ທ່ານ ທອງລຸນ ສີສຸລິດ ນາຍົກລັດຖະມົນຕີ ເຂົ້າຮ່ວມກອງປະຊຸມສຸດຍອດເພື່ອສະເຫຼີມສະຫຼອງການພົວພັນອາຊຽນ – ສ. ເກົາຫລີ ຄົບຮອບ 30 ປີ ທີ່ ປູຊານ

- 352 1 - ທ່ານ ທອງລຸນ ສີສຸລິດ ນາຍົກລັດຖະມົນຕີ ເຂົ້າຮ່ວມກອງປະຊຸມສຸດຍອດເພື່ອສະເຫຼີມສະຫຼອງການພົວພັນອາຊຽນ – ສ. ເກົາຫລີ ຄົບຮອບ 30 ປີ ທີ່ ປູຊານ
- AGL banner - ທ່ານ ທອງລຸນ ສີສຸລິດ ນາຍົກລັດຖະມົນຕີ ເຂົ້າຮ່ວມກອງປະຊຸມສຸດຍອດເພື່ອສະເຫຼີມສະຫຼອງການພົວພັນອາຊຽນ – ສ. ເກົາຫລີ ຄົບຮອບ 30 ປີ ທີ່ ປູຊານ

      ໃນວັນທີ 26 ພະຈິກນີ້, ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ໄດ້ສືບຕໍ່ນຳພາ ຄະນະເຂົ້າຮ່ວມກອງປະຊຸມສຸດຍອດເພື່ອສະເຫຼີມສະຫຼອງການພົວພັນອາຊຽນ-ສ. ເກົາຫລີ ຄົບຮອບ 30 ປີ ທີ່ ປູຊານ, ສ. ເກົາຫລີ ພາຍໃຕ້ການເປັນປະທານຮ່ວມຂອງທ່ານ ມູນ ແຈ ອິນ, ປະທານາທິບໍດີ ສ. ເກົາຫລີ ແລະ ທ່ານ ພົນເອກ ປຣະຢຸດ ຈັນໂອຊາ ນາຍົກລັດຖະມົນຕີ ແຫ່ງ ຣາຊະອານາຈັກໄທ.

ກອງປະຊຸມຄັ້ງນີ້,  ຜູ້ນຳອາຊຽນ ແລະ ສ. ເກົາຫລີ ໄດ້ລົງເລິກປຶກສາຫາລືກັນ 3 ຫົວຂໍ້: ທົບທວນຄືນການຮ່ວມມື 30 ປີຜ່ານມາ ແລະ ທິດທາງໃນຕໍ່ໜ້າ; ຮັດແໜ້ນການເຊື່ອມຈອດເພື່ອຄວາມສົມບູນພູນສຸກ ແລະ ຍືນຍົງ; ແລະ ບັນຫາແຫຼມເກົາຫລີ.

ບັນດາຜູ້ນຳໄດ້ຕີລາຄາສູງຕໍ່ຜົນການຮ່ວມມືອາຊຽນ-ສ. ເກົາຫລີ ໄລຍະ 30 ປີ ຜ່ານມາ, ເຊິ່ງສະແດງອອກໃນຜົນສຳເລັດຂອງການຈັດຕັ້ງປະຕິບັດແຜນປະຕິບັດງານອາຊຽນ-ສ. ເກົາຫລີ ໄລຍະ 2016-2020 ແລະ ການເຊື່ອມສານລະຫວ່າງແຜນວິໄສທັດອາຊຽນ 2025 ແລະ ສູ່ພາຍໃຕ້ແຜນນະໂຍບາຍໃໝ່ຂອງ ສ. ເກົາຫລີ ອັນໄດ້ເຮັດໃຫ້ການຮ່ວມມືກ້າວເຂົ້າສູ່ລວງເລິກ ແລະ ກວມເອົາ 3 ເສົາຄ້ຳປະຊາຄົມອາຊຽນ (ການເມືອງ-ຄວາມໝັ້ນຄົງ, ເສດຖະກິດ ແລະ ວັດທະນະທຳ-ສັງຄົມ).

ສຳລັບທິດທາງໃນຕໍ່ໜ້າຜູ້ນຳອາຊຽນ ແລະ ສ. ເກົາຫລີ ຕົກລົງ: ເສົາຄ້ຳການເມືອງ-ຄວາມໝັ້ນຄົງ, ສ. ເກົາຫລີ ຢືນຢັນຈະສືບຕໍ່ສະໜັບສະໜູນຄວາມເປັນແກນກາງຂອງອາຊຽນ ແລະ ບັນດາກົນໄກທີ່ອາຊຽນເປັນຜູ້ນຳພາເຊັ່ນ: ອາຊຽນ+1, ອາຊຽນ+3, ເອອາເອັຟ, ອີເອເອັດສ ແລະ ອື່ນໆ. ພ້ອມນີ້, ຍັງເຫັນດີຕໍ່ການກະກຽມຮ່າງແຜນປະຕິບັດງານການຮ່ວມມືອາຊຽນ-ສ. ເກົາຫລີ ສະບັບໃໝ່ 2021-2025 ເພື່ອໃຫ້ສາມາດຮັບຮອງເອົາໃນປີ 2020.

ເສົາຄ້ຳເສດຖະກິດ, ສ. ເກົາຫລີ ຍິນດີຈະສືບຕໍ່ຊ່ວຍເຫລືອການຈັດຕັ້ງແຜນແມ່ບົດການເຊື່ອມຈອດອາຊຽນ 2025 (MPAC 2025) ໂດຍສະເພາະການກໍ່ສ້າງພື້ນຖານໂຄງລ່າງ ແລະ ລະບຽບການລວມທັງການເຊື່ອມຈອດທາງອາກາດ ແລະ ແຜນປະຕິບັດງານ ໄອເອໄອ ສະບັບທີ 3 ເລັ່ງໃສ່ຫລຸດຜ່ອນຄວາມແຕກໂຕນດ້ານການພັດທະນາພາຍໃນອາຊຽນ. ພ້ອມນີ້, ໄດ້ເຫັນດີໃນການສືບຕໍ່ຮັດແໜ້ນການຮ່ວມມືດ້ານການຄ້າ, ການລົງທຶນ ແລະ ການທ່ອງທ່ຽວ ດ້ວຍການຈັດຕັ້ງປະຕິບັດເຂດການຄ້າເສລີອາຊຽນ-ສ. ເກົາຫລີ ເພື່ອໃຫ້ສາມາດບັນລຸໄດ້ມູນຄ່າການຄ້າ 200 ຕື້ ໂດລາສະຫະລັດ ໃນປີ 2020 ແລະ ສືບຕໍ່ເຈລະຈາສັນຍາການເປັນຄູ່ຮ່ວມເສດຖະກິດຮອບດ້ານຢູ່ລະດັບພາກພື້ນ ຫລື ອາຊີອີພີ ໃຫ້ສຳເລັດ ແລະ ສາມາດລົງນາມນຳກັນໄດ້ໃນຕົ້ນປີ 2020. ນອກຈາກນີ້, ບັນດາຜູ້ນຳໄດ້ເຫັນດີຈະສືບຕໍ່ຮ່ວມມືກັນໃນບາງບັນດາຂົງເຂດບູລິມະສິດຄື: ກະກຽມທາງດ້ານບຸກຄະລາກອນ ແລະ ໂຄງລ່າງຂໍ້ມູນຂ່າວສານ ກໍຄືຈຸລະທຸລະກິດ, ທຸລະກິດຂະໜາດນ້ອຍ ແລະ ກາງ ເພື່ອຮັບມືກັບຄວາມກ້າວໜ້າທາງດ້ານເຕັກໂນໂລຊີ ແລະ ເພື່ອກ້າວໄປສູ່ເສດຖະກິດດີຈີຕອນ, ການປະຕິວັດອຸດສາຫະກຳ 4.0, ການຄ້າອີເລັກໂຕຣນິກ ແລະ ທຸລະກິດ ແລະ ນະວັດຕະກຳໃໝ່ (Startups ແລະ Innovation).

ເສົາຄ້ຳວັດທະນະທຳ-ສັງຄົມ, ບັນດາຜູ້ນຳຈະສືບຕໍ່ຮັດແໜ້ນການຮ່ວມມືດ້ານການໄປມາຫາສູ່ລະຫວ່າງປະຊາຊົນ ກັບ ປະຊາຊົນ ແນໃສສົ່ງເສີມການທ່ອງທ່ຽວ (ໃຫ້ບັນລຸໄດ້ຈຳນວນນັກທ່ອງທ່ຽວໄປຢ້ຽມຢາມເຊິ່ງກັນ ແລະ ກັນ 15 ລ້ານຄົນໃນປີ 2020), ການແລກປ່ຽນວັດທະນະທຳ, ໂຄງການແລກປ່ຽນລະຫວ່າງຊາວໜຸ່ມ ແລະ ການສະໜອງທຶນການສຶກສາໄລຍະຍາວ (ຈະເພີ່ມຂຶ້ນສອງເທົ່າໃນປີ 2022). ພ້ອມນີ້, ຈະສືບຕໍ່ຮ່ວມມືກັນເພື່ອຮັບມືກັບສະພາບການປ່ຽນແປງດິນຟ້າອາກາດ, ໄພທຳມະຊາດ, ການກໍ່ການຮ້າຍ, ອາຊະຍາກຳຂ້າມຊາດ ແລະ ຄວາມໝັ້ນຄົງທາງໄຊເບີ.

ຄຽງຄູ່ກັນນີ້, ບັນດາຜູ້ນຳໄດ້ແລກປ່ຽນຄຳຄິດຄຳເຫັນຕໍ່ບັນຫາແຫຼມເກົາຫລີ, ເຊິ່ງໄດ້ເຫັນດີຈະສືບຕໍ່ຮ່ວມມື ແລະ ແກ້ໄຂບັນຫາແຫຼມເກົາຫລີດ້ວຍສັນຕິວິທີ ແລະ ການເຈລະຈາທາງການທູດ ແນໃສ່ສ້າງຄວາມເຊື່ອໝັ້ນ ແລະ ຄວາມໝັ້ນໃຈຂອງບັນດາຝ່າຍທີ່ກ່ຽວຂ້ອງ ແລະ ຜັນຂະຫຍາຍຍັດຕິຂອງສະພາຄວາມໝັ້ນຄົງ ສປຊ. ພ້ອມນີ້, ໄດ້ສະເໜີໃຫ້ສືບຕໍ່ດຶງດູດ ສປປ ເກົາຫລີ ເຂົ້າຮ່ວມກົນໄກ ທີ່ ອາຊຽນນຳພາເປັນຕົ້ນ: ເວທີປຶກສາຫາລືພາກພື້ນອາຊຽນ (ເອອາເອັຟ).

ກອງປະຊຸມສຸດຍອດສະເຫຼີມສະຫຼອງການພົວພັນອາຊຽນ- ສ.ເກົາຫລີ ຄົບຮອບ 30 ປີ ຄັ້ງນີ້, ບັນດາຜູ້ນຳອາຊຽນໄດ້ຮັບຮອງເອົາ 2 ເອກະສານຄື: ຖະແຫຼງການຮ່ວມຜູ້ນຳອາຊຽນ- ສ. ເກົາຫລີ ສະເຫຼີມສະຫຼອງ 30 ປີ ແລະ ຖະແຫຼງການປະທານຮ່ວມ.

- lattana banner - ທ່ານ ທອງລຸນ ສີສຸລິດ ນາຍົກລັດຖະມົນຕີ ເຂົ້າຮ່ວມກອງປະຊຸມສຸດຍອດເພື່ອສະເຫຼີມສະຫຼອງການພົວພັນອາຊຽນ – ສ. ເກົາຫລີ ຄົບຮອບ 30 ປີ ທີ່ ປູຊານ
-    AD conten website - ທ່ານ ທອງລຸນ ສີສຸລິດ ນາຍົກລັດຖະມົນຕີ ເຂົ້າຮ່ວມກອງປະຊຸມສຸດຍອດເພື່ອສະເຫຼີມສະຫຼອງການພົວພັນອາຊຽນ – ສ. ເກົາຫລີ ຄົບຮອບ 30 ປີ ທີ່ ປູຊານ
- lattana banner 1 - ທ່ານ ທອງລຸນ ສີສຸລິດ ນາຍົກລັດຖະມົນຕີ ເຂົ້າຮ່ວມກອງປະຊຸມສຸດຍອດເພື່ອສະເຫຼີມສະຫຼອງການພົວພັນອາຊຽນ – ສ. ເກົາຫລີ ຄົບຮອບ 30 ປີ ທີ່ ປູຊານ
error: Alert: ເນື້ອຫາຂ່າວມີລິຂະສິດ !!