟີ​ລິບ​ປິນ ຈຶ່ງ​ລາກທ້າຍ​ໝູ່​ໃນ​ອາ​ຊຽນ

ນອກຈາກບັນຫາສໍ້ລາດບັງຫລວງແລ້ວກໍຍັງມີປັດໄຈຖ່ວງດຶງອື່ນໆອີກເຮັດໃຫ້ ຟີລິບປິນແລ່ນບໍ່ທັນໝູ່ຄື: ຄວາມພູມໃຈໃນຄວາມເປັນຊາດ ແລະ ເອກະລັກສະເພາະຂອງຊາດໃນຄົນຟີລິບປິນນັ້ນຍັງຕ່ຳ.

ຄົນໄທມີຄວາມພູມໃຈທີ່ປະເທດຊາດບໍ່ໄດ້ຕົກເປັນຫົວເມືອງຂຶ້ນຂອງຕ່າງປະເທດຈັກເທື່ອ ຄົນຫວຽດນາມນັ້ນມີຄວາມທະນົງໃຈທີ່ສາມາດຕີເອົາຊະນະປະເທດສັດຕູ ຄູ່ອາຄາດ ທີ່ເຂັ້ມແຂງທີ່ສຸດໃນໂລກ.

ປັດໄຈທີ່ເຮັດໃຫ້ຄົນຟີລິບປິນຂາດຄວາມພູມໃຈໃນຄວາມເປັນຊາດ ແລະ ເອກະລັກ ເພາະຂອງຕົນນັ້ນອາດມາກຈາກຮ່ອງຮອຍຂອງການເປັນຫົວເມືອງຂຶ້ນຂອງສະເປນ ແລະ ສະຫະລັດອາເມລິກາໃນເມື່ອກ່ອນເຊິ່ງປົກຄອງຟີລິບປິນດ້ວຍລະບົບ “ແບ່ງແຍກເພື່ອປົກຄອງ” ພວກລ່າຫົວເມືອງຂຶ້ນສະເປນໄດ້ບັງຄັບໃຊ້ແຮງງານຜູ້ຊາຍຟີລິບປິນຜູ້ລະ 40 ວັນຕໍ່ປີ ແລະ ຍ້ອນແນວນີ້ເອງຈິ່ງເຮັດໃຫ້ຄົນຟີລິບປິນ ເຫັນການອອກແຮງງານດ້ວຍຕີນ ມືເປັນວຽກຕ່ຳຕ້ອຍ.

ຜູ້ຂຽນບົດໄດ້ຍ້ອງວ່າຄົນຫວຽດນາມນັ້ນດຸໝັ້ນ, ຢູ່ລ້າບໍ່ເປັນ, ແລ້ວວຽກໜັກ ການໜາກໍສຸມໃສ່ວຽກເຮືອນການຊານ. ສ່ວນຄົນຟີລິບປິນມີນິໄສມັກສະບາຍ, ເສບຕິດສື່ສັງຄົມອ່ອນລາຍເປັນທີ່ໜຶ່ງຂອງໂລກຄືໂດຍສະເລ່ຍຄົນຟີລິບປິນ ແຕ່ລະຄົນເສຍເວລາຢູ່ໜ້າຈໍມື້ລະ 3-5 ຊົ່ວ ໂມງ, ທຳລາຍຕົວເລກສະເລ່ຍຂອງໂລກເຊິ່ງມີພຽງ 1.77 ຊົ່ວໂມງ.

ສຸດທ້າຍບົດໄດ້ເວົ້າວ່າ ຄົນຟີລິບປິນນັ້ນມັກໃຊ້ຈ່າຍ ຟຸມເຟືອຍ, ຕ້ອງການເງິນ ທີ່ໄດ້ມາແບບງ່າຍໆ ເຊິ່ງເປັນຂະບວນພາໃຫ້ມີການສໍ້ລາດບັງຫລວງ, ສິນບົນ, ຕົວະຕົ້ມ ສໍ້ໂກ້ງ. ນິໄສດ່ງກ່າວໄດ້ ເຊື່ອມຊືມເຂົ້າລະບົບການເມືອງ ແລະ ການດຳເນີນທຸລະກິດ. ບົດໄດ້ມ້ວນທ້າຍ ວ່າບັນຫາເຫລົ່ານີ້ຄົງແກ້ ຍາກກວ່າທີ່ຄິດເອົາໄວ້./.

- WhatsApp Image 2020 05 27 at 5 - ​ເປັນ​ຫຍັງ? ຟີ​ລິບ​ປິນ ຈຶ່ງ​ລາກທ້າຍ​ໝູ່​ໃນ​ອາ​ຊຽນ
- WhatsApp Image 2020 05 27 at 5 - ​ເປັນ​ຫຍັງ? ຟີ​ລິບ​ປິນ ຈຶ່ງ​ລາກທ້າຍ​ໝູ່​ໃນ​ອາ​ຊຽນ
error: Alert: ເນື້ອຫາຂ່າວມີລິຂະສິດ !!